ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

តើ​​កប៉ាល់​នេសាទ​ចិន​គំរាម​កំហែង​ដល់​សន្តិសុខ​កាន់​តែ​ខ្លាំង​ឬ​យ៉ាង​ណា?


រូបភាព​ផ្ដល់​ដោយ​ការិយាល័យ​ព័ត៌មាន​របស់​កង​ទ័ព​ជើង​ទឹក​អាហ្សង់ទីន បង្ហាញ​ពី​នាវា​ល្បាត​សមុទ្រ​ ARA “Bouchard” អម​​នាវា​នេសាទ​មាន​បំពាក់​ទង់​ជាតិ​ចិន បន្ទាប់​ពី​នាវា​នេសាទ​នេះ​ត្រូវ​បាន​ចាប់​បាន​នៅ​ពេល​កំពុង​នេសាទ​ដោយ​ខុស​ច្បាប់​នៅដែន​សមុទ្រ​អាហ្សង់​ទីន កាល​ពី​ខែ​ឧសភា។

ប្រទេស​ចិន​និយាយ​ថា ខ្លួន​បាន​ហាម​ប្រាម​កប៉ាល់​នេសាទរបស់​ខ្លួន​មិន​ឲ្យ​នេសាទត្រី​មឹក​នៅ​ផ្នែក​នានា​នៃ​មហា​សមុទ្រ​អាត្លង់ទិច និង​មហា​សមុទ្រ​ប៉ាស៊ីហ្វិក​រយៈ​ពេល ៣ ខែ ដើម្បី​ជួយ​ឲ្យ​មច្ឆា​ជាតិ​ទាំង​នេះ​មាន​ចំនួន​កើន​ឡើង​ច្រើន​ឡើង​វិញ​ បន្ទាប់​ពី​ក្រុម​អ្នក​ការពារ​បរិស្ថាន​បាន​ព្រមាន​ថា សកម្មភាព​នេសាទ​ខុស​ច្បាប់​របស់​ប្រទេស​នេះ ​កំពុង​បំផ្លិច​បំផ្លាញ​ដល់​តំបន់​ដែល​មាន​អេកូឡូស៊ី​ងាយ​រង​គ្រោះ ដូចជា​នៅ​កោះ Galapagos ជា​ដើម។

យោង​តាម​ក្រសួង​កសិកម្ម​និង​កិច្ចការ​ជន​បទ​របស់​ប្រទេស​ចិន ការ​ហាម​ឃាត់​ជា​បណ្ដោះ​អាសន្ន​ចំពោះ​កប៉ាល់​នេសាទចិន​នៅ​លើ​ផ្ទៃ​ទឹក​សមុទ្ររួម​ក្នុង​មហាសមុទ្រ​អត្លង់ទិច​នៅ​ភាគ​និរតី និង​នៅ​មហាសមុទ្រ​ប៉ាស៊ីហ្វិក​ខាង​កើត បាន​ចូល​ជា​ធរមាន​កាលពី​ថ្ងៃ​ទី១ កក្កដា។

សារព័ត៌មាន​រដ្ឋ​ចិន ​Global Times​ បាន​ចុះ​ផ្សាយ​ថា ការ​សម្រេច​ចិត្ត​នេះ​ជួយ​ដល់​ការ​ប្រើ​ប្រាស់​ធន​ធាន​មច្ឆជាតិ​ក្នុង​រយៈ​ពេល​វែង​ នៅ​លើ​ផ្ទៃទឹក​ដែល​បើក​ទូលាយ​សម្រាប់​ការ​ប្រើ​ប្រាស់​រួម ហើយ​វា​ក៏​បង្ហាញផង​ដែរ​នូវ​រូបភាព​មួយ​ដែល​ថា ចិន​ជា​ប្រទេស​មាន​អំណាច​ខាង​ការ​នេសាទ​ប្រកប​ដោយ​ការ​ទទួល​ខុស​ត្រូវ និង​ជា​ព្រឹត្តិការណ៍​សំខាន់​បញ្ជាក់​ពី​ការ​ចូលរួម​របស់​ចិន​ក្នុងការ​គ្រប់គ្រង​នៅ​ដែន​សមុទ្រ​អន្តរជាតិ។

