មហាសេដ្ឋីទីមួយនិងមានតែមួយនៅក្នុងប្រទេសនេប៉ាល់បានសន្យាថានឹងជួយកសាងផ្ទះនិងសាលារៀនឡើងវិញនៅក្រោយការរញ្ជួយដីដ៏មហន្តរាយមួយដែលបានកើតឡើងក្នុងប្រទេសរបស់លោក។ លោក Binod Chaudhary ប្រធានសាជីវកម្ម CG និងក្រុមហ៊ុន Globlal and Chaudhary Group នៅប្រទេសនេប៉ាល់បានប្រាប់វីអូអេកាលពីថ្ងៃព្រហស្បតិ៍អំពីបញ្ហាប្រឈមដ៏ធំដែលប្រទេសរបស់លោកកំពុងជួបប្រទះ ហើយនិងអ្វីដែលលោកកំពុងធ្វើដើម្បីជួយប្រទេសនេះ។
គាត់មានប្រសាសន៍ថា «វាប្រហែលជាពេលវេលាមួយដែលមានឧបសគ្គធំបំផុតដែលមិនធ្លាប់មាននៅក្នុងប្រវត្តិសាស្ត្រនៃប្រទេសនេប៉ាល់»។
ក្រុមហ៊ុនសាជីវកម្ម Chaudhary Group គឺជាបណ្តុំក្រុមហ៊ុនមានមូលដ្ឋាននៅក្នុងទីក្រុងកដ្ឋមណ្ឌូ (Kathmandu) ដែលមានមុខជំនួញជិត៨០ និងមានប្រាក់ចំណេញសរុបជាង៨០០លានដុល្លារ។ ក្រៅតែពីជាអ្នកមានម្នាក់ក្នុងចំណោមអ្នកមាន១ពាន់៥រយនាក់នៅក្នុងពិភពលោក លោក Chaudhary ក៏ជាជនជាតិនេប៉ាល់ម្នាក់ដ៏មានមោទនភាពដែលបានដឹងពីពេលវេលាក្នុងការជួយប្រទេសរបស់លោក។
លោក Chaudhary មានប្រសាសន៍ថា៖ «ក្តីសង្ឃឹមរបស់យើងគឺថា ឆាប់ៗនេះយើងនឹងអាចមានលទ្ធភាពក្នុងការរកដៃគូត្រឹមត្រូវដែលនឹងជួយគាំទ្រយើងក្នុងការសម្រេចគោលដៅកសាងផ្ទះចំនួនមួយម៉ឺនកន្លែងដែលយើងបានគ្រោងធ្វើឡើង ហើយយើងសង្ឃឹមថា នឹងមានសាលាជាងមួយរយកន្លែងដែលយើងមានគម្រោងជួសជុលឡើងវិញ។
លោក Chaudhary បានមានប្រសាសន៍ថា មូលនិធិ Pricewaterhouse ក្រុមហ៊ុន SEEDS India ក្រុមហ៊ុន Tata Group និងក្រុមហ៊ុន Ali Baba Group គឺជាក្រុមហ៊ុនមួយចំនួនដែលបានយល់ព្រមសហការក្នុងកិច្ចការងារនេះ។
អង្គការសហប្រជាជាតិនិយាយថា មនុស្ស៨លាននាក់ដែលស្មើនឹងជាង១ភាគបួននៃប្រជាជននេប៉ាល់បានរងការប៉ះពាល់ពីគ្រោះមហន្តរាយនេះ។
លោក Keshav Koirala ការីនិពន្ធឌីជីថលនៃកាសែត Himalayan Times កំពុងស្ថិតនៅក្នុងផ្ទះល្វែងរបស់លោកជាមួយនឹងក្រុមគ្រួសារនៅពេលដែលរញ្ជួយដីបានកើតឡើង។
លោកមាននិយាយថា៖ «មនុស្សគ្រប់គ្នាចាប់ផ្ដើមភ័យរន្ធត់។ រញ្ជួយដីមិនបានឈប់ក្នុងរយៈពេល៣០ទៅ៤០វិនាទីទេ ហើយខ្ញុំក៏មានអារម្មណ៍ថា វាមិនមែនជារញ្ជួនដីតូចតាចនោះដែរ»។
ប្អូនស្រីរបស់លោកកំពុងបីក្មួយប្រុសរបស់លោកដែលមានអាយុ៧ខែ នៅពេលដែលអាគារបន្តញ័ររញ្ជួយ។
«ខ្ញុំបានយកកូនតូចចេញពីដៃប្អូនស្រី ហើយយកទៅពួនក្រោមសាឡុង ដោយគិតថា បើទោះបីជាផ្ទះដួលរលំ ក៏យើងនៅមានសុវត្ថិភាពដែរ។ វាគឺដូចជាសុបិនអាក្រក់មួយអញ្ចឹង»។
