ប្រទេសចិនកំពុងការពារការវិនិយោគទុនជាប្រវត្តិសាស្រ្តដែលមានទឹកប្រាក់រាប់ពាន់លានដុល្លាររបស់ខ្លួននៅក្នុងប្រទេសប៉ាគីស្ថាន ដោយបានច្រានចោលការចោទប្រកាន់ថា កម្មវិធីអភិវឌ្ឍន៍សេដ្ឋកិច្ចកំពុងជំរុញសម្ព័ន្ធមិត្តដែលត្រូវការប្រាក់យ៉ាងខ្លាំងនៅតំបន់អាស៊ីខាងត្បូងមួយនេះឲ្យចូលក្នុង«អន្ទាក់បំណុលរបស់ចិន»។
លោក Wang Yi ទីប្រឹក្សារដ្ឋនិងរដ្ឋមន្រ្តីការបរទេសចិនដែលកំពុងបំពេញទស្សនកិច្ចប្រទេសនោះបានធ្វើកំណត់សម្គាល់កាលពីថ្ងៃសៅរ៍នៅក្នុងរដ្ឋធានីអ៊ីស្លាមម៉ាបាតបន្ទាប់ពីការចរចាជាមួយលោក Shah Mehmood Quereshi រដ្ឋមន្រ្តីការបរទេសរបស់ប៉ាគីស្ថាន។
កម្មវិធីទ្វេភាគីដ៏ធំមួយដែលគេស្គាល់ថា «របៀងសេដ្ឋកិច្ចចិននិងប៉ាគីស្ថាន»ជាផ្នែកដ៏សំខាន់មួយនៃការផ្តួចផ្តើមខ្សែក្រវ៉ាត់មួយនិងផ្លូវមួយរបស់ប្រធានាធិបតីចិនស៊ី ជីងពីង។
របៀងសេដ្ឋកិច្ចចិននិងប៉ាគីស្ថាន មានគោលបំណងស្ថាបនានិងធ្វើឲ្យប្រសើរឡើងនូវបណ្តាញដឹកជញ្ជូន គម្រោងថាមពល កំពង់ផែទឹកជ្រៅនៅតំបន់ Gwadar និងតំបន់សេដ្ឋកិច្ចពិសេសដើម្បីគាំទ្រការអភិវឌ្ឍឧស្សាហកម្មរបស់ប៉ាគីស្ថានជាមជ្ឈមណ្ឌលផលិតកម្មដ៏ធំមួយនៅឆ្នាំ២០៣០។
លោក Wang បាននិយាយថា ក្នុងរយៈពេល៤ឆ្នាំចុងក្រោយនេះ របៀងសេដ្ឋកិច្ចចិននិងប៉ាគីស្ថានបាននាំប្រាក់វិនិយោគរបស់ចិនប្រហែល១៩ពាន់លានដុល្លារចូលក្នុងប្រទេសប៉ាគីស្ថានហើយគម្រោង២២ផ្សេងទៀតបានត្រូវបញ្ចប់ឬនឹងត្រូវបញ្ចប់។
រដ្ឋមន្រ្តីការបរទេសចិនបានពន្យល់ថា គម្រោងចំនួន១៨បានផ្តល់ហិរញ្ញវត្ថុតាមរយៈការវិនិយោគទុនដោយផ្ទាល់ដោយចិនឬដោយជំនួយរបស់ចិន។ លោកក៏បានច្រានចោលការព្រួយកង្វល់អំពីតម្លាភាពរបស់គម្រោងរបៀងសេដ្ឋកិច្ចចិន និងប៉ាគីស្ថាន នោះ៕