ក្រុម​អ្នក​ជំនាញថ្លែង​ប្រាប់ VOA ​ថា ការ​នេសាទ​ខុស​ច្បាប់​របស់​ចិន​ដែលប្រើ​ប្រាស់​ដោយ​រដ្ឋាភិបាល​ក្រុង​ប៉េកាំងមិន​មែន​ត្រឹម​តែ​ដើម្បីទាមទារ​ដែន​សមុទ្រ​ប៉ុណ្ណោះ​ទេ ប៉ុន្តែ​ការ​នេសាទ​ហួស​ប្រមាណ​នៃ​កប៉ាល់​នេសាទ​ទាំង​នោះ​ថែម​ទាំង​ចូលរួម​បង្កើត​អសន្តិសុខ​ស្បៀង និង​បង្កបញ្ហា​ដល់​អេកូឡូស៊ី​ផ្សេង​ទៀត​ផង។

រូបថត​ដែល​ថត​ពី​លើ​អាកាស​កាល​ពី​ខែ​មេសា ២០១៩ បង្ហាញ​ពី​ទូក​នេសាទ​ត្រឡប់​ចូល​មក​កំពង់​ផែ​វិញ នៅ​ពេល​ដែល​អ្នក​នេសាទ​ត្រៀមផ្អាក​បណ្ដោះ​អាសន្ន​ការ​នេសាទ​នៅ​រដ្ឋ​ក្ដៅ នៅ​ទីក្រុង Lianyungang ខេត្ត​ជាំងស៊ូ ប្រទេស​ចិន។
រូបថត​ដែល​ថត​ពី​លើ​អាកាស​កាល​ពី​ខែ​មេសា ២០១៩ បង្ហាញ​ពី​ទូក​នេសាទ​ត្រឡប់​ចូល​មក​កំពង់​ផែ​វិញ នៅ​ពេល​ដែល​អ្នក​នេសាទ​ត្រៀមផ្អាក​បណ្ដោះ​អាសន្ន​ការ​នេសាទ​នៅ​រដ្ឋ​ក្ដៅ នៅ​ទីក្រុង Lianyungang ខេត្ត​ជាំងស៊ូ ប្រទេស​ចិន។

កប៉ាល់​នេសាទនៅ​ក្នុង​ផ្ទៃ​ទឹក​សមុទ្រ​ប្រទេស​ដទៃ​ច្រើន​បំផុត

កប៉ាល់​នេសាទ​ចិន​ដែល​នេសាទ​ក្នុង​ដែន​សមុទ្រ​ប្រទេស​ដទៃ​បាន​បង្ក​ភាព​ចម្រូង​ចម្រាស​ជា​យូរ​មក​ហើយ​នៅ​ក្នុង​ផ្ទៃ​ទឹក​នៅ​អាស៊ី។ ខណៈ​ដែល​ចំនួន​កប៉ាល់​នេសាទ​បែប​នេះ​កើន​ឡើងកាន់​តែ​ច្រើន ការ​តវ៉ា​ការ​កើន​ឡើង​ផងដែរ។ នា​ពេល​ថ្មីៗ​នេះ​ បណ្ដាកប៉ាល់​នេសាទ​ធុន​ធំ​របស់​ចិន​ចំនួន ៣៤០ គ្រឿង​បាន​ធ្វើ​ដំណើរ​ចូល​ទៅ​ក្នុង​ផ្ទៃ​ទឹក​នៅ​ជិត​ប្រទេស​អេក្វាទ័រ ដែល​បង្ក​ឲ្យ​មាន​ការ​តវ៉ា​ប្រឆាំង​ទៅ​នឹង​ការ​គំរាម​កំហែង​ដែល​អាច​មាន​ទៅ​លើ​កោះ Galapagos ដែល​ជា​បេតិកភណ្ឌ​ពិភពលោក​របស់​អង្គការ​យូណេស្កូ ​និង​ជា​ជម្រកពូជ​សត្វ​ប្លែកៗ​គ្នា​ជា​ច្រើន​ប្រភេទ។

ជម្លោះ​បែប​នេះ​កំពុង​កើត​មាន​ឡើង​ពាក់​ព័ន្ធ​នឹង​កប៉ាល់​នេសាទ​ចិន​នៅ​ក្នុង​ផ្ទៃ​ទឹក​នៃ​ទ្វីប​អាហ្វ្រិក និង​ឧបទ្វីប​កូរ៉េ​ផង​ដែរ។

