នៅទីក្រុង Melbourne (មែលប៊ន) នៃប្រទេសអូស្ត្រាលី ដើម្បីប្រារព្ធខួបលើកទី ៥០ ឆ្នាំនៃទំនាក់ទំនងអូស្ត្រាលីនិងអាស៊ាន មេដឹកនាំសមាគមអាស៊ាន រួមមានកម្ពុជាផងដែរ និងនាយករដ្ឋមន្រ្តីអូស្ត្រាលីបានប្តេជ្ញាធ្វើឱ្យទំនាក់ទំនងកាន់តែស៊ីជម្រៅ។ នាយករដ្ឋមន្ត្រីកម្ពុជានិងអូស្ត្រាលីក៏មើលឃើញឱកាសដើម្បីរឹតចំណងទ្វេភាគីផងដែរ។
បើតាមសេចក្តីថ្លែងការណ៍ទីក្រុងមែលប៊ន ចុះថ្ងៃទី ៦ ខែមីនា ឆ្នាំ ២០២៤ នៅក្នុងបរិបទនៃបញ្ហាប្រឈមផ្នែកបរិស្ថានដ៏ស្មុគស្មាញ ភាពមិនប្រាកដប្រជានៃសេដ្ឋកិច្ច និងការប្រកួតប្រជែងជាយុទ្ធសាស្រ្ត មេដឹកនាំទាំងនោះប្តេជ្ញាចិត្តយ៉ាងមុតមាំនៅក្នុងការធ្វើការរួមគ្នា ដើម្បីដោះស្រាយបញ្ហាប្រឈមរួម ប្រកាន់ខ្ជាប់សណ្តាប់ធ្នាប់តំបន់ដោយផ្អែកលើច្បាប់ និងកំណត់អនាគតរួម។
សេចក្តីថ្លែងការណ៍បញ្ជាក់ថា៖ «ភាពជាដៃគូរយៈពេល ៥០ ឆ្នាំរបស់យើងបានកំណត់ទីតាំងយើងឱ្យបានល្អ ដើម្បីឆ្លើយតបទៅនឹងការផ្លាស់ប្តូរយុទ្ធសាស្រ្តបច្ចុប្បន្ន និងដែលកំពុងរីកចម្រើន និងបញ្ហាប្រឈមដ៏ស្មុគស្មាញសម្រាប់អនាគតកាន់តែមានសុវត្ថិភាព ធន់ និងវិបុលភាព។ យើងប្តេជ្ញាយ៉ាងមុតមាំក្នុងការបន្តធ្វើការជាមួយគ្នា ទាញយកឱកាសដែលមាន ដើម្បីបង្កើនភាពជាដៃគូរបស់យើង។ យើងប្រារព្ធខួប ៥០ ឆ្នាំនៃភាពជាដៃគូរហូតមកដល់បច្ចុប្បន្ន ហើយស្វាគមន៍ភាពជាដៃគូនាពេលអនាគតនៅចំពោះមុខយើង»។
ភាគីទាំងពីរក៏បង្ហាញឆន្ទៈនៅក្នុងការរក្សានិងលើកកម្ពស់សន្តិភាព និងស្ថិរភាពក្នុងតំបន់ តាមរយៈការអនុវត្តរបៀបវារៈស្ត្រី សន្តិភាព និងសន្តិសុខ (WPS) តាមរយៈយន្តការដែលដឹកនាំដោយអាស៊ានដែលមានស្រាប់ ព្រមទាំងបន្តកិច្ចសហប្រតិបត្តិការក្នុងការប្រឆាំងឧក្រិដ្ឋកម្មឆ្លងដែន រួមទាំងការប្រយុទ្ធប្រឆាំងនឹងការជួញដូរមនុស្ស។នេះបើតាមសេចក្តីថ្លែងការណ៍។
