លោកស្រី Hillary Clinton អតីតបេក្ខជនប្រធានាធិបតីសហរដ្ឋអាមេរិកបានរឹះគន់យ៉ាងខ្លាំងដល់វោហាសាស្រ្តប្រកបដោយការរំខានរបស់ប្រធានាធិបតីដូណាល់ ត្រាំអំពីប្រទេសកូរ៉េខាងជើង ខណៈដែលថ្លែងនៅក្នុងប្រទេសកូរ៉េខាងត្បូងកាលពីថ្ងៃពុធ។
លោកស្រីគ្លីនតុនបាននិយាយនៅក្នុងសុន្ទរកថាមួយទៅកាន់វេទិកា World Knowledge Forumក្នុងទីក្រុងសេអ៊ូលថា៖ «មិនមានហេតុផលសម្រាប់យើងចូលចិត្តធ្វើសង្គ្រាមនិងរឹះគន់បង្ករហេតុនោះទេ»។
លោកស្រីគ្លីនតុនបានលើកឡើងនូវបញ្ហានៃការពណ៌នាបន្តុះបង្អាប់របស់ប្រធានាធិបតីត្រាំដល់ Kim Jong Unថា «បុរសមាឌតូចដែលចូលចិត្តកាំជ្រួច»ហើយនឹងការគំរាមកំហែងរបស់លោកត្រាំដើម្បីឆ្លើយតបទៅនឹងការបង្ករហេតុរបស់កូរ៉េខាងជើងដោយ«ភ្លើងនិងកំហឹង»។
លោកស្រីគ្លីនតុនបានមានប្រសាសន៍ថា៖ «ដោយជោគវាសនារបស់មនុស្សរាប់លាននាក់ពឹងផ្អែកលើសេចក្តីសម្រេចខាងការទូតដល់វិបត្តិកូរ៉េខាងជើងនោះ គេមិនត្រូវនិយាយពីការគំរាមកំហែងដើម្បីចាប់ផ្តើមសង្គ្រាមជាការប្រកបដោយគ្រោះថ្នាក់និងមិនគិតវែងឆ្ងាយនោះទេ»។
លោកស្រីក៏មានប្រសាសន៍ទៀតថា «ការជ្រើសរើសធ្វើការប្រយុទ្ធជាមួយគីម ជុងអ៊ុន គ្រាន់តែធ្វើឲ្យជននោះសប្បាយចិត្តតែប៉ុណ្ណោះ» ហើយនិងធ្វើឲ្យមេដឹកនាំរដ្ឋាភិបាលក្រុងព្យូងយ៉ាងទទួលបានការចាប់អារម្មណ៍ពីអន្តរជាតិតែប៉ុណ្ណោះ។ នៅសប្តាហ៍នេះ លោក Rex Tillerson រដ្ឋមន្រ្តីការបរទេសសហរដ្ឋអាមេរិកបានការពារសារតាមប្រព័ន្ធ Twitter ប្រកបដោយការរំខានហើយនឹងអត្ថាធិប្បាយជាសាធារណៈរបស់ប្រធានាធិបតីត្រាំថាជាការប៉ុនប៉ងដើម្បីធ្វើឲ្យមានសកម្មភាពដែលជំរុញព្រឹត្តិការណ៍ធ្វើឲ្យកិច្ចការការទូតជឿនលឿនទៅមុខ។
ខណៈដែលលោកស្រីគ្លីនតុនមិនយល់ស្របជាមួយវិធីដ៏គគ្លើនរបស់ប្រធានាធិប តីត្រាំនោះ លោកស្រីគ្លីនតុនហាក់ដូចជាយល់ស្របជាមួយយុទ្ធសាស្រ្តខាងការទូតដោយការបង្ខំរបស់ប្រធានាធិបតីត្រាំដើម្បីដាក់ការគាបសង្កត់ទៅលើរដ្ឋាភិបាលគីម ជុងអ៊ុនដើម្បីបោះបង់ចោលកម្មវិធីអាវុធនុយក្លែអ៊ែររបស់ខ្លួន។
លោកស្រីគ្លីនតុនបានយល់ស្របថា ការរីកចម្រើនដ៏ឆាប់រហ័សរបស់កូរ៉េខាងជើងឆ្ពោះទៅកាន់ការអភិវឌ្ឍកាំជ្រួចបាល់លីស្ទិកអន្តរទ្វីបដែលបំពាក់ទៅដោយអាវុធនុយក្លែអ៊ែដែលអាចបាញ់ដល់ដីគោករបស់សហរដ្ឋអាមេរិកជាការគំរាមកំហែងខាងសន្តិសុខដល់សហរដ្ឋអាមេរិក។
