ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី
ស្ត្រីអ៊ុយក្រែនម្នាក់ឈរមើលផ្ទះសម្បែងដែលត្រូវបានបំផ្លាញក្រោយពីមានការបាញ់គ្រាប់ផ្លោងលើតំបន់ Kramatorsk ក្នុងអំឡុងជម្លោះឈ្លានពានរបស់រុស្ស៊ីលើអ៊ុយក្រែន នៅតំបន់ Donetsk ប្រទេសអ៊ុយក្រែន ថ្ងៃទី ១២ ខែសីហា ឆ្នាំ ២០២២។

ផ្សាយ​ផ្ទាល់ LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ១២​ សីហា ២០២២

រុស្ស៊ីបានចូលឈ្លានពានអ៊ុយក្រែន តាំងពីថ្ងៃទី២៤ ខែកម្ភៈ មក។ សូមតាមដានព្រឹត្តិការណ៍ថ្មីៗប្រចាំថ្ងៃទាក់ទងនឹងវិបត្តិអ៊ុយក្រែន នៅ​លើ​ទំព័រ Live Blog ដែលផ្សាយផ្ទាល់នេះ។

21:14 12.8.2022

ថ្ងៃសុក្រ ទី ១២ ខែសីហា៖

  • របាយ​ការណ៍​ចារកម្ម​ចុង​ក្រោយ​របស់​ក្រសួង​ការពារ​ជាតិ​ចក្រភព​អង់គ្លេស​ បាន​ឱ្យ​ដឹង​ថា​ ការ​ផ្ទុះ​នៅ​ព្រលាន​យន្តហោះ​យោធា​ Saky​ ដែល​ប្រតិបត្តិ​ការ​ដោយ​រុស្ស៊ីកាល​ពី​ដើម​សប្តាហ៍​នេះ​ គឺ​អាច​បណ្តាល​មក​ពី​ការ​ផ្ទុះ​ឃ្លាំង​គ្រាប់​រហូត​ដល់​ទៅ ​៤​ កន្លែង​នៅ​ក្នុង​ទីតាំង​នោះ។​ យន្តហោះ​យ៉ាង​ហោច​ណាស់​ចំនួន​ ៨ ​គ្រឿង​ដែរ​ ត្រូវ​បាន​បំផ្លាញ​ ឬ​រង​នូវ​ការ​ខូច​ខាត​យ៉ាង​ធ្ងន់ធ្ងរ។​ នេះ​បើ​យោង​ទៅ​លើ​របាយ​ការណ៍​ចារកម្ម​ចុង​ក្រោយ​របស់​អង់គ្លេស។​ បើទោះ​បីជា​ព្រលាន​យន្តហោះ​នោះនៅ​អាច​ដំណើរ​ការ​បាន​យ៉ាង​ណា​ក្តី​ ក៏​ការ​ផ្ទុះ​នេះ​បាន​ធ្វើ​ឱ្យ​សមត្ថភាព​កងទ័ព​នាវា​ជើង​ទឹក​រុស្ស៊ី​នៅ​ក្នុង​សមុទ្រ​ខ្មៅ​ មាន​ការ​ថយ​ចុះ​ខ្លាំង។
  • ក្រុម​មន្ត្រី​រុស្ស៊ី​ត្រូវ​បាន​បណ្តុះ​បណ្តាល​ក្នុង​ប្រទេស​អ៊ឺរ៉ង់​ក្នុង​ពេល​ប៉ុន្មាន​សប្តាហ៍​ថ្មីៗ​នេះ​ ដែល​ជា​ផ្នែក​មួយ​នៃ​កិច្ច​ព្រមព្រៀង​ផ្ទេរ​យន្តហោះ​គ្មាន​មនុស្ស​បើកបរ​គឺ​ ដ្រូន​រវាង​ប្រទេស​ទាំង​ពីរ។​ នេះ​បើ​តាម​ការ​បញ្ជាក់​របស់​ក្រសួង​ការ​បរទេស​អាមេរិក​ ហើយ​ដែល​ត្រូវ​បាន​ចេញ​ផ្សាយ​ដោយ​ទី​ភ្នាក់ងារ​ព័ត៌មាន ​Reuters។ ​ក្រុម​មន្ត្រី​អាមេរិក​បាន​និយាយ​កាល​ពី​ខែ​មុន​ថា​ រដ្ឋាភិបាល​ក្រុង​វ៉ាស៊ីនតោន​មាន​ព័ត៌មាន​ថា​ ប្រទេស​អ៊ីរ៉ង់​កំពុង​រៀបចំ​ផ្តល់​យន្តហោះ​ដ្រូន​រាប់​រយ​គ្រឿង​ទៅ​ឱ្យ​ប្រទេស​រុស្ស៊ី​ ដែល​ក្នុង​នោះ​មានយន្តហោះ​ដ្រូន​មួយ​ចំនួន​អាច​មាន​សមត្ថភាព​បំពាក់​អាវុធ​បាន​ទៀត​ផង។ ទន្ទឹម​នឹង​នេះ​ដែរ​ ក្រុម​មន្ត្រី​រុស្ស៊ី​មួយ​ចំនួន​បាន​ធ្វើ​ដំណើរ​ទៅ​កាន់​ប្រទេស​អ៊ីរ៉ង់​ដើម្បី​ត្រួត​ពិនិត្យ​មើល​ប្រភេទ​យន្តហោះ​ដ្រូន​ដែល​មាន​សមត្ថភាព​ធ្វើ​ការ​វាយ​ប្រហារ​បាន។​ ការ​អះអាង​នេះ​ បាន​ធ្វើ​ឱ្យ​មាន​ក្តី​បារម្ភ​ថា​ ប្រទេស​អ៊ីរ៉ង់​ ដែល​បាន​ផ្គត់ផ្គង់​យន្តហោះ​ដ្រូន​ទៅ​ឱ្យ​សម្ព័ន្ធ​មិត្ត​នៅ​ក្នុង​តំបន់​មជ្ឈឹម​បូព៌ា​នោះ ​នៅ​ពេល​នេះ​កំពុង​ផ្តល់​ការ​គាំទ្រ​របស់​ខ្លួន​ទៅ​ឱ្យ​រុស្ស៊ី​ក្នុង​ការ​ធ្វើ​សង្រ្គាម​នៅ​ប្រទេស​អ៊ុយក្រែន។​
