អភិបាលខេត្តព្រះសីហនុលើកឡើងថា កំណើនជនបរទេសដែលភាគច្រើនជាជនជាតិចិនក្នុងខេត្តមានសក្តានុពលដោយសារសមុទ្រមួយនេះកំពុងធ្វើឲ្យមានផលប៉ះពាល់ផ្សេងៗ តាមរយៈការធ្វើសកម្មភាពខុសច្បាប់។ នេះបើតាមរបាយការណ៍របស់លោក យន្ត មីន អភិបាលខេត្តព្រះសីហនុផ្ញើជូនរដ្ឋមន្ត្រីក្រសួងមហាផ្ទៃ។
ក្នុងរបាយការណ៍របស់លោក យន្ត មីន អភិបាលខេត្តព្រះសីហនុចុះកាលពីថ្ងៃទី២៤ ខែមករា ឆ្នាំ២០១៨ ផ្ញើទៅលោក ស ខេង រដ្ឋមន្ត្រីក្រសួងមហាផ្ទៃស្តីពីផលប៉ះពាល់របស់ជនបរទេសដែលស្នាក់នៅក្នុងខេត្តព្រះសីហនុបញ្ជាក់ថា ក្នុងឆ្នាំ២០១៧កន្លងទៅមានភ្ញៀវទេសចរណ៍និងវិនិយោគិនជាជនបរទេសយ៉ាងច្រើនចូលមកស្នាក់នៅនិងបណ្តាក់ទុនក្នុងខេត្ត។ លោកបន្តថា ជនបរទេសដែលមកស្នើសុំសៀវភៅការងារក្នុងខេត្តព្រះសីហនុ មានជាង៦ពាន់នាក់(៦,៣៨៥នាក់) ក្នុងនោះជនជាតិចិនមានចំនួនជាង៤ពាន់នាក់(៤,៤៩៨នាក់) ស្មើនឹងប្រមាណជា៧០% នៃជនបរទេសចំនួន៦១សញ្ជាតិ។
ក្នុងរបាយការណ៍នោះ លោក យន្ដ មីន បញ្ជាក់ថា កំណើនជនបរទេសក្នុងខេត្តព្រះសីហនុ បានជំរុញការអភិវឌ្ឍសេដ្ឋកិច្ច ដូចជាការកើនឡើងនូវវិស័យសំណង់ និងអចលនទ្រព្យមានតម្លៃខ្ពស់ សម្បូរសណ្ឋាគារ កាស៊ីណូ និងភោជនីយដ្ឋានសម្រាប់ទទួលភ្ញៀវទេសចរ និងប្រាក់ចំណូលពន្ធកើនឡើងជាដើម។
ប៉ុន្តែលោកថា កំណើនជនបរទេសក្នុងខេត្តនេះ បាននិងកំពុងធ្វើឲ្យមានផលប៉ះពាល់ជាច្រើនដូចជា បង្កឱកាសដល់ជនជាតិចិនជាពួកម៉ាហ្វីយ៉ាមួយចំនួនបន្លំខ្លួនចូលមកប្រព្រឹត្តបទល្មើស បង្កអសន្ដិសុខ និងចាប់ជម្រិតអ្នកវិនិយោគ ខ្លះទៀតបានជួលផ្ដាច់សណ្ឋាគារ និងផ្ទះសំណាក់មួយចំនួនធំដែលធ្វើឲ្យការផ្ដល់សេវាដល់ភ្ញៀវទេសចរជាតិ និងអន្តរជាតិមានការខ្វះខាតនៅពេលបុណ្យទាន។
លោក យន្ត មីន បានឲ្យដឹងទៀតថា ជនបរទេសមួយចំនួនគេចវេសមិនព្រមបំពេញបែបបទតាមនីតិវិធី ខ្លះបើកបរដោយគ្មានច្បាប់អនុញ្ញាត ខ្លះផឹកស៊ី ឡូឡា និងវាយតប់គ្នាតាមទីសាធារណៈ។ ចំណែកស្លាកយីហោហាង សណ្ឋាគារ កាស៊ីណូ និងការដ្ឋានខ្លះ សរសេរអក្សរបរទេសសុទ្ធ ឬសរសេរអក្សរខ្មែរតូចជាងអក្សរបរទេសជាដើម។
កំណើនជនជាតិចិនបានកើនឡើងយ៉ាងគំហុកក្នុងខេត្តព្រះសីហនុចាប់តាំងពីឆ្នាំ២០១៧ បន្ទាប់ពីទំនាក់ទំនងកម្ពុជា-ចិន កាន់តែមានមានភាពស្អិតល្មួត។ ប្រទេសចិនបានផ្ដល់ជំនួយឥតសំណង និងកម្ចីមកកម្ពុជាជាបន្តបន្ទាប់ហើយកម្ពុជាបានចុះកិច្ចព្រមព្រៀងជាមួយរដ្ឋាភិបាលចិនក្នុងការអភិវឌ្ឍខេត្តព្រះសីហនុ ឲ្យក្លាយជាតំបន់ទេសចរណ៍អន្ដរជាតិ និងក្លាយជាតំបន់សេដ្ឋកិច្ចពិសេស។
VOA មិនអាចទាក់ទងសុំការអធិប្បាយពីលោក យន្ត មីន អភិបាលខេត្តព្រះសីហនុបានទេ។
ទោះជាយ៉ាងណាលោក យន្ដ មីន បានបញ្ជាក់ក្នុងរបាយការណ៍ដដែលថា អាជ្ញាធរ និងសមត្ថកិច្ចពាក់ព័ន្ធ បានត្រៀមកម្លាំងការពារសន្តិសុខ និងបង្ក្រាបបទល្មើស ព្រមទាំងចុះស្រង់ស្ថិតិអំពីអាជីវកម្មបរទេស និងជំរុញណែនាំឲ្យពួកគេគោរពតាមច្បាប់កម្ពុជា។
អ្នកស្រី ជាប សុភារី មន្ដ្រីសម្របសម្រួលសមាគមអាដហុកប្រចាំនៅខេត្តព្រះសីហនុ ប្រាប់ VOA ថា កំណើនជនជាតិចិនមកស្នាក់នៅនិងធ្វើការក្នុងខេត្តព្រះសីហនុបានធ្វើឲ្យមានភាពអវិជ្ជមានច្រើនជាងភាពវិជ្ជមាន។ អ្នកស្រីបន្ថែមថា កំណើនជនជាតិចិនបានធ្វើឲ្យប៉ះពាល់យ៉ាងខ្លាំងដល់ជីវភាព និងការរស់នៅរបស់ប្រជាពលរដ្ឋខ្មែរ តាមរយៈការដែលជនជាតិចិនទាំងនោះចូលមកធ្វើការ រកស៊ី និងបើកបនល្បែងកាស៊ីណូ។ អ្នកស្រីថា ជនជាតិចិនបានប្រើពាក្យសម្ដីអសីលធម៌ ស្រែកឡូឡា មិនគោរពច្បាប់កម្ពុជាជាដើម។
អ្នកស្រី ជាប សុភារី បន្ថែមថា រដ្ឋាភិបាលក៏ដូចជាអាជ្ញាធរកម្ពុជាគួរតែដាក់លក្ខខណ្ឌជាមួយក្រុមហ៊ុនបរទេសដែលចូលវិនិយោគធ្វើយ៉ាងណាសម្រួលដល់ប្រជាពលរដ្ឋខ្មែរដែលកំពុងរស់នៅនិងប្រកបមុខរបរនៅទីនោះនិងត្រូវបង្កើនកម្លាំងសន្តិសុខដើម្បីទប់ស្កាត់បទល្មើសផ្សេងៗដែលអាចកើតមាន។
អ្នកស្រីមានប្រសាសន៍ថា៖
«យើងត្រូវពិនិត្យមើលលក្ខខណ្ឌនៃការផ្តល់ឱកាសការអភិវឌ្ឍនេះដើម្បីទាំងអស់គ្នា ដើម្បីឲ្យពួកគាត់មានការងារធ្វើ រកប្រាក់ចំណូលបាន អាហ្នឹងគួរតែមានលក្ខខណ្ឌជជែកគ្នាឲ្យបានច្បាស់លាស់។ ហើយមួយទៀតអ្វីដែលយើងសង្កេតឃើញថា រញ៉េរញ៉ៃដែរហ្នឹង អាជ្ញាធរ ក៏ដូចជាខាងប្រធានជំនាញដែរ គួរតែមានការរៀបចំ និងបន្ថែមកម្លាំងសមត្ថកិច្ចដែរ ព្រោះកាលណាមនុស្សច្រើនទៅ បញ្ហាបទល្មើសវាអាចកើនឡើងដែរ»។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ VOA នៅថ្ងៃសុក្រនេះថា ក្រសួងមហាផ្ទៃមានការបារម្ភពីចំនួនជនបរទេសដែលកំពុងកើនឡើងយ៉ាងគំហុក និងថា ក្រសួងបានបញ្ជូនក្រុមគណៈកម្មការចុះត្រួតពិនិត្យកាលពីសប្ដាហ៍មុន ដើម្បីសិក្សា និងរាយការណ៍ត្រឡប់មកក្រសួងវិញ។
លោកមានប្រសាសន៍ថា៖
«សម្តេចក្រឡាហោម [លោក ស ខេង] ក៏លោកបានចាត់តាំងគណៈកម្មការមួយរបស់ក្រសួងហ្នឹងឲ្យចុះទៅផ្ទាល់កាលពីសប្តាហ៍មុនម្ល៉េះ ដើម្បីពិនិត្យមើលផ្ទាល់រឿងផលប៉ះពាល់នៃវត្តមានរបស់ជនជាតិចិនយ៉ាងគំហុកនៅខេត្តព្រះសីហនុ។ យើងមានការបារម្ភរឿងហ្នឹងដែរ តើវាយ៉ាងម៉េចលើបញ្ហាហ្នឹង»។
កម្ពុជារំពឹងថានឹងទទួលបានអ្នកទេសចរចិនប្រមាណជា២លាននាក់នៅឆ្នាំ២០២០។ កាលពីឆ្នាំ២០១៦ កម្ពុជាបានទទួលទេសចរចិនប្រមាណ៨៣ម៉ឺននាក់។ ចំណែកនៅក្នុងឆ្នាំ២០១៧ ទេសចរជនជាតិចិនមកកម្ពុជាមានចំនួនជាង៩សែននាក់។ នេះបើយោងតាមតួលេខរបស់ក្រសួងទេសចរណ៍កម្ពុជា៕
