ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តើ​យើង​ដឹង​អ្វី​ខ្លះ​អំពី​របាយការណ៍​របស់​លោក Mueller?


នេះ​ជា​របាយការណ៍​ស្តី​ពី​ការ​ស៊ើបអង្កេត​ពី​ការ​រំខាន​របស់​រុស្ស៊ី​ក្នុង​ការ​បោះឆ្នោត​ប្រធានធិបតី​ក្នុង​ឆ្នាំ២០១៦។

របាយការណ៍​របស់​រដ្ឋ​អាជ្ញា​ពិសេស​ លោក Robert Mueller ​អំពី​ការ​ជ្រៀតជ្រែក​របស់​រុស្ស៊ី​ទៅលើ​ការ​បោះឆ្នោត​ប្រធានាធិបតី​អាមេរិក​កាល​ពី​ឆ្នាំ​២០១៦​​សន្និដ្ឋាន​ថា ​រដ្ឋាភិបាល​ក្រុង​មូស្គូ​បាន​ប្រើប្រាស់​ប្រតិបត្តិការ​ធំៗ​​ពីរ​ដើម្បី​ព្យាយាម​ជះឥទ្ធិពល​ទៅ​លើ​ការ​បោះឆ្នោត​នោះ។

ទីមួយ​គឺ​យុទ្ធនាការ​តាម​ប្រព័ន្ធ​ផ្សព្វផ្សាយ​សង្គម​ដែល​លម្អៀង​ទៅ​រក​បេក្ខជន​ខាង​គណបក្ស​សាធារណរដ្ឋ​គឺ​លោក ដូណាល់ ត្រាំ និង​បន្តុះបង្អាប់​អ្នកស្រី Hillary Clinton ដែល​ជា​គូប្រជែង​របស់​លោក។ ទីពីរ​គឺ​ការ​ព្យាយាម​លួច​ទិន្នន័យ​តាម​ប្រព័ន្ធ​កុំព្យូទ័រ​អំពី​អ្នកស្រី Clinton ដើម្បី​ចេញ​ផ្សាយ​ឯកសារ​ដែល​បាន​លួច។

ខណៈ​ដែល​លទ្ធផល​នៃ​ការ​ស៊ើបអង្កេត​នេះ​បាន​ធ្វើ​ឲ្យ​អតីត​សមាជិក​មួយ​ចំនួន​នៃ​យុទ្ធនាការ​ឃោសនា​បោះឆ្នោត​របស់​លោក​ ត្រាំ សារភាព​ទទួល​កំហុស ចំពោះ​បទឧក្រិដ្ឋ​ហិរញ្ញវត្ថុ​នានា​និង​បទឧក្រិដ្ឋ​ផ្សេងៗ​ទៀត ការ​ស៊ើបអង្កេត​នេះ​មិន​បាន​រក​ឃើញ​ថា មន្ត្រី​យុទ្ធនាការ​ឃោសនា​បោះឆ្នោត​ណា​ម្នាក់​របស់​លោក ត្រាំ បាន​ឃុបឃិត​ជាមួយ​នឹង​មន្ត្រី​រុស្ស៊ី​ដើម្បី​ជះឥទ្ធិពល​ដល់​ការ​បោះឆ្នោត​នោះ​ឡើយ។ ​

ក៏​ប៉ុន្តែ​របាយការណ៍​នោះ​មិន​បាន​បញ្ជាក់​ថា​ លោក​ប្រធានាធិបតី​មិន​បាន​ប្រព្រឹត្ត​ខុស​នោះ​ទេ។

រូបភាព​កសារ៖ លោក​ប្រធានាធិបតី ដូណាល់ ត្រាំ ថ្លែង​ទៅ​កាន់​អ្នក​សារព័ត៌មាន នៅ​ពេល​លោក​បាន​ត្រឡប់​មក​សេតវិមាន​វិញ កាលពី​ថ្ងៃទី២៤ ខែមីនា ឆ្នាំ២០១៩។
រូបភាព​កសារ៖ លោក​ប្រធានាធិបតី ដូណាល់ ត្រាំ ថ្លែង​ទៅ​កាន់​អ្នក​សារព័ត៌មាន នៅ​ពេល​លោក​បាន​ត្រឡប់​មក​សេតវិមាន​វិញ កាលពី​ថ្ងៃទី២៤ ខែមីនា ឆ្នាំ២០១៩។

ស្នើ​ឲ្យ​ប្រធានាធិបតី​ផ្តល់​សក្ខីកម្ម?

