ក្រោយមានការចែកចាយតាមបណ្តាញសង្គម ពាក់ព័ន្ធនឹងកាស៊ីណូមួយថា អ្នកសារព័ត៌មានមកពីអង្គភាពប្រព័ន្ធផ្សព្វផ្សាយយ៉ាងតិចចំនួន ៧០០ មកទារលុយពីខ្លួននោះ អ្នកជំនាញក្នុងវិស័យសារព័ត៌មាន ស្នើឱ្យអាជ្ញាធរពាក់ព័ន្ធ និងក្រសួងព័ត៌មាន ស្រាវជ្រាវរកឫសគល់ដែលបណ្តាលឱ្យមានការផ្តល់លុយកាក់ឱ្យអ្នកកាសែតបែបនេះ ព្រោះអ្នកកាសែតមិនអាចទៅជំរិតទារប្រាក់ពីបុគ្គល ឬក្រុមណាមួយបានទេ។
កាស៊ីណូឈ្មោះ ថប ដាយអឹម៉ិន (Top Diamond Casion) ដែលមានទីតាំងនៅជិតព្រំដែនកម្ពុជាវៀតណាម ស្ថិតក្នុងឃុំភ្នំដិន ស្រុកគិរីវង់ ខេត្តតាកែវ បានចេញសេចក្តីជូនដំណឹងចុះ ថ្ងៃទី ៥ ខែកញ្ញា ដោយចោទថា អ្នកសារព័ត៌មានមកពីអង្គភាពចំនួន ៧០០ ទៅ ៩០០ អង្គភាពបានសុំប្រាក់ឧបត្ថម្ភពីកាស៊ីណូខ្លួនជារៀងរាល់ខែ។ នេះបើតាមសេចក្តីជូនដំណឹងរបស់កាស៊ីណូ ដែលត្រូវបានអតីតរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បង្ហោះក្នុងគណនីហ្វេសប៊ុករបស់លោកកាលពីថ្ងៃទី៧ ខែកញ្ញា។
អ្នកជំនាញប្រព័ន្ធផ្សព្វផ្សាយលើកឡើងថា ប្រសិនបើមានករណីនេះពិតមែន គឺអ្នកសារព័ត៌មានទាំងនោះ មិនបានអនុវត្តត្រឹមត្រូវតាមវិជ្ជាជីវៈនោះទេ ដូច្នេះអាជ្ញាធរខេត្ត និងក្រសួងព័ត៌មាន ត្រូវតែស្វែងរកមូលហេតុនៅក្រោយរឿងនេះ និងត្រូវក្រើនរំឭកអ្នកសារព័ត៌មាន ឱ្យគោរពតាមក្រមសីលធម៌ វិជ្ជាជីវៈរបស់ខ្លួនឱ្យបានខ្ជាប់ខ្ជួន ដោយកុំទៅធ្វើសកម្មភាពខុសបែបនោះបន្តទៀត។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា លោក ណុប វី ថ្លែងថា អ្នកកាសែតទាំងអស់ត្រូវតែពង្រឹង និងគោរពក្រមសីលធម៌វិជ្ជាជីវៈឱ្យបានត្រឹមត្រូវ ដោយមិនត្រូវយកលុយពីបុគ្គលណា ឬតាមទីតាំងរកស៊ីណានោះទេ ដើម្បីរក្សាសេចក្តីថ្លៃថ្នូររបស់អាជីពសារព័ត៌មាន និងកុំឱ្យប៉ះពាល់ដល់អ្នកសារព័ត៌មានដទៃទៀតដែលប្រកបវិជ្ជាជីវៈត្រឹមត្រូវ។
លោកចង់ឃើញអាជ្ញាធរខេត្ត និងក្រសួងព័ត៌មាន បើកការស៊ើបអង្កេត និងបំភ្លឺសាធារណជនអំពីអង្គហេតុដែលជំរុញឱ្យម្ចាស់កាស៊ីណូឱ្យលុយទៅអ្នកកាសែត។
លោកថ្លែងថា៖ «បើសិនជាមិនមានភ្លើងក៏មិនមានផ្សែងដែរ។ អ៊ីចឹងហើយ នៅក្នុងការចោទប្រកាន់អ្នកសារព័ត៌មានថា បានទៅយកលុយអីហ្នឹងហើយនឹងសំណួរថា តើហេតុអ្វីបានជាកាស៊ីណូហ្នឹងត្រូវផ្តល់លុយឱ្យអ្នកសារព័ត៌មានជាប្រចាំ? មានអ្វីនៅពីក្រោយ? វាគួរតែស៊ើបអង្កេតឱ្យបានហ្មត់ចត់»។
លោកបញ្ជាក់ទៀតថា នៅពេលអ្នកសារព័ត៌មានទៅយកលុយពីបុគ្គលផ្សេង ដែលមិនមែនជាអង្គភាពរបស់ខ្លួន វាបានបង្ហាញពីទង្វើខុសឆ្គងក្នុងវិជ្ជាជីវៈសារព័ត៌មាន ហើយបានជះផលអាក្រក់ធ្ងន់ធ្ងរដល់សង្គម ព្រោះថា បើអ្នកសារព័ត៌មានធ្វើបែបនោះ គឺមិនបានជួយបង្ហាញចំណុចអវិជ្ជមានក្នុងសង្គម ប៉ុន្តែថែមទាំងជួយបិទបាំងចំណុចអវិជ្ជមានទៅវិញ។
លោកបន្ថែមថា៖ «កាលណា គឺថា យករបស់ ស្រណោះដៃ អ៊ីចឹងចំណុចហ្នឹងវាធ្វើឱ្យមានផលប៉ះពាល់ទៅដល់ឯករាជ្យភាពនៅក្នុងការសរសេរព័ត៌មានជាមិនខាន។ ហើយវាមានផលប៉ះពាល់ធ្ងន់ធ្ងរណាស់ នៅក្នុងករណីនៃការយកលុយជាថ្នូរនឹងការបិទបាំង ឬការលាក់បាំងការណ៍ពិតអ្វីមួយដែលគួរតែបកអាក្រាតនៅក្នុងសង្គមហ្នឹង គឺថា វានឹងធ្វើឱ្យជះផលប៉ះពាល់អវិជ្ជមានធ្ងន់ធ្ងរទៅដល់សង្គម»។
ស្រដៀងគ្នានេះដែរ នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជា លោក អ៊ិត សូធឿត យល់ថា បើអ្នកកាសែតទទួលយកប្រាក់សគុណ នោះទំនាស់ផលប្រយោជន៍នឹងកើតមាន ព្រោះពួកគេនឹងមិនហ៊ានលាតត្រដាងនូវអ្វីដែលពួកគេបានរកឃើញ។
លោកបន្ថែមថា៖ «សម្រាប់ក្រសួងដែលជាសេនាធិការរបស់រាជរដ្ឋាភិបាលនៅក្នុងការមើលការខុសត្រូវនៅក្នុងវិស័យសារព័ត៌មាននេះ គាត់គួរតែផ្សព្វផ្សាយឡើងវិញអំពីគោលការណ៍ក្រមសីលធម៌វិជ្ជាជីវៈ ហើយក៏ដូចជាការដាស់តឿនទៅដល់អ្នកសារព័ត៌មានទាំងអស់ ក្នុងការបំពេញក្រមសីលធម៌វិជ្ជាជីវៈរបស់ខ្លួនឱ្យបានខ្ជាប់ខ្ជួន»។
វីអូអេមិនទាន់អាចសុំការបញ្ជាក់ពីភាគីកាស៊ីណូ ថបដាយអឹម៉ិន បាននៅឡើយទេ។ ដោយឡែកអភិបាលខេត្តតាកែវ លោក អ៊ូច ភា បដិសេធមិនផ្តល់ការអត្ថាធិប្បាយ ដោយថា លោកកំពុងពិនិត្យសុខភាពនៅក្រៅប្រទេស។
លោកប្រាប់វីអូអេនៅថ្ងៃសុក្រនេះថា៖ «ខ្ញុំជាប់នៅក្រៅប្រទេសកំពុងពិនិត្យសុខភាពបន្តិច»។
វីអូអេក៏មិនទាន់អាចសុំការអត្ថាធិប្បាយពីរដ្ឋមន្ត្រីក្រសួងព័ត៌មាន លោក នេត្រ ភក្ត្រា ដែលទើបឡើងកាន់តំណែងថ្មីនៅក្រសួងព័ត៌មានបានដែរ។
កាលពីថ្ងៃទី ១ ខែកញ្ញា ឆ្នាំ ២០២២ អតីតអ្នកនាំពាក្យក្រសួងព័ត៌មានលោក មាស សុភ័ណ្ឌ បានឱ្យដឹងថា ក្នុងឆ្នាំ ២០២២ អង្គភាពសារព័ត៌មានជាតិនិងបរទេស ដែលបានចុះបញ្ជីនៅក្រសួងព័ត៌មានមានចំនួន ២,១៥៤ អង្គភាព ដោយក្នុងនោះមាន គេហទំព័រនិង TV Online ចំនួន ៨៦១ អង្គភាព កាសែតចំនួន ៤៤៦ អង្គភាព ស្ថានីយវិទ្យុ FM ចំនួន ៨៣ ស្ថានីយនៅរាជធានីភ្នំពេញ និងតាមបណ្ដាលខេត្តចំនួន ១៣៧ ស្ថានីយ ក្រៅពីនោះជា សមាគមសារព័ត៌មាន ទស្សនាវដ្ដី រោងពុម្ព និងភ្នាក់ងារផ្សព្វផ្សាយពាណិជ្ជកម្មជាដើម។
ពាក់ព័ន្ធការបំពេញការងាររបស់អ្នកសារព័ត៌មាន ខណៈចំនួនអង្គភាពសារព័ត៌មានច្រើនបែបនេះ នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី ចង់ឃើញយន្តការនៃការបង្កើតក្រុមប្រឹក្សាព័ត៌មានជាតិកម្ពុជាចេញជារូបរាង ដើម្បីអាចតាមដាន ឃ្លាំមើល និងដាក់ពិន័យលើអ្នកសារព័ត៌មានដែលធ្វើខុសវិជ្ជាជីវៈ៕