  • សាធារណ​រដ្ឋ​ឆែក​ ដែល​ធ្វើ​ជា​ប្រធាន​ប្តូរ​វេន​របស់​សហភាព​អឺរ៉ុប​ បាន​និយាយ​នៅ​ថ្ងៃ​សុក្រ​ថា​ ការ​ដាក់​បម្រាម​ទិដ្ឋាការ​ជា​ទូទៅ​ លើ​អ្នក​ធ្វើ​ដំណើរ​ជន​ជាតិ​រុស្ស៊ី​អាច​ជា​ការ​ដាក់​ទណ្ឌកម្ម​ជំហាន​បន្ទាប់​របស់​ប្លុក​មួយ​នេះ​លើ​រុស្ស៊ី។​ ការ​បិទ​ទិដ្ឋាការ​ដល់​ពលរដ្ឋ​រុស្ស៊ី​ដោយ​រដ្ឋ​ជា​សមាជិក​ទាំង​អស់​របស់​សហភាព​អឺរ៉ុប​ អាច​ជា​វិធាន​ការ​ថ្មី​មួយ​ទៀត​ ដែល​មាន​ប្រសិទ្ធ​ភាព​ខ្លាំង​បំផុត»។​ នេះ​បើតាម​ សេចក្តី​ថ្លែង​ការណ៍​រដ្ឋមន្ត្រី​ការ​បរទេស​របស់​ប្រទេស​ឆែក​ លោក​ Jan Lipavsky ​ដែល​ទី​ភ្នាក់ងារ​ព័ត៌មាន ​AFP ​ទទួល​បាន។ លោក​ថ្លែង​ថា​ លោក​នឹង​ស្នើ​គំនិត​នេះ​ឡើង​ នៅ​ក្នុង​កិច្ច​ប្រជុំ​ក្រៅ​ផ្លូវការ​មួយ​របស់​រដ្ឋមន្ត្រី​ការ​បរទស​សហភាព​អឺរ៉ុប​នៅ​ក្នុង​រដ្ឋធានី​ប្រាក​ ប្រទេស​ឆែក​ នៅ​ដំណាច់​ខែ​សីហា​នេះ។​ លោក​ថ្លែង​ទៀត​ថា៖ «នៅ​ក្នុង​អំឡុង​ពេល​ដែល​រុស្ស៊ី​កំពុង​តែ​ឈ្លាន​ពាន​អ៊ុយក្រែន​ ហើយ​វិមាន​ក្រឹមឡាំង​នៅ​តែ​ធ្វើ​ឱ្យ​ស្ថាន​ភាព​កាន់​តែ​ក្តៅ​ខ្លាំង​ថែម​ទៀត​នោះ គេ​មិន​អាច​និយាយ​ដល់​ការ​ធ្វើ​ដំណើរ​ទេសចរណ៍​ជា​ទូទៅ​របស់​ពលរដ្ឋ​រុស្ស៊ី​នោះ​ឡើយ»។ ​នេះ​បើតាម​ទី​ភ្នាក់ងារ​ព័ត៌មាន AFP។​
  • ទីភ្នាក់ងារ​សន្តិសុខ​របស់​អ៊ុយក្រែន​ជា​ច្រើន​បាន​ចេញ​សេចក្តី​ថ្លែង​ការណ៍​រួម​គ្នា​មួយ​នៅថ្ងៃសុក្រ​នេះ ​ដោយ​អំពាវនាវ​ឱ្យ​អង្គការ​សហ​ប្រជាជាតិ ​និងគណៈ​កម្មាធិការ​កាកបាទ​ក្រហម​អន្តរជាតិ​បញ្ជូន​តំណាង​ទៅ​ទី​កន្លែង​មួយ​ចំនួន​ ដែល​រុស្ស៊ី​កំពុង​ឃុំ​ខ្លួន​ឈ្លើយ​សឹក​អ៊ុយក្រែន។​ ការ​ស្នើ​សុំ​នេះ​ កើត​មាន​ឡើង​បន្ទាប់​ពី​មាន​ការ​ចោទ​ប្រកាន់កាល​ពី​ពេល​កន្លង​ទៅដោយ​រដ្ឋាភិបាល​ក្រុង​កៀវ​ថា​ កង​កម្លាំង​រុស្ស៊ី​ បាន​ធ្វើ​ទារុណ​កម្មនិង​សម្លាប់​អ្នក​ទោស​សង្គ្រាម​ ដែល​ក្នុង​នោះ​រួម​មាន​ទាំង​ការ​ដាក់​គ្រាប់​បំផ្ទុះ​នៅ​ក្នុង​ជំរំ​ឈ្លើយ​សឹក នៅ​ក្នុង​ទីក្រុង Olenivka ​ផង​ដែរ។ រដ្ឋាភិបាល​ក្រុង​ម៉ូស្គូ​បាន​អះអាង​ថា​ កងទ័ព​អ៊ុយក្រែន​ជា​អ្នក​ផ្លោង​ដាក់​ជំរំ​នោះ​ ដោយ​សម្លាប់​ឈ្លើយ​សឹក​ជាង​ ៥០​ នាក់។​ ​នេះ​បើ​តាម​សេចក្តី​រាយ​ការណ៍​របស់​ទី​ភ្នាក់ងារ​ព័ត៌មាន​ Reuters៕
23:17 11.8.2022

