អភិបាលខេត្តព្រះសីហនុ លោក យន្ត មីន បានថ្លែងការពារការហូរចូលនៃជនជាតិចិនក្នុងខេត្តព្រះសីហនុ ដែលមានចំនួនប្រមាណជា៧ម៉ឺននាក់ ហើយកំពុងស្នាក់ក្នុងខេត្តនេះ ដោយនិយាយថា បានផ្តល់ផលវិជ្ជមានយ៉ាងច្រើនដល់ការអភិវឌ្ឍក្នុងខេត្ត។
ព័ត៌មានផ្សព្វផ្សាយលើទំព័រហ្វេសប៊ុករបស់រដ្ឋបាលខេត្តព្រះសីហនុនៅថ្ងៃសុក្រនេះបញ្ជាក់ថា អគ្គនាយកអន្តោប្រវេសន៍ និងគណៈអភិបាលខេត្តព្រះសីហនុនៅព្រឹកថ្ងៃទី៧ខែកុម្ភៈឆ្នាំ២០១៩បានបើកកិច្ចប្រជុំបូកសរុបការស្រង់ស្ថិតិជំហានដំបូងជនបរទេសស្នាក់នៅ និងធ្វើអាជីវកម្មក្នុងខេត្តព្រះសីហនុ។ ព័ត៌មានដដែលបង្ហាញថា ជនបរទេសស្នាក់នៅអចិន្ត្រៃយ៍ក្នុងខេត្តព្រះសីហនុមានចំនួន៤០.៧៧០នាក់ ស្រី៨.៣៨៧នាក់ មាន៥៧សញ្ជាតិ និងមានអាជីវកម្មធុនតូចចំនួន១៦៧ប្រភេទ តាមគោលដៅអាជីវកម្មចំនួន២០៥២កន្លែង។
ទំព័រហ្វសប៊ុករដ្ឋបាលខេត្តព្រះសីហនុនោះបានស្រង់សម្តីរបស់លោក យន្ត មីន អភិបាលខេត្តព្រះសីហនុថា អ្នកវិនិយោគ និងទេសចរចិនស្នាក់នៅខេត្តព្រះសីហនុមានប្រមាណជា៧ម៉ឺននាក់ កំពុងផ្តល់ផលវិជ្ជមានយ៉ាងច្រើន ជួយឲ្យខេត្តបង្កើនកំណើនសេដ្ឋកិច្ចយ៉ាងឆាប់រហ័ស ក៏ប៉ុន្តែវាមានផលអវិជ្ជមានតិចតួចដែរ។
ទំព័រហ្វេសប៊ុកដដែលនោះបញ្ជាក់ពីសម្តីរបស់លោក យន្ត មីន តាមន័យដើមថា៖
«លោកប៉ាន់ប្រមាណថា មានប្រជាពលរដ្ឋពី៩០ទៅ៩៥ភាគរយអបអរសាទរចំពោះការវិនិយោគនិងទេសចរចិនមកខេត្តព្រះសីហនុ។ អាជ្ញាធរខេត្តបានអនុវត្តគោលនយោបាយការកៀរគរចំពោះអ្នកវិនិយោគ និងទេសចរដើម្បីបង្កើនចំណូលថវិកាជាតិ បន្តជំរុញគ្រប់គ្រងជនបរទេស ធានាការពារសន្តិសុខ សុវត្ថិភាពដល់វិនិយោគិន និងទេសចរ ធ្វើឲ្យខេត្តមានការអភិវឌ្ឍលឿន»។
លោក យន្ត មីន ត្រូវបានស្រង់សម្តីបន្ថែមថា ថ្វីដ្បិតការវិនិយោគវាមានផលប៉ះពាល់ដល់ហេដ្ឋារចនាសម័្ពន្ធ បរិស្ថាន ប្រព័ន្ធលូ ប៉ុន្តែលោកថា បច្ចុប្បន្នមានសំណង់អគារធំខ្ពស់ប្រមាណជាង២០០អគារកំពុងកើតឡើងនៅលើទឹកដីខេត្តព្រះសីហនុ ព្រមទាំងសង្ឃឹមថា នឹងមានសំណង់ជាច្រើនទៀតបន្តកើតឡើងជាបន្តបន្ទាប់នាពេលខាងមុខ។
VOA បានព្យាយាមទាក់ទងលោក យន្ត មីន ដើម្បីបញ្ជាក់អំពីការប៉ាន់ស្មានចំនួនប្រជាពលរដ្ឋកម្ពុជាដែលលោកបានអះអាងថា មានប្រមាណជា៩០ទៅ៩៥ភាគរយដែលសាទរវត្តមានជនជាតិចិនដ៏ច្រើនក្នុងខេត្តព្រះសីហនុ ប៉ុន្តែលោកមិនទទួលទូរស័ព្ទ។
ខេត្តព្រះសីហនុដែលធ្លាប់តែជាកន្លែងទេសចរណ៍ដ៏ប្រសើរសម្រាប់ពលរដ្ឋខ្មែរ បានក្លាយជាកន្លែងដែលអ្នកទេសចរក្នុងស្រុកព្យាយាមចៀសវាង ដោយសារតែការកើនឡើងដ៏គំហុកនៃជនជាតិចិន និងកាស៊ីណូនៅតំបន់នោះ។
មានការបញ្ចេញមតិរិះគន់ជាច្រើននៅតាមបណ្ដាញសង្គមហ្វេសប៊ុកពីរឿងការហូរចូលយ៉ាងគំហុករបស់ជនជាតិចិនមកកាន់ខេត្តព្រះសីហនុ។
ករណីចោរកម្ម ករណីវាយតប់គ្នា បងតូចបងធំ និងការជួញដូរគ្រឿងញៀនដែលប្រព្រឹត្តដោយជនជាតិចិនត្រូវបានគេផ្សព្វផ្សាយតាមសារព័ត៌មានក្នុងស្រុកនិងបណ្ដាញសង្គមជាបន្តបន្ទាប់ផងដែរ។
អ្នកស្រី ជាប សុភារី មន្ដ្រីសម្របសម្រួលសមាគមអាដហុកប្រចាំនៅខេត្តព្រះសីហនុ ប្រាប់ VOA ថា កំណើនជនជាតិចិនយ៉ាងគំហុកបានធ្វើឲ្យការអភិវឌ្ឍលើវិស័យសំណង់មានការកើនឡើងយ៉ាងឆាប់រហ័ស ប៉ុន្តែអ្នកស្រីថា អ្នកដែលទទួលបានផលប្រយោជន៍ពីការអភិឌ្ឍដែលពោរពេញដោយជនជាតិចិនទាំងនោះភាគច្រើនជាអ្នកមានអំណាច និងអ្នកមានអចលនទ្រព្យច្រើន។ អ្នកស្រីបន្ថែមថា ប្រជាពលរដ្ឋធម្មតាកំពុងប្រឈមនឹងជីវភាពរស់នៅយ៉ាងខ្លាំងដោយសារជនជាតិចិនទាំងនោះដណ្តើមយកមុខរបរពីប្រជាពលរដ្ឋ សូម្បីតែប្រភេទមុខរបរតូចតាច។
អ្នកស្រីបញ្ជាក់ថា៖
«ពិតមែនតែមនុស្សច្រើនមែន ប៉ុន្តែទំនិញវាថ្លៃ ហើយមនុស្សច្រើនហ្នឹង ផ្ទះជួលក៏ឡើងថ្លៃដែរ។ អ៊ីចឹងសម្រាប់មនុស្សមួយចំនួន គេមានអគារ មានដីមានអី គាត់សប្បាយចិត្តណាស់ គាត់មិនចាំបាច់ពិបាករកស៊ីរកអីទេ មួយខែៗគេរកចំណូលបានរាប់ម៉ឺន។ គេចាំតែយកលុយហ្នឹង។ ហើយអ្នកដែលយ៉ាប់យ៉ឺនហ្នឹងគឺមុខរបរគាត់មួយចំនួនគឺគាត់រកអត់បានដូចមុនទេ។ រកស៊ី ចិនគាត់រកស៊ីបើកទាំងហាងគុយទាវ ហាងបាយ ហើយនៅកំពង់សោមកន្លែងក៏មានផ្លាកចិនដែរ»។
កាលពីខែមករាឆ្នាំ២០១៨ លោក យន្ត មីន អភិបាលខេត្តព្រះសីហនុ បានផ្ញើរបាយការណ៍មួយជូនក្រសួងមហាផ្ទៃ ដែលក្នុងរបាយការណ៍នោះមានបង្ហាញអំពីលំហូរជនជាតិចិនចូលមកក្នុងប្រទេសកម្ពុជា និងការកើនឡើងនូវឧក្រិដ្ឋកម្ម។ លោកយន្ត មីនបន្ថែមក្នុងរបាយការណ៍នោះថា អ្នកចូលលេងល្បែងនៅកាស៊ីណូនិងក្លឹបកម្សាន្តជជែកគ្នាឡូឡាកងរំពង និងបញ្ហាអ្នកបើករថយន្តជនជាតិចិនគ្មានប័ណ្ណបើកបរនានាគឺជាដើមចមនៃការព្រួយបារម្ភ ហើយអាជីវករក្នុងខេត្តព្រះសីហនុមិនសប្បាយចិត្តដោយសារអាជីវកម្មរបស់ចិនបានជ្រៀតជ្រែកដណ្ដើមឆ្នាំងបាយរបស់ពួកគេ។ លោកបានលើកឡើងពីចំណុច«អវិជ្ជមាន»ចំនួនជាង១០ចំណុច ដែលពាក់ព័ន្ធនឹងជនជាតិចិន ដែលក្នុងនោះមានទាំងការកើនឡើងនូវសកម្មភាពឧក្រិដ្ឋកម្មរបស់ក្រុមបងធំបងតូចផងដែរ។
