លោកនាយករដ្ឋមន្រ្តី ហ៊ុន ម៉ាណែត នៅថ្ងៃអង្គារនេះ បានការពារថា ការដំឡើងប្រាក់ឈ្នួលចំនួន ៤ដុល្លារដល់កម្មករក្នុងវិស័យកាត់ដេរ និងវាយនភណ្ឌសម្រាប់ឆ្នាំ២០២៤ គឺជាការខិតខំ និងជា«ជោគជ័យ»មួយ ក្នុង«កាលៈទេសៈលំបាកទាំងអស់គ្នា» ហើយក្នុងពេលទីផ្សារអន្តរជាតិក៏កំពុងមានបញ្ហា។
លោក ហ៊ុន ម៉ាណែត ថ្លែងបែបនេះ ក្នុងពេលជួបជាមួយកម្មករប្រមាណ ២ម៉ឺននាក់នៅក្នុងរាជធានីភ្នំពេញ។
លោក ហ៊ុន ម៉ាណែត ថ្លែងថា ប្រាក់ឈ្នួល ២០៤ដុល្លារដែលនឹងចាប់ផ្តើមផ្តល់ចាប់ពីឆ្នាំ២០២៤ គឺខ្ពស់ជាងប្រទេសផ្សេងៗ ដូចជាប្រទេសស្រីលង្កា បង់ក្លាដេស ឡាវ វៀតណាម ភូមា និងឥណ្ឌាជាដើម ដែលប្រទេសភាគច្រើនមិនមានការដំឡើងប្រាក់ឈ្នួលទេនៅឆ្នាំនេះ។ លោកបន្តថា ការបញ្ជាទិញនៅលើទីផ្សារអន្តរជាតិក៏ថយចុះនាពេលនេះ ប៉ុន្តែកម្ពុជានៅរក្សាការប្រកួតប្រជែង ក្នុងទំហំប្រាក់ឈ្នួល ២០៤ដុល្លារ។
លោកថ្លែងថា៖ «កម្មករខ្មែរសំណាងណាស់ ដែលប្រាក់ខែដំឡើងហើយ ខ្ពស់ជាងប្រទេសគេហើយ ហើយឆ្នាំនេះ រដ្ឋាភិបាលដំឡើងឱ្យទៀត។ នេះគួរអបអរសាទរទៅហើយប្រទេសទាំងអស់នេះប្រកួតប្រជែងជាមួយយើង នាំអីវ៉ាន់ទៅអាមេរិកទៅអឺរ៉ុបដូចគ្នា»។
លោក ហ៊ុន ម៉ាណែត បន្ថែមថា ការដំឡើងប្រាក់ឈ្នួលនេះ ជាភាព«ជោគជ័យ»មួយ ក្រោមគោលការណ៍«ជួយគ្នារស់ ចែកគ្នារស់»។
លោកបញ្ជាក់បន្ថែមថា៖ «នេះជាស្មារតីដែលយើងជួយគ្នារស់ ថែរក្សាឆ្នាំងបាយ ថែរក្សាអង្ករហើយបង្កើនតិចតួចក្តីឱ្យវាកើនក្នុងឆ្នាំង»។
តួលេខ ២០២ដុល្លារជាលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា ដែលទទួលបានសំឡេងបោះឆ្នោតគាំទ្រខ្ពស់ជាងគេ។ ប៉ុន្តែលោកនាយករដ្ឋមន្ត្រី ហ៊ុន ម៉ាណែត បានបន្ថែមចំនួន ២ដុល្លារ ដើម្បីកំណត់ប្រាក់ឈ្នួលចំនួន ២០៤ដុល្លារ ក្នុងមួយខែសម្រាប់ឆ្នាំ២០២៤។
បើតាម លោក ហ៊ុន ម៉ាណែត ការបន្ថែម ២ដុល្លារពីរូបលោកផ្ទាល់ក្នុងនាមជានាយករដ្ឋមន្រ្តី គឺជាការ«បង្ខំ»និយោជកក្នុងការឱ្យទទួលយកប្រាក់ឈ្នួលដែលបានចរចា។ លោកបញ្ជាក់ថា នាយករដ្ឋមន្រ្តីមានសិទ្ធិសម្រេចចុងក្រោយ តែត្រូវបញ្ចប់នីតិវិធីនៃការចរចាប្រាក់ឈ្នួលពីគ្រប់ភាគីពាក់ព័ន្ធ តាមច្បាប់ចែងជាមុនសិន។