គួររំឭកថា ក្នុងវិស័យការពារសន្តិសុខ ប្រទេសអូស្ត្រាលីជាប្រទេសស្ថិតនៅក្នុងកិច្ចព្រមព្រៀង AUKUS ជាមួយសហរដ្ឋអាមេរិក និងអង់គ្លេស ដែលត្រូវបានបង្កើតឡើងដើម្បីតទល់ការបង្កើនភាពគឃ្លើនរបស់ចិននៅក្នុងតំបន់អាស៊ីប៉ាស៊ីហ្វិក ទីដែលប្រទេសសមាជិកអាស៊ានខ្លះត្រូវគេមើលឃើញថាមានទំនាក់ទំនងយោធាកាន់តែខ្លាំងជាមួយប្រទេសចិន។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី ៦ ខែមីនា ឆ្នាំ ២០២៤ នាយករដ្ឋមន្ត្រីកម្ពុជា លោក ហ៊ុន ម៉ាណែត បានលើកឡើងនៅក្នុងកិច្ចប្រជុំកំពូលពិសេសថា អាស៊ាននិងអូស្ត្រាលីគឺជាដៃគូដ៏ស្និទ្ធស្នាល និងថាទំនាក់ទំនងនេះបានរីកលូតលាស់កាន់តែខ្លាំងឡើងៗជាលំដាប់ ដែលនាំមកនូវផលប្រយោជន៍ជាក់ស្តែងសម្រាប់ប្រជាជន ហើយបើកផ្លូវឱ្យដំឡើងភាពជាដៃគូយុទ្ធសាស្ត្រគ្រប់ជ្រុងជ្រោយកាលពីឆ្នាំ ២០២១។
បើតាមក្រសួងការបរទេសកម្ពុជា លោក ហ៊ុន ម៉ាណែត ថ្លែងថា៖ «ទំនាក់ទំនងអាស៊ាន-អូស្ត្រាលី តែងតែឈរលើបំណងប្រាថ្នារួម ក្នុងការលើកកម្ពស់សន្តិភាព ស្ថិរភាព និងវិបុលភាពនៅក្នុងតំបន់ ដោយផ្អែកលើការគោរពគ្នាទៅវិញទៅមក ការជឿជាក់គ្នា និងការផ្តល់ផលប្រយោជន៍ទៅវិញទៅមក»។
ផ្តោតលើទំនាក់ទំនងទ្វេភាគីរវាងកម្ពុជានិងអូស្ត្រាលីវិញ លោក ហ៊ុន ម៉ាណែត បានវាយតម្លៃខ្ពស់ចំពោះការចូលរួមរបស់អូស្ត្រាលីនៅក្នុងដំណើរការសន្តិភាពនៅកម្ពុជា ជាពិសេសការគាំទ្រដល់ការអភិវឌ្ឍវិស័យជាច្រើននៅកម្ពុជា។
បើតាមក្រសួងការបរទេសកម្ពុជា លោក ហ៊ុន ម៉ាណែត បានស្នើឱ្យភាគីពាក់ព័ន្ធនៃប្រទេសទាំងពីរពង្រឹងកិច្ចសហប្រតិបត្តិការ ដើម្បីបង្កើនការផ្លាស់ប្តូរពាណិជ្ជកម្ម និងការវិនិយោគ ខណៈនាយករដ្ឋមន្ត្រីអូស្ត្រាលីមើលឃើញពីឱកាសនៃការពង្រីកកិច្ចសហប្រតិបត្តិការនៅក្នុងការលើកកម្ពស់ផលិតភាពកសិកម្ម និងជំនាញផ្នែកវិទ្យាសាស្ត្រ។
នៅក្នុងសន្និសីទសារព័ត៌មានស្តីលទ្ធផលនៃដំណើរទស្សនកិច្ចរបស់លោក ហ៊ុន ម៉ាណែត ទៅកាន់ប្រទេសអូស្រ្តាលី រដ្ឋមន្ត្រីប្រតិភូអមនាយករដ្ឋមន្ត្រី លោក តាន់ ហ្សង់ហ្វ្រង់ស័រ បានថ្លែងកាលពីថ្ងៃពុធថា៖ «សូមជម្រាបជូនថា កម្ពុជា-អូស្ត្រាលីមានទំនាក់ទំនងនឹងគ្នាយូរអង្វែងជាង ៧ ទសវត្សរ៍កន្លងមកហើយ ហើយអូស្ត្រាលីជួយកម្ពុជាច្រើនណាស់ ជួយខ្លាំង ហើយជួយច្រើនណាស់ ពិសេសនៅអំឡុងពេលនៃការស្វែងរកសន្តិភាពជូនកម្ពុជានៅក្នុងទសវត្សរ៍ឆ្នាំ១៩៩០ ហើយក្នុងពេលនេះ អូស្ត្រាលីបន្តជួយកម្ពុជាក្នុងការអភិវឌ្ឍធនធានមនុស្ស និងក្នុងវិស័យគន្លឹះៗជាច្រើន ដូចជាកសិកម្ម សុខាភិបាល ការបោសសម្អាតមីន សន្តិសុខ និងការពារសន្តិសុខ។ល។»។
អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់វីអូអេថា លទ្ធផលនៃកិច្ចប្រជុំនេះបង្ហាញថាអូស្ត្រាលីមានការប្តេជ្ញាចិត្តខ្ពស់នៅក្នុងការពង្រឹងនិងពង្រីកកិច្ចសហប្រតិបត្តិការដែលមានស្រាប់ ខណៈព្យាយាមបង្កើនកិច្ចសហប្រតិបត្តិការថ្មី ដើម្បីឱ្យទំនាក់ទំនងរវាងអាស៊ាននិងអូស្ត្រាលីកាន់តែល្អប្រសើរ។
បើតាមអ្នកវិភាគរូបនេះ អូស្ត្រាលីមើលឃើញពីសក្តានុពលរបស់អាស៊ានសម្រាប់ការវិនិយោគរបស់ខ្លួននិងការពង្រីកឥទ្ធិពលរបស់ខ្លួន ហើយអាស៊ានក៏ស្វាគមន៍ចំពោះការចូលរួមរបស់អូស្ត្រាលីផងដែរ។
លោកថ្លែងថា៖ «ខ្ញុំគិតថាជាចំណុចមួយដែលអាស៊ានក៏សាទរចំពោះការចូលរួមនិងកិច្ចសហប្រតិបត្តិការរបស់អូស្ត្រាលីដែរ ដោយសារតែអាស៊ានជាទូទៅ អាស៊ានមើលឃើញថា បើសិនជាខ្លួនអាចពង្រឹងទំនាក់ទំនងរវាងដៃគូសន្ទនារបស់អាស៊ាន ជាពិសេសប្រទេសដែលមានកំណើនសេដ្ឋកិច្ចខ្ពស់ ដែលមានសន្តិសុខនិងសណ្តាប់ធ្នាប់ល្អប្រសើរ អាស៊ានអាចនឹងការពារមជ្ឈភាពរបស់អាស៊ាន មិនឱ្យបែកបាក់ និងមិនឱ្យចាប់ខាងនៅក្នុងជម្លោះភូមិសាស្ត្រនយោបាយ។ អ៊ីចឹងហើយអូស្ត្រាលីគាត់មើលឃើញពីចំណុចត្រង់នេះរបស់អាស៊ានដែរ បានជាគាត់ធ្វើម៉េចពង្រឹង ហើយនិងចូលរួមក្នុងការអភិវឌ្ឍសេដ្ឋកិច្ចអាស៊ាន ធ្វើម៉េចឱ្យមានវិបុលភាពផ្នែកសេដ្ឋកិច្ច»។
អ្នកវិភាគរូបនេះអះអាងថា ចំណងទាក់ទងរវាងកម្ពុជានិងអូស្ត្រាលីមានភាពល្អប្រសើរ ប៉ុន្តែលោកថា ដើម្បីទទួលបានផលប្រយោជន៍ច្រើន កម្ពុជាត្រូវពង្រឹងស្ថាប័នសាធារណៈ បើកលំហសេរីភាពនយោបាយ សិទ្ធិមនុស្សនិងលទ្ធិប្រជាធិបតេយ្យក្នុងប្រទេសផងដែរ៕
វេទិកាបញ្ចេញមតិ