អំឡុងពេល៤ឆ្នាំនៃការអនុវត្តគម្រោងច្រករបៀងសេដ្ឋកិច្ចរវាងចិននិងប៉ាគីស្ថានហៅកាត់ថា CPEC រដ្ឋាភិបាលក្រុងប៉េកាំងបានផ្តល់កម្ចី១៩ពាន់លានដុល្លារដល់រដ្ឋាភិបាលក្រុងអ៊ីស្លាម៉ាបាដ ដោយយកការប្រាក់ទាបជាងទីផ្សារ ការវិនិយោគបរទេសដោយផ្ទាល់ កែលម្អ ឬសាងសង់ប្រព័ន្ធគមនាគមន៍ប៉ាគីស្ថានឡើងវិញ បង្កើតរោងចក្រថាមពលអគ្គសនី និងយុទ្ធសាស្ត្រសម្រាប់កំពង់ផែសមុទ្រអារ៉ាប់នៅទីក្រុង Gwadar។
ក្រុមមន្ត្រីប៉ាគីស្ថាននិងចិនបាននិយាយថា ដំណាក់កាលនៃការពង្រីកគម្រោងនិងការពង្រីកភូមិសាស្រ្តនៃគម្រោង CPEC ត្រូវបានរៀបចំរួចហើយទៅកាន់តំបន់ភាគខាងលិចប្រទេសប៉ាគីស្ថាន និងនៅក្នុងប្រទេសអាហ្វហ្គានីស្ថានដែលជាប្រទេសគ្មានសមុទ្រ។
ក្រុមមន្រ្តីទាំងនោះបាននិយាយបន្តថា នៅឆ្នាំនេះទីក្រុងកាប៊ុលនឹងធ្វើជាម្ចាស់ផ្ទះរៀបចំកិច្ចសន្ទនាត្រីភាគីស្តីពីសន្តិភាពនិងប្រតិបត្តិការសន្តិសុខជាមួយក្រុងប៉េកាំងនិងក្រុងអ៊ីស្លាម៉ាបាដ ហើយកិច្ចពិភាក្សានេះក៏នឹងរួមបញ្ជូលសំណើក្របខណ្ឌការងារដើម្បីភ្ជាប់ប្រទេសអាហ្វហ្គានីស្ថានទៅក្នុងគម្រោង CPEC នេះផងដែរ។
ឯកអគ្គរដ្ឋទូតចិនប្រចាំទីក្រុងអ៊ីសា្លម៉ាបាដ លោក Yao Jing បានថ្លែងថា៖ «យើងគួរតែធ្វើឲ្យកិច្ចសហប្រតិបត្តិការទ្វេភាគីនៃគម្រោង CPEC នេះក្លាយទៅជាវេទិកាពិភាក្សាមួយផ្សេងទៀតដើម្បីបង្កើនកិច្ចសហប្រតិបត្តិការក្នុងតំបន់ឲ្យបានប្រសើរជាងនេះ ឬអាចតភ្ជាប់ពីប្រទេសមួយទៅប្រទេសមួយទៀតបាន។
អំឡុងពេល៤ឆ្នាំនៃការអនុវត្តគម្រោង CPEC និងគម្រោងផ្លូវពាណិជ្ជកម្មសកលហៅ កាត់ថា BRI របស់លោកប្រធានាធិបតី Xi Jinping បានបង្កើតការងារក្នុងតំបន់ជាង ៧៥.០០០ និងបានជួយដល់កំណើនសេដ្ឋកិច្ចប៉ាគីស្ថានឲ្យកើនឡើងពីជាង៣ភាគរយ ទៅ៥,៨ ភាគរយកាលពីឆ្នាំ២០១៧។ គម្រោងរោងចក្រថាមពលអគ្គិសនីបានជួយ បញ្ចប់វិបត្តិអគ្គិសនីក្នុងប្រទេសស្ទើរទាំងអស់។
ក្រុមមន្រ្តីបាននិយាយបន្ថែមថា ដំណាក់កាលទីពីរនៃគម្រោង CPEC នឹងចាប់ផ្តើមអនុវត្តនៅប៉ុន្មានសបា្តហ៍ខាងមុខនេះ ដើម្បីបង្កើតតំបន់សេដ្ឋកិច្ចពិសេសនានាជួយប៉ាគីស្ថានឲ្យមានភាពជឿនលឿន និងស្តារការអភិវឌ្ឍវិស័យឧស្សាហកម្មឡើងវិញ។
