ស្របពេលដែលក្រុមអ្នកគាំទ្រលោក ស្រែកច្រៀងអបអរជ័យជម្នះនេះ អ្នកប្រឆាំងនានាមានទស្សនៈផ្សេងពីនេះសម្រាប់ប្រធានាធិបតីដែលកំពុងកាន់តំណែងរូបនេះ។
ប្រធានគណៈកម្មការរៀបចំការបោះឆ្នោតនៅកេនយ៉ា លោក Wafula Chebukati បានប្រកាសពីជ័យជម្នះរបស់លោក Kenyatta ដោយនិយាយថា លោកទទួលបានសំឡេងគាំទ្រចំនួន ៩៨ ភាគរយ ក្នុងចំណោមសន្លឹកឆ្នោតដែលបានបោះទាំងអស់។
លោក Kenyatta បានមានប្រសាសន៍ថា៖ «នេះគឺគ្មានអ្វីក្រៅពីការសបញ្ជាក់សារជាថ្មីពីឆន្ទៈជាទូទៅរបស់អ្នកបោះឆ្នោតក្នុងការគាំទ្ររូបខ្ញុំឲ្យដឹកនាំប្រទេស និងគាំទ្ររដ្ឋាភិបាលដែលមានអាយុកាលរាប់ទសវត្សរ៍របស់យើងនោះទេ ដែលនេះជាជម្រើសរបស់អ្នកបោះឆ្នោត»។
អ្នកជំនាញកិច្ចការទ្វីបអាហ្វ្រិកលោក Chris Hennemeyer បញ្ជាក់ថា លោក Kenyatta ត្រូវប្រកាន់ខ្ជាប់គោលជំហរផ្សេងពីនេះ ដោយលោកបាននិយាយយ៉ាងដូច្នេះថា៖ «ឥឡូវនេះ គឺវាអាស្រ័យលើលោកKenyatta ក្នុងការសម្រេចថាតើគាត់ចង់បង្ហាញខ្លួនជាមេដឹកនាំសម្រុះសម្រួលមួយ ដែលព្យាយាមបង្រួបបង្រួមប្រទេសកេនយ៉ា ឬក៏ថាតើនេះមិនមែនជាជម្រើសរបស់លោក ឬក៏យ៉ាងណានោះ។ បន្ទាប់ពីលោកបានថ្លែងសុន្ទរកថាកាលពីពេលថ្មីៗនេះមក មើលទៅ ដូចជាលោកមិនចង់ពិភាក្សាជាមួយមេបក្សប្រឆាំងលោក Raila Odinga ដើម្បីព្យាយាមស្វែងរកចំណុចរួមគ្នា និងដឹកនាំប្រទេសឆ្ពោះទៅមុខនោះទេ»។
ទោះជាយ៉ាងណាក្ដី លោក Hennemeyer ក៏បាននិយាយថា លោក Kenyatta ដឹងថា ប្រទេសរបស់លោកជាចំណុចសំខាន់មួយនៅតំបន់អាហ្វ្រិកខាងកើត។ លោកបានមានប្រសាសន៍ថា៖ «លោក Kenyattaយល់ថា អ្វីៗទាំងអស់ត្រូវតែបន្តទៅមុខ ហេតុដូច្នេះខ្ញុំគិតថា ប្រទេសកេនយ៉ានឹងមិនក្លាយជារដ្ឋដួលរំលំ ឬរដ្ឋដែលមិនដំណើរការនោះទេ»។
មេដឹកនាំគណបក្សប្រឆាំង លោក Raila Odinga ដែលបានបោះបង់ចោលការចូលរួមក្នុងការបោះឆ្នោតសារជាថ្មីនេះ បានអំពាវនាវដល់ក្រុមអ្នកគាំទ្ររបស់លោកឲ្យធ្វើពហិការមិនចូលរួមក្នុងការបោះឆ្នោត។ លោកក៏បានចោទសួរពីលទ្ធផលនៃការបោះឆ្នោតនេះផងដែរ។
អ្នកនាង Kamissa Camara ប្រធានទទួលបន្ទុកកិច្ចការតំបន់ភាគខាងត្បូងនៃវាលខ្សាច់សាហារ៉ានៅទ្វីបអាហ្វ្រិក ប្រចាំអង្គការ PartnersGlobal បាននិយាយថា៖ «លោក Odinga និងអ្នកគាំទ្ររបស់លោកភាគច្រើន ពិតជាធ្វើពហិការមិនចូលរួមក្នុងការបោះឆ្នោត។ មានតែអ្នកចុះឈ្មោះបោះឆ្នោតចំនួនតែមួយភាគបីប៉ុណ្ណោះ ដែលបានចូលរួមនៅក្នុងការបោះឆ្នោតឡើងវិញនេះ។ ដូច្នេះ ការណ៍នេះបានបង្កឲ្យមានការចោទសួរដ៏ធំមួយទៅលើភាពស្របច្បាប់របស់លោកប្រធានាធិបតី Uhuru Kenyatta»។
នេះជាពេលវេលាដ៏លំបាកបំផុតមួយសម្រាប់ប្រទេសកេនយ៉ា។ នេះបើយោងទៅតាមការបញ្ជាក់របស់ប្រធានផ្នែកទ្វីបអាហ្វ្រិក នៃវិទ្យាស្ថាន International Republican Institute (IRI) លោក John Tomaszewski ដែលស្ថិតនៅក្នុងប្រទេសកេនយ៉ាក្នុងអំឡុងពេលបោះឆ្នោតនេះ។
លោកបាននិយាយថា៖ «យើងធ្លាប់បានឃើញវដ្ដនៃការបោះឆ្នោតដ៏តឹងតែងមួយ ហើយអ្វីដែលយើងបានឃើញនៅថ្ងៃនេះគឺជាជំហានដ៏លំបាកមួយនៅក្នុងរឿងរ៉ាវវិវត្តដែលនឹងមិនបញ្ចប់នៅថ្ងៃនេះនោះទេ។ ខណៈដែលរដ្ឋាភិបាលដែលមានអាយុកាលរាប់ទសវត្សរ៍នេះមានបំណងនឹងបន្តទៅមុខ គណបក្សមហាសម្ពន្ធភាពជាតិដែលហៅកាត់ថា NAS នៅតែប្រកាន់គោលជំហររបស់ខ្លួនដដែល ហើយខ្ញុំគិតថា យើងនឹងបន្តឃើញការពិភាក្សាពីបញ្ហានេះនៅក្នុងរយៈពេលប៉ុន្មានសប្ដាហ៍ខាងមុខទៀត»។
ប្រែសម្រួលដោយ ណឹម សុភ័ក្រ្តបញ្ញា