របាយការណ៍​នោះ​បាន​រៀបរាប់​លម្អិត​អំពី​សកម្មភាព​របស់​លោក​ប្រធានាធិបតី​ ត្រាំ ទៅ​លើ​ការ​ស៊ើបអង្កេត​របស់​ FBI និង​របស់​លោក​រដ្ឋ​អាជ្ញា​ពិសេស ដែល​លោក ត្រាំ តែងតែ​ចាត់​ទុក​ថា​ជា​ការ «មួលបង្កាច់‍»។ របាយការណ៍​នេះ​ក៏​បាន​រៀបរាប់​ហេតុផល​ផ្លូវ​ច្បាប់​អំពី​ថា​តើ​សកម្មភាព​របស់​លោក ត្រាំ គួរ​តែ​ចាត់​ទុក​ថា​ជា​ការ​រារាំង​ដល់​ដំណើរការ​ស៊ើបអង្កេត​ឬ​យ៉ាង​ណានោះ។

ក្រុម​មេធាវី​របស់​លោក​ប្រធានាធិបតី​បាន​បដិសេធ​សំណើ​របស់​អ្នក​ស៊ើបអង្កេត​ក្នុង​ការ​សាកសួរ​លោក​ប្រធានាធិបតី​ដោយ​ផ្ទាល់។ មេធាវី​ទាំង​នោះ​ត្រឹម​តែ​យល់​ព្រម​ឆ្លើយតប​ជា​លាយលក្ខណ៍​អក្សរ​ទៅ​នឹង​សំណួរ​នានា​ដែល​ផ្តល់​ទៅ​តែ​ប៉ុណ្ណោះ។

សូម​ទស្សនា៖ រ​បាយការណ៍​លោក Mueller ធ្វើ​ឲ្យ​មាន​សំណួរ​ជាច្រើន​ពី​ការ​រារាំងដំណើរការ​យុត្តិធម៌របស់​លោក​ប្រធានាធិបតី​ត្រាំ​

Release of Mueller Report Raises New Questions About Trump Obstruction
សូម​រង់ចាំ

No media source currently available

0:00 0:03:26 0:00
ទាញ​យក​ពី​តំណភ្ជាប់​ដើម

ក្រុមការងារ​របស់​លោក​រដ្ឋអាជ្ញា​ពិសេស​បាន​សរសេរ​ថា «យើង​យល់​ថា​ចម្លើយ​ជា​លាយលក្ខណ៍​អក្សរ​ទាំង​នោះ​មិន​គ្រប់គ្រាន់​នោះ​ទេ។ ប៉ុន្តែ​នៅ​ពេល​នោះ ការ​ស៊ើបអង្កេត​របស់​យើង​បាន​ដំណើរការ​ទៅ​មុខ​យ៉ាង​ច្រើន ហើយ​បាន​ភស្តុតាង​ជា​ដុំ​កំភួន​សម្រាប់​របាយការណ៍​របស់​យើង‍»។

