សមាគមការពារសិទ្ធិមនុស្សអាដហុក ស្នើអាជ្ញាធរមូលដ្ឋានបញ្ឈប់សកម្មភាព«តាមដាន» និង«បំភិតបំភ័យ» ខណៈមានសេចក្តីរាយការណ៍ថាអាជ្ញាធរមូលដ្ឋានក្នុងខេត្តព្រៃវែងបានចុះទៅកន្លែងពួកគេរៀបចំកម្មវិធី កាលពីថ្ងៃអង្គារ។
សមាគមនេះចាត់ទុកទង្វើរបស់សមត្ថកិច្ចថ្នាក់ក្រោមក្នុងក្រុងព្រៃវែងនេះ គឺជាការអនុវត្តផ្ទុយនឹងច្បាប់ និងផ្ទុយពីសេចក្តីជូនដំណឹងរបស់រដ្ឋមន្ត្រីក្រសួងមហាផ្ទៃ កាលពីឆ្នាំ២០១៨ ដែលមិនតម្រូវឱ្យសមាគម ឬអង្គការសង្គមស៊ីវិលដាក់លិខិតទៅអាជ្ញាធរនោះទេ។
ការទាមទារនេះ កើតឡើងនៅពេលដែលការិយាល័យសមាគមអាដហុកប្រចាំក្រុងព្រៃវែងបានរៀបចំសិក្ខាសាលាមួយផ្សព្វផ្សាយអំពីសិទ្ធិមនុស្ស និងសេរីភាពជាមូលដ្ឋានដល់ប្រជាពលរដ្ឋចូលរួមចំនួន២៤នាក់ កាលពីថ្ងៃទី២៦ ខែកក្កដា ប៉ុន្តែមន្ត្រីនគរបាលប៉ុស្តិ៍កំពង់លាវម្នាក់ បានចុះទៅសួរនាំអ្នកសម្របសម្រួលរបស់សមាគមនេះប្រចាំខេត្តព្រៃវែង អំពីច្បាប់អនុញ្ញាតបើកវគ្គបណ្តុះបណ្តាលនេះ និងទាមទារសុំមើលឯកសារផ្សេងៗទៀត និងតម្រូវឱ្យដាក់លិខិតជូនទៅអាជ្ញាធរមូលដ្ឋាន ដែលសមាគមនេះយល់ថា ការអនុវត្តរបស់មន្ត្រីមូលដ្ឋាន គឺផ្ទុយពីច្បាប់ និងសេចក្តីណែនាំរបស់ក្រសួងមហាផ្ទៃកាលពីឆ្នាំ២០១៨។ នេះបើតាមសេចក្តីប្រកាសព័ត៌មាននៅលើទំព័រហ្វេសប៊ុករបស់សមាគមអាដហុក កាលពីថ្ងៃអង្គារ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក យល់ថាសកម្មភាពនគរបាលចុះទៅសួរនាំបុគ្គលិករបស់អាដហុកនៅទីតាំងរៀបចំសិក្ខាសាលាអំពីសិទ្ធិមនុស្ស គឺជាការគំរាមកំហែង បំភិតបំភ័យដល់អ្នកចូលរួម ការរឹតត្បិតសេរីភាពនៃការជួបជុំ និងសេរីភាពជាមូលដ្ឋាន ដែលមិនគួរឱ្យកើតមានក្នុងប្រទេសកម្ពុជា ដែលប្រកាន់របបប្រជាធិបតេយ្យ។
លោកស្នើឱ្យអាជ្ញាធរទាំងអស់ត្រូវបញ្ឈប់សកម្មភាពទាំងអស់នេះ និងត្រូវអនុវត្តតាមសេចក្តីណែនាំឆ្នាំ២០១៨របស់ក្រសួងមហាផ្ទៃឱ្យបានត្រឹមត្រូវ ព្រោះបើតាមសេចក្តីណែនាំថាអង្គការមិនមែនរដ្ឋាភិបាល សមាគម សហគមន៍នានានៅមូលដ្ឋាន ដែលបានចុះបញ្ជីត្រឹមត្រូវស្របតាមច្បាប់ គឺមិនចាំបាច់ជូនដំណឹងទៅអាជ្ញាធរមូលដ្ឋាននោះទេ ចំពោះការអនុវត្តសកម្មភាពការងារណាមួយនៅក្នុងមូលដ្ឋាន។
លោកថ្លែងថា៖ «វាជារូបភាពមួយបង្ហាញអំពីការគំរាមកំហែងហើយ ទោះបីគាត់មិនបានទៅនិយាយអ្វីឱ្យដល់ពលរដ្ឋដែលចូលរួម ប៉ុន្តែនៅពេលដែលពលរដ្ឋចូលរួម គាត់ឃើញរូបភាព សមត្ថកិច្ចមានឯកសណ្ឋានបែបហ្នឹងទៅសួរនាំដល់អ្នករៀបចំ ចង់មិនចង់អារម្មណ៍របស់ពួកគាត់ គឺមានការភ័យខ្លាច មានការព្រួយបារម្ភក្នុងការចូលរួមហើយ។ នេះគឺជារូបភាពមួយដែលយើងមិនចង់ឃើញទេ នៅក្នុងកិច្ចការងារដែលយើងរៀបចំសកម្មភាពក្នុងការអប់រំផ្សព្វផ្សាយហ្នឹង»។