ថ្ងៃព្រហស្បតិ៍ ទី ១១ ខែសីហា៖

  • ចក្រភព​អង់គ្លេស​នឹង​ផ្តល់ឱ្យប្រទេស​អ៊ុយក្រែន​នូវ​ប្រព័ន្ធបាញ់​ពហុ​រ៉ុក្កែត​បន្ថែម​ជា​ច្រើនគឿង​ទៀត​ ដែល​អាច​ធ្វើ​ការ​វាយ​ប្រហារ​ទៅ​លើ​គោល​ដៅ​សត្រូវ​រហូត​ដល់​ចម្ងាយ​ ៨០​គីឡូម៉ែត្រ។​ នេះ​បើតាម​សេចក្តី​រាយ​ការណ៍​របស់​ទីភ្នាក់ងារ​ព័ត៌មាន ​Reuters។​ រដ្ឋមន្ត្រី​ការពារ​ជាតិ​ចក្រភព​អង់គ្លេស​ លោក Ben Wallace បាន​និយាយ​ថា​ ការផ្តល់នូវ​គ្រឿង​សព្វាវុធ​ដល់​អ៊ុយក្រែននឹង​ជួយ​ឱ្យ​ប្រទេស​នេះ​អាច​ការ​ពារ​ខ្លួនដោយ​ខ្លួន​ឯង​បាន ដើម្បី​ប្រឆាំងទប់ទល់​នឹងកាំភ្លើង​ផ្លោង​ធុន​ធ្ងន់​របស់​រុស្ស៊ី។ ​លោក​និយាយ​ក្នុង​សេចក្តី​ថ្លែង​ការណ៍​ថា៖ «ការគាំទ្រជា​បន្ត​របស់​យើង​បាន​បញ្ជូន​សារដ៏​ច្បាស់​លាស់​មួយ​ថា​ ចក្រភព​អង់គ្លេស​ និង​សហគមន៍​អន្តរជាតិ​នៅ​តែ​ប្រឆាំង​ទៅ​នឹង​សង្គ្រាម​ខុស​ច្បាប់របស់​រុស្ស៊ី​ ហើយ​យើង​ប្រគៀក​ស្មា​គ្នា​ដើម្បី​ផ្តល់​នូវ​ជំនួយ​យោធាការពារ​ជាតិ​ទៅ​ឱ្យ​អ៊ុយក្រែន​ដើម្បី​ជួយ​ពួក​គេ​ក្នុង​ការ​ការពារ​ទប់ទល់​នឹងការ​ឈ្លានពាន​របស់​លោក Putin»។
  • ក្រសួង​ការ​បរទេស​រុស្ស៊ីបាន​និយាយ​នៅថ្ងៃ​ព្រហស្បតិ៍​នេះ​ថា​ ប្រទេស​ស្វីសមិន​អាចធ្វើ​ជា​តំណាងឱ្យផល​ប្រយោជន៍​របស់​អ៊ុយក្រែននៅក្នុង​ប្រទេស​រុស្ស៊ី​ ហើយ​ក៏​មិន​អាច​ធ្វើ​ជា​តំណាងផល​ប្រយោជន៍​របស់​រុស្ស៊ី​នៅ​ក្នុង​ប្រទេស​អ៊ុយក្រែន​បានដែរ ដោយ​សារ​តែ​ប្រទេសស្វីស​មិន​មែន​ជា​ប្រទេស​អព្យាក្រឹតតទៅ​ទៀត​នោះឡើយ។ នេះបើតាម​សេចក្តី​រាយ​ការណ៍​របស់ទី​ភ្នាក់ងារ​ព័ត៌មាន​ Reuters។ ​មន្ត្រី​ក្រសួង​ការ​បរទេស​រុស្ស៊ី​លោកស្រី ​Ivan Nechayev​ បាន​និយាយថា៖ «ប្រទេស​ស្វីស​បាន​បញ្ចប់​នូវ​ភាព​ជារដ្ឋជាអព្យាក្រឹត ដោយ​បាន​ចូលរួម​ដាក់​ទណ្ឌកម្ម​ប្រឆាំង​នឹង​រុស្ស៊ី»។

សំណង់អគារនៃសណ្ឋាគារមួយខ្នងត្រូវបានបំផ្លាញដោយការបាញ់គ្រាប់ផ្លោងក្នុងអំឡុងជម្លោះឈ្លានពានរបស់រុស្ស៊ីលើអ៊ុយក្រែន នៅភូមិ Svitlodarsk ក្នុងតំបន់ Donetsk ដែលគ្រប់គ្រងដោយទាហានរុស្ស៊ី កាលពីថ្ងៃទី ៨ ខែសីហា ឆ្នាំ ២០២២។
សំណង់អគារនៃសណ្ឋាគារមួយខ្នងត្រូវបានបំផ្លាញដោយការបាញ់គ្រាប់ផ្លោងក្នុងអំឡុងជម្លោះឈ្លានពានរបស់រុស្ស៊ីលើអ៊ុយក្រែន នៅភូមិ Svitlodarsk ក្នុងតំបន់ Donetsk ដែលគ្រប់គ្រងដោយទាហានរុស្ស៊ី កាលពីថ្ងៃទី ៨ ខែសីហា ឆ្នាំ ២០២២។