ក្រុមការងារ​នោះ​បាន​និយាយ​ថា ជាជាង​ការ​បង្កើត​ឲ្យ​មាន​ការ​តវ៉ា​តាម​ផ្លូវច្បាប់​មួយ​ដែល​មាន​រយៈពេល​យូរ​ដើម្បី​បង្ខំ​ឲ្យ​ប្រធានាធិបតី​ផ្តល់​សក្ខីកម្ម «យើង​កំណត់​ថា ព័ត៌មាន​ក្រាស់ក្រែល​ដែល​យើង​ទទួល​បាន​ពី​ប្រភព​ព័ត៌មាន​ដទៃទៀត​បាន​អនុញ្ញាត​ឲ្យ​យើង​ធ្វើការ​សន្និដ្ឋាន​ទៅ​លើ​ការពិត​នានា​អំពី​គោលបំណង​និង​ការ​ជឿ​ជាក់​បាន‍»។

ក្រៅ​ពី​បរិយាយ​លម្អិត​អំពី​សកម្មភាព​របស់​លោក​ប្រធានាធិបតី​និង​លទ្ធភាព​នៃ​ដំណើរការ​ផ្លូវច្បាប់​នានា របាយការណ៍​នោះ​ក៏​បាន​ច្រានចោល​មិន​ធ្វើ​សេចក្តីសន្និដ្ឋាន​ទៅ​លើ​ថា​តើ​លោក​ប្រធានាធិបតី​បាន​ប្រព្រឹត្ត​បទឧក្រិដ្ឋ​ដែរ​ឬ​យ៉ាង​ណា​ទេ។

ប៉ុន្តែ​របាយការណ៍​នោះ​បាន​លើកឡើង​ថា សភា​គួរ​តែ​ជា​អ្នក​កំណត់​ទៅ​លើ​ថា​តើ​សកម្មភាព​របស់​លោក​ប្រធានាធិបតី​អាច​ឲ្យ​គេ​ប្តឹង​ទម្លាក់​ពី​តំណែង​បាន​ដែរ​ឬ​យ៉ាង​ណា​នោះ។ ​

«សេចក្តីសន្និដ្ឋាន​ដែល​ថា​សភា​ប្រហែល​ជា​អាច​ប្រើប្រាស់​ច្បាប់​រារាំង​ដំណើរការ​យុត្តិធម៌​ទៅ​លើ​ការ​ប្រើប្រាស់​អំណាច​លើស​ដែន​កំណត់​របស់​លោក​ប្រធានាធិបតី​គឺ​ស្រប​ទៅ​នឹង​ប្រព័ន្ធ​ធម្មនុញ្ញ​នៃ​ការត្រួតពិនិត្យ​ផ្ទៀតផ្ទាត់​និង​គោលការណ៍​ដែល​ថា គ្មាន​នរណា​ម្នាក់​នៅ​ពី​លើ​ច្បាប់​នោះ​ទេ‍»។

រូបភាព​ឯកសារ៖ នេះ​ជា​អគារ Trump Tower ដែល​ស្ថិត​លើ​មហាវិថី 5th Avenue ក្នុង​ក្រុង​ញូវយ៉ក ដែល​ត្រូវ​បាន​គេ​ថត​កាលពី​ថ្ងៃទី១០ ខែមេសា ឆ្នាំ២០១៨។
រូបភាព​ឯកសារ៖ នេះ​ជា​អគារ Trump Tower ដែល​ស្ថិត​លើ​មហាវិថី 5th Avenue ក្នុង​ក្រុង​ញូវយ៉ក ដែល​ត្រូវ​បាន​គេ​ថត​កាលពី​ថ្ងៃទី១០ ខែមេសា ឆ្នាំ២០១៨។

