លោកប្រធានាធិបតីអ៊ីរ៉ង់ Hassan Rouhani បាននិយាយថា ប្រទេសលោកប្រុងប្រៀបនឹង «ធ្វើអ្វីទាំងអស់ដែលខ្លួនអាចធ្វើបាន» ដើម្បីស្តារទំនាក់ទំនងជាមួយប្រទេសអារ៉ាប៊ីសាអូឌីតឡើងវិញដើម្បីចាប់ផ្តើមការជឿនលឿន និងភាពសម្បូររុងរឿងនៅក្នុងពិភពអ្នកកាន់សាសនាឥស្លាម។
លោក Rouhani ដែលបានបញ្ចប់ទស្សនកិច្ចពីរថ្ងៃរបស់លោកក្នុងប្រទេសប៉ាគីស្ថានកាលពីថ្ងៃសៅរ៍បានថ្លែងថាលោកមានជំនឿលើការដោះស្រាយការខ្វែងគំនិតគ្នាតាមរយៈកិច្ចចរចាគ្នា ទោះណាជាកិច្ចចរចាដោយផ្ទាល់រវាងប្រទេសជាតិទាំងពីរនេះមិនទំនងជានឹងមានទេក្នុងពេលខ្លីខាងមុខនេះ។
ប្រទេសអារ៉ាប៊ីសាអូឌីតបានកាត់ផ្តាច់ចំណងទាក់ទងគ្នាជាមួយប្រទេសអ៊ីរ៉ង់កាលពីខែមករានៅពេលដែលហ្វូងមនុស្សបានចូលលុកក្នុងស្ថានទូតរាជាណាចក្រនេះក្នុងក្រុងតេហេរ៉ង់ដើម្បីតវ៉ាប្រឆាំងនឹងការប្រហារជីវិតមេដឹកនាំសាសនាឥស្លាមនិកាយ Shia ម្នាក់ដោយអាជ្ញាធរប្រទេសអារ៉ាប៊ីសាអូឌីត។
ថ្លែងទៅកាន់អ្នកកាសែតនៅក្នុងក្រុង Istanbul លោក Rouhani បានមានប្រសាសន៍ថាប្រទេសអ៊ីរ៉ង់ «មិនយកចិត្តទុកដាក់លើភាពតានតឹងជាមួយប្រទេសអារ៉ាប៊ីសាអូឌីតទេ»។
លោក Rouhani បានមានប្រសាសន៍តាមរយៈអ្នកបកប្រែភាសាម្នាក់ថា «ប្រទេសអ៊ីរ៉ង់ជាប្រទេសធំមួយក្នុងតំបន់ និងក្នុងពិភពអ្នកគោរពសាសនាឥស្លាម។ ប្រទេសអារ៉ាប៊ីសាអូឌីតមានមុខនាទីមានឥទ្ធិពលមួយនៅក្នុងពិភពអ្នកកាន់សាសនាឥស្លាម។ ដូច្នេះ ប្រសិនបើមានបញ្ហារវាងប្រទេសទាំងពីរនេះ បញ្ហានេះត្រូវតែដោះស្រាយ»។
លោក Rouhani បានកត់សម្គាល់ថា កិច្ចព្រមព្រៀងបរមាណូរបស់ប្រទេសអ៊ីរ៉ង់ ជាមួយសហគមន៍អន្តរជាតិកាលពីឆ្នាំទៅមិញជាឧទាហរណ៍ល្អមួយអំពីថាតើបញ្ហាដែលហាក់ដូចជាមិនអាចដោះស្រាយកើត អាចត្រូវដោះស្រាយបានតាមរយៈកិច្ចចរចាគ្នា។
ចាប់តាំងពីលោកបានទៅដល់ប្រទេសប៉ាគីស្ថានកាលពីថ្ងៃសុក្រដើម្បីបំពេញទស្សនកិច្ចលើកទីមួយរបស់លោកក្នុងឋានៈជាប្រធានាធិបតីនៃប្រទេសអ៊ីរ៉ង់ មេដឹកនាំរូបនេះបានធ្វើឱ្យសម្រេចកិច្ចព្រមព្រៀងជាមួយមន្ត្រីស៊ីវិល និងមន្ត្រីយោធាប៉ាគីស្ថានអំពីការពង្រីកទំនាក់ទំនងពាណិជ្ជកម្ម និងការទាក់ទងខាងសេដ្ឋកិច្ច កិច្ចសហប្រតិបត្តិការអំពីបញ្ហាថាមពល និងការកែលម្អសន្តិសុខនៅតាមបណ្តោយព្រំដែនរវាងប្រទេសទាំងពីរដែលមានប្រវែង១ពាន់គ.ម៕