ទោះបីជាពួកគេមានបទពិសោធន៍ដ៏គួរឲ្យរន្ធត់ក៏ដោយ លោក Keshav និងក្រុមគ្រួសាររបស់លោកគឺជាមនុស្សមានសំណាងក្នុងចំណោមអ្នកដែលបានរួចជីវិត។ ផ្ទះរបស់លោកមិនបានរលំទេ ហើយសមាជិកគ្រួសាររបស់លោកបានរួចជីវិតទាំងអស់។ ក៏ប៉ុន្តែសាលារៀនសម្រាប់ក្មេងៗក្នុងទីក្រុងកដ្ឋមណ្ឌូបានខ្ទេចអស់ទៅហើយ។
នាយកសាលា លោក Ojesh Bajracharya បាននិយាយថា៖ «យើងទើបតែបានពិសាអាហារថ្ងៃត្រង់ហើយយើងទើបតែចេញពីបន្ទប់ញ៉ាំបាយ។ រំពេចនោះ អាគារទាំងមូលចាប់ផ្តើមរង្គើ។ ដូច្នេះយើងបានប្រមូលសិស្សរបស់យើងទាំងអស់ ហើយយើងនាំគ្នាក្រាបចុះទៅនឹងដីក្នុងកន្លែងក្មេងលេង។ សំណាងល្អ នៅពេលនោះយើងនៅខាងក្រៅសាលា ដូច្នេះគ្រប់គ្នាមានសុវត្ថិភាព»។
អាគារពីរក្នុងចំណោមអាគារទាំងប្រាំរបស់សាលានោះ នៅមានសភាពដូចដើម។ សិស្សសាលាទាំង៧០នាក់ដែលបានរស់នៅក្នុងសាលានោះ ត្រូវបានបង្ខំឲ្យស្វែងរកកន្លែងរស់នៅផ្សេងទៀត។ សិស្សសាលាទាំង៥៤០នាក់នៅតែមិនទាន់ដឹងនៅឡើយថា តើពេលណាពួកគេអាចត្រឡប់មករៀនវិញបានដូចដើម។
លោក Bajracharya មានប្រសាសន៍ថា៖ «ខ្ញុំបានដាក់ពាក្យទៅការិយាល័យក្រុងដើម្បីឲ្យរដ្ឋាភិបាលចុះមកមើលសាលារបស់ខ្ញុំ ក៏ប៉ុន្តែមានគេប្រាប់ខ្ញុំថា ឥឡូវនេះ រឿងនេះមិនមែនជាអាទិភាពរបស់គេទេ។ ខ្ញុំមិនដឹងជាធ្វើយ៉ាងម៉េចទេ។
រដ្ឋាភិបាលនេប៉ាល់បានប៉ាន់ប្រមាណថា សាលារៀនច្រើនជាង៦រយកន្លែងនិងលំនៅដ្ឋានប្រហែល៣០ម៉ឺនកន្លែងបានរងការខូចខាតនិងត្រូវបានបំផ្លាញក្នុងអំឡុងពេលនៃការរញ្ជួយដីនោះ។
ក្រុមហ៊ុន Chaudhary Group គឺជាក្រុមហ៊ុនដំបូងមួយក្នុងចំណោមក្រុមហ៊ុនផ្សេងទៀតដែលស្វែងរកការខិតខំប្រឹងប្រែងនៅនឹងកន្លែងក្នុងទីក្រុងកដ្ឋមណ្ឌូក្រោយពីមានការរញ្ជួយដី។
លោក Chaudhary មានប្រសាសន៍ថា៖ «យើងបានប្រែក្លាយសាលារបស់យើងស្ទើរតែទាំងអស់ក្នុងក្រុងកដ្ឋមណ្ឌូឲ្យទៅជាជំរុំជួយសង្គ្រោះនៅពេលដែលរញ្ជួយដីបានកើតឡើងភ្លាម កាលពីថ្ងៃទី២៥។ បន្ទាប់មកយើងបានចាប់ផ្តើមធ្វើអ្វីៗដែលយើងអាចធ្វើបានទាក់ទិននឹងការនាំយកចំណីអាហារ ទឹក ភេសជ្ជៈ ថ្នាំសង្កូវ និងប្រព័ន្ធគាំទ្រផ្នែកសុខាភិបាលទៅកាន់តំបន់ផ្សេងៗជាច្រើនក្នុងប្រទេសនេះ»។
លោក Koirala បាននិយាយថា ការផ្តួចផ្តើមរបស់លោក Chaudhary ទទួលបានការស្វាគមន៍ ក៏ប៉ុន្តែ លោកសង្ឃឹមថា ក្រុមហ៊ុនសាជីវកម្មផ្សេងទៀតនិងបុគ្គលមានទ្រព្យធនជាច្រើននៅទូទាំងពិភពលោកនិងធ្វើតាមគំរូរបស់លោក Chaudhary។
លោក Koirala និយាយថា៖ «វាមិនមែនជាការងារដែលមនុស្សម្នាក់អាចធ្វើបានទេ។ មនុស្សគ្រប់រូបអាចចូលរួមចំណែកទៅតាមអ្វីដែលពួកគេអាចធ្វើបាន»។
លោក Chaudhary បានយល់ស្របដោយមានប្រសាសន៍ថា៖ «នេះជាស្ថានភាពដែលធនធានទាំងអស់ត្រូវតែដាក់រួមគ្នា មិនថាមកពីរដ្ឋាភិបាល ស្ថាប័នឯកជន អង្គការអន្តរជាតិ អង្គការក្រៅរដ្ឋាភិបាល ឬក៏សហគមន៍អន្តរជាតិទេ»។
នៅឆ្នាំ២០១០ លោក Chaudhary បានស្ថិតនៅក្នុងប្រទេសឈីលីជាមួយនឹងភរិយារបស់លោកនៅពេលដែលរញ្ជួយដីធំទី៦ក្នុងប្រវត្តិសាស្ត្របានវាយប្រហារលើប្រទេសដែលស្ថិតនៅក្នុងទ្វីបអាមេរិកខាងត្បូងមួយនេះ។
លោក Chaudhary មានប្រសាសន៍ថា៖ «វាសនារបស់ខ្ញុំហាក់បីដូចជាមានជាប់ពាក់ព័ន្ធទៅនឹងការរញ្ជួយដីដែលមានកម្លាំងខ្លាំងបែបនេះ»។
លោក Kiran Shrestha ចាងហ្វាងរោងពុម្ព Nepalaya Production ដែលបានសរសេរប្រវត្តិផ្ទាល់ខ្លួនរបស់លោក Chaudhary បាននិយាយថា រញ្ជួយដីនៅឈីលីបានបន្សល់ទុកនូវឥទ្ធិពលយ៉ាងជ្រៅក្នុងជីវិតរបស់គាត់។
លោកនិយាយថា៖ «គាត់ជួបប្រទះនឹងរបៀបដែលជីវិតមិនច្បាស់លាស់អាចមាន ដូចជាការរកប្រាក់បាន និងអ្វីៗផ្សេងទៀត»។
លោក Chaudhary បាននិយាយដល់បទពិសោធន៍របស់លោកថា៖ «វាហាក់ដូចជាយើងកំពុងរង់ចាំសេចក្តីស្លាប់ដែលនៅពីមុខយើង គឺវាស្ទើរតែមកដល់យើង។ ការដែលបានរួចជីវិតពីរឿងនោះ ខ្ញុំគិតថា វាដូចជាការបើកជំពូកប្រវត្តិសាស្ត្រថ្មីស្រឡាងក្នុងជីវិត»។
ជំពូកប្រវត្តិសាស្ត្រថ្មីបំផុតសម្រាប់ជីវិតលោក Chaudhary គឺនៅប្រទេសនេប៉ាល់៖ «នៅទីបញ្ចប់អត្តសញ្ញាណរបស់យើងគឺប្រទេសនេប៉ាល់។ យើងជំពាក់អ្វីគ្រប់យ៉ាងដែលយើងមានទៅលើប្រទេសនេប៉ាល់ ហើយយើងបានគិតថា នេះជាពេលវេលាដែលយើងត្រូវតែធ្វើអ្វីគ្រប់យ៉ាងដែលយើងអាចធ្វើបាន។ ខ្ញុំកំពុងរៀបចំឲ្យល្អបំផុតនូវអ្វីៗដែលយើងអាចធ្វើបាន ទាំងសមត្ថភាពផ្នែកគ្រប់គ្រងផ្ទាល់របស់យើង ពេលវេលា ការខិតខំប្រឹងប្រែង ក៏ដូចជាបណ្តាញមិត្តភក្តិរបស់យើង និងធនធានដែលយើងអាចប្រមូលបាន ដើម្បីដោះស្រាយបញ្ហាទាំងអស់នេះសម្រាប់ប្រទេស»។
លោក Chaudhary សង្ឃឹមថា ក្នុងរយៈពេល៦ខែ លោកនឹងអាចសម្រេចបានយ៉ាងហោចណាស់ផ្ទះសម្រាប់ស្នាក់នៅបណ្តោះអាសន្នចំនួនមួយពាន់ខ្នងក្រោមការផ្តល់មូលនិធិទាំងស្រុងពីក្រុមហ៊ុន Chaudhary Group៕
ប្រែសម្រួលដោយ នៀម ឆេង