ទំនាក់ទំនង​រវាង​រុស្ស៊ី​និង​យុទ្ធនាការ​ឃោសនា​បោះឆ្នោត​លោក ត្រាំ

ក្រុម​អ្នក​ស៊ើបអង្កេត​បាន​និយាយ​ថា ពួកគេ​បាន​សន្និដ្ឋាន​ថា រុស្ស៊ី​ជឿ​ថា ខ្លួន​នឹង​អាច​ទទួល​បាន​អត្ថប្រយោជន៍​ពី​ការ​កាន់​តំណែង​ជា​ប្រធានាធិបតី​របស់​លោក ត្រាំ ហើយ​យុទ្ធនាការ​ឃោសនា​បោះឆ្នោត​របស់​លោក ត្រាំ ក៏​ជឿថា ខ្លួន​អាច​ទទួល​បាន​ផលប្រយោជន៍​ពី​កិច្ចខិតខំប្រឹងប្រែង​របស់​រុស្ស៊ី​ក្នុង​ការ​លួច​យក​ទិន្នន័យ​ពី​ប្រព័ន្ធ​កុំព្យូទ័រ​ផង​ដែរ។ របាយការណ៍​ដែល​មាន​កម្រាស់​ជាង​១០០​ទំព័រ​នោះ​បាន​រៀបរាប់​លម្អិត​ពី​ទំនាក់ទំនង​និង​ជំនួប​ជាច្រើន​រវាង​មន្ត្រី​នៃ​យុទ្ធនាការ​ឃោសនា​បោះឆ្នោត​របស់​លោក ត្រាំ និង​ជនជាតិ​រុស្ស៊ី​មួយ​ចំនួន ដែល​បាន​ចាប់​ផ្តើម​ធ្វើ​ឡើង​ភ្លាមៗ​បន្ទាប់​ពី​លោក​ ត្រាំ ប្រកាស​បេក្ខភាព​ឈរឈ្មោះ​ប្រធានាធិបតី​កាល​ពី​ខែ មិថុនា ឆ្នាំ​២០១៥។

ទំនាក់ទំនង​ទាំង​នោះ​មាន​ដូចជា​ការ​ពិភាក្សា​អំពី​ជំនួញរបស់​លោក ត្រាំ ដែល​គ្រោង​នឹង​សាងសង់​អគារ​ខ្ពស់​មួយ​នៅ​ក្នុង​ទីក្រុង​មូស្គូ​មុន​នឹង​យុទ្ធនាការ​ឃោសនា​បោះឆ្នោត​របស់​លោក​ចាប់​ផ្តើម ការ​ទាក់ទង​គ្នា​រវាង​មន្ត្រី​យុទ្ធនាការ​ឃោសនា​បោះឆ្នោត​របស់​លោក ត្រាំ ​ជាមួយ​នឹង​មន្ត្រី​រុស្ស៊ី មុន​នឹង​លោក​ទទួល​បាន​ជ័យជម្នះ​នៅ​ក្នុង​ការ​បោះឆ្នោត ហើយ​និង​ជំនួប​កាល​ពី​ខែ​មិថុនា ឆ្នាំ២០១៦ នៅ​អគារ Trump Tower ដែល​មាន​ការ​ចូលរួម​ពីអាជ្ញាធរ​ពាក់ព័ន្ធ​នឹង​រដ្ឋាភិបាល​រុស្ស៊ី​និង​មន្ត្រី​កំពូលៗ​នៃយុទ្ធនាការ​ឃោសនា​បោះឆ្នោត​របស់​លោក ត្រាំ ផង​ដែរ។

របាយការណ៍​នោះ​បាន​ឲ្យ​ដឹង​ថា «ទំនាក់ទំនង​ទាំង​នោះ​រួម​មាន​ទាំង​ការ​ស្នើ​របស់​រុស្ស៊ី​ក្នុង​ការ​ជួយ​ជ្រោមជ្រែង​ដល់​យុទ្ធនាការ​ឃោសនា​បោះឆ្នោត​របស់​លោក ត្រាំ ផង​ដែរ។ ពេល​ខ្លះ ក្រុម​យុទ្ធនាការ​ឃោសនា​បោះឆ្នោត​របស់​លោក ត្រាំ មាន​បំណង​ពិចារណា​អំពី​យោបល់​ទាំង​នោះ ហើយ​ពេល​ខ្លះ​ទៀត មន្ត្រី​យុទ្ធនាការ​ឃោសនា​បោះឆ្នោត​របស់​លោក ត្រាំ មិន​ទទួល​យក​យោបល់​ទាំង​នោះ​ទេ‍»។