អ្នក​ស្រី Miren Gutierrez អ្នក​សិក្សា​ស្រាវជ្រាវ​នៅ​វិទ្យាស្ថាន​អភិវឌ្ឍន៍​បរទេស ODI មាន​មូលដ្ឋាន​នៅ​ទីក្រុង​ឡុងដ៍​បាន​ថ្លែង​ប្រាប់​ VOA ថា ​បច្ចុប្បន្ន​នេះ ប្រទេស​ចិន​មាន​ចំនួន​កប៉ាល់​នេសាទ​ដែល​នៅ​ក្រៅ​ដែន​ដី​របស់​ខ្លួន​ច្រើនជាង​គេ​នៅ​លើ​ពិភពលោក ហើយ​និន្នាការ​នេះ​កំពុង​តែ​បន្ត​ទៅ​មុខ។

អ្នកស្រី​មាន​ប្រសាសន៍​ថា៖«បន្ទាប់​ពីអស់ត្រី​នៅ​ក្នុង​ផ្ទៃ​ទឹក​ក្នុង​ស្រុក​របស់​ខ្លួន​ ហើយ​ទទួល​បាន​ការ​លើក​ទឹក​ចិត្ត​ដោយ​ការ​ឧបត្ថម្ភធន​ធាន កប៉ាល់​នេសាទរបស់​ចិន​នៅ​ក្នុង​ដែន​ទឹក​ប្រទេស​ដទៃ​កំពុង​ធ្វើ​ដំណើរ​កាន់​តែ​ឆ្ងាយទៅ​ ហើយ​ក្រុមហ៊ុននានា​របស់​ចិន​កំពុង​តែ​សាង​សង់​កប៉ាល់​ប​ន្ថែម​ទៀត​កាន់​តែ​ច្រើន ដើម្បី​ឆ្លើយ​តប​ទៅ​នឹង​តម្រូវ​ការ​អាហារ​សមុទ្រ​កាន់​តែ​កើន​ឡើង»។

ការ​ស្រាវជ្រាវ​មួយ​របស់​វិទ្យាស្ថាន​អភិវឌ្ឍន៍​នាយ​សមុទ្រ​បាន​កត់​ត្រា​ទុក​ជា​ឯកសារ​នូវ​កប៉ាល់​នេសាទ​ចិន​ចំនួន ១​ម៉ឺន ៧​ពាន់​គ្រឿង ​ជា​ចំនួន​មួយ​ដែល​ស្ទើរ​តែ​មិន​អាច​ឃ្លាំ​មើល​បាន​ នៅ​ទូទាំង​ពិភពលោក។

នាវា​កង​ទ័ព​ជើង​ទឹក​ប្រទេស​អេក្វាទ័រ​ឡោម​ព័ទ្ធ​ទូក​នេសាទ​មួយ​គ្រឿង​បន្ទាប់​ពី​បាន​ឃើញ​ក្រុម​ទូក​នេសាទ​ដែល​ភាគ​ច្រើន​មាន​បំពាក់​ទង់​ជាតិ​ចិន​នៅ​ច្រក​អន្តរជាតិ ដែល​ជាប់​ព្រំប្រទល់​តតំបន់​សេដ្ឋកិច្ច​ផ្ដាច់​មុខ​នៃ​កោះ Galapagos នៅ​មហា​សមុទ្រ​ប៉ាស៊ីហ្វិក កាល​ពី​ថ្ងៃ​ទី​៧ សីហា ២០២០។
នាវា​កង​ទ័ព​ជើង​ទឹក​ប្រទេស​អេក្វាទ័រ​ឡោម​ព័ទ្ធ​ទូក​នេសាទ​មួយ​គ្រឿង​បន្ទាប់​ពី​បាន​ឃើញ​ក្រុម​ទូក​នេសាទ​ដែល​ភាគ​ច្រើន​មាន​បំពាក់​ទង់​ជាតិ​ចិន​នៅ​ច្រក​អន្តរជាតិ ដែល​ជាប់​ព្រំប្រទល់​តតំបន់​សេដ្ឋកិច្ច​ផ្ដាច់​មុខ​នៃ​កោះ Galapagos នៅ​មហា​សមុទ្រ​ប៉ាស៊ីហ្វិក កាល​ពី​ថ្ងៃ​ទី​៧ សីហា ២០២០។

