អតីតប្រមុខរដ្ឋខ្មែរក្រហម ខៀវ សំផន ដែលកំពុងទទួលការកាត់ទោសនៅសាលាក្តីដែលគាំទ្រដោយអង្គការសហប្រជាជាតិ មិនផ្តល់ចម្លើយជាលាយលក្ខណ៍អក្សរដល់អង្គភាពគាំពារការការពារក្តីតាមការបង្គាប់របស់អង្គជំនុំជម្រះសាលាដំបូងនោះទេ ប៉ុន្តែខៀវ សំផន នឹងមិនប្តូរជំហរនៅក្នុងការអនុញ្ញាតឲ្យក្រុមមេធាវីរបស់ខ្លួនបន្តធ្វើពហិការចូលរួមក្នុងសវនាការក្នុងសំណុំរឿង០០២ វគ្គទី២រហូតដល់ដំណាច់ខែធ្នូ។ នេះបើយោងតាមការបញ្ជាក់របស់មេធាវីរបស់ជនជាប់ចោទ លោកគង់ សំអុន នៅថ្ងៃអង្គារនេះ។
កាលពីរសៀលថ្ងៃច័ន្ទ ក្រោយពីមិនបានកាត់ក្តីដោយសារអវត្តមានរបស់មេធាវីនៃអតីតប្រមុខរដ្ឋសម័យខ្មែរក្រហមខៀវ សំផន លោកចៅក្រមនិល ណុន ប្រធានអង្គជំនុំជម្រះសាលាដំបូងបានបង្គាប់ឲ្យជនជាប់ចោទរូបនេះផ្តល់ចម្លើយជាលាយលក្ខណ៍អក្សរដល់អង្គភាពគាំពារការការពារក្តីដើម្បីបញ្ជាក់ជំហរថាតើជនជាប់ចោទនឹងនៅតែផ្តល់យោបល់ឲ្យមេធាវីរបស់ខ្លួនបន្តធ្វើពហិការការកាត់ក្តីសំណុំរឿង០០២វគ្គទី២បន្តទៀតឬយ៉ាងណាហើយការផ្តល់ចម្លើយនេះយ៉ាងយូរបំផុតផុតកំណត់នៅម៉ោង៤និង៣០នាទីរសៀលថ្ងៃអង្គារនេះ។
លោកចៅក្រម និល ណុន បញ្ជាក់ថា តុលាការនឹងធ្វើការសម្រេចចិត្ត ដើម្បីដោះស្រាយភាពជាប់គាំងដោយសារការធ្វើពិហិការរបស់មេធាវីជនជាប់ចោទក្រោយពីទទួលបានការបញ្ជាក់ជំហរច្បាស់លាស់របស់ជនជាប់ចោទ។
ជាមួយគ្នានោះដែរលោកចៅក្រម និល ណុន បានសម្រេចរួចជាស្រេចហើយថាក្នុងករណីដែលក្រុមមេធាវីរបស់ខៀវ សំផន នៅតែបន្តធ្វើពហិការ អង្គជំនុំជម្រះសាលាដំបូងនឹងពិចារណាលើលទ្ធភាពចំនួនបីដើម្បីដោះស្រាយភាពជាប់គាំង។ទី១គឺការតែងតាំងមេធាវីឡើងវិញនូវមេធាវីបច្ចុប្បន្នរបស់ជនជាប់ចោទឲ្យទៅជាមេធាវីរបស់តុលាការដែលនឹងនាំឲ្យមេធាវីសព្វថ្ងៃរបស់ជនជាប់ចោទនឹងត្រូវគោរពតាមការបង្គាប់ដោយផ្ទាល់របស់តុលាការក្នុងការចេញមុខការពារផលប្រយោជន៍ជនជាប់ចោទ។ លទ្ធភាពទី២គឺតុលាការអាចតែងតាំងមេធាវីថ្មីតែម្តងដោយមិនយកមេធាវីរបស់ជនជាប់ចោទសព្វថៃ្ង។ រីឯលទ្ធភាពទី៣អង្គជំនុំជម្រះសាលាដំបូងអាចនឹងតែងតាំងមេធាវីថ្មីផង និងតែងតាំងមេធាវីបច្ចុប្បន្នជាមេធាវីរបស់ជនជាប់ចោទផង។
គោលបំណងគឺដើម្បី«ធានាដល់ផលប្រយោជន៍យុត្តិធម៌និងកិច្ចឆាប់រហ័សនៃដំណើរការនីតិវិធី»ក្នុងការជំនុំជម្រះក្តី។