  • កងកម្លាំង​រុស្ស៊ី​បាន​បង្កើន​ការ​វាយ​ប្រហារតាមផ្លូវ​អាកាស​ទ្វេដង​ទៅ​លើ​ទីតាំង​កងយោធា​របស់​អ៊ុយក្រែន​ និង​ហេដ្ឋា​រចនា​សម្ព័ន្ធ​ស៊ីវិល​ បើប្រៀប​ធៀប​ទៅចំនួន​វាយ​ប្រហារ​របស់​រុស្ស៊ី​កាល​ពី​សប្តាហ៍​មុន។ នេះ​បើតាម​ការ​ឱ្យ​ដឹង​របស់ឧត្តម​សេនីយ៍​ត្រី​អ៊ុយក្រែន​ លោក ​Oleksiy Hromov នៅ​ថ្ងៃ​ព្រហស្បតិ៍​នេះ។​ លោក​បាន​ប្រាប់​សន្និសីទ​សារ​ព័ត៌មាន​មួយ​ថា៖ «យន្តហោះនិង​ឧទ្ធម្ភាចក្ររបស់​រុស្ស៊ី​បាន​ចៀសវាង​ហោះ​ចូលរង្វង់ការពារដែន​អាកាស​របស់​យើង​ ហេតុដូច​នេះ​ហើយ​លទ្ធភាព​របស់សត្រូវ​វាយ​ប្រហារ​ចំ​ទិស​ដៅ​មាន​កម្រិត​ទាប។​ លោក​ក៏​បាន​បន្ថែម​ទៀត​ថា​ អ៊ុយក្រែន​នឹង​បញ្ជូន​កម្លាំង​បន្ថែម​ទៀតទៅ​កាន់ទី​ប្រជុំ​ជន​ខ្សែត្រៀម​ជួរមុខ Pisky ​ដែល​ស្ថិតជាយ​ទីក្រុង ​Donetsk ដែលកាន់​កាប់​ដោយ​ក្រុម​បំបែក​ខ្លួន​ ហើយ​ដែល​កំពុង​មាន​ការ​ប្រយុទ្ធគ្នា​ដ៏​តឹង​តែង​ក្នុង​រយៈពេល​ប៉ុន្មាន​ថ្ងៃ​ថ្មីៗ​កន្លង​ទៅ​នេះ។ ក្រុម​អ្នក​បំបែក​ខ្លួន​ ដែលគាំទ្រ​ដោយ​រុស្ស៊ី​ បាន​ធ្វើ​ការ​អះ​អាងពី​ការកាន់​កាប់​ទី​ប្រជុំជន​ Pisky ​ប៉ុន្តែ​មន្ត្រី​អ៊ុយក្រែនបាន​បដិសេធ​ថា​ មិន​ពិត​ឡើយ។​ ទី​ភ្នាក់ងារ​ព័ត៌មាន​ Reuters ​នៅ​មិន​ទាន់​ធ្វើ​ការ​ផ្ទៀង​ផ្ទាត់​បាន​នៅ​ឡើយ​ទេ​ជុំវិញ​រឿង​នេះ។​ នេះបើតាម​ការ​ចេញ​ផ្សាយ​របស់​ទី​ភ្នាក់ងារ​ព័ត៌មាន​នេះ។
  • នាយក​រដ្ឋមន្ត្រីចក្រភព​អង់គ្លេស​លោក​ Boris Johnson ​បាន​ប្រាប់​ប្រធានាធិបតី​ប្រទេស​អេមីរ៉ាត​អារ៉ាប់រួម​ ព្រះអង្គម្ចាស់ ​Sheikh Mohammed bin Zayed al-Nahyan ​នៅក្នុង​ការហៅតាមទូរស័ព្ទ​មួយ​ថា​ កិច្ច​សហប្រតិបត្តិការរវាង​ប្រទេស​ទាំង​ពីរ​ស្តី​ពី​ប្រទេស​អ៊ុយក្រែន​និង​ស្ថិរភាព​តំបន់​ គឺ​មាន​សារៈ​សំខាន់​ខ្លាំង​សម្រាប់​ពិភព​លោក​ទាំង​មូល។​ នេះ​បើ​តាម​ការ​បញ្ជាក់​របស់អ្នកនាំ​ពាក្យ​នាយក​រដ្ឋមន្ត្រី​អង់គ្លេស​រូប​នេះ។​ អ្នក​នាំ​ពាក្យ​រូប​នេះ​បន្ត​ទៀត​ថា៖ «​លោក ​Johnson​ បាន​សម្តែង​នូវ​ជំនឿ​ចិត្ត​ថា​ កិច្ច​សហ​ប្រតិបត្តិការរវាង​ចក្រភព​អង់គ្លេស​និង​ប្រទេស​អេមីរ៉ាត​អារ៉ាប់រួម​ នឹង​បន្តកើត​មាន​ជា​ច្រើន​ឆ្នាំ​ទៅ​មុខ​ទៀត»។
  • ប្រទេស​រុស្ស៊ី​នៅ​ថ្ងៃ​ព្រហស្បតិ៍​នេះ​បាន​ថ្កោល​ទោស​ទៅលើសេចក្តី​សម្រេច​មួយ​របស់​សភា​ប្រទេស​ឡេតូនី​ ដែល​បាន​ដាក់​រុស្ស៊ី​ជា «រដ្ឋ​គាំទ្រ​ភេរវកម្ម»។​ នេះ​តាម​ទី​ភ្នាក់ងារ​ព័ត៌មាន​ Reuters។​ អ្នក​នាំ​ពាក្យក្រសួង​ការ​បរទេស​រុស្ស៊ី​លោក​ស្រី ​Maria Zakharova ​បានបង្ហោះសារ​លើ​តេឡេក្រាម​ថា​ «ដោយ​គ្មាន​បង្ហាញ​ភស្តុតាង​ច្បាស់​លាស់ ​តែ​មាន​ការគុំកួន​មិន​ចូល​ចិត្ត​ប្រទេស​រុស្ស៊ី​ ដែល​នៅ​ពី​ក្រោយ​សេចក្តី​សម្រេច​នោះ​ ​វា​ចាំបាច់​ដែល​យើង​ហៅ​ការ​សម្រេច​នោះថា ​គ្មាន​អ្វី​ក្រៅ​ពី​ណាហ្ស៊ី​ជំនាន់​ថ្មី​នោះ​ឡើយ»។​ ​សេចក្តី​សម្រេច​នោះនិយាយ​ថា​ «ប្រទេស​ឡេតូនី​ទទួលស្គាល់សកម្ម​ភាព​របស់​រុស្ស៊ី​នៅ​ក្នុង​ប្រទេស​អ៊ុយក្រែន​ថា​ ជា​អំពើប្រល័យ​ពូជសាសន៍​មួយ​ ដែល​បាន​កំណត់​ទិស​ដៅ​ ប្រឆាំងប្រជាជន​អ៊ុយក្រែន» និង​បានអំពាវនាវ​ឱ្យ​មានការ​ជួយ​គាំទ្រ​បន្ថែម​ទៀត​ខាង​ផ្នែក​យោធា​ ហិរញ្ញវត្ថុ​ មនុស្សធម៌​ និង​ការ​ទូត​សម្រាប់​ប្រទេស​អ៊ុយក្រែន»៕