​បន្ទាប់​ពី​លោក​ ត្រាំ បាន​ឈ្នះ​ការ​បោះឆ្នោត ក្រុម​អ្នក​ស៊ើបអង្កេត​បាន​ពិនិត្យ​ទៅ​លើ​ជំនួប​នានា​ដែល​ពាក់ព័ន្ធ​នឹង​អតីត​ទីប្រឹក្សា​សន្តិសុខ​ជាតិ លោក Michael Flynn និង​សម្ព័ន្ធមិត្ត​នានា​របស់​លោក ត្រាំ ដែល​រួម​មាន​លោក Steve Bannon និង​លោក Erik Prince ផង​ដែរ។

ក្រុមអ្នក​ស៊ើបអង្កេត​បាន​រៀបរាប់​លម្អិត​អំពី​គោលបំណង​សំខាន់​នៃ​ជំនួប​ទាំង​នោះ ប៉ុន្តែ​ពួកគេ​និយាយ​ថា មិនមាន​ភស្តុតាង​គ្រប់គ្រាន់​ដើម្បី​ឈាន​ដល់​ការចោទប្រកាន់​ពី​បទឧក្រិដ្ឋ​នោះ​ទេ។

របាយការណ៍​ស៊ើបអង្កេត​របស់​លោក Mueller បាន​បញ្ជាក់​យ៉ាង​ដូច្នេះ​ថា៖ «មិនមាន​ភស្តុតាង​គ្រប់គ្រាន់​ដើម្បី​ចោទប្រកាន់​មន្ត្រី​យុទ្ធនាការ​ឃោសនា​បោះឆ្នោត​របស់​លោក ត្រាំ ណា​ម្នាក់ ​ថា​ជា​ភ្នាក់ងារ​ក្រៅផ្លូវការ​របស់​រដ្ឋាភិបាល​រុស្ស៊ី​ឬ​របស់​ស្ថាប័ន​រុស្ស៊ី​ណា​មួយ​បាន​ទេ‍»។

[X]

Lorem ipsum dolor sit amet, consectetur adipisicing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco laboris nisi ut aliquip ex ea commodo consequat.

Explore the Mueller investigation: Check out our timeline of events, indictment profiles and history of past investigations.

របាយការណ៍​របស់​លោក Mueller បញ្ជាក់​១១​ចំណុច​ទាក់ទិន​នឹង​ការ​រារាំង​ដំណើរការ​ស៊ើបអង្កេត

របាយការណ៍​នោះ​មិន​បាន​ផ្តល់​ការ​លើកលែង​ដល់​លោក​ប្រធានាធិបតី​ចំពោះ​ការ​ចោទប្រកាន់​អំពី​ការ​រារាំង​ដល់​ដំណើរការ​យុត្តិធម៌​នោះ​ទេ។

ជិត​ពាក់កណ្តាល​នៃ​របាយការណ៍​នោះ​ផ្តោត​ទៅ​លើ​សកម្មភាព​របស់​លោក ដូណាល់ ត្រាំ ក្នុង​អំឡុងពេល​នៃ​ការ​ស៊ើបអង្កេត​និង​ទៅ​លើ​ថា​តើ​លោក​ ត្រាំ បាន​ប្រើប្រាស់​អំណាច​របស់​លោក​ហួស​ព្រំដែន​ដើម្បី​ព្យាយាម​រារាំង​ដល់​ការ​ស៊ើបអង្កេត​ទៅ​លើ​យុទ្ធនាការ​ឃោសនា​បោះឆ្នោត​របស់​លោក​ឬ​ក៏​យ៉ាង​ណា​នោះ។ របាយការណ៍​នោះ​រៀបរាប់​ចំណុច​ចំនួន​១១ផ្សេង​គ្នា ដែល​ក្នុង​នោះរួម​មាន​ទាំង​កិច្ចខិតខំ​ប្រឹងប្រែង​របស់​លោក ត្រាំ ក្នុង​ការ​រារាំង​ដល់​ការ​ស៊ើបអង្កេត​របស់​លោក​រដ្ឋអាជ្ញា​ពិសេស​និង​ការ​បណ្តេញ​អតីត​នាយក FBI លោក James Comey ចេញ​ពី​តំណែង ដែល​បង្ក​ឲ្យ​មាន​ការ​ចោទសួរ​ជា​សំណួរ​ផ្លូវច្បាប់​អំពី​សកម្មភាព​របស់​លោក​ប្រធានាធិបតី​ផង​ដែរ។

