ខណៈដែលថ្ងៃទិវាបុណ្យនៃក្តីស្រឡាញ់ឬ Valentine's Day ខិតជិតមកដល់ក្នុងពេលមួយសប្តាហ៍ខាងមុខ ក្រសួងអប់រំ យុវជននិងកីឡាបានណែនាំឱ្យបុគ្គលិកនិងស្ថាប័នក្រោមឱវាទខ្លួនធ្វើការទប់ស្កាត់សកម្មភាពនានា ដែលខ្លួនចាត់ទុកថាមិន«ប្រក្រតី»ដែលអាចកើតមានក្នុងទិវាបុណ្យនៃក្តីស្រឡាញ់ នៅថ្ងៃទី១៤កុម្ភៈខាងមុខនេះ។
សេចក្តីណែនាំរបស់ក្រសួងអប់រំ ដែលចេញផ្សាយកាលពីព្រឹកថ្ងៃព្រហស្បតិ៍បានសរសេរយ៉ាងដូច្នេះ៖
«ទិវានេះពុំមែនជាពិធីបុណ្យ ប្រពៃណីរបស់ជាតិខ្មែរយើងទេ ហើយអំឡុងប៉ុន្មានឆ្នាំចុងក្រោយនេះ ទិវាបុណ្យក្តីស្រឡាញ់កាន់តែមានឥទ្ធិពលខ្លាំងឡើងៗ ធ្វើឱ្យយុវជនភ្លើតភ្លើន ភ្លេចការសិក្សាបាត់បង់សេចក្តីថ្លៃថ្នូររបស់ខ្លួន និងក្រុមគ្រួសារ ប្រាសចាកវប្បធម៌ និងប្រពៃណីជាតិដ៏ល្អផូរផង់របស់ខ្មែរទៀតផង»។
សេចក្តីណែនាំរបស់ក្រសួងអប់រំស្តីពីស្តីពីវិធានការទប់ស្កាត់«សកម្មភាពមិនប្រក្រតី»នេះក៏បានណែនាំឱ្យស្ថាប័នអប់រំរដ្ឋ និងឯកជនធ្វើការផ្សព្វផ្សាយដល់សិស្សានុសិស្សតាមគ្រប់មធ្យោបាយ កុំឲ្យយល់ខុសពីអត្ថន័យនៃទិវាបុណ្យនៃក្តីស្រឡាញ់ ពង្រឹងសីលធម៌ និងវិន័យ ដោយតាមដានអវត្តមានរបស់សិស្សានុសិស្សជាប្រចាំ អនុវត្តសកម្មភាព«មិត្តអប់រំមិត្ត»និងរក្សាទំនាក់ទំនងជិតស្និទ្ធជាមួយមាតា បិតា អាណាព្យាបាលសិស្ស និងសហគមន៍ដើម្បីណែនាំ កែលម្អសកម្មភាពមិនប្រក្រតីរបស់សិស្សឲ្យបានទាន់ពេលវេលា។
លោក រស់ សុវាចា អ្នកនាំពាក្យនៃក្រសួងអប់រំ យុវជននិងកីឡា បានប្រាប់ VOA ថា៖
«ដូចរៀងរាល់ឆ្នាំនៅថ្ងៃទី១៤កុម្ភៈ ដែលជាទូទៅប្រជាជននៅលើពិភពលោកហៅថា ជាទិវាបុណ្យនៃក្តីស្រឡាញ់នេះ ជាឱកាសមួយដែលសិស្សានុសិស្សទូទៅមួយចំនួន គាត់យល់ច្រឡំថា បុណ្យនេះគឺជាថ្ងៃបុណ្យសង្សារ ឬមួយក៏ជាពេលដែលណាត់ជួបគ្នាផ្សេងៗ ប៉ុន្តែទិវានេះគឺមិនស្ថិតនៅក្នុងពិធីបុណ្យប្រពៃណីរបស់ជនជាតិខ្មែរយើងទេ បាទ»។
ទាក់ទិននឹងសកម្មភាពមិនប្រក្រតីក្នុងថ្ងៃទិវាបុណ្យនៃក្តីស្រឡាញ់ឬ Valentine's Day លោក រស់ សុវាចា បានបញ្ជាក់យ៉ាងប្រយ័ត្នប្រយែងយ៉ាងដូច្នេះ៖
«បាទ សកម្មភាពនេះជាសកម្មភាពទូទៅ ជាយថាហេតុណាមួយ ដោយយើងមិនមានជានិយមន័យច្បាស់លាស់នៅក្នុងនោះទេ ប៉ុន្តែយ៉ាងណា ភាពមិនប្រក្រតីដែលនៅក្នុងលិខិតនេះបានចែងគឺសំដៅទៅលើទិដ្ឋភាពទូទៅដែលអាចធ្វើឲ្យមានភាពមិនសមរម្យណាមួយទាក់ទងទៅនឹងសង្គមក៏ដូចជានៅក្នុងស្ថាប័នក្តី នៅខាងក្រៅស្ថាប័នក្តីដែលស្ថិតនៅស្ថិតក្រោមឱវាទរបស់ក្រសួង បាទ»។
ទិវាបុណ្យនៃក្តីស្រឡាញ់ឬ Valentine's Day មានភាពល្បីល្បាញក្នុងពិភពលោកជាពិសេស ក្នុងចំណោមសិស្សានុសិស្ស។ ថ្ងៃនៃក្តីស្រឡាញ់ឬ Valentine's Day ត្រូវបានគេធ្វើឡើងនៅថ្ងៃទី១៤ ខែកុម្ភៈ ជារៀងរាល់ឆ្នាំ ដើម្បីបង្ហាញពីក្តីស្រឡាញ់រវាងគូរស្នេហ៍ មិត្តភក្ដិ រួមទាំងមាតាបិតាផងដែរ ដោយមានការជូនបាច់ផ្កា កាដូឬក៏ស្ករសូកូឡា។
ក្រសួងអប់រំយុវជន និងកីឡា និងក្រសួងនានាតែងតែចេញសេចក្តីណែនាំមុនទិវាបុណ្យនៃក្តីស្រឡាញ់ចូលមកដល់ ដើម្បីបង្ការសកម្មភាពនានាដែលក្រសួងយល់ថា ខុសប្រពៃណីវប្បធម៌ខ្មែរ។
លោក ថៃ នរៈសត្យាអ្នកនាំពាក្យក្រសួងវប្បធម៌ និងវិចិត្រសិល្បៈ បាននិយាយប្រាប់ VOA តាមទូរស័ព្ទថា ការអបអរទិវាបុណ្យនៃក្តីស្រឡាញ់នេះមិនមែនតែមាននៅក្នុងប្រទេសកម្ពុជានោះទេ ដោយសារឥទ្ធិពលរបស់សាកលភាវូបនីយកម្ម ការទទួលយកវប្បធម៌ខ្លះៗរបស់ពិភពលោកគឺជារឿងធម្មតា។ យ៉ាងណាក៏ដោយលោកបញ្ជាក់ថា យុវជនគួរមានស្មារតីភ្ញាក់រឭក និងគោរពតាមគោលការណ៍ទំនៀមទម្លាប់ខ្មែរ។
លោកបានបន្តថា៖
«យើងគ្រាន់តែមានការដាស់តឿន ក្រើនរំឭកគ្នាតែប៉ុណ្ណឹងទេថា កុំធ្វើអ្វីឲ្យវាលើស។ ឥឡូវគេច្រើននិយាយពាក្យលើស។ កុំធ្វើអ្វីឲ្យវាហួស រហូតទៅដល់ថាវាហួសអំពីអ្វីដែលសង្គមកម្ពុជាគេទទួលបាន ដូចជាប្រែក្លាយសេចក្តីស្រឡាញ់ហ្នឹងឲ្យទៅជាការណាត់ជួបគ្នាជារបៀបខុសប្រពៃណី ខុសទំនៀមទម្លាប់ អ៊ីចឹងទៅ»។
ដោយឡែក អ្នកស្រី អ៊ុក ឆាយាវី ប្រធានសមាគមគ្រូបង្រៀនឯករាជកម្ពុជានិយាយថា ក្រសួងអប់រំគួរតែមានវិធានការផ្សេងទៀតឱ្យច្បាស់ជាងនេះ ដោយសារតែវាមិនអាចការពារបានទាំងស្រុងនោះទេ ទោះជាមានសេចក្តីណែនាំដើម្បីបង្ការទង្វើមិនប្រក្រតីរបស់សិស្សានុសិស្សអំឡុងទិវាបុណ្យនៃក្តីស្រឡាញ់ជារៀងរាល់ឆ្នាំយ៉ាងណាក៏ដោយ។
«ខ្ញុំគិតថា រាល់ឆ្នាំសារាចររបស់ក្រសួងចេញអ៊ីចឹងរាល់តែពេលហ្នឹង! ប៉ុន្តែសួរថាមានឥទ្ធិពលទេ? អត់មានឥទ្ធិពលទេចា៎! ប៉ុន្តែជាការល្អហើយដែលជួយកើនរំឭកដល់យុវជនយើងណា៎! ក្នុងនាមខ្ញុំបានឃើញរាល់តែឆ្នាំ»។
អ្នកស្រីបានបន្តថា៖
«អ៊ីចឹងគិតថា ក្រសួងត្រូវតែបង្វែរការហ្នឹង យកកម្មវិធីហ្នឹងជាកម្មវិធីមួយប្រឡងឬកម្មវិធីអីមួយផ្សេងទៀត រកវិធីសាស្រ្តដើម្បីបង្វែរយុវជនយើងមកវិញ។ អាហ្នឹងខ្ញុំគិតថា វាល្អប្រសើរជាងគ្រាន់តែយើងចេញសារាចរបែបហ្នឹង»។
ទិវាបុណ្យនៃក្តីស្រឡាញ់ឬ Valentine's Day ដែលមានប្រភពមកពីលោកខាងលិចត្រូវបានគេប្រារព្ធឡើងស្ទើរតែទូទាំងពិភពលោក ដោយនៅថ្ងៃទី១៤ខែកុម្ភៈ មនុស្សម្នាបានឲ្យអំណោយគ្នាទៅវិញទៅមកដើម្បីបញ្ជាក់ពីក្តីស្រឡាញ់រវាងគ្នានិងគ្នា។ ដូចគ្នានោះដែរ ក្នុងរយៈពេលប៉ុន្មានឆ្នាំចុងក្រោយនេះ យុវជនកម្ពុជាកាន់ច្រើនឡើងៗបានចូលរួមប្រារព្ធទិវានេះផងដែរដោយគេសង្កេតឃើញមានការលក់ផ្កាកុលាប តុក្កតា ឬវត្ថុអនុស្សាវរីយ៍ផ្សេងៗយ៉ាងស្អេកស្កះ នៅតាមដងផ្លូវក្នុងរាជធានីភ្នំពេញ៕