00:58 11.8.2022

ថ្ងៃពុធ ទី ១០ ខែសីហា៖

  • ការ​បង្ហូរ​ប្រេង​របស់​រុស្ស៊ី​ដែល​ត្រូវ​បាន​ផ្អាកទៅ​កាន់​ផ្នែក​ខ្លះ​របស់​អឺរ៉ុប​ អាចនឹង​ត្រូវបើក​ដំណើរ​ការ​ឡើង​វិញ ក្រោយ​ពី​ក្រុមហ៊ុន​ប្រេង ​MOL ​របស់​ប្រទេស​ហុងគ្រី បាន​បង់ថ្លៃ​បញ្ជូន​ប្រេង​ដែល​ជំពាក់ទៅ​ឱ្យ​ប្រទេស​អ៊ុយក្រែន​រួច​ហើយ​ ដែលនេះ​ជាការ​ផ្តល់​នូវ​ដំណោះ​ស្រាយជា​បណ្តោះ​អាសន្ន​មួយ​ ចំពោះ​ការធ្វើ​ឱ្យ​រាំងស្ទះទៅ​លើ​ការ​ផ្គត់​ផ្គង់​ថាមពល​របស់​រុស្ស៊ីនា​ពេល​ថ្មីៗ​ចុង​ក្រោយ​បំផុត​នេះ។ នេះ​បើ​តាម​ការឱ្យ​ដឹង​របស់មន្រ្តី​មួយ​ចំនួន​និង​រដ្ឋមន្ត្រី​មួយ​រូប។ ក្រុមហ៊ុន​ប្រេង Transneft បាន​និយាយ​កាល​ពី​ថ្ងៃ​អង្គារ​ថា​ បំពង់​បង្ហូរ​ប្រេង​របស់​រុស្ស៊ី​ទៅ​កាន់​ផ្នែក​ខ្លះ​នៃ​អឺរ៉ុប​កណ្តាល​ ត្រូវ​បាន​ផ្អាកចាប់​តាំង​ពី​ថ្ងៃ​ទី​៤​ ខែ​សីហា​មក​ ដោយ​សារ​តែ​ទណ្ឌកម្ម​របស់​ប្រទេស​លោក​ខាងលិច​ បាន​រារាំង​ដល់​ការ​បង់​ថ្លៃ​បង្ហូរ​ប្រេង​ពី​រុស្ស៊ី​ទៅ​អ៊ុយក្រែន។​ នេះ​បើ​តាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន Reuters។
  • ប្រទេស​ដាណឺម៉ាក​នឹង​បញ្ជូន​គ្រូ​បណ្តុះ​បណ្តាល​ផ្នែកយោធាទៅ​កាន់​ចក្រភព​អង់គ្លេស​ ដើម្បីជួយបង្វឹក​កងទាហាន​អ៊ុយក្រែន​នៅ​ទី​នោះ​ និង​ស្នើ​សុំ​ការការ​បណ្តុះ​បណ្តាល​មន្ត្រី​អ៊ុយក្រែន​នៅ​ក្នុង​ប្រទេសរបស់​ខ្លួន​ផង​ដែរ។ នេះ​បើ​តាម​ការ​បញ្ជាក់​របស់​ក្រសួង​ការពារ​ជាតិ​ដាណឺម៉ាក​នៅ​ថ្ងៃ​ពុធ​នេះ។ សេចក្តី​ប្រកាស​នេះ​ត្រូវ​បាន​ធ្វើ​ឡើង​ នៅ​មុនសន្និសីទ​មួយក្នុង​រាជធានី​កូប៉ិនហាក​ ប្រទេស​ដាណឺម៉ាក​ នៅ​ថ្ងៃ​ព្រហស្បតិ៍​នេះ នៅ​ពេល​ដែល​រដ្ឋមន្ត្រី​ការពារ​ជាតិ​ចក្រភព​អង់គ្លេស​ ​ប្រទេស​ដាណឺម៉ាក​ និង​អ៊ុយក្រែន​ ត្រូវ​គេ​រំពឹង​ថា​នឹង​ជួប​ប្រជុំ​គ្នា​ ដើម្បី​ពិភាក្សា​អំពីការ​គាំទ្រ​យូរអង្វែង​មួយដល់​ប្រទេស​អ៊ុយក្រែន ដែល​ក្នុង​នោះ​រួម​មាន​ការ​បណ្តុះបណ្តាល​ផ្នែក​យោធា​ ការ​ដោះ​មីន​ និង​ការ​ផ្គត់​ផ្គង់​អាវុធ​ជា​ដើម។ នេះ​បើ​តាមសេចក្តី​រាយការណ៍​របស់​ទី​ភ្នាក់ងារ​ព័ត៌មាន Reuters។