ទោះជាយ៉ាងណាលោកសហមេធាវីកម្ពុជាគង់ សំអុន បញ្ជាក់ថាខៀវ សំផន កូនក្តីរបស់លោកមិនបានសរសេរលិខិតទៅកាន់អង្គភាពគាំពារការការពារក្តីនោះទេនៅថ្ងៃនេះប៉ុន្តែគ្រាន់តែបានជួបដោយផ្ទាល់ជាមួយប្រធានអង្គភាពនេះហើយជនជាប់ចោទបញ្ជាក់ថាខ្លួនមិនប្តូរជំហរនៅក្នុងការផ្តល់លទ្ធភាពឲ្យមេធាវីរបស់ខ្លួនបន្តធ្វើពហិការនោះទេ។
«យើងអត់បានដាក់ពាក្យអ្វីទេ។លោកខៀវ សំផន បានហៅប្រធានអង្គភាពគាំពារការពារក្តីទៅជួបហើយពន្យល់ពីគោលជំហររបស់គាត់។គឺគាត់មិនផ្លាស់ប្តូរជំហរទេ។គាត់បង្គាប់ឲ្យក្រុមមេធាវីរបស់គាត់ធ្វើការលើបណ្តឹងសារទុក្ខរបស់គាត់ក្នុងសំណុំរឿង០០២វគ្គទី១»។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមមានប្រសាសន៍ថាលោកមិនទាន់បានទទួលដំណឹងចុងក្រោយទាក់ទងនឹងការសម្រេចចិត្តរបស់ជនជាប់ចោទខៀវ សំផននោះទេ។
ប៉ុន្តែលោកអះអាងថាប្រសិនបើខៀវ សំផន រក្សាជំហរដដែលនោះតុលាការនឹងពិចារណាជ្រើសរើសយកលទ្ធភាពមួយក្នុងចំណោមលទ្ធភាពទាំងបីដូចបានជូនដំណឹងកាលពីម្សិលមិញ។
«គឺលទ្ធភាពទីមួយនឹងអាចតែងតាំងមេធាវីរបស់គាត់ទៅជាមេធាវីរបស់តុលាការដែលការតែងតាំងនេះធ្វើឲ្យមេធាវីត្រូវតែស្តាប់បញ្ជារបស់តុលាការ។ទី២អាចមានលទ្ធភាពតែងតាំងមេធាវីថ្មីឲ្យគាត់តែម្តង។និងទី៣អាចនឹងមានការតែងតាំងបញ្ចូលគ្នារវាងមេធាវីរវាងមេធាវីបច្ចុប្បន្នរបស់គាត់និងមេធាវីថ្មី»។
តែកាលពីម្សិលមិញខៀវ សំផន បានប្រកាសមិនទទួលយកការតែងតាំងមេធាវីថ្មីនោះទេដោយសំអាងថាមេធាវីថ្មីអាចនឹងមិនយល់ពីការពារក្តីរបស់គាត់គ្រប់គ្រាន់។
អង្គជំនុំជម្រះសាលាដំបូងនៃសាលាក្តីខ្មែរក្រហមបានផ្អាកសវនាការចំនួនបីលើករួចមកហើយចាប់តាំងពីការចាប់បើកសវនាការសំណុំរឿង០០២វគ្គទី២កាលពីថ្ងៃទី១៧ខែតុលា មូលហេតុដោយសារការធ្វើពហិការរបស់ក្រុមមេធាវីការពារជនជាប់ចោទនួន ជា និងខៀវ សំផន។
ប៉ុន្តែក្រុមមេធាវីរបស់នួន ជា បានបញ្ចប់ពហិការហើយកាលពីម្សិលមិញក្រោយពីបណ្តឹងដិតចិត្តសុំដេញចៅក្រមចំនួនបួនរូបនៃអង្គជំនុំជម្រះត្រូវបានទាត់ចោល។
ដោយឡែកក្រុមមេធាវីការពារក្តីរបស់ខៀវ សំផន អះអាងថាខ្លួននឹងបន្តធ្វើពហិការរហូតដល់ខ្លួនរៀបចំសារណាបណ្តឹងសារទុក្ខចប់នៅចុងខែធ្នូ។បណ្តឹងសារទុក្ខនេះប្រឆាំងទៅនឹងសាលក្រមរបស់អង្គជំនុំជម្រះសាលាដំបូងកាលពីខែសីហាដោយដាក់ទោសជនជាប់ចោទឲ្យជាប់ពន្ធនាគារអស់មួយជីវិត៕