ក្ដី​បារម្ភ​អំពី​បញ្ហា​សន្តិសុខ​និង​បរិស្ថាន

ក្រុម​អ្នក​វិភាគ​និយាយ​ថា កប៉ាល់​របស់​ចិន​ជា​ច្រើន​ធ្វើ​សកម្មភាព​នេសាទ​ដែល «ខុស​ច្បាប់ មិន​រាយការណ៍ និង​គ្មានច្បាប់​ទម្លាប់» ដែល​គំរាម​កំហែង​ដល់​អធិបតេយ្យភាព​នៃ​ប្រទេស​ដទៃ​ទៀត និង​បង្ក​គ្រោះ​ថ្នាក់​ដល់​សង្វាក់​សន្តិសុខ​ស្បៀង​សាកលោក។

យោង​តាម​សន្ទស្សន៍​នៃ​ការ​នេសាទ​ខុស​ច្បាប់ មិន​រាយការណ៍ និង​គ្មាន​ច្បាប់​ទម្លាប់ ឆ្នាំ ២០១៩ (2019 IUU) ដែល​បង្កើត​ឡើង​ដោយ​អង្គការផ្ដួច​ផ្ដើម​សាកល​ប្រឆាំង​នឹង​ឧក្រិដ្ឋកម្ម​ឆ្លង​ដែន មាន​មូលដ្ឋាន​នៅ​ទី​ក្រុង​ហ្សឺណែវ បញ្ជាក់​ថា ប្រទេស​ចិន​គឺ​ជា​ប្រទេស​មួយ​ក្នុង​ចំណោម​ប្រទេស ១៥២ ដែល​បាន​អនុវត្ត​សកម្មភាព​នេសាទ​ខុស​ច្បាប់។

ចិន​កំពុង​ប្រើ​ប្រាស់​ការ​នេសាទ​ដើម្បី​ធ្វើ​ជា​ឧបករណ៍​មួយ​ដែល​ជួយ​ដល់​ការ​ទាមទារ​ដែនទឹក ​នៅ​ក្នុង​ដែន​ទឹក​ក្នុង​តំបន់​អាស៊ី​ខាង​កើត។ ប្រទេស​នានា​មាន​ដូចជា​ ជប៉ុន វៀតណាម ហ្វីលីពីន និង​ម៉ាឡេស៊ី មាន​ប្រតិកម្ម​យ៉ាង​ខ្លាំង​ទៅ​លើ​សកម្មភាព​នេសាទ​ខុស​ច្បាប់​របស់​ចិន ​នៅ​ក្នុង​ដែន​ទឹក​ដែល​មាន​ជម្លោះ។

កាល​ពីខែ​មីនា កប៉ាល់​ចម្បាំង​របស់​កង​កម្លាំង​ការពារ​ខ្លួន​ជើង​ទឹក​របស់​ជប៉ុន​បាន​ប៉ះ​ទង្គិច​ជាមួយ​កប៉ាល់​នេសាទ​ចិន​មួយ​គ្រឿង នៅ​សមុទ្រ​ចិន​ខាង​កើត។ នៅ​មុន​ព្រឹត្តិការណ៍​នោះ​មួយ​សប្ដាហ៍ កប៉ាល់​ល្បាត​របស់​តៃវ៉ាន់​២​គ្រឿង ក៏មាន​ជម្លោះ​ជាមួយ​កប៉ាល់​នេសាទចិន​មួយ​គ្រឿង​ នៅ​ពេល​កប៉ាល់​តៃវ៉ាន​ទាំង​២​នោះ​ព្យាយាម​បញ្ឈប់​កប៉ាល់​នេសាទ​ចិន​មិន​ឲ្យ​នេសាទខុស​ច្បាប់​នៅ​ជិត​ច្រក​សមុទ្រ​នៃ​កោះ​តៃវ៉ាន់។

កាល​ពី​ឆ្នាំ ២០១៩ កង​ឆ្មាំ​ការពារ​ដែន​សមុទ្រ​របស់​ប្រទេស​អាហ្សង់ទីន បាន​បើក​ការ​បាញ់​ប្រហារ​ទៅ​លើ​កប៉ាល់​នេសាទ​ចិន ដែល​បាន​ធ្វើ​សកម្មភាព​នេសាទ​ខុស​ច្បាប់​នៅ​ក្នុង​តំបន់​សេដ្ឋកិច្ច​ផ្ដាច់​មុខ​ (EEZ) របស់​អាហ្សង់ទីន។

