ថ្លែងទៅកាន់ប្រទេសជាតិមួយដែលកំពុងតែព្រួយបារម្ភ និងពិភពលោកមួយដែលកំពុងតែខ្វាយខ្វល់ ប្រធានាធិបតីសហរដ្ឋអាមេរិក លោក Joe Biden បានប្ដេជ្ញានៅក្នុងសុន្ទរកថាប្រចាំឆ្នាំស្ដីអំពីស្ថានភាពសហព័ន្ធ (State of the Union) កាលពីយប់ថ្ងៃអង្គារថា នឹងយកចិត្តទុកដាក់ចំពោះភាពគឃ្លើនរបស់រុស្ស៊ីនៅក្នុងប្រទេសអ៊ុយក្រែន កាត់បន្ថយការកើនឡើងអតិផរណានៅក្នុងប្រទេស និងដោះស្រាយបញ្ហានៃការរាតត្បាតជំងឺកូវីដ១៩ ដែលកំពុងតែចុះថមថយ ប៉ុន្តែនៅតែជាគ្រោះថ្នាក់ចំពោះប្រជាជន។ នេះបើតាមការរាយការណ៍របស់ទីភ្នាក់ងារ AP។
លោកប្រធានាធិបតីបានស្នើឲ្យសមាជិកសភាទាំងពីរថ្នាក់ ក្រោកឈរឡើងដើម្បីសម្តែងការគោរពដល់ពលរដ្ឋអ៊ុយក្រែន នៅពេលដែលលោកចាប់ផ្ដើមថ្លែងសុន្ទរកថាប្រចាំឆ្នាំនេះ។ សមាជិកសភាបាននាំគ្នាក្រោកឈរ និងទះដៃអបអរជនជាតិអ៊ុយក្រែនដែលមានវត្តមាននៅទីនោះ។
ឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិក លោកស្រី Oksana Markarova ធ្វើកាយវិការអរគុណប្រធានាធិបតីអាមេរិក លោក Joe Biden ក្នុងអំឡុងពេលលោកថ្លែងសុន្ទរកថាប្រចាំឆ្នាំស្តីពីស្ថានភាពសហព័ន្ធនៅវិមានសភាក្នុងរដ្ឋធានីវ៉ាស៊ីនតោន កាលពីថ្ងៃទី១ ខែមីនា ឆ្នាំ២០២២។
នៅក្នុងសុន្ទរកថានៅចំពោះមុខសភា លោក Biden បានគូសបញ្ជាក់អំពីភាពអង់អាចក្លាហានរបស់ប្រជាជនអ៊ុយក្រែនដែលប្រយុទ្ធដើម្បីការពារទឹកដី និងការប្ដេជ្ញារបស់សម្ព័ន្ធមិត្តបស្ចិមប្រទេសដែលបានផ្ដល់គ្រឿងសព្វាវុធដល់យោធាអ៊ុយក្រែន និងដាក់សម្ពាធលើសេដ្ឋកិច្ចរបស់រុស្ស៊ីតាមរយៈទណ្ឌកម្ម។ លោក Biden ក៏បានព្រមានអំពីផលវិបាកនៃទណ្ឌកម្មនេះមកលើសេដ្ឋកិច្ចសហរដ្ឋអាមេរិកផងដែរ ប៉ុន្តែលោកក៏បានព្រមានថា ប្រសិនបើគ្មានផលវិបាកទាំងនេះទេ នោះភាពគឃ្លើនរបស់ប្រធានាធិបតីរុស្ស៊ីលោក Vladimir Putin ចំពោះប្រទេសអ៊ុយក្រែននឹងមិនអាចទប់មិនឲ្យរាលដាលកាន់តែធំបានទេ។
លោក Biden ថ្លែងថា៖ «នៅក្នុងប្រវត្តិសាស្ត្ររបស់យើង យើងបានរៀនអំពីមេរៀនដែលថា នៅពេលដែលមេដឹកនាំផ្ដាច់ការមិនទទួលបានផលវិបាកពីសកម្មភាពគឃ្លើនរបស់ពួកគេ នោះពួកគេនឹងបង្កភាពចលាចលកាន់តែច្រើន»។ លោកបានថ្លែងទៀតថា៖ «ពួកគេបន្ដបង្ករឿង ហើយផលវិបាកនិងការគំរាមកំហែងចំពោះសហរដ្ឋអាមេរិកនិងពិភពលោកបន្ដកើនឡើង»។
