ទីផ្សារភាគហ៊ុនអាស៊ី បានធ្លាក់ចុះ ហើយតម្លៃប្រេង បានហក់ឡើងខ្ពស់ បន្ទាប់ពីប្រធានាធិបតីរុស្ស៊ីលោកVladimir Putin បានប្រកាសធ្វើសកម្មភាពយោធានៅក្នុងប្រទេសអ៊ុយក្រែន។ តម្លៃភាគហ៊ុនក្នុងទីក្រុងតូក្យូប្រទេសជប៉ុន និងទីក្រុងសេអ៊ូលរបស់កូរ៉េខាងត្បូង បានធ្លាក់ចុះប្រមាណ ២% ហើយតម្លៃភាគហ៊ុនក្រុងហុងកុង និងក្រុង Sydney ប្រទេសអូស្ត្រាលី បានធ្លាក់ ចុះប្រមាណ ៣%។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន AP។
ដោយឡែកតម្លៃប្រេងឥន្ធនៈ បានហក់ឡើងជិត ៣ ដុល្លារអាមេរិកក្នុងមួយធុង ដោយបារម្ភពីលទ្ធភាពនៃការរអាក់រអួលនៃការផ្គត់ផ្គត់ប្រេងរបស់រុស្ស៊ី។ នៅមុននេះ សន្ទស្សន៍ភាគហ៊ុននៅផ្សារភាគហ៊ុន Wall Street S&P បានធ្លាក់ចុះប្រមាណ ១,៨% ដែលជាចំនួនទាបក្នុងរយៈ ពេល៨ខែ បន្ទាប់ពីរដ្ឋាភិបាលវិមានក្រឹមឡាំងរបស់រុស្ស៊ី និយាយថា ក្រុមឧទ្ទាមនៅក្នុងតំបន់ខាងកើតអ៊ុយក្រែន បានស្នើសុំជំនួយយោធាពីរុស្ស៊ី។
ពួកអ្នកព្យាករណ៍ និយាយថា សេដ្ឋកិច្ចអាស៊ី ប្រឈមហានិភ័យតិចជាងតំបន់អឺរ៉ុបមកពីលទ្ធភាពនៃការវាយប្រហាររបស់រុស្ស៊ី និងការដាក់ទណ្ឌកម្មរបស់ប្រទេសលោកខាងលិច។ ក៏ប៉ុន្តែ ពួកគេ និយាយទៀតថា សេដ្ឋកិច្ចដែលត្រូវការធ្វើការនាំចូលដូចជាប្រេង អាចឡើងថ្លៃកាន់តែខ្លាំងឡើង ប្រសិនបើ ការផ្គត់ផ្គង់ទាំងនោះមកពីរុស្ស៊ីដែលជាប្រទេសផលិតប្រេងធំទី៣ ត្រូវបានបង្អាក់នោះ។
អ្នកវិនិយោគទុន មានក្តីបារម្ភពីលទ្ធភាពនៃផលប៉ះពាល់ដែលអាចកើតមានឡើងលើផែនការរបស់ធនាគារកណ្តាលសហព័ន្ធ ដែលព្យាយាមកាត់បន្ថយអតិផរណា ដោយបានដកចេញនូវអត្រាការប្រាក់ទាប និងប្រាក់ឧត្ថម្ភផ្សេងៗដែលបានជួយជំរុញតម្លៃភាគហ៊ុន៕