​«ភស្តុតាង​ដែល​យើង​ទទួល​បាន​អំពី​សកម្មភាព​និង​បំណង​របស់​លោក​ប្រធានាធិបតី​បង្ហាញ​ពី​បញ្ហា​លំបាក​នានា​ដែល​រារាំង​មិន​ឲ្យ​យើង​ធ្វើការ​កំណត់ដោយ​គ្មាន​មន្ទិលសង្ស័យ​ថា គ្មាន​ការ​ប្រព្រឹត្ត​បទឧក្រិដ្ឋ​បាន​កើតឡើង​នោះ​ទេ។ ទោះ​ជា​របាយការណ៍​នេះ​មិន​បាន​សន្និដ្ឋាន​ថា លោក​ប្រធានាធិបតី​បាន​ប្រព្រឹត្ត​អំពើ​ឧក្រិដ្ឋកម្ម​ក៏​ពិតមែន ប៉ុន្តែ​វា​មិន​បាន​បញ្ជាក់​ថា លោក​ប្រធានាធិបតី​រួច​ខ្លួន​នោះ​ដែរ។

ចំណុច​ទាំង​១១​នៃ​របាយការណ៍​ស៊ើបអង្កេតនោះ​ក៏​រួម​មាន​ផង​ដែរ​នូវ​ការណ៍​ដែល​លោក​ប្រធានាធិបតី​ស្នើ​ឲ្យ​អ្នក​នៅ​ក្រោម​បង្គាប់​ចាត់​វិធានការ​ដក​លោក​រដ្ឋអាជ្ញា​ពិសេស​ចេញ​ពី​តំណែង​និង​ដឹកនាំ​ជំនួយការ​របស់​លោក​ឲ្យ​ចាត់​វិធានការ​ដើម្បី​ទប់ស្កាត់​ការ​បញ្ចេញ​ភស្តុតាង​ជា​សាធារណៈ​ផង​ដែរ។ ក្រៅពី​នោះ​ក៏​មាន​ការ​លើកឡើង​ជា​សាធារណៈ​នានា​របស់​លោក​ប្រធានាធិបតី​អំពី​សមាជិក​ក្រុម​ការងារ​របស់​លោក​ដែល​ស្ថិត​នៅ​ក្រោម​ការ​ស៊ើបអង្កេត​ផង​ដែរ។

របាយការណ៍​ស៊ើបអង្កេត​របស់​លោក Mueller ​បាន​ឲ្យ​ដឹង​ថា សកម្មភាព​របស់​លោក​ប្រធានាធិបតី​រួម​មាន​ទាំង​«ការវាយប្រហារ​ជា​សាធារណៈ​ទៅ​លើ​ការ​ស៊ើបអង្កេត កិច្ចខិតខំប្រឹងប្រែង​លក្ខណៈ​ឯកជន​ដើម្បី​ត្រួតត្រា​ការ​ស៊ើបអង្កេត​នោះ និង​កិច្ចខិតខំប្រឹងប្រែង​ជាសាធារណៈ​និង​ឯកជន​ ដើម្បីលើក​ទឹកចិត្ត​ដល់​សាក្សី​កុំ​ឲ្យ​សហការ​ជាមួយ​នឹង​ដំណើរការ​ស៊ើបអង្កេត​នោះ‍»៕

ប្រែសម្រួល​ដោយ​អ្នកស្រី ហុង ចិន្តា

XS
SM
MD
LG