កិច្ចព្រមព្រៀងយោធាកាលពីពេលថ្មីៗនេះរវាងប្រទេសថៃ និងចិន កំពុងបណ្តាលឲ្យមានការប៉ាន់ស្មានអំពីកិច្ចសហប្រតិបត្តិការដ៏ស៊ីជម្រៅរបស់ប្រទេសទាំង២។
លោក Chang Wanquan រដ្ឋមន្រ្តីការពារប្រទេស និងប្រធានក្រុមប្រឹក្សារដ្ឋចិនហើយនឹងលោក Prawit Wongsuwan រដ្ឋមន្រ្តីការពារប្រទេសថៃ បានធ្វើការចរចានៅសប្តាហ៍នេះនៅខាងក្រៅជំនួបរដ្ឋមន្រ្តីការពារប្រទេសរបស់អាស៊ាននៅក្នុងប្រទេសឡាវ។
ពួកអ្នកវិភាគ និយាយថា ជំនួបនេះ បញ្ជាក់ថា កិច្ចព្រមព្រៀងនៅពេលថ្មីៗនេះបានត្រូវធ្វើឡើងដើម្បីពង្រឹងកិច្ចសហប្រតិបត្តិការ ក៏ប៉ុន្តែ ពួកគេ បានព្រមានថា ថៃ ទំនងមិនពឹងផ្អែកទាំងស្រុងទៅលើរដ្ឋាភិបាលទីក្រុងប៉េកាំងចំពោះតម្រូវការខាងយោធារបស់ខ្លួនទេ។
កិច្ចព្រមព្រៀង ដែលបានចចាររវាងក្រុមប្រឹក្សាសន្តិសុខជាតិថៃនិងទីភ្នាក់ងារស៊ើបការណ៍សម្ងាត់ចិន បានគ្របដណ្តប់ការពង្រឹងការទាក់ទងខាងយោធា ការសិក្សាអប់រំ បច្ចេកវិទ្យា និងការអភិវឌ្ឍហើយនិងធ្វើឲ្យប្រសើរឡើងនូវកិច្ចខំប្រឹងប្រែងរួមរបស់ក្រុមការងារជំនាញប្រឆាំងភេរវកម្ម។
លោក Panita Wattanayagorn អ្នកវិទ្យាសាស្រ្តនយោបាយនិងជាទីប្រឹក្សារបស់ឧត្តមសេនីយ៍ Prawit បាននិយាយថា ការចរចាបានសង្កត់ពីកិច្ចសហប្រតិបត្តិការដ៏ធំទូលាយរបស់ថៃជាមួយមហាអំណាចសំខាន់ៗ។
លោកPanitan បាននិយាយថា «ជំនួបនេះបានបញ្ជាក់ឡើងវិញហើយនិងកំណត់សកម្មភាពដ៏ជាក់លាក់ដោយផ្អែកលើកិច្ចព្រមព្រៀងទាំងនោះនៅពេល៣ទៅ៤ខែថ្មីៗនេះ។ ជំនួបនោះ បានប្រាប់ឲ្យដឹងថា កិច្ចសហប្រតិបត្តិការរបស់ថៃជាមួយមហាអំណាចសំខានៗ បានកែប្រែឲ្យទាន់សភាពការណ៍ហើយនិងបានធ្វើទៅកាន់សករាជថ្មីមួយ»។
លោក Panitan បាននិយាយបន្តទៀតថា «នេះជាការសំខាន់នៅពេលថៃបង្កើនការពេញចិត្តនិងសកម្មភាពកាន់តែច្រើនឡើងជាមួយប្រទេសសំខាន់ៗ រួមទាំងសហរដ្ឋអាមេរិក ជប៉ុន ឥណ្ឌា រុស្ស៊ីហើយជាការពិតជាមួយប្រទេសចិន»។
ចាប់តាំងពីឡើងកាន់អំណាចនៅឆ្នាំ២០១៤មក យោធាថៃ បានងាកទៅប្រទេសចិនជាប្រភពមួយទៀតដើម្បីបំពេញតម្រូវការខាងយោធានិងសន្តិសុខបន្ទាប់ពីសហរដ្ឋអាមេរិកដែលជាសម្ព័ន្ធមិត្តប្រពៃណីរបស់ខ្លួន បានកាត់បន្ថយកិច្ចសហប្រតិបត្តិការខាងយោធាបន្ទាប់ពីរដ្ឋប្រហារកាលពីខែឧសភា។ លោក Prawitដែលជាឧបនាយករដ្ឋមន្រ្តីដែរនោះ បានធ្វើការច្រើនលើកជាមួយជាឥស្សរជនយោធាជាន់ខ្ពស់របស់ចិនក្នុងរយៈពេល២ឆ្នាំកន្លងមកនេះ។
ទោះជាយ៉ាងណាក៏ដោយ ពួកអ្នកវិភាគនិយាយថា ថៃ ក៏បានឈោងដល់ប្រទេសរុស្ស៊ីនិងអឺរ៉ុបដើម្បីពង្រឹងចំណងទាក់ទងខាងសន្តិសុខ។ នាយករដ្ឋមន្រ្តី Prayut Chan-o-Cha បានធ្វើការចរចាកម្រិតខ្ពស់ទាំងជាមួយចិននិងរុស្ស៊ីដើម្បីពង្រឹងចំណងទាក់ទងខាងសន្តិសុខហើយនិងការទិញអាវុធ។
កងនាវាថៃ កំពុងរកទិញនាវាមុជទឹកប្រភេទ S26 T Yuan របស់ចិន ខណៈដែលកងទ័ពថៃបានទិញរថក្រោះធុន VT4 ចំនួន២៨គ្រឿងពីប្រទេសចិន ដោយមានជម្រើសទិញរថយន្តចំនួន១៥៣គ្រឿងថែមទៀត។
ក្នុងខណៈនោះដែរ យោធាថៃ កំពុងរកទិញឧទ្ធម្ភាគចក្រប្រភេទ MI-17 ចំនួន១២គ្រឿងធ្វើនៅប្រទេសរុស្ស៊ីដើម្បីជំនួសឧទ្ធម្ភាគចក្រធុន Black Hawks ធ្វើនៅសហរដ្ឋអាមេរិកដែលយោធាថៃ និយាយថា ថ្លៃណាស់៕
