រលកកំដៅដ៏ធ្ងន់ធ្ងរដែលកំពុងកើតមានក្នុងប្រទេសឥណ្ឌាជារលកកម្ដៅដ៏ប្រល័យបំផុតទីពីរ ដែលប្រទេសនេះបានជួបប្រទះនិងជារលកកម្ដៅដ៏ប្រល័យបំផុតទីប្រាំក្នុងពិភពលោក។ នៅពេលដែលចំនួនមនុស្សស្លាប់ឡើងដល់២ពាន់នាក់ហើយនោះមានកំណើនការអំពាវនាវដល់អាជ្ញាធរឱ្យចាត់វិធានការថែមទៀតដើម្បីដោះស្រាយបញ្ហាសីតុណ្ហភាពឡើងខ្លាំងបែបនេះ។
ការធ្លាក់ភ្លៀងឯណេះបន្តិចឯណោះបន្តិចបាននាំឱ្យមានភាពធូរស្រាលនៅក្នុងកន្លែងមួយចំនួនតូចដែលមានសីតុណ្ហភាពក្តៅខ្លាំងជិតពីរសប្តាហ៍មកហើយនៅភាគច្រើននៃប្រទេសឥណ្ឌា។ ក៏ប៉ុន្តែនៅក្នុងតំបន់ជាច្រើននៃប្រទេសឥណ្ឌាគ្មានសញ្ញាថា មានការថមថយកំដៅទេ។
មជ្ឈមណ្ឌលទិន្នន័យព្រឹត្តិការណ៍គ្រាមានអាសន្នដែលភាសាអង់គ្លេសហៅថាEmergency Events Database ដែលជាមជ្ឈមណ្ឌលខាងមហន្តរាយមានមូលដ្ឋាននៅក្នុងក្រុង Brussels បានហៅកំណើនកំដៅនេះថា ជារលកកំដៅដ៏ប្រល័យបំផុតទីប្រាំនៅក្នុងពិភពលោក។
លោក Chandra Bhushan ជានាយករងនៃមជ្ឈមណ្ឌលសម្រាប់វិទ្យាសាស្ត្រនិងបរិស្ថានដែលភាសាអង់គ្លេសហៅថា Center for Science and Environment មានមូលដ្ឋានក្នុងក្រុង New Delhi។ លោកនិយាយថា ទោះណាជាប្រទេសឥណ្ឌាធ្លាប់ស៊ាំនឹងសីតុណ្ហភាពខ្ពស់ក៏ដោយ ក៏កំដៅនៅរដូវក្តៅនេះមានមនុស្សស្លាប់ច្រើនជាងមុន ពីព្រោះសីតុណ្ហភាពកើនឡើងឆាប់រហ័ស។
«ជាទូទៅមានកំណើនសីតុណ្ហភាពយឺតៗ ក៏ប៉ុន្តែសីតុណ្ហភាពមិនកើនយឺតអញ្ចឹងទេ នៅពេលនេះ។ យើងមានធាតុអាកាសត្រជាក់និងសើមមិនធម្មតាក្នុងខែមីនា និងខែមេសា ហើយចាប់តាំងពីសប្តាហ៍ទីមួយនៃខែឧសភាមក សីតុណ្ហភាពបានចាប់ផ្តើមកើនឡើងឆាប់រហ័សណាស់។ នេះមានន័យថា ក្នុងរយៈពេលខ្លីបំផុត សីតុណ្ហភាពបានកើនឡើងពី១៥ទៅ២០អង្សា Celsius»។
នៅក្នុងតំបន់មានផលប៉ះពាល់អាក្រក់បំផុតដូចជារដ្ឋ Andhra Pradesh ជាដើមនោះ អាជ្ញាធរបានចេញផ្សាយការណែនាំឱ្យប្រជារាស្ត្រឋិតនៅក្នុងម្លប់។
ក៏ប៉ុន្តែមានមនុស្សក្រីក្រច្រើននាក់ ដូចជាក្រុមកម្មករសំណង់ ពួកអ្នកពពាយនាយលក់ឥវ៉ាន់ និងក្រុមអ្នកលក់ទំនិញនៅក្រៅអាគារដែលពឹងពាក់លើប្រាក់បៀវត្សរ៍ប្រចាំថ្ងៃ មិនអាចធ្វើតាមការណែនាំនេះបានទេ។ ទុក្ខវេទនានៃក្រុមមនុស្សរស់នៅក្នុងក្រុងមានប្រជារាស្ត្រណែនក្តន់មានភាពធ្ងន់ធ្ងរថែមទៀតដោយសារការខ្វះដើមឈើដើម្បីជ្រក ហើយកន្លែងមានចាក់កៅស៊ូនិងមានក្រាលស៊ីម៉ង់ធ្វើឱ្យមានសីតុណ្ហភាពខ្ពស់ថែមទៀត។ នៅក្នុងកន្លែងជាច្រើនសីតុណ្ហភាពបានឡើងដល់៤៥អង្សា Celsius៕
ប្រែសម្រួល លោកឈឹម សុមេធ