ក្រៅ​ពី​ការ​ព្រួយ​បារម្ភ​រឿង​សន្តិសុខ ​ការ​នេសាទ​ខុស​ច្បាប់ មិន​រាយការណ៍ និង​គ្មាន​ច្បាប់​ទម្លាប់ ​បាន​ធ្វើ​ឲ្យ​ស្ថានភាព​វិបត្តិ​ស្បៀង​សាកល​លោក​មាន​សភាព​កាន់​តែ​ធ្ងន់​ធ្ងរ​ជាង​មុន។ មនុស្ស​ប្រមាណ​៣,២​ពាន់​លាន​នាក់​ពឹង​អាស្រ័យ​លើ​អាហារ​សមុទ្រ​ដែល​ជា​ប្រភព​ចម្បង​នៃ​ប្រូតេអ៊ីន​របស់​ពួក​គេ។ អង្គការ​ស្បៀង​អាហារ​និង​កសិកម្ម​សហប្រជាជាតិ​បាន​និយាយ​កាល​ពី​ខែ​មិថុនា​ថា ​ផល​ត្រី​ប្រមាណ​១ភាគ​៣ នៃ​មច្ឆាជាតិ​ត្រូវ​បាន​គេ​នេសាទ​«ក្នុង​កម្រិត​មួយ​ដែល​គ្មាន​ចីរភាព»។

បើ​និយាយ​ពី​តម្រូវ​ការ​អាហារ​សមុទ្រ ប្រទេស​ចិន​ជាប់​លំដាប់​ថ្នាក់​កំពូល។ ការ​ទទួល​ទាន​ត្រី​នៅ​ក្នុង​ប្រទេស​នេះ​មាន​ក្នុង​កម្រិត​ ១ ភាគ ៣ នៃ​បរិមាណការ​បរិភោគ​មច្ឆាជាតិ​សរុប​នៅ​លើ​ពិភពលោក ហើយ​ការ​បរិភោគ​ត្រី​មាន​អត្រា​កំណើន​៦ ភាគ​រយ​ក្នុង​មួយ​ឆ្នាំ។

ការ​ខាត​បង់​ផ្នែក​សេដ្ឋកិច្ច

ទន្ទឹង​ជាមួយ​គ្នា​នេះ សកម្មភាព​នេសាទ​ខុស​ច្បាប់​បាន​បង្ក​ឲ្យ​មាន​ការ​ខាត​បង់​ដល់​សេដ្ឋកិច្ច​យ៉ាង​ធ្ងន់​ធ្ងរ សម្រាប់​ប្រទេស​ដែល​ពាក់​ព័ន្ធ​នឹង​ជម្លោះ​នេះ។ ទិន្នន័យ​ថ្មីៗ​ពី​ប្រទេស​សេណេហ្គាល់​បង្ហាញ​ថា ការ​នេសាទ​ខុស​ច្បាប់​ធ្វើ​ឲ្យ​មាន​ការ​ខាត​បង់​សេដ្ឋកិច្ច​ក្នុង​ស្រុក​ប្រចាំ​ឆ្នាំ​ចំនួន​ ២៧០ លាន​ដុល្លារ។ ឯកសារ​ការពារជាតិ​ទី១​របស់​ប្រទេស​ម៉ាឡេស៊ី (Malaysia’s first National Defense White Paper) ដែល​ចេញ​ផ្សាយ​នៅ​ឆ្នាំ​នេះ បាន​លើកឡើង​ថា ការ​នេសាទ​ខុស​ច្បាប់​បណ្ដាល​ឲ្យ​មាន​ការ​ខាត​បង់​សេដ្ឋកិច្ច​ប្រចាំ​ឆ្នាំ​១.៥ ពាន់​លាន​ដុល្លារ។

នាវា​ដឹក​ទំនិញ​មួយ​គ្រឿង​មាន​ដឹក​កុង​តឺន័រ​នៅ​ជិត​កំពង់​ផែ Yantian ក្រុង Shenzhen ខេត្តGuangdong ​ប្រទេស​ចិន កាល​ពី​ខែ​ឧសភា ២០២០។
នាវា​ដឹក​ទំនិញ​មួយ​គ្រឿង​មាន​ដឹក​កុង​តឺន័រ​នៅ​ជិត​កំពង់​ផែ Yantian ក្រុង Shenzhen ខេត្តGuangdong ​ប្រទេស​ចិន កាល​ពី​ខែ​ឧសភា ២០២០។

