រដ្ឋបាលសាលារាជធានីភ្នំពេញ នៅថ្ងៃអង្គារនេះ ប្រកាសចាត់វិធានការផ្លូវច្បាប់លើជនណាដែលដុតផាវ កាំជ្រួច បង្កសំឡេងផ្ទុះ និងលេងល្បែងស៊ីសងគ្រប់ប្រភេទ ក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាម ដោយអះអាងថា ដើម្បីរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ។ នេះបើតាមសេចក្តីជូនដំណឹងរបស់សាលារាជធានី។
ក្នុងសេចក្តីជូនដំណឹងដែលមានចំនួន៧ចំណុច ចេញនៅថ្ងៃទី២៩ ខែមករា ឆ្នាំ២០១៩ ដោយលោក ឃួង ស្រេង អភិបាលនៃគណៈអភិបាលសាលារាជធានីភ្នំពេញបញ្ជាក់ថា ក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី០៤ ដល់ថ្ងៃទី០៦ ខែកុម្ភៈ ឆ្នាំ២០១៩ ខាងមុខ រដ្ឋបាលរាជធានីភ្នំពេញ ហាមដាច់ខាតមិនឲ្យមានការដុតផាវ កាំជ្រួច ឬបង្កសំឡេងផ្ទុះគ្រប់ប្រភេទ មិនឲ្យលេងល្បែងស៊ីសង និងមិនឲ្យមានការហែក្បួនផ្សេងៗទាំងបែបសាសនា ឬប្រពៃណីដែលគ្មានការអនុញ្ញាត។
សេចក្ដីជូនដំណឹងដដែលបានសរសេរទៀតថា នៅទីកន្លែងកម្សាន្តសប្បាយនានា ទាំងនៅតាមស្ថាប័ន និងអង្គភាពត្រូវរក្សាសន្តិសុខ សេចក្ដីថ្លៃថ្នូរ និងត្រូវប្រុងប្រយ័ត្នអគ្គិសនី និងចរន្តអគ្គិសនីដែលអាចបង្កគ្រោះថ្នាក់ជាយថាហេតុ។ មន្ទីរធម្មការ និងសាសនារាជធានីភ្នំពេញ ត្រូវអញ្ជើញបណ្ដាសមាគមចិន វៀតណាម ដើម្បីផ្សព្វផ្សាយខ្លឹមសារនេះ។
ចំណែកសមត្ថកិច្ចគ្រប់ថ្នាក់ ត្រូវចាត់វិធានការឲ្យបានម៉ឺងម៉ាត់បំផុត កុំឲ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទតាមច្រកចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅគ្រប់ទីកន្លែងក្នុងរាជធានីភ្នំពេញ។
សាលារាជធានីបានបញ្ជាក់ក្នុងចំណុចទី៧នៃសេចក្តីណែនាំនោះថា៖ «ជនណាបំពានលើសេចក្តីណែនាំនេះ ឬប្រព្រឹត្តល្មើសបង្កឲ្យមានចលាចលក្នុងសង្គម បាត់សណ្តាប់ធ្នាប់សន្តិសុខ សុវត្ថិភាព និងរបៀបរៀបរយសាធារណៈ ត្រូវទទួលទោសតាមច្បាប់ជាធរមាន»។
ក្នុងរយៈពេលប៉ុន្មានឆ្នាំចុងក្រោយនេះ សាលារាជធានីតែងចេញសេចក្តីជូនដំណឹង ក៏ដូចជាបំរាមផ្សេងៗ ហាមមិនឲ្យមានការហែរក្បួន ឬបង្កសំឡេងផ្ទុះផ្សេងៗ ក្នុងពិធីបុណ្យចូលឆ្នាំចិន វៀតណាម៕
