ភ្ជាប់​ទៅ​គេហទំព័រ​ទាក់ទង

អគ្គមេបញ្ជាការ​យោធា​ថៃ​បញ្ជាក់​ថា​ប្រទេស​ថៃ​នឹង​វិល​ទៅ​រក​លទ្ធិ​ប្រជា​ធិបតេយ្យ​វិញ


រូបឯកសារ៖ នាយករដ្ឋមន្ត្រី​ថៃ Prayuth Chan-ocha នៅ​ពេល​លោក​មក​ដល់​អាគារ​ខុទ្ទកាល័យ​ដើម្បី​ជួយជាមួយ​មន្ត្រី​រដ្ឋាភិបាល​ប្រចាំ​សប្តាហ៍ កាល​ពី​ខែ​ឧសភា។

លោក ​Prayuth Chan-ocha ​ប្រធាន​នៃ​ក្រុម​ប្រឹក្សា​យោធា​នៃ​ប្រទេសថៃបាន​ការពារ​ការ​ក្តាប់​អំណាច​កាល​ពី​ពីរឆ្នាំ​មុន​នេះ​ដើម្បី​បញ្ចៀស​កុំ​ឱ្យ​មាន​ចលាចល​ថែម​ទៀត​ ឬ​«សង្គ្រាម​ស៊ីវិល​ថែម​ទៀតផង»។

លោក​ Prayuth ​ដែល​ជា​អគ្គ​មេ​បញ្ជាការ​នៃ​កងទ័ព​ថៃ​បាន​ដឹកនាំ​រដ្ឋប្រហារ​គ្មាន​ការ​បង្ហូរ​ឈាម​មួយ​កាល​ពី​ខែ​ឧសភា​ឆ្នាំ​២០១៤​ ហើយ​ចាប់​តាំង​ពី​ពេល​នោះ​មក​លោក​បាន​ក្លាយ​ទៅ​ជា​នាយក​រដ្ឋមន្ត្រី​នៃ​ប្រទេស​ថៃ។ ​កាល​ពី​ថ្ងៃ​សុក្រ លោក​បាន​មាន​ប្រសាសន៍​ប្រាប់​ពួក​ជន​ដែល​បាន​ចូល​រួម​ក្នុង​សន្និសីទ​កំពូល​សន្តិសុខ​ក្នុង​តំបន់​មួយថា៖ «ខ្ញុំ​អាច​ធានារ៉ាប់រង​ដល់​លោក​អ្នក​ថា​ ប្រទេស​ថៃ​នឹង​វិល​ត្រឡប់​ទៅ​កាន់​លទ្ធិ​ប្រជាធិបតេយ្យ​វិញ»។

ការ​ក្តាប់​អំណាច​ដោយ​ក្រុម​យោធា​ ដែល​បាន​បណ្តេញ​រដ្ឋាភិបាល​ស៊ីវិល​មួយ​ដែល​ខ្សោយជា​សេចក្តី​ត្រូវការ​ដើម្បី​ដាក់​ប្រទេស​ឱ្យ​ឋិត​នៅលើ​មាគារ​នៃ​ការ​កែ​ទម្រង់​និង​បញ្ចៀស​កុំឱ្យ​មាន​ការ​ខូចខាត​ថែម​ទៀត​ដល់​សេដ្ឋកិច្ច​នៃ​ព្រះរាជាណាចក្រ​ដែល​បាន​បាត់​បង់​លំនឹង។

ក្រុម​ប្រឹក្សា​យោធា​នេះ​ឋិត​នៅ​ក្នុង​អំណាច​នៅ​ពេល​ដែល​មាន​កង្វល់​តទៅ​ទៀត​អំពី​ព្រះរាជ​សុខភាព​នៃ​ព្រះមហា​ក្សត្រ​ Bhumibol ​ដែល​មាន​ការ​គោរព​ច្រើន​ពី​ប្រជារាស្ត្រ​ថៃ​ដែល​មាន​ព្រះជន្ម​៨៨​ព្រះវស្សា​ ជា​ព្រះរាជា​ដែល​សោយ​រាជ្យ​យូរ​ជាង​គេ​បំផុត​ក្នុង​ពិភពលោក។ ព្រះអង្គ​បាន​ចំណាយ​ពេល​សឹង​តែ​ទាំង​អស់​កាល​ពី​ប៉ុន្មាន​ឆ្នាំ​ថ្មីៗ​នេះ​ដើម្បី​គង់​ព្យាបាល​ព្រះរោគ​និង​សម្រាក​ព្រះកាយ​នៅ​ក្នុង​មន្ទីរពេទ្យ​មួយ​ក្នុង​ក្រុង​បាងកក។