អ្នកស្រី Tabitha Mallory សាស្ត្រាចារ្យ​ឯកទេស​ខាង​គោលនយោបាយ​ការបរទេស​និង​បរិស្ថាន​ចិន នៅ​សាកល​វិទ្យាល័យ​វ៉ាស៊ីនតោន ​បាន​ថ្លែង​ប្រាប់​ VOA ថា វា​ជារឿង​ពិបាក​មួយ​សម្រាប់​ប្រទេស​កំពុង​អភិវឌ្ឍន៍​ក្នុង​ការ​ធ្វើ​ការ​ឃ្លាំ​មើលផ្ទៃ​ទឹក​នៅ​ឆ្នេរ​សមុទ្រ​របស់​ពួក​គេ​ឲ្យ​បាន​ដិត​ដល់។

អ្នក​ស្រី​មាន​ប្រសាស៍​ថា៖«ប្រទេស​ចិន​នេសាទ​នៅ​ក្នុង​ប្រទេស​ជា​ច្រើន​ដែល​មិន​មាន​លទ្ធភាព​ឃ្លាំ​មើល​ផ្ទៃទឹក​នៅ​ឆ្នេរ​សមុទ្រ​របស់​ខ្លួន​បាន​ល្អ ដូច​ជា​ប្រទេស​កូរ៉េ​ខាង​ជើង។ កប៉ាល់​ឆ្មាំ​សមុទ្រ និង​ឥន្ធនៈ​សម្រាប់​កប៉ាល់​ល្បាត​ទាំង​នោះ​មាន​តម្លៃ​ខ្ពស់​សម្រាប់​ប្រទេស​កំពុង​អភិវឌ្ឍន៍​នានា»។

សហគមន៍​អន្តរជាតិ​បាន​ដាក់​សម្ពាធ​ទៅ​លើ​ប្រទេស​ចិន​ឲ្យ​ធ្វើ​ឲ្យ​ប្រសើរ​ឡើង​នៃ​របៀប​នេសាទ​កម្រិត​ឧស្សាហកម្ម​របស់​ខ្លួន។ បន្ទាប់​ពី​រដ្ឋ​មន្ត្រី​ការបរទេស​សហរដ្ឋ​អាមេរិក លោក Mike Pompeo បាន​ហៅ​សកម្មភាពកប៉ាល់​នេសាទ​ចិន​នៅ​កោះ Galapagos ថា​ជា​ការ​រំលោភអធិបតេយ្យភាព​ប្រទេស​អេក្វាទ័រ​រួច​មក​ ប្រទេស​ចិន​បាន​ប្រកាស​ថា​ ខ្លួន​បាន​ផ្អាក​ការ​នេសាទ​នៅ​តំបន់​នោះ​ហើយ។

អ្នក​ស្រី Mallory ក៏​បាន​ចង្អុល​បង្ហាញ​កាយ​វិការ​វិជ្ជមាន​ដទៃ​ទៀត រួម​មាន​ការ​សម្រេច​ចិត្ត​របស់​ចិន​ក្នុង​ការ​ដាក់​បញ្ចូល​ភាសា​ស្ដីពី​ការ​នេសាទ​ខុសច្បាប់ ​មិន​រាយការណ៍ និង​គ្មានច្បាប់​ទម្លាប់​ ទៅ​ក្នុង​សេចក្ដី​ព្រាង​ច្បាប់​នេសាទ​ដែល​ត្រូវ​បានកែ​ស​ម្រួល​កាល​ពេលថ្មីៗ​នេះ និង​ការ​ធ្វើ​បច្ចុប្បន្ន​ភាព​ការ​នេសាទ​នៅ​ដែន​ទឹក​ប្រទេស​ដទៃ។ ចិន​ក៏បាន​បង្កើត​ការ​ដាក់​ពិន័យ​សម្រាប់​អ្នក​ដែល​ជាប់​ពាក់​ព័ន្ធ​ទៅ​នឹង​ការ​នេសាទ​សុខ​ច្បាប់ មិន​រាយការណ៍ និង​គ្មាន​ច្បាប់​ទម្លាប់​ រួម​មាន​ការ​ដាក់​ក្នុង​បញ្ជី​ខ្មៅ​ ការផាក​ពិន័យ និង​ការ​ដក​ចេញ​ពី​ការ​ឧបត្ថម្ភ​ធន​ធាន​ផងដែរ។