ក្រុមមន្រ្តីបានប្រាប់ VOA ថា ប្រទេសចិនអាចស្នើឲ្យមានកម្មវិធីបណ្តុះបណ្តាលពង្រឹងសមត្ថភាពនៅក្នុងប្រទេសអាហ្វហ្គានីស្ថាន និងឧបត្ថម្ភថវិកាដើម្បីកសាងផ្លូវល្បឿនលឿនភ្ជាប់ពីប៉ាគីស្ថានទៅកាន់ទីក្រុង Jalalabad និងទីក្រុង Kandahar នៅតាមព្រំដែនអាហ្វហ្គានីស្ថានប្រទេសចិនកំពុងជួយប៉ាគីស្ថានសាងសង់ផ្លូវល្បឿនលឿនភ្ជាប់ពីក្រុង Peshawar ព្រំដែនភាគពាយព្យទៅកំពង់ផែភាគខាងត្បូងនៃទីក្រុង Karachi ដែលរដ្ឋាភិបាលទីក្រុងកាប៊ុលប្រើប្រាស់សម្រាប់ធ្វើពាណិជ្ជកម្មអន្តរជាតិរបស់ខ្លួន។ សំណើសង់ផ្លូវល្បឿនលឿននេះនឹងជួយកាត់បន្ថយពេលវេលាធ្វើដំណើររបស់ពលរដ្ឋអាហ្វហ្គានីស្ថានទៅកាន់កំពង់ផែ Gwadar ដែលគ្រប់គ្រងដោយប្រទេសចិន ដែលជាច្រកចេញចូលរបស់គម្រោង CPEC។
លោក Mushahid Hussain ដែលជាប្រធានគណៈកម្មាធិការទទួលបន្ទុកកិច្ចការបរទេសនៃព្រឹទ្ធសភាប៉ាគីស្ថានបានថ្លែងថា បើទោះបីជាមានចម្ងល់និងមន្ទិលសង្ស័យពីអន្តរជាតិជាពិសេសសហរដ្ឋអាមេរិកអំពីគម្រោង CPECនេះក៏ដោយ ក៏គម្រោងទាំង២២ដែលនៅស្ថិតនៅក្រោមគំនិតផ្តួចផ្តើមនេះបានបញ្ចប់ឬកំពុងជិតបញ្ចប់ដោយជោគជ័យ។
លោក Hussain បានថ្លែងប្រាប់VOA ថា៖ «ឥឡូវនេះគឺជាពេលដែលត្រូវពង្រីកគម្រោង CPEC ទៅកាន់តំបន់ផ្សេងៗទៀតក្រៅពីប៉ាគីស្ថាននិងចិន ហើយការពង្រីកគម្រោង CPEC នេះគួរតែអនុវត្តនៅក្នុងប្រទេសអាហ្វហ្គានីស្ថាន ពីព្រោះអាហ្វហ្គានីស្ថានមានព្រំដែនជាប់នឹងប៉ាគីស្ថាននិងចិន ហើយប្រទេសទាំងបីនេះមានទំនាក់ទំនងសេដ្ឋកិច្ច វប្បធម៌ និងភូមិសាស្ត្រជាមួយគ្នា។
លោកបានថ្លែងនៅទីក្រុងអ៊ីស្លាម៉ាបាដនៅខែនេះថា សន្និសីទស្តីពីកិច្ចពិភាក្សាត្រីភាគីមិនផ្លូវការរវាងចិន អាហ្វហ្គានីស្ថាន និងប៉ាគីស្ថានក្នុងទីក្រុងអ៊ីសា្លម៉ាបាដ ក៏នឹងពិភាក្សាអំពីវិធីសាស្រ្តដើម្បីបញ្ជូលទីក្រុងកាប៊ុលទៅក្នុងគម្រោង CPEC នេះផងដែរ។ កិច្ចពិភាក្សាត្រីភាគីជាផ្លូវការរវាងអាហ្វហ្គានីស្ថាន និងប៉ាគីស្ថានដែលត្រូវបានផ្តួចផ្តើមដោយរដ្ឋាភិបាលក្រុងប៉េកាំងកាលពីឆ្នាំមុនគឺជាកិច្ចប្រឹងប្រែងមួយដើម្បីបញ្ចប់ភាពតានតឹងនៅក្នុងតំបន់និងស្វែងរកដំណោះស្រាយសន្តិភាពចំពោះសង្គ្រាមអាហ្វហ្គានីស្ថាន។
លោក Hussain បានថ្លែងបន្ថែមថា៖ «តួនាទីរបស់ចិនគឺមានសារៈសំខាន់យ៉ាងខ្លាំងក្នុងការធ្វើឲ្យប៉ាគីស្ថាន និងអាហ្វហ្គានីស្ថានធ្វើការជាមួយគ្នា ពីព្រោះថាប្រទេសចិនមានទំនាក់ទំនងយ៉ាងរឹងមាំជាមួយប៉ាគីស្ថាន។ ចិនគឺជាប្រទេសមួយដែលមិនធ្លាប់មានទំនាក់ទំនងអវិជ្ជមានជាមួយអាហ្វហ្គានីស្ថានដោយសារតែអាហ្វហ្គានីស្ថានគ្មានប្រវត្តិទំនាក់ទំនង ឬគិតអវិជ្ជមានអំពីតួនាទីរបស់ចិននោះទេ»។