  • ក្រុម​អ្នក​ស៊ើប​អង្កេត​រុស្ស៊ី​នៅ​ថ្ងៃ​ពុធ​នេះ​បាន​បើក​ការ​ស៊ើប​អង្កេត​ករណី​ព្រហ្មទណ្ឌ​មួយ​ ទៅ​លើ​អ្នក​សារព័ត៌មានលោក​ស្រី​ Marina Ovsyannikova ដែល​បាន​ថ្កោលទោស​ការ​ចូល​ឈ្លានពាន​របស់​កង​កម្លាំង​រុស្ស៊ី​ទៅ​ក្នុង​ប្រទេស​អ៊ុយក្រែន​ នៅក្នុង​ការ​ផ្សាយ​បន្ត​ផ្ទាល់​លើ​កញ្ចក់​ទូរទស្សន៍។ លោកស្រី​ត្រូវ​បាន​ចាប់​ឃុំ​ខ្លួន។ នេះ​បើ​តាម​ការ​ឱ្យ​ដឹង​ពី​មេធាវី​ការពារ​ក្តី​របស់​លោក​ស្រី។ មេធាវី​ការពារ​ក្តី​លោក​ស្រី គឺ​លោក Dmitry Zakhvatov បាន​ប្រាប់ទី​ភ្នាក់ងារ​ព័ត៌មាន​បារាំង AFP ថា៖ «ការ​ស៊ើប​អង្កេត​ករណី​ព្រហ្មទណ្ឌ​មួយ​ត្រូវ​បាន​ធ្វើ​ឡើង»។ លោក​បន្ថែម​ទៀត​ថា ពេល​នេះ​ពួក​គេ​កំពុង​រង់​ចាំ​នូវការ​សម្រេច​ចិត្តរបស់ក្រុម​អ្នក​ស៊ើប​អង្កេត​ ទៅ​លើ​វិធានការ​មុន​ការ​ជំនុំ​ជម្រះ​ក្តីទៅ​លើ​លោកស្រី។ លោកស្រី Ovsyannikova មាន​កូន​២នាក់។ នេះ​បើ​តាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន​ AFP។
  • នាយក​រដ្ឋមន្ត្រី​ប៉ូឡូញ​លោក Mateusz Morawiecki បាន​ចោទ​ប្រកាន់សហភាព​អឺរ៉ុប​ថា​ប្រកាន់​អត្តចរិត​បែប​ចក្រពត្តិនិយម​ ទៅ​លើ​សមាជិក​ដែល​ជា​រដ្ឋ​តូចៗ​ នៅ​ក្នុងអត្ថបទទស្សនៈ​របស់​លោក​មួយ​ ដែល​ត្រូវ​បាន​ចេញ​ផ្សាយ​នៅ​លើគេហទំព័រ​ព័ត៌មាន Welt នៅ​ថ្ងៃពុធ​នេះ។​ នេះ​បើ​តាម​សេចក្តី​រាយការណ៍​របស់ទី​ភ្នាក់ងារ​ព័ត៌មាន​ Reuters។​ នាយក​រដ្ឋមន្ត្រីប៉ូឡូញ​រូប​នេះ​ ដែល​បានប៉ះ​ទង្គិច​គ្នាជា​ញឹក​ញាប់​ជា​មួយ​នឹង​ការ​អនុវត្ត​ច្បាប់ហួសកម្រិតរបស់​សហភាព​អឺរ៉ុប​នោះ​ បាន​និយាយ​ថា​ ការ​ចូល​ឈ្លាន​ពាន​របស់​រុស្ស៊ី​ទៅ​លើប្រទេស​អ៊ុយក្រែន​ បាន​ឆ្លុះ​បញ្ចាំង​ឱ្យ​ឃើញ​ពីកង្វះខាត​របស់សហភាព​អឺរ៉ុប។​ លោក​បាន​អំពាវនាវឱ្យ​មាន​ការ​ «កែ​ទម្រង់​ស៊ីជម្រៅ​មួយ​ ដោយ​ដាក់មក​វិញ​នូវ​ភាព​ល្អ​ជាទូទៅនិងភាព​ស្មើគ្នា ទៅ​ក្នុង​គោលការណ៍​ដ៏​សំខាន់របស់សហភាព​អឺរ៉ុប»។
00:02 10.8.2022

