ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅក្នុងសុន្ទរកថាប្រចាំថ្ងៃថា លោក និងរដ្ឋមន្ត្រីការបរទេសអាមេរិកលោក Antony Blinken ដែលធ្វើទស្សនកិច្ចដោយមិនប្រកាសទៅកាន់ទីក្រុង កៀវ កាលពីថ្ងៃព្រហស្បតិ៍នោះ បានពិភាក្សាអំពីប្រធានបទជាច្រើន រួមទាំងការចាត់ទុកប្រទេសរុស្ស៊ីជារដ្ឋភេរវករ។
លោក Zelenskyy និយាយថា៖ «ការណ៍ពិតតាមផ្លូវច្បាប់ត្រូវតែស្របការណ៍ពិតជាក់ស្តែងជានិច្ច។ ហើយវាជាការណ៍ពិតដែលរុស្ស៊ីបានក្លាយជាប្រភពនៃអំពើភេរវកម្មដ៏ធំបំផុតក្នុងពិភពលោក។ ពិភពលោកច្បាស់ជាទទួលបានសញ្ញាច្បាស់លាស់ថា ភេរវកររុស្ស៊ីនឹងមិនត្រូវបានលើកលែងទោសឡើយ»។
នៅក្នុងសុន្ទរកថាប្រចាំថ្ងៃរបស់គាត់ផងដែរ លោក Zelenskyy បាននិយាយថា៖ «ទឹកដីរបស់យើងជាងមួយពាន់គីឡូម៉ែត្រក្រឡាត្រូវបានរំដោះចាប់តាំងពីថ្ងៃទី១ ខែកញ្ញា។ ខ្ញុំដឹងគុណអ្នករាល់គ្នាចំពោះស្នាដៃនេះ។ ខ្ញុំអរគុណកងទ័ព មន្ត្រីស៊ើបការណ៍សម្ងាត់ និងសេវាកម្មពិសេសដែលជ្រោងទង់ជាតិអ៊ុយក្រែនសព្វថ្ងៃនេះ»។
ក្នុងសេចក្តីថ្លែងការណ៍មួយបន្ទាប់ពីបានជួបលោក Zelenskyy លោក Blinken បាននិយាយថា៖ «អ្នកការពារជួរមុខមិនធម្មតារបស់អ៊ុយក្រែន បន្តប្រយុទ្ធដោយក្លាហានដើម្បីសេរីភាពប្រទេសរបស់ពួកគេ»។
អ្នកការទូតកំពូលរបស់សហរដ្ឋអាមេរិករូបនេះបានអះអាងសារជាថ្មីនូវការប្តេជ្ញាចិត្តរបស់លោកប្រធានាធិបតី Joe Biden គាំទ្រប្រទេសអ៊ុយក្រែន«ដរាបណាបើនៅតែចាំបាច់»។
ទន្ទឹមនឹងនេះ សហរដ្ឋអាមេរិកបាននិយាយកាលពីថ្ងៃព្រហស្បតិ៍ថា ខ្លួនគ្រោងនឹងបញ្ជូនជំនួយយោធារយៈពេលយូរចំនួន២ពាន់២រយលានដុល្លារទៅប្រទេសអ៊ុយក្រែន និងប្រទេសចំនួន១៨ ផ្សេងទៀតនៅអឺរ៉ុប ដែលត្រូវបានគំរាមកំហែងដោយការឈ្លានពានរបស់រុស្ស៊ី ហើយថវិកាចំនួន ៦៧៥លាន ដុល្លារផ្សេងទៀតឱ្យដោយផ្ទាល់ទៅកាន់រដ្ឋាភិបាលទីក្រុងកៀវ ក្នុងកញ្ចប់ជំនួយយោធាថ្មីដើម្បីប្រយុទ្ធប្រឆាំងនឹងការឈ្លានពានរបស់រដ្ឋាភិបាលទីក្រុងមូស្គូ៕