ក៏ប៉ុន្តែ លោកស្រីអតីតរដ្ឋមន្រ្តីការបរទេសគ្លីនតុន មិនបានផ្តល់អនុសាសន៍គោលនយោបាយផ្សេងទៀតដើម្បីរារាំងការសាកល្បងអាវុធនុយក្លែអ៊ែរនិងកាំ ជ្រួចមីស៊ីលបន្តទៀតរបស់កូរ៉េខាងជើងទេ។លោកស្រីមិនបានស្នើរការជំរុញលើកទឹកចិត្តឬសម្បទានដើម្បីសម្រុះសម្រួលការចរចាហើយមិនបានផ្តល់អត្ថាធិប្បាយស្តីពីសំណើរបស់ចិននិងរុស្ស៊ីដើម្បីបញ្ឈប់កម្មវិធីនុយក្លែអ៊ែររបស់កូរ៉េខាងជើងនៅក្នុងការដោះដូរការផ្អាកការធ្វើសមយុទ្ធខាងយោធារបស់សហរដ្ឋអាមេរិកនិងកូរ៉េខាងត្បូងទេ។
តែផ្ទុយទៅវិញ លោកស្រីបានបន្ទរតាមរដ្ឋបាលរបស់ប្រធានាធិបតីត្រាំក្នុងការគាំទ្រថា សហគមន៍អន្តរជាតិត្រូវតែបង្កើនការដាក់ទណ្ឌកម្មសេដ្ឋកិច្ចលើកូរ៉េខាងជើងដើម្បីបង្ខំឲ្យគីម ជុងអ៊ុនបោះបង់ចោលអាវុធនុយក្លែអ៊ែរ បើពុំដូច្នេះទេ នឹងប្រឈមការដួលរលំហើយលោកស្រីបានបន្ទរតាមថា ចិនត្រូវតែធ្វើឲ្យបានកាន់តែច្រើនឡើងថែមទៀតដើម្បីអនុវត្តការដាក់ទណ្ឌកម្ម ហើយក្នុងពេលវេលាដ៏សំខាន់នេះ សម្ព័ន្ធមិត្តរបស់សហរដ្ឋអាមេរិកចាំបាច់រក្សាភាពធ្វើឲ្យញញើតខាងយោធាដ៏ខ្លាំងមួយ។
លោកស្រីគ្លីនតុនក៏បានរិះគន់ពីសកម្មភាពសងសឹករបស់ចិនប្រឆាំងនឹងក្រុម ហ៊ុនរបស់កូរ៉េខាងត្បូងដែលធ្វើពាណិជ្ជកម្មនៅក្នុងប្រទេសចិនបន្ទាប់ពីការដាក់ពង្រាយប្រព័ន្ធការពារកាំជ្រួចមីស៊ីលរបស់សហរដ្ឋអាមេរិកនៅក្នុងប្រទេសកូរ៉េខាងត្បូងមក។
លោកស្រីគ្លីនតុនក៏មានប្រសាសន៍ដែរថា សហរដ្ឋអាមេរិកនិងសម្ព័ន្ធមិត្តរបស់ខ្លួនត្រូវតែធ្វើការឆ្លើយតបដោយកម្លាំងសមាមាត្រទៅនឹងការបង្ករហេតុរបស់កូរ៉េខាងជើង ខណៈដែលប្រធានាធិបតីត្រាំបាននិយាយថា សហរដ្ឋអាមេរិកនឹងកំទេចកូរ៉េខាងជើងឲ្យក្លាយទៅជាផេះ ប្រសិនបើរងការវាយប្រហារនោះ។
ចំណាត់ការខាងយោធាណាមួយដើម្បីកំចាត់ទីកន្លែងនុយក្លែអ៊ែរឬកាំជ្រួចមីស៊ីលរបស់កូរ៉េខាងជើងប្រថុយប្រថាននឹងធ្វើឲ្យសង្គ្រាមដែលអាចធ្វើឲ្យអន្តរាយនិងមានអស្ថិរភាពនៅក្នុងតំបន់។ ក៏ប៉ុន្តែ ពួកមេដឹកនាំនិងអ្នកវិភាគមួយចំនួននិយាយថា ការដាក់ទណ្ឌកម្មសេដ្ឋកិច្ចតែមួយមុខនឹងមិនបង្ខំឲ្យមេដឹកនាំនៅក្រុងព្យុងយ៉ាងបោះបង់ចោលនូវភាពកំញើញនុយក្លែអ៊ែររបស់ខ្លួនទេ ជាពិសេស ចំពោះភាសាគំរាមកំហែងរបស់ប្រធានាធិបតីត្រាំនោះ។