ថ្ងៃអង្គារ ទី ៩ ខែសីហា៖

  • វិមាន​ក្រឹមឡាំង​នៅ​ថ្ងៃ​អង្គារនេះ​បាន​បដិសេធ​នូវ​ការ​អំពាវនាវ​របស់របស់​ប្រធានាធិបតី​អ៊ុយក្រែន​លោក Volodymyr Zelenskyy ដែល​សុំឱ្យមាន​ការ​ដាក់​បម្រាមដល់​ការ​ធ្វើដំណើរ​របស់​ពលរដ្ឋ​រុស្ស៊ី​ទាំង​អស់​ទៅ​កាន់​ប្រទេស​លោក​ខាង​លិច​ ថា​ជារឿង​មួយ​មិន​សមហេតុផល​គ្មាន​ការ​ពិចារណា និង​បាន​និយាយ​ថា​ អឺរ៉ុបនឹង​ត្រូវ​គិត​នៅ​ទី​បំផុត​ថា​តើ​ខ្លួន​នឹងចង់​ខាត​បង់​ទៅ​តាម​ការ​ចង់​បាន​របស់​លោក Zelenskyy ឬ​យ៉ាង​ណា​នោះ។​ នេះ​បើ​តាម​សេចក្តីរាយកាណ៍​របស់ទី​ភ្នាក់ងារ​ព័ត៌មាន​Reuters។ នៅក្នុង​បទ​សម្ភាសន៍មួយ​ជា​មួយ​កាសែត The Washington Post លោក Zelenskyy បាន​អំពាវនាវ​ឱ្យ​មេដឹកនាំ​ប្រទេស​លោក​ខាង​លិច​បញ្ឈប់​ការ​អនុញ្ញាតឱ្យ​ពលរដ្ឋ​រុស្ស៊ី​ធ្វើដំណើរ​ទៅ​កាន់​ប្រទេសរបស់​ខ្លួន ​ដែល​ជា​ការ​ដាក់ទណ្ឌកម្មទៅ​លើ​ការ​សម្រេច​ចិត្ត​របស់​ប្រធានាធិបតី​រុស្ស៊ី​លោក Vladimir Putin ក្នុង​ការ​បញ្ជូន​ទ័ពចូល​ឈ្លាន​ពាន​ប្រទេស​អ៊ុយក្រែន​នោះ។ លោក Zelenskyy ត្រូវ​បានស្រង់​សម្តីដោយ​កាសែត The Washington Post ថា​ ពលរដ្ឋ​រុស្ស៊ី​គួរ​ត្រូវ​បាន​បង្ខំ​«ឱ្យ​រស់​នៅ​ក្នុង​ប្រទេសរបស់​ខ្លួន​រហូត​ដល់​ពួកគេ​ធ្វើ​ការផ្លាស់ប្តូរ​នូវ​ទស្សនៈ​យល់​ឃើញ​របស់​ពួកគេ»។​
  • អភិបាល​រង​ទីក្រុង Nova Kakhovka​ របស់​អ៊ុយក្រែន​ ដែល​ត្រូវ​បាន​តែង​តាំង​ដោយ​រដ្ឋាភិបាល​ក្រុង​ម៉ូស្គូ លោក Vitaliy Efymenko ត្រូវ​បានឃុំ​ខ្លួនពី​បទ​ព្រហ្មទណ្ឌ។​ នេះ​បើតាមការ​ផ្សព្វផ្សាយ​របស់​វិទ្យុសេរីភាព​និងវិទ្យុអឺរ៉ុប​សេរីនៅ​ថ្ងៃ​អង្គារ​នេះ។ ក្រុម​អាជ្ញាធរ​ដែល​ត្រូវ​បាន​លើក​បន្តុប​ដោយ​រុស្ស៊ីនៅ​ក្នុងទីក្រុង Kherson នៃ​តំបន់​ភាគ​អាគ្នេយ៍​អ៊ុយក្រែន បាន​ឱ្យ​ដឹង​នៅ​ថ្ងៃ​ទី​៨ ខែ​សីហា​ថា​ ពួក​គេ​បាន​រឹបអូស​យក​អាវុធ​ខុសច្បាប់ជា​ច្រើន​ដើម​ និង​លុយ​រូប្ល​រុស្ស៊ី​ជា​ច្រើន​លានពីលោក Efymenko ដែល​ត្រូវ​បាន​គេ​ស្គាល់​ផង​ដែរ​ ថា​ជា​អ្នក​ជំនួញ​ក្នុង​ស្រុកមួយ​រូប​នោះ។ យោង​ទៅ​លើអ្វី​ដែល​គេ​ហៅ​ថា​ជា​អគ្គនាយកដ្ឋាន​បណ្តោះ​អាសន្ននៃ​ក្រសួងមហាផ្ទៃ​រុស្ស៊ីនៅ​ក្នុង​តំបន់​នោះ លោក Efymenko ត្រូវ​បាន​សង្ស័យ​ថា​ ជា​សមាជិក​នៃ​ក្រុម​ជន​អន្ធពាល​ ដែល​បាន​ធ្វើ​ការ​វាយ​ប្រហារ​យ៉ាង​តិច​ណាស់​ក៏​ចំនួន​២​ដង​ដែរ​ ទៅ​លើអ្នក​ជំនាញ​ក្នុង​ស្រុក​២​រូប​ នៅក្នុង​សប្តាហ៍​ថ្មីៗ​កន្លង​ទៅ​នេះ។​