ទោះ​ជា​យ៉ាង​ណា​ក្ដី​ អ្នក​ស្រី​ថ្លែង​ថា រឿង​ដែល​សំខាន់​បំផុត​សម្រាប់​រដ្ឋាភិបាល​ចិន គឺ​ត្រូវ​បញ្ឈប់​ការ​ឧបត្ថម្ភ​ធន​ធាន​ទ្រង់​ទ្រាយ​ធំ​ដល់​ឧស្សាហកម្ម​នេសាទ​នៅ​ក្នុង​ដែន​ទឹក​ប្រទេស​ដទៃ។ យោង​តាម​សន្ទស្សន៍​នៃ​ការ​នេសាទ​ខុស​ច្បាប់ មិន​រាយការណ៍ និង​គ្មាន​ច្បាប់​ទម្លាប់ ឆ្នាំ ២០១៩ (2019 IUU) ដែល​បង្កើត​ឡើង​ដោយ​គំនិត​ផ្ដួច​ផ្ដើម​ប្រឆាំង​នឹង​ឧក្រិដ្ឋកម្ម​ឆ្លង​ដែន មាន​មូលដ្ឋាន​នៅ​ទី​ក្រុង​ហ្សឺណែវ បញ្ជាក់​ថា ប្រទេស​ចិន​គឺ​ជា​ប្រទេស​ឈរ​នៅ​លំដាប់​ចុង​ក្រោយ​គេ ក្នុង​ចំណោម​ប្រទេស​ចំនួន​ ១៥២។

អ្នក​ស្រី​បន្ត​ថា៖ «បច្ចុប្បន្ន​នេះ ប្រទេស​ចិន​ព្យាយាម​រក្សា​ទុក​ការ​ឧបត្ថម្ភ​ធន​ទាំង​នេះ​ក្នុង​នាម​ជា​ប្រទេស​កំពុង​អភិវឌ្ឍន៍ ក៏​ប៉ុន្តែ​វា​ពិបាក​ប្រកែក​ថា ​ចិន​មាន​ឋានៈ​ជា​ប្រទេស​កំពុង​អភិវឌ្ឍន៍ នៅ​ពេល​ដែលប្រទេស​នេះ​មាន​កប៉ាល់​នេសាទ​នៅ​ក្នុង​ដែន​ទឹក​នៃ​ប្រទេស​ដទៃច្រើន​ជាង​គេ​នៅ​លើ​ពិភព​លោក»។

ស្រប​ពេល​ជាមួយ​គ្នា​នេះ ក្រុម​អ្នក​បិរស្ថាន​អំពាវ​នាវ​ឲ្យ​ចិន​មាន​តម្លា​ភាព​បន្ថែម​ទៀត​ក្នុង​ការ​ចែក​រំលែក​ទិន្នន័យ​ពាក់​ព័ន្ធ​ទៅ​នឹង​កប៉ាល់​នេសាទ​នៅ​ដែនទឹក​ប្រទេស​ដទៃ។

អ្នក​ស្រី​ Daisy Brickhill អ្នក​នាំ​ពាក្យ​មូល​និធិ​យុត្តិធម៌​បរិស្ថាន បាន​ថ្លែង​ប្រាប់​ VOA ថា សកម្មភាព​ខ្លះ​នៃ​សកម្មភាព​ទាំង​អស់​នោះ​អាច​រួម​បញ្ចូល​នូវ​ការ​ចេញ​ផ្សាយ​តាម​អ៊ីនធឺណេត​ នូវ​តារាង​ស្ដី​ពី​ការ​អនុញ្ញាត​ឲ្យ​មាន​ការ​នេសាទ​នៅ​ក្នុង​ដែន​ទឹក​ប្រទេស​ដទៃ និង​បញ្ជី​កប៉ាល់​នេសាទ​ដែល​ទទួល​បាន​អាជ្ញាប័ណ្ណ​និងមាន​ទង់​ជាតិ​ចិន​ រួម​ទាំង​ព័ត៌មាន​លម្អិត​ស្ដី​អំពី​ករណី​នេសាទ​ខុស​ច្បាប់​ទាំង​អស់ និង​ការ​ដាក់​ទណ្ឌកម្ម​នានា៕

អត្ថបទ​ទាក់ទង

XS
SM
MD
LG