ភាពមន្ទិលសង្ស័យអំពីគម្រោងផ្លូវពាណិជ្ជកម្ម BRI និងគម្រោងច្រករបៀងសេដ្ឋកិច្ចរបស់ចិន CPEC ទាំងមន្រ្តីចិននិងប៉ាគីស្ថានបានច្រានចោលការរិះគន់នានាដែលថាគម្រោង CPEC និង គម្រោង BRI គឺជាអន្ទាក់បំណុលសម្រាប់ប្រទេសកំពុងអភិវឌ្ឍនានា និងថាជាកិច្ចប្រឹងប្រែងដើម្បីបង្កើនឥទ្ធិពលនយោបាយរបស់ក្រុងប៉េកាំងក្នុងតំបន់។
លោកឯកអគ្គរដ្ឋទូត Jing បាននិយាយនៅកាន់នាយកគ្រប់គ្រងគម្រោង CPEC នៅឯស្ថានទូតចិនថា «ការរិះគន់ទាំងនោះគឺចេញពីប្រទេសដែលមិនចង់ឃើញភាពលេចឆ្លោរបស់ចិន មិនចង់ឃើញភាពរុងរឿងរបស់ចិន។ មានប្រទេសមួយចំនួនមិនចង់ឃើញភាពជាដៃគូបែបនេះរវាងចិននិងប៉ាគីស្ថាន។ យើងគួរតែប្រុងប្រយ័ត្នទៅនឹងគំនិតអវិជ្ជមានទាំងនេះ»។
រដ្ឋាភិបាលក្រុងអ៊ីស្លាម៉ាបាដនិងប៉េកាំងក៏បានបដិសេធទៅនឹងការរាយការណ៍អំពីក្តីបារម្ភនានាថាវិបត្តិសេដ្ឋកិច្ចប៉ាគីស្ថានកំពុងបង្ខំឲ្យរដ្ឋាភិបាលរបស់លោកនាយករដ្ឋមន្ត្រី Imran Khan បន្ថយល្បឿនអនុវត្តគម្រោងរបស់ចិន ឬត្រួតពិនិត្យគម្រោងCPEC ឡើងវិញ។
លោក Jing បានថ្លែងថា វិនិយោគទុននៅក្រោមគម្រោង CPEC ដែលមានទឹកប្រាក់រាប់ពាន់លានដុល្លារគឺជាការបង្ហាញថ្មីមួយអំពីការជឿជាក់និងទំនុកចិត្តលើប្រទេសប៉ាគីស្ថាន។
ឆ្លើយតបទៅនឹងការរិះគន់អំពីគម្រោង CPEC នេះ នាយខុទ្ទការល័យប៉ាគីស្ថានលោកShireen Mazari បានថ្លែងថា រដ្ឋាភិបាលប៉ាគីស្ថានប្តេជ្ញាថានឹងអនុវត្តគម្រោងណាដែលជួយជំរុញឲ្យមានការជាប់ពាក់ព័ន្ធជាមួយប្រទេសជិតខាងនានាដើម្បីធ្វើឲ្យប៉ាគីស្ថានក្លាយជាប្រទេសមួយសម្រាប់ការអភិវឌ្ឍក្នុងតំបន់។
គម្រោង CPEC ត្រូវគេប៉ាន់ស្មានថានឹងនាំយកការវិនិយោគរបស់ចិនជាទឹកប្រាក់ជាង៦២ពាន់លានដុល្លារនៅក្នុងប្រទេសប៉ាគីស្ថាននៅអំឡុងទសវត្សរ៍ក្រោយនេះ។
លោកឯកអគ្គរដ្ឋទូត Jing បានថ្លែងថា ទស្សនៈកិច្ចជាផ្លូវលើកទីមួយរបស់លោកនាយករដ្ឋមន្ត្រី Khan ទៅប្រទេសចិននឹងជួយរឹតចំណងមិត្តភាពរវាងប្រទេសទាំងពីរទៅដល់កម្រិតកំពូល។
លោកបានថ្លែងបន្ថែមថា កិច្ចព្រមព្រៀងនានារវាងប្រទេសទាំងពីរនៅអំឡុងដំណើរទស្សនៈកិច្ចនេះត្រូវបានរំពឹងថានឹងជួយបន្ធូរបន្ថយឱនភាពពាណិជ្ជកម្មរវាងប្រទេសទាំងពីរ។ រដ្ឋាភិបាលក្រុងប៉េកាំងក៏មានគម្រោងប្រកាសអំពីជំនួយឥតសំណងដល់ប្រទេសប៉ាគីស្ថានដើម្បីជួយឲ្យប្រទេសនេះដោះស្រាយវិបត្តិតុល្យភាពនៃការទូទាត់សាច់ប្រាក់ផងដែរ។
លោកឯអគ្គរដ្ឋទូតចិនបានមានប្រសាសន៍ថា៖ «យើងចង់វិនិយោគបន្ថែមទៀតនៅក្នុងប្រទេសប៉ាគីស្ថាន និងទិញទំនិញបន្ថែមទៀតពីប៉ាគីស្ថាន។ ដើមទុនរបស់ចិន បច្ចេកវិទ្យារបស់ចិន និងទីផ្សារដ៏ធំរបស់ចិនអាចចូលរួមចំណែកដ៏ធំធេងទៅក្នុងការអភិវឌ្ឍនាពេលអនាគតរបស់ប្រទេសប៉ាគីស្ថាន»៕