អាជ្ញាធរមូលដ្ឋានបានការពារខ្លួនថាការចុះទៅសួរនាំមន្ត្រីរបស់សមាគមអាដហុកនេះ គឺដើម្បីការពារសុខសុវត្ថិភាពតែប៉ុណ្ណោះ។
លោក នុត ពិសិដ្ឋ មេប៉ុស្តិ៍នគរបាលកំពង់លាវ ក្រុងព្រៃវែង ប្រាប់វីអូអេនៅថ្ងៃពុធនេះថា មន្ត្រីនគរបាលម្នាក់ ពិតជាបានចុះទៅទីតាំងរបស់អង្គការអាដហុកប្រចាំក្រុងព្រៃវែងពិតមែន។ លោកបានការពារថាសមត្ថកិច្ចទៅពិនិត្យមើល គឺដើម្បីការពារសន្តិសុខតែប៉ុណ្ណោះ ហើយមិនមែនទៅគំរាមកំហែង ឬបំភិតបំភ័យអ្នកណាម្នាក់នោះទេ។
លោកថ្លែងថា៖ «អាហ្នឹងត្រូវការពារ ត្រូវធ្វើអ៊ីចឹង ទោះបីកន្លែងទីប្រជុំជនណាក៏ដោយឱ្យតែមាន[ការជួបជុំ] ពួកខ្ញុំដឹង ខ្ញុំទៅមើលសិន ទៅមើលការខុសត្រូវខ្លះ។ វាមិនទៅមើល១០០ភាគរយអីទេ គឺទៅមើលខ្លះអ៊ីចឹងទៅ មើលក្រែងលោកមានស្ថានភាពអីចម្លែក។ អាហ្នឹងពួកខ្ញុំ[មាន]វិធានការ ដូចជាមានចោរកម្ម លួច អីអ៊ីចឹងទៅ មានក្មេងលួចរបស់របរលើម៉ូតូ [ឬ]មានកាតាប មានអី ក្រែងលោក្មេងវាលួច ពួកខ្ញុំនៅទីនោះស្រាប់»។
លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់វីអូអេនៅថ្ងៃពុធថាសេចក្តីជូនដំណឹងរបស់ក្រសួងមហាផ្ទៃឆ្នាំ២០១៨ ស្តីពីការធ្វើសកម្មភាពរបស់សមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន គឺមិនមានការផ្លាស់ប្តូរអ្វីនោះទេ។ ប៉ុន្តែលោកទាមទារឱ្យសមាគមអាដហុក និងអង្គការផ្សេងទៀត ត្រូវចូលរួមសហការជាមួយអាជ្ញាធរ និងចៀសវាងការមួលបង្កាច់អាជ្ញាធរ។
លោកបញ្ជាក់ថា៖ «ស្អីក៏ដោយឱ្យតែស្អប់គ្នាហើយ គាត់ឃើញដានជើងអាជ្ញាធរ ក៏គាត់កើបគ្រវាត់ចោលដែរ»។
នៅក្នុងសេចក្តីណែនាំឆ្នាំ២០១៨ របស់រដ្ឋមន្ត្រីក្រសួងមហាផ្ទៃ លោក ស ខេង ស្តីពីការធ្វើសកម្មភាពរបស់សមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន លោករដ្ឋមន្រ្តីបានបញ្ជាក់ប្រាប់ទៅអភិបាលរាជធានី ខេត្ត និងអ្នកពាក់ព័ន្ធផ្សេងទៀតថាសមាគម អង្គការមិនមែនរដ្ឋាភិបាល ដែលបានចុះបញ្ជី ត្រឹមត្រូវស្របតាមច្បាប់ ព្រមទាំងសហគមន៍នានានៅមូលដ្ឋានមានសិទ្ធិសេរីភាពពេញលេញក្នុងការធ្វើសកម្មភាពក្នុងព្រះរាជាណាចក្រកម្ពុជាស្របតាមច្បាប់ និងលិខិតបទដ្ឋានគតិយុត្តនានាជាធរមាន ព្រមទាំងលក្ខន្តិកៈរបស់ខ្លួនដែលបានតម្គល់ទុកនៅក្រសួងមហាផ្ទៃ ដោយពុំចាំបាច់ជូនដំណឹងដល់អាជ្ញាធរមូលដ្ឋានក្នុងរយៈពេល៣ថ្ងៃមុនពេលចាប់ផ្តើមសកម្មភាពនោះទេ៕