របាយការណ៍ប្រចាំខែកក្កដាឆ្នាំ២០១៨របស់មន្ទីរអភិវឌ្ឍន៍ជនបទខេត្តព្រះសីហនុបង្ហាញថា ខេត្តព្រះសីហនុមានប្រជាជនសរុបចំនួនជាង២សែននាក់ (២១២.២៥៨នាក់)។ បើធៀបនឹងតួលេខនេះ ចំនួនជនជាតិចិនដែលស្ថិតក្នុងខេត្តព្រះសីហនុមានប្រមាណជាជាង៣០ភាគរយ។
លោកបណ្ឌិត ឡៅ ម៉ុងហៃ អ្នកវិភាគនយោបាយឯករាជ្យ ប្រាប់ VOA ថា ជនជាតិចិនដែលជាចំណូលថ្មីនៅកម្ពុជាមានអត្តចរិតខុសពីជនជាតិចិនដែលកំពុងរស់នៅ និងមានសញ្ជាតិខ្មែរក្នុងពេលបច្ចុប្បន្ន។ លោកបន្ថែមថា ការបណ្តោយឲ្យជនជាតិចិនចូលមករស់នៅតាមបែបប្រមូលផ្តុំក្នុងតំបន់តែមួយកាន់តែច្រើនឡើងៗនេះនឹងធ្វើឲ្យរដ្ឋាភិបាលពិបាកក្នុងការគ្រប់គ្រងជនជាតិចិនទាំងនោះ។
លោកមានប្រសាសន៍ថា៖
«គេមិនឲ្យរស់នៅផ្តុំគ្នាច្រើនអ៊ីចឹងទេ! ម៉េចបានអ៊ីចឹង? គឺជនជាតិហ្នឹង បើប្រៀបធៀបនឹងជនជាតិយើង គេខ្លាំងជាង ហើយគេមានមធ្យោបាយច្រើន គេមានជាង គេបានទទួលការគាំទ្រពីរដ្ឋាភិបាលចិន ហើយរដ្ឋាភិបាលចិនមានឥទ្ធិពលលើរដ្ឋាភិបាលខ្មែរ។ អ៊ីចឹងគេមកហ្នឹងគេអាងយ៉ាងច្បាស់ណាស់ ដូចជាខ្ញុំហៅថាអាណានិគមជនគឺមកធ្វើអាណានិគម»។
លោកនាយករដ្ឋមន្រ្តី ហ៊ុន សែន ដែលកំពុងងាកចេញពីប្រទេសកាន់លទ្ធិប្រជាធិបតេយ្យនិងចាប់ដៃយ៉ាងស្អិតល្មួតជាមួយប្រទេសចិនបានថ្លែងកាលពីពាក់កណ្តាលខែមករានេះថា ចិនគឺជាប្រទេសវិនិយោគធំជាងគេនៅកម្ពុជា ជាពិសេសលើវិស័យហេដ្ឋារចនាសម្ព័ន្ធផ្លូវថ្នល់ ស្ពាន ស្ពានអាកាស និងវារីអគ្គិសនីជាដើម។ ហើយរហូតមកដល់ពេលនេះ ទំហំពាណិជ្ជកម្មកម្ពុជានិងចិនបានកើនឡើងដល់៥៦០០លានដុល្លារ។
លោកនាយករដ្ឋមន្រ្តីដែលកាន់អំណាចជាង៣៤ឆ្នាំរូបនេះក៏បានបន្ថែមថា កម្ពុជាចង់ឲ្យទេសចរចិនកើនឡើងយ៉ាងហោចណាស់ប្រាំដងធៀបនឹងចំនួនទេសចរចិនក្នុងឆ្នាំ២០១៨ ដែលមានចំនួនត្រឹមតែ១,៩លាននាក់ ដើម្បីលើកស្ទួយវិស័យសេដ្ឋកិច្ចរបស់កម្ពុជា។
ទំនាក់ទំនងរវាងកម្ពុជានិងចិនមានការកើនឡើងជាលំដាប់ក្នុងរយៈពេលជិត១០ឆ្នាំចុងក្រោយនេះខណៈកម្ពុជាត្រូវបានប្រទេសកាន់លទ្ធិប្រជាធិបតេយ្យចោទថា កំពុងដើរបញ្ច្រាសលទ្ធិប្រជាធិបតេយ្យតាមរយៈការបង្ក្រាបដ៏ធ្ងន់ធ្ងរលើក្រុមជំទាស់ អង្គការសង្គមស៊ីវិល សារព័ត៌មានឯករាជ្យ និងការរំលាយគណបក្សសង្គ្រោះជាតិក្នុងឆ្នាំ២០១៧។ ការបង្ក្រាបទាំងនោះបានធ្វើឲ្យបក្សកាន់អំណាចរបស់លោកហ៊ុន សែនទទួលជ័យជម្នះក្នុងការបោះឆ្នោត និងដឹកនាំប្រទេសដោយឯកបក្ស៕