ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃពុធនេះថា ប្រទេសរុស្ស៊ីមិនបានបាត់បង់អ្វីពីប្រតិបត្តិការយោធារបស់ខ្លួននៅក្នុងប្រទេសអ៊ុយក្រែននោះទេ ប៉ុន្តែថា ប្រតិបត្តិការយោធានោះបានពង្រឹងអធិបតេយ្យភាពរបស់ប្រទេសរុស្ស៊ី។
លោក Putin បានថ្លែងនៅក្នុងវេទិកាសេដ្ឋកិច្ចមួយថា រាល់សកម្មភាពរបស់រុស្ស៊ី «គឺសំដៅជួយប្រជាពលរដ្ឋនៅក្នុងតំបន់ Donbas [នៃប្រទេសអ៊ុយក្រែន]»។
លោក Putin បានបញ្ជាក់ដូច្នេះថា៖ «នៅទីបំផុត ប្រតិបត្តិការយោធានេះនឹងឈានទៅដល់ការពង្រឹងប្រទេសរបស់យើងពីខាងក្នុង និងការពង្រឹងប្រទេសរបស់យើងនៅក្នុងគោលនយោបាយការបរទេសរបស់ខ្លួន»។
ប្រទេសរុស្ស៊ីបានចូលឈ្លានពានប្រទេសអ៊ុយក្រែនកាលពីចុងខែកុម្ភៈកន្លងទៅនេះ ហើយបន្ទាប់ពីបានលះបង់ចោលការជំរុលឆ្ពោះទៅកាន់រដ្ឋធានីកៀវរបស់អ៊ុយក្រែនមក រុស្ស៊ីបានផ្តោតកិច្ចខិតខំប្រឹងប្រែងយោធារបស់ខ្លួននៅក្នុងតំបន់ Donbas នៅភាគខាងកើតប្រទេសអ៊ុយក្រែន ដែលជាកន្លែងដែលយុទ្ធជនគាំទ្ររុស្ស៊ីបានប្រយុទ្ធជាមួយនឹងកងកម្លាំងអ៊ុយក្រែនតាំងពីឆ្នាំ ២០១៤ មក។
លោក Putin ក៏បានរិះគន់ផងដែរលើកិច្ចព្រមព្រៀងមួយដែលសម្របសម្រួលដោយអង្គការសហប្រជាជាតិនិងប្រទេសតួកគី ដែលបានធ្វើឱ្យមានការនាំចេញធញ្ញជាតិរបស់ប្រទេសអ៊ុយក្រែនឡើងវិញ នៅចំពេលដែលមានវិបត្តិស្បៀងអាហារពិភពលោក ដោយលោកបាននិយាយថា ការនាំចេញទាំងនេះមិនបានទៅដល់បណ្ដាប្រទេសក្រីក្របំផុតនៅលើពិភពលោកនោះទេ។
មជ្ឈមណ្ឌលសម្របសម្រួលរួម (Joint Coordination Center) ដែលកំពុងមើលការខុសត្រូវលើការអនុវត្តកិច្ចព្រមព្រៀងនេះ បានបញ្ជាក់ថា គិតត្រឹមថ្ងៃអង្គារ ធញ្ញជាតិជាង ២ លាន ២ សែនតោន និងគ្រឿងឧបភោគបរិភោគផ្សេងទៀតត្រូវបាននាំចេញពីកំពង់ផែអ៊ុយក្រែនតាមកប៉ាល់ប្រហែល ១០០ គ្រឿងឆ្ពោះទៅកាន់គោលដៅមួយចំនួនដូចជាប្រទេសអ៊ីតាលី តួកគី អ៊ីរ៉ង់ ចិន រូម៉ានី ជីប៊ូទី អាល្លឺម៉ង់ និងលីបង់ជាដើម។
លោក Mykhailo Podolyak ដែលជាទីប្រឹក្សារបស់ប្រធានាធិបតីអ៊ុយក្រែន បានប្រាប់ទីភ្នាក់ងារព័ត៌មាន Reuters ថា ការលើកឡើងរបស់រុស្ស៊ីអំពីកិច្ចព្រមព្រៀងនេះគឺជាការលើកឡើងដែល «នឹកស្មានមិនដល់» និង «គ្មានមូលដ្ឋាន»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
លោក Putin ថា សង្គ្រាមនៅអ៊ុយក្រែននឹងជួយពង្រឹងប្រទេសរុស្ស៊ី
