កាលពីពេលថ្មីៗនេះ ប៉ូលិសនៅខេត្ត Ninh Binh ភាគខាងជើងប្រទេសវៀតណាមបានចាប់ខ្លួនបុរសវ័យ ៦១ ឆ្នាំម្នាក់ ដែលបានប្រើប្រាស់បណ្តាញសង្គមហ្វេសប៊ុកដើម្បីបង្ហោះអត្ថបទព័ត៌មានស្តីពីសិទ្ធិមនុស្ស និងអំពើពុករលួយ។ បុរសរូបនេះ ក៏បានបញ្ជាក់ពីគោលបំណងរបស់ខ្លួននៅក្នុងការឈរឈ្មោះបោះឆ្នោតសម្រាប់តំណែងនៅរដ្ឋសភា។
លោក Tran Quoc Khanh ត្រូវបានឃុំខ្លួនកាលពីថ្ងៃទី ០៩ ខែមីនា ដោយរងការចោទប្រកាន់ថា បានប្រើប្រាស់ការផ្សាយផ្ទាល់នៅលើបណ្តាញសង្គមហ្វេសប៊ុកដើម្បី«បង្ខូចព័ត៌មានប្រឆាំងនឹងរដ្ឋាភិបាល ដោយបង្កឲ្យមានការភ័ន្តច្រឡំពីសាធារណជន»។
វេបសាយកងសន្តិសុខថ្នាក់ខេត្តបានលើកឡើងថា លោក Tran Quoc Khanh ត្រូវបានឃុំខ្លួនរយៈពេល០៤ខែ ដើម្បីត្រៀមឡើងសវនាការ។ ប្រសិនបើត្រូវបានរកឃើញថា មានទោស លោកនឹងប្រឈមនឹងការជាប់ពន្ធនាគាររយៈពេល ១២ ឆ្នាំ។
លោក Khanh ដែលមានមិត្តនៅក្នុងគណនីហ្វេសប៊ុកជាង ៤.៧០០នាក់ បានប្រើប្រាស់បណ្តាញសង្គមនេះដើម្បីបង្ហោះសារស្តីពីការរំលោភបំពានសិទ្ធិមនុស្ស ការចោទប្រកាន់ពីអំពើពុករលួយដោយមន្រ្តីរដ្ឋាភិបាល និងជម្លោះដែនដីរវាងវៀតណាមនិងចិនពាក់ព័ន្ធនឹងតំបន់សមុទ្រចិនខាងត្បូង ដែលជាតំបន់មួយមានផ្លូវនាវាចរណ៍តំបន់នេសាទ និងធនធានធម្មជាតិយ៉ាងសំខាន់។
លោក Vu Quoc Ngu នាយកអង្គការសិទ្ធិមនុស្ស Defend the Defenders នៅវៀតណាមបានថ្លែងប្រាប់ VOA ផ្សាយជាភាសាវៀតណាមថា ការចាប់ខ្លួននេះគឺជា «សកម្មភាពរឹតត្បិត» ចុងក្រោយបង្អស់ប្រឆាំងនឹងក្រុមអ្នករិះគន់ និងសកម្មជនក្នុងសង្គម ចាប់តាំងពីសមាជជាតិគណបក្សកុម្មុយនីស្តវៀតណាមមក។
លោកបាននិយាយថា៖ «និន្នាការនៃការចាប់ខ្លួននេះគឺទំនងនឹងបន្តនៅពេលខាងមុខដ៏ខ្លីនេះ»។
ក្រុមអង្គការសិទ្ធិមនុស្សអន្តរជាតិបានរាយការណ៍ពីការកើនឡើងនៃការចាប់ខ្លួនអ្នករិះគន់រដ្ឋាភិបាល នៅក្នុងរយៈពេលប៉ុន្មានខែមុនពេលសមាជជាតិគណបក្ស ដែលធ្វើឡើងរាល់ប្រាំឆ្នាំម្តង ដើម្បីជ្រើសរើសសមាជិកថ្នាក់ដឹកនាំជាន់ខ្ពស់នៅក្នុងជួររដ្ឋាភិបាល។
អគ្គលេខាធិការគណបក្សកុម្មុយនីស្តវៀតណាម លោក Nguyen Phu Trong លោកនាយករដ្ឋមន្រ្តី Nguyen Xuan Phuc និងរដ្ឋមន្រ្តីសន្តិសុខសាធារណៈលោក To Lam ត្រូវបានបោះឆ្នោតជ្រើសតាំងឲ្យបន្តកាន់តំណែងរបស់ខ្លួនសារជាថ្មីក្នុងអំឡុងពេលសមាជកាលពីចុងខែមករា។
ការបោះឆ្នោតនឹងត្រូវបានត្រៀមធ្វើឡើងនៅខែឧសភាសម្រាប់សភាជាតិវៀតណាម ដែលចាត់ចែងផ្នែកគោលនយោបាយក្នុងស្រុកនិងការបរទស។
លោក Khanh បានប្រកាសពីគោលបំណងរបស់លោកក្នុងការឈរឈ្មោះជាបេក្ខជនឯករាជ្យសម្រាប់ការបោះឆ្នោតនៅសភា។ ក្នុងអំឡុងពេលនៃការផ្សាយផ្ទាល់តាមបណ្តាញសង្គមហ្វេសប៊ុកកាលពីថ្ងៃទី០៦ ខែមីនា លោកបានពិភាក្សាពីអ្វីដែលលោកយល់ឃើញថាជា កំហុសរបស់បណ្តាក្រសួងនានា ដោយអំពាវនាវឲ្យមន្រ្តីតាមក្រសួងទាំងនោះគោរពនីតិរដ្ឋ។
VOA មិនទាន់អាចបញ្ជាក់ថាតើលោក Khanh បានដាក់ស្នើនូវពាក្យសុំជាផ្លូវការដល់អាជ្ញាធរថ្នាក់តំបន់ ដើម្បីឈរឈ្មោះនៅក្នុងការបោះឆ្នោតដែលលោកបានចុះឈ្មោះជាពលរដ្ឋស្នាក់អចិន្រ្តៃយ៍នៅឡើយនោះទេ។
លោក Khanh ក៏បានប្រើប្រាស់បណ្តាញសង្គមហ្វេសប៊ុកដើម្បីពិភាក្សាពីអង្គការទទួលបន្ទុកផ្នែកសង្គម និងនយោបាយ ដែលលោកបានបំណងបង្កើតឡើងដើម្បីលើកកម្ពស់សិទ្ធិមនុស្ស។ លោកបាននិយាយថា ពាក្យសុំជាផ្លូវការរបស់លោកកាលពីឆ្នាំ ២០១៩ ដើម្បីបង