  • រុស្ស៊ី​បាន​ជំរុញកងកម្លាំង​ជើងគោក​ ​បង្កើន​ការ​វាយ​ប្រហារ​តាម​ជើង​អាកាស និងប្រើ​កាំភ្លើង​ធំ​បាញ់​ផ្លោង​ ខណៈ​ខ្លួន​កំពុង​ធ្វើ​ការ​វាយ​ប្រហារ​កាន់​តែ​ខ្លាំង​ ដើម្បីត្រួត​ត្រា​បាន​ទាំង​ស្រុងនូវ​តំបន់​ភាគ​ខាង​កើត​ប្រទេស​អ៊ុយក្រែន​ ប៉ុន្តែ​រដ្ឋាភិបាល​ក្រុង​កៀវ​បាន​និយាយ​ថា​ កងកម្លាំង​របស់​ខ្លួន​ កំពុង​ធ្វើ​ការ​ទប់ទល់​យ៉ាង​ស្វិតស្វាញជាមួយ​កង​កម្លាំង​រុស្ស៊ី និង​កំពុង​គ្រប់គ្រង​ខ្សែ​បន្ទាត់​សមរភូមិ​ខាង​មុខ។​ នេះ​បើ​តាម​សេចក្តីរាយការណ៍​របស់ទី​ភ្នាក់ងារ​ព័ត៌មាន Reuters។ ការ​វាយប្រហារ​ដ៏​ខ្លាំង​ក្លា​ត្រូវ​បាន​គេ​រាយការណ៍ថាបាន​កើតមាន​នៅ​ក្នុង​ទីប្រជុំជន​នៃ​ខ្សែបន្ទាត់​ជួរមុខ​ក្នុង​ទីក្រុង​ភាគ​ខាង​កើត​តំបន់ Donetsk នៅ​ថ្ងៃ​អង្គារ​នេះ​ ទី​ដែល​មន្ត្រី​អ៊ុយក្រែន​និយាយ​ថា​ កង​កម្លាំង​រុស្ស៊ី កំពុង​ធ្វើ​ការ​វាយ​ប្រហារ​ជាប់​គ្នា​ផ្ទួនៗ​ ខណៈ​ពេល​ដែលរុស្ស៊ី​កំពុង​ព្យាយាម​ដណ្តើម​គ្រប់គ្រងតំបន់​ឧស្សាហកម្ម Donbas​ នោះ។​
  • គេ​ឮ​សូរ​សំឡេង​ផ្ទុះ​ជា​ច្រើន​កន្លែងកើតមាន​ឡើង​នៅ​ថ្ងៃ​អង្គារ​នេះ​ នៅ​ជិតមូលដ្ឋាន​កង​ទ័ព​ជើង​អាកាស​របស់​រុស្ស៊ី​ នៅ​ក្នុង​តំបន់ Crimea ​ដែល​ត្រូវ​បានបញ្ចូល​ជា​ផ្នែក​មួយ​របស់​រុស្ស៊ី​ និង​ជា​កន្លែង​ទេសចរណ៍​ដ៏​ពេញ​និយម​មួយ។​ នេះ​បើ​តាម​ការឱ្យ​ដឹង​របស់​មន្ត្រី​ក្នុង​ស្រុក​មួយ​ចំនួន។ ជំនួយ​ការ​មួយ​រូប​របស់​មេដឹកនាំតំបន់ Crimea ដែល​ត្រូវ​បាន​លើក​បន្តុប​ដោយ​រដ្ឋាភិបាល​ក្រុង​ម៉ូស្គូ លោក Oleg Kryuchkov បាន​និយាយនៅ​ក្នុង​សារតេឡេក្រាម​ថា​ «​ខ្ញុំ​អាច​បញ្ជាក់បាន​ថា​ មាន​ការ​ផ្ទុះ​ជាច្រើនមែននៅ​ក្នុង​តំបន់ Novofyodorovka ហើយ​មូលហេតុ​នៃ​ការ​ផ្ទុះ​នោះ​កំពុង​ត្រូវ​បាន​ធ្វើ​ការពិនិត្យបញ្ជាក់»។​ នេះ​បើតាម​សេចក្តី​រាយការណ៍​របស់​ទីភ្នាក់ងារ​ព័ត៌មាន AFP។ ដោយ​ឡែកក្រសួង​ការពារ​ជាតិ​រុស្ស៊ីបាន​និយាយ​ថា​ ការ​ផ្ទុះនៅក្នុង​មូលដ្ឋាន​កងទ័ពជើង​អាកាស​រុស្ស៊ី​នៅ​ក្នុង​តំបន់ Crimea ​នោះ​ គឺ​បណ្តាល​មកពី​ការ​ផ្ទុះ​គ្រាប់​ ហើយ​ពុំ​មាន​ការ​ខូច​ខាត​អ្វី​នោះ​ឡើយ។​ នេះ​បើ​តាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន Reuters។ ​

ព័ត៌មាន​​​​​​ផ្សេង​​​ទៀត

XS
SM
MD
LG