លោក Biden បានប្រកាសថា សហរដ្ឋអាមេរិកនឹងធ្វើតាមប្រទេសកាណាដា និងសហភាពអឺរ៉ុបនៅក្នុងការហាមឃាត់យន្ដហោះរបស់រុស្ស៊ីមិនឲ្យហោះហើរនៅលើដែនអាកាសរបស់សហរដ្ឋអាមេរិកនោះទេ ដើម្បីជាការសងសឹកទៅនឹងការឈ្លានពានរបស់រុស្ស៊ីទៅលើអ៊ុយក្រែន។ លោកក៏បាននិយាយថា ក្រសួងយុត្តិធម៌កំពុងរៀបចំកងកម្លាំងពិសេសមួយដើម្បីតាមដានឧក្រិដ្ឋកម្មរបស់ពួកអ្នកមានអំណាចរុស្ស៊ី ដែលលោកហៅថាជា«ពួកមេដឹកនាំពុករលួយ ដែលកេងប្រវ័ញ្ចប្រាក់រាប់ពានលានដុល្លារពីរបបហិង្សានេះ»។
សមាជិកសភាអាមេរិកជាច្រើនបានពាក់ក្រឡាស់អាវជាពណ៌ទង់ជាតិអ៊ុយក្រែន។
លោក Biden បានលើកឡើងអំពីផែនការក្នុងការដោះស្រាយបញ្ហាអតិផរណាតាមរយៈការវិនិយោគឡើងវិញទៅលើសមត្ថភាពផលិតរបស់អាមេរិក បង្កើនល្បឿនសង្វាក់ផ្គត់ផ្គង់ និងកាត់បន្ថយបន្ទុកសេវាមើលថែទាំកូនក្មេង និងមនុស្សចាស់របស់បុគ្គលិកក្នុងផ្នែកនេះ។
លោក Biden បានមានប្រសាសន៍ថា៖ «យើងមានជម្រើសមួយ។ ជម្រើសមួយក្នុងការទប់ទល់នឹងអតិផរណាគឺត្រូវកាត់បន្ថយប្រាក់ឈ្នួល និងធ្វើឲ្យពលរដ្ឋអាមេរិកកាន់តែក្រ។ ប៉ុន្តែខ្ញុំមានផែនការមួយដែលល្អជាងនេះក្នុងការទប់ទល់អតិផរណា នោះគឺកាត់បន្ថយការចំណាយ មិនមែនកាត់ប្រាក់ចំណូលនោះទេ»។
លោក Biden បានដើរចូលទៅកាន់វិមានសភាដោយមិនពាក់ម៉ាស់ការពារ ដើម្បីឆ្លុះបញ្ចាំងឲ្យឃើញពីការថយចុះករណីឆ្លងជំងឺកូវីដ១៩ និងគោលការណ៍ណែនាំថ្មីរបស់រដ្ឋាភិបាលសហព័ន្ធដើម្បីបញ្ជាក់ដល់សាធារណជនថា ពួកគេអាចត្រឡប់ទៅធ្វើសកម្មភាពធម្មតាដូចនៅមុនពេលមានការរាតត្បាតជំងឺកូវីដ១៩បានវិញហើយ។ ប៉ុន្តែវិមានសភាត្រូវបានដាក់ព័ទ្ធដោយរបងការពារថ្មី ដោយសារតែការព្រួយបារម្ភអំពីការវាយលុកចូលវិមានសភាកាលពីឆ្នាំមុន។
ក្នុងបរិបទ មានក្តីបារម្ភក្នុងប្រទេស និងគ្រោះថ្នាក់នៅបរទេស សេតវិមានដំបូងឡើយប្រាថ្នាយកសុន្ទរកថាកាលពីយប់ថ្ងៃអង្គារជាឱកាសមួយដើម្បីសង្កត់ធ្ងន់ទៅលើស្ថានភាពទូទៅដែលប្រសើរជាងមុននៃការរាតត្បាតជំងឺកូវីដ១៩ កែប្រែអាទិភាពគោលនយោបាយក្នុងស្រុករបស់លោក Biden ជាថ្មី និងបង្ហាញមាគ៌ាមួយដើម្បីកាត់បន្ថយការចំណាយរបស់ប្រជាជនដែលជួបទុក្ខលំបាកដោយសារតែការកើនឡើងអតិផរណា។ ប៉ុន្តែសុន្ទរកថាប្រចាំឆ្នាំនេះកាន់តែមានសារៈសំខាន់ថ្មីទៀត ដោយសារមានស្ថានការណ៍កើតឡើងកាលពីសប្ដាហ៍មុន នោះគឺការឈ្លានពានរបស់រុស្ស៊ីទៅលើអ៊ុយក្រែន និងការកំញ៉ើញប្រើអាវុធនុយក្លេអ៊ែររបស់លោក Putin៕
ប្រែសម្រួលដោយអ្នកស្រី ហុង ចិន្ដា