លោក ហ៊ុន ម៉ាណែត ថ្លែងថា៖ «នាយករដ្ឋមន្រ្តីមានឆន្ទានុសិទ្ធិក្នុងការសម្រេចរក្សាដដែល បន្ថយបើសិនជាមើលទៅប៉ះពាល់សេដ្ឋកិច្ច ឬបង្កើនខ្លះ។ អាហ្នឹងហើយបានយើងសម្រេចថែម ២ដុល្លារមិនច្រើន តែក៏មិនតិច ៤ភាគរយ។ នេះហើយគឺជាឆន្ទានុសិទ្ធិ ហើយសន្តិវិធី ហើយនេះហើយគឺជា អ្វីដែលជាការយកចិត្តទុកដាក់នៅក្នុងដំណាក់កាលដ៏លំបាកនេះ»។
ក្រោយការដំឡើងប្រាក់ឈ្នួលរបស់កម្មករ ៤ដុល្លារ មន្ត្រីសង្គមស៊ីវិលនិងមេដឹកនាំសហជីពការពារសិទ្ធិកម្មករមួយចំនួនបានសម្តែងការសោកស្តាយចំពោះលទ្ធផលប្រាក់ឈ្នួលគោល ដោយថា វាមិនទាន់អាចឆ្លើយតបទៅនឹងការចាយវាយរបស់កម្មករ ខណៈទំនិញនៅលើទីផ្សារ និងប្រេងសាំងនៅតែបន្តឡើងថ្លៃ។
ប្រធានសហភាពការងារកម្ពុជា (CLC) លោក អាត់ ធន់ ប្រាប់វីអូអេថា ចំនួនប្រាក់ឈ្នួលកម្មករ ២០៤ដុល្លារក្នុងមួយខែសម្រាប់ឆ្នាំ២០២៤ ខាងមុខនេះ មានកម្រិតទាបនៅឡើយ ខណៈការចំណាយរបស់កម្មករច្រើនជាងចំណូលដែលទទួលបាន។
លោកថ្លែងថា៖ «ប្រាក់ឈ្នួល ២០៤ដុល្លារគឺវាជាចំនួនតិច មិនអាចឆ្លើយតបនឹងស្ថានភាពរស់នៅរបស់កម្មករបច្ចុប្បន្នទេ។ តាមការសិក្សាស្រាវជ្រាវក្នុងមនុស្សម្នាក់ចំណាយក្នុងរវង្វង់ពី ២៦០ដុល្លារទៅ ៣០០ដុល្លារ ហើយគិតមួយគ្រួសារវាជិត ៤០០ឯណោះ ហើយពេលដែលប្រាក់ឈ្នួលត្រឹមតែ ២០៤ គឺវានៅទាបនៅឡើយទេ»។
ប្រធានសហភាពការងារកម្ពុជារូបនេះទទួលស្គាល់ថា ប្រាក់ឈ្នួលកម្មករនៅកម្ពុជាគឺខ្ពស់ជាងប្រាក់ឈ្នួលរបស់កម្មករក្នុងប្រទេសផ្សេងៗពិតមែន ប៉ុន្តែលោកថា ការចាយវាយនៅក្នុងបណ្តាប្រទេសនីមួយៗមិនដូចគ្នានោះទេ។
លោក អាត់ ធន់ បន្ថែមថា៖«បាទវាជាការពិតវាខ្ពស់ជាងបើយើងប្រៀបធៀបទៅឡាវ ភូមា ស្រីលង្កា ប៉ុន្តែបើយើងប្រៀបធៀបវៀតណាម ថៃ ម៉ាឡេ[ស៊ី] ឬក៏សិង្ហបុរី ឬក៏ឥណ្ឌូណេស៊ី គឺយើងទាបជាងគេ។ ហើយការកំណត់ប្រាក់ឈ្នួល វាមិនអាស្រ័យលើប្រាក់ឈ្នួលទាប ឬប្រាក់ឈ្នួលខ្ពស់ទេ។ យើងអ្នកជំនាញច្បាប់ អ្នកជំនាញប្រាក់ឈ្នួល យើងដឹងហើយថា ការកំណត់ប្រាក់ឈ្នួល វាអាស្រ័យលើការចាយវាយឬក៏កម្រិតជីវភាពរបស់ប្រជាពលរដ្ឋនៅក្នុងប្រទេសនោះ»។
គួរបញ្ជាក់ថា កាលពីឆ្នាំ២០២៣ ប្រាក់ឈ្នួលរបស់កម្មករត្រូវបានដំឡើងចំនួន ៦ដុល្លារ ដល់ ២០០ដុល្លារអាមេរិកក្នុងមួយខែ ដែលជាប្រាក់ឈ្នួលរបស់កម្មករក្នុងពេលបច្ចុប្បន្ននេះ៕