លោកGary Samoreអតីតអ្នកសម្របសម្រួលការត្រួតត្រាអាវុធរបស់សេតវិមានក្នុងអំឡុងរដ្ឋបាលរបស់ប្រធានាធិបតី បារ៉ាក់ អូបាម៉ា ដែលបច្ចុប្បន្ននេះធ្វើការនៅសាលា Kennedy School of Government នៅឯសាកលវិទ្យាល័យHarvard បាននិយាយថា៖ «ខ្ញុំគិតថា យើងត្រូវតែសុខចិត្តទទួលយកការពិតថា យើងនឹងត្រូវរស់នៅជាមួយប្រទេសកូរ៉េខាងជើងដែលមានអាវុធនុយក្លែអ៊ែរនៅពេលអនាគតខ្លីខាងមុខ។ ជាក់ស្តែង ការគ្មានអាវុធនុយក្លែអ៊ែលែងជាគោលដៅពិតប្រាកដទៀតហើយនោះ»។
លោកស្រីគ្លីនតុនក៏មានប្រសាសន៍ដែរថា សហរដ្ឋអាមេរិកត្រូវការកម្លាំងមួយដែលមានភាពមាំមួន ចុះសម្រុងគ្នានិងអាចទស្សន៍ទាយបានដើម្បីរក្សាសន្តិភាពនៅក្នុងតំបន់អាស៊ី ហើយថា វិធីដោះស្រាយរបស់ប្រធានាធិបតីត្រាំជាការមិនប្រយ័តប្រយ៉ែងនិងទទួលផលផ្ទុយវិញ។
លោកស្រីគ្លីនតុននិយាយទៀតថា សម្ព័ន្ធមិត្តរបស់រដ្ឋាភិបាលក្រុងវ៉ាស៊ីនតោន បានសម្តែងនូវការព្រួយកង្វល់ពីភាពដែលអាចទុកចិត្តបានរបស់សហរដ្ឋអាមេរិកក្រោយពីមានការរិះគន់កាលពីអតីតកាលរបស់ប្រធានាធិបតីត្រាំទៅលើពាណិជ្ជ កម្មមិនយុត្តិធម៌និងការបង់ប្រាក់ខាងការពារប្រទេសមិនគ្រប់គ្រាន់ដើម្បីទទួលកងទ័ពសហរដ្ឋអាមេរិកនៅក្នុងតំបន់។
ប្រធានាធិបតីដូណាល់ ត្រាំមានគម្រោងទៅបំពេញទស្សនកិច្ចជាផ្លូវការលើកដំបូងរបស់លោកនៅតំបន់អាស៊ីនៅដើមខែវិច្ឆិកាខាងមុខនេះ។ លោកប្រធានាធិបតីនឹងធ្វើដំណើរទៅកាន់ប្រទេសជប៉ុន កូរ៉េខាងត្បូងនិងប្រទេសចិនមុនពេលអញ្ជើញចូលរួមសន្និសីទកំពូលពាណិជ្ជកម្មនិងសន្តិសុខនៅប្រទេសវៀតណាមនិងហ្វីលីពីន។
ការិយាល័យប្រធានាធិបតីរបស់កូរ៉េខាងត្បូងបានប្រាប់ឲ្យដឹងនៅក្នុងសេចក្តីថ្លែងការណ៍ថា កូរ៉េខាងត្បូងរំពឹងថាលោកប្រធានាធិបតីសហរដ្ឋអាមេរិកដូណាល់ ត្រាំមិនត្រឹមតែធ្វើសុន្ទរកថាដើម្បីគាំទ្រសម្ព័ន្ធភាពរវាងកូរ៉េខាងត្បូងនិងសហរដ្ឋអាមេរិកនិងការឆ្លើយតបបញ្ហានុយក្លែអ៊ែររបស់កូរ៉េខាងជើងទេ ក៏ប៉ុន្តែនឹងធ្វើសុន្ទរកថាពីទស្សនៈគោលនយោបាយរបស់លោកស្តីពីឧបទ្វីបនិងតំបន់អាស៊ីភាគឦសាន្តដែរ៕
ប្រែសម្រួលដោយជឹង ប៉ូជីន