ដោយ​ច្រាន​ចោល​ការ​រិះគន់​អន្តរជាតិ​អំពី​ការ​ក្តាប់​អំណាច​ដោយ​ក្រុម​ប្រឹក្សា​យោធា​និង​ការ​បង្ក្រាប​លើ​សេរីភាព​ស៊ីវិល លោក​ Prayuth​ បានមាន​ប្រសាសន៍​ថា យើង​គ្មាន​បំណង​រំលោភ​លើ​សិទ្ធិមនុស្ស​ទេ...​វិធានការ​ទាំង​អស់​របស់​យើង​ផ្អែក​លើ​វិធាន​នៃ​ច្បាប់។

ដោយ​ត្រួតត្រា​ដោយ​ក្រុមប្រឹក្សា​យោធា​ រដ្ឋធម្មនុញ្ញ​ថ្មី​មួយ​បាន​ត្រូវព្រាង​ហើយ​នឹង​ត្រូវ​បោះឆ្នោត​ដោយ​ប្រជារាស្ត្រ​ថៃ​នៅ​ខែ​សីហា ​ក៏​ប៉ុន្តែ​ការ​ជជែក​ដេញ​ដោល​គ្នា​អំពី​រដ្ឋធម្មនុញ្ញ​នេះ​ដែល​បានត្រូវ​រិះគន់​នៅ​ទូទាំង​វិសាលគម​នយោបាយ​ក្នុង​ប្រទេស​ថៃ​ បាន​ត្រូវបាន​រឹតត្បិត​កុំ​ឱ្យ​និយាយ។

កាល​ពី​ពេល​ថ្មីៗ​នេះ​ លោក Prayuth បាន​មាន​ប្រសាសន៍​ថា​ការ​ច្រាន​ចោល​រដ្ឋធម្មនុញ្ញ​នេះ​អាច​ពន្យា​ពេល​ការ​បោះឆ្នោត​ដើម្បី​បង្កើត​រដ្ឋាភិបាល​ថ្មី​មួយ​ ហើយ​ថា​លោក​ប្រហែល​ជា​«នឹង​កាន់​អំណាច​តទៅ​ទៀត​ ទោះ​ណាជា​លោក​អ្នក​ស្អប់​ខ្ញុំ​យ៉ាង​ណាក៏​ដោយ»។

ប្រទេសថៃ​ ដែល​ជា​សម្ព័ន្ធមិត្ត​ខាង​យោធាគួរ​ឱ្យ​ជឿទុក​ចិត្តរបស់​ស.រ.អា.​នៅ​ក្នុង​សម័យ​សង្គ្រាម​ត្រជាក់​និង​ក្នុង​សង្គ្រាម​វៀតណាម​ នៅ​ក្រោមការ​គ្រប់គ្រង​នៃ​ក្រុម​ប្រឹក្សា​យោធា​បច្ចុប្បន្ន ​មាន​ចំណង​ទាក់ទង​ខាង​សន្តិសុខ​និង​ពាណិជ្ជកម្ម​កក់ក្តៅ​ជាមួយ​ប្រទេស​ចិន​និង​ប្រទេស​រុស្ស៊ី​នៅ​ក្រោយរដ្ឋាភិបាល​ក្រុង​វ៉ាស៊ីនតោន​ រិះគន់​រដ្ឋប្រហារ​នោះ​និង​មាន​កង្វល់​អំពី​ការ​បង្ក្រាប​លើ​សិទ្ធិ​និង​ការ​មិន​ធ្វើ​ឱ្យ​មាន​លទ្ធិ​ប្រជាធិបតេយ្យ​ឱ្យ​បាន​ឆាប់​រហ័ស​ឡើង​វិញ៕

XS
SM
MD
LG