ប្រធានាធិបតីសហរដ្ឋអាមេរិកលោក Joe Biden បានផ្តល់មេដាយកិត្តិយសដល់ពលរដ្ឋអាមេរិកាំងចំនួន ២០ នាក់នៅឯពិធីមួយនៅសេតវិមានកាលពីថ្ងៃព្រហស្បតិ៍។
ជ័យលាភីមេដាយកិត្តិយស Presidential Citizens Medal នេះក៏រួមមានផងដែរនូវសមាជិករដ្ឋសភាលោក Bennie Thompson និងអតីតសមាជិករដ្ឋសភាអ្នកស្រី Elizabeth Cheney ដែលបានដឹកនាំការស៊ើបអង្កេតមួយរបស់សភាលើការវាយប្រហារថ្ងៃទី ៦ ខែមករា ឆ្នាំ ២០២១ លើវិមានសភាសហរដ្ឋអាមេរិក ដែលធ្វើឡើងដោយហ្វូងមនុស្សឥតសណ្តាប់ធ្នាប់ដែលមានបំណងបង្អាក់ដល់ការប្រកាសជាផ្លូវការអំពីជ័យជម្នះរបស់លោក Joe Biden នៅក្នុងការបោះឆ្នោតប្រធានាធិបតីឆ្នាំ ២០២០។
លោក Donald Trump ដែលបានឈ្នះការបោះឆ្នោតប្រធានាធិបតីឆ្នាំ ២០២៤ សម្រាប់អាណត្តិថ្មីដែលនឹងចាប់ផ្តើមនៅថ្ងៃទី ២០ ខែមករានេះ បាននិយាយថា លោក Thompson និងអ្នកស្រី Cheney គួរតែត្រូវជាប់ពន្ធនាគារ។
សេចក្តីថ្លែងការណ៍របស់សេតវិមានអំពីអ្នកទទួលបានមេដាយកិត្តិយសនេះបានបញ្ជាក់ថា អ្នកស្រី Cheney ដែលជាសមាជិកបក្សសាធារណរដ្ឋ «ហ៊ាននិយាយ...ការពារប្រទេសជាតិនិងឧត្តមគតិរបស់យើងដែលយើងបានប្រកាន់ខ្ជាប់ដែលនោះគឺសេរីភាព សេចក្តីថ្លៃថ្នូរ និងសុភាវធម៌»។
សេចក្តីថ្លែងការណ៍នោះបានបញ្ជាក់ទៀតថា លោក Thompson បាន «ស្ថិតនៅជួរមុខនៃការការពារនីតិរដ្ឋដោយសេចក្ដីសុចរិតមិនងាករេនិងការតាំងចិត្តយ៉ាងខ្ជាប់ខ្ជួនចំពោះសច្ចភាព»។
មេដាយប្រធានាធិបតីនេះត្រូវបានបង្កើតឡើងក្នុងឆ្នាំ ១៩៦៩ ដើម្បីផ្តល់កិត្តិយសដល់ពលរដ្ឋ «ដែលបានបំពេញការងារជាគំរូសម្រាប់ប្រទេសនិងពលរដ្ឋរបស់ខ្លួន»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP។
