លោកនាយករដ្ឋមន្រ្តី ហ៊ុន ម៉ាណែត កាលពីថ្ងៃអាទិត្យ បានអំពាវនាវទៅកាន់អ្នកវិនិយោគ សូមកុំរកស៊ីផ្នែកល្បែងស៊ីសងនៅកម្ពុជា ហើយលោកថា រដ្ឋាភិបាលរបស់លោកក៏មិនអនុញ្ញាតដែរ។
លោក ហ៊ុន ម៉ាណែត ថ្លែងបែបនេះ នៅក្នុងពិធីសំណេះសំណាលជាមួយប្រជាពលរដ្ឋខ្មែរនៅទីក្រុង Melbourne (មែលប៊ន) នៃប្រទេសអូស្រ្តាលី ក្នុងពេលលោកទៅបំពេញទស្សនកិច្ចនៅទីនោះ។
លោក ហ៊ុន ម៉ាណែត បញ្ជាក់ថា ការរកស៊ីផ្នែកល្បែងមិនចំណេញអ្វីដល់កម្ពុជាឡើយ ហើយគោលដៅរបស់រដ្ឋាភិបាលគឺ ត្រូវពង្រាយរោងចក្រ បង្កើតការងារ និងបង្កើនចំណូលទៅដល់ប្រជាពលរដ្ឋ មិនមែនពង្រាយទីតាំងល្បែងនៅទូទាំងប្រទេសឡើយ។
លោក ហ៊ុន ម៉ាណែត ថ្លែងថា៖ «សូមអ្នកវិនិយោគ ខ្ញុំសូមយោគយល់ ព្រោះអានេះវាអត់ចំណេញប៉ុន្មានទេ ហើយវាបង្កការលំបាកទៀត ទោះបីជាស្របច្បាប់ក៏ដោយ យើងត្រូវតែដកចេញ»។
លោក ហ៊ុន ម៉ាណែត បន្ថែមថា លោកក៏បានបញ្ជាឱ្យផ្អាកការផ្តល់អាជ្ញាបណ្ណសម្រាប់ជំនួញផ្នែកល្បែងនេះ ហើយពិចារណាលុបចោលអាជ្ញាបណ្ណជាបន្តបន្ទាប់។
គួរបញ្ជាក់ថា កាលពីខែកុម្ភៈ លោក ហ៊ុន ម៉ាណែត បានបញ្ជាឱ្យអាជ្ញាធរខេត្តរាជធានីទាំងអស់ត្រួតពិនិត្យទីតាំងល្បែងផ្សងសំណាងនៅទូទាំងប្រទេស ក្នុងនោះមានការបិទល្បែងឡូតូផងដែរ៕
វេទិកាបញ្ចេញមតិ