មេដឹកនាំនយោបាយចក្រភពអង់គ្លេសកំពុងជំរុញលើកចុងក្រោយឲ្យមានការបោះឆ្នោតនានានៅមុនការបោះឆ្នោតជាតិនៅថ្ងៃព្រហស្បតិ៍នេះ ដែលត្រូវបានគ្របដណ្តប់ដោយបញ្ហានៃការចាកចេញរបស់អង់គ្លេសពីសហភាពអ៊ឺរ៉ុប ឬហៅកាត់ថា Brexit។ ក្រុមអ្នកវិភាគជាច្រើនបាននិយាយថា គោលនយោបាយរបស់គណបក្សនានាកំពុងបង្កការភាន់ច្រឡំអំពី Brexit និងធ្វើឲ្យទំនាក់ទំនងនាពេលអនាគតរបស់ចក្រភពអង់គ្លេសជាមួយនឹងសហភាពអ៊ឺរ៉ុបកាន់តែធ្លាក់ចុះដុនដាប។
ឧស្សាហកម្មនេសាទរួមចំណែកច្រើនបំផុតតែ០,១ភាគរយប៉ុណ្ណោះដល់សេដ្ឋកិច្ចរបស់ចក្រភពអង់គ្លេស។ ក៏ប៉ុន្តែវាគឺជានិមិត្តរូបសំខាន់បំផុតសម្រាប់ពួកអ្នកបោះឆ្នោតជាច្រើនដែលគាំទ្រការចាកចេញរបស់អង់គ្លេសពីសហភាពអ៊ឺរ៉ុបហៅកាត់ថា Brexit ជាអ្នកដែលចង់គ្រប់គ្រងដែនទឹក និងរាំងខ្ទប់មិនឲ្យទូកនេសាទរបស់អ៊ឺរ៉ុបចូលមកនេសាទបាន។
លោក Boris Johnson នាយករដ្ឋមន្រ្តីចក្រភពអង់គ្លេសបានថ្លែងថា៖ «ខ្ញុំគិតថា នេះគឺជា ឱកាសដែលត្រូវក្រឡេកមើលទៅលើយុទ្ធសាស្រ្តណា ដែលអាចធ្វើឲ្យប្រទេសគ្រប់គ្រងឧស្សាហកម្មដ៏សំខាន់នេះឡើងវិញ បន្ទាប់ពីយើងបញ្ចប់រឿង Brexit នៅខែមករា»។
ប៉ុន្តែ៣ភាគ៤នៃទិន្នផលនេសាទរបស់អង់គ្លេសគឺ សម្រាប់នាំចេញ ដែលភាគច្រើននាំចេញទៅសហភាពអ៊ឺរ៉ុប ដូច្នេះរបាំងពាណិជ្ជកម្មនានាអាចប៉ះពាល់ដល់ឧស្សាហកម្មនេះ។ ការដោះដូរពាណិជ្ជកម្ម Brexit ត្រូវបានគេមិនអើពើទាល់តែសោះ នេះបើយោង តាមបាយការណ៍ថ្មីមួយ ដែលព្រមានថា គោលនយោបាយរបស់គណបក្សទាំងអស់ហាក់ដូចជានាំឲ្យមានការមន្ទិលសង្ស័យ នៅពេលនិយាយដល់បញ្ហា Brexit។
ក្បួនយុទ្ធសាស្រ្តរបស់គណបក្សអភិរក្សនិយមគឺត្រូវបញ្ចប់បញ្ហា Brexit។ ប៉ុន្តែចក្រភពអង់គ្លេសមិនទាន់បានចរចាអំពីទំនាក់ទំនងរបស់ខ្លួននាពេលអនាគតជាមួយនឹងសហភាពអ៊ឺរ៉ុបនៅឡើយទេ និងទំនងជានឹងអាចប្រើពេលច្រើនឆ្នាំ។
អ្នកស្រី Jill Rutter មកពីកម្មវិធីចក្រភពអង់គ្លេសនៅក្នុងការផ្លាស់ប្តូររបស់អ៊ឺរ៉ុបបាននិយាយថា៖ «ចំណុចមួយក្នុងចំណោមចំណុចនានាដែលគណបក្សអភិរក្សនិយមបានលើកឡើងគឺថា យើងអាចទទួលបានកិច្ចព្រមព្រៀងពាណិជ្ជកម្មល្អមួយជាមួយនឹងសហភាពអ៊ឺរ៉ុបនៅមុនខែធ្នូ ឆ្នាំ២០២០។ យើងនឹងមិនសុំពន្យាពេលទៀតទេ។ វាមិនសមហេតុសមផលទេចំពោះពលរដ្ឋស្ទើរតែទាំងអស់។ វាមិនច្បាស់ថាតើគណបក្សអភិរក្សនិយមនឹងដើរតាមវិធីណានោះទេពាក់ព័ន្ធនឹងបញ្ហាទំនាក់ទំនងនេះ»។
លោក Jeremy Corbyn មេដឹកនាំគណបក្សពលកម្មដែលជាគណបក្សប្រឆាំង បានព្យាយាមផ្តោតលើបញ្ហាផ្សេងៗទៀតដូចជាវិស័យសុខភាពជាដើម។ លោក Jeremy Corbyn មេដឹនាំគណបក្សពលកម្មបានថ្លែងថា៖ «តើអ្នកមិនចង់បានរដ្ឋាភិបាលមួយដែលផ្តល់តម្លៃដល់អ្នករាល់គ្នានៅក្នុងសង្គមរបស់យើងទេឬ?»។ លោក Corbyn បានសន្យាថា នឹងធ្វើការចរចាឡើងវិញដើម្បីទទួលបានកិច្ចព្រមព្រៀង Brexit ប្រសើរមួយ ហើយបន្ទាប់មករៀបចំធ្វើប្រជាមតិ។
អ្នកស្រី Jill Rutter នៃកម្មវិធីចក្រភពអង់គ្លេសនៅក្នុងការផ្លាស់ប្តូររបស់អឺរ៉ុបបានថ្លែងថា៖ «ពួកគេនិយាយអំពីភាពមិនពេញលេញជាមួយនឹងបទបញ្ញត្តិនៃប្លុកពាណិជ្ជកម្ម Single Market។ ខ្ញុំគិតថា សហភាពអ៊ឺរ៉ុបប្រហែលគួរតែសួរថាតើមានរឿងអ្វីកើតឡើងពីព្រោះថា ពួកគេពិតជា មិនចូលចិត្តទេ នៅពេលដែលអតីតនាយករដ្ឋមន្រ្តីលោកស្រី Theresa May និយាយថាលោកស្រីចង់ជ្រើសរើសនិងបញ្ចូលច្បាប់ណាដែលលោកស្រីចង់បាន»។
គណបក្សប្រជាធិបតេយ្យសេរីនិយមបានបញ្ជាក់ថា ពួកគេនឹងលុបចោល Brexit ហើយអាចនឹងមានឥទ្ធិពលប្រសិនបើគ្មានគណបក្សណាមួយមានសំឡេងភាគច្រើន។
ប៉ុន្តែការស្ទង់មតិនានាបង្ហាញថាគណបក្សអភិរក្សនិយមរបស់លោក Boris Johnson នឹងឈ្នះសំឡេងភាគច្រើន។ ប៉ុន្តែអាចមានការភ្ញាក់ផ្អើល។ មនុស្សប្រមាណ ជា ៣,៨៥លាននាក់ទើបតែចុះឈ្មោះបោះឆ្នោតកាលពីប៉ុន្មានសប្តាហ៍ថ្មីៗនេះហើយ ប្រហែលជា២ភាគ៣នៃពួកគេទាំងនោះមានអាយុក្រោម៣៥ឆ្នាំ។ ពួកគេហាក់ដូចជា មិនបោះឆ្នោតឲ្យគណបក្សអភិរក្សនិយមទេ។
លោក Jason Palmer មន្រ្តីសហជីពនិសិត្សនៃសាកលវិទ្យាល័យ Bristol បាននិយាយថា៖ «ខ្ញុំគិតថាបញ្ហាជាច្រើនកើតចេញពីភាពមិនសប្បាយចិត្តនៅក្នុងបទពិសោធន៍ដែលធ្លាប់ឆ្លងកាត់។ ពួកយុវវ័យទាំងនោះគិតថាសំឡេងរបស់ពួកគេគ្មានតម្លៃនៅក្នុងនយោបាយ ឬក៏ថាពួកគេគ្មានសំឡេង។ ឧទាហរណ៍ដូចជាបទពិសោធន៍នៅក្នុងការធ្វើប្រជាមតិ Brexit កាលពីឆ្នាំ២០១៦ជាដើម»។
ការភ្ញាក់ផ្អើលខ្លាំងបំផុតអាចកើតឡើងនៅក្នុងមណ្ឌលបោះឆ្នោត Uxbridge ផ្ទាល់របស់នាយករដ្ឋមន្ត្រី។ លោក Ali Milani បេក្ខជនមកពីគណបក្សពលកម្មសម្រាប់មណ្ឌល Uxbridge បានថ្លែងថា៖«យើងត្រូវការតែសំឡេងឆ្នោត៥ភាគរយទៀតប៉ុណ្ណោះដើម្បីឈ្នះអាសនៈនេះ ដើម្បីដកតំណែងនាយករដ្ឋមន្រ្តី ដែលនឹងក្លាយជារឿងដំបូងកើតឡើងនៅក្នុងប្រវត្តិប្រជាធិបតេយ្យរបស់ចក្រភពអង់គ្លេស»។
អាកាសធាតុនៅចក្រភពអង់គ្លេសក៍ជាបញ្ហារាំងស្ទះសំខាន់មួយផងដែរ។ ការព្យាករណ៍អាកាសធាតុធ្លាក់ចុះត្រជាក់អាចធ្វើឲ្យពួកអ្នកបោះឆ្នោតមួយចំនួនសម្រេចមិនចេញទៅបោះឆ្នោត។ តើចក្រភពអង់គ្លេសនឹងបោះឆ្នោតផ្លាស់ប្តូរទិសដៅ ឬមួយក៏ការបោះឆ្នោតនឹងរុញច្រានប្រទេសឲ្យធា្លក់ចូលក្នុងវិបត្តិនយោបាយកាន់តែជ្រៅ? គេនឹងដឹងចម្លើយនេះនៅព្រឹកថ្ងៃសុក្រនេះ៕
ប្រែសម្រួលដោយ ស៊ូ ពេជ្រចិន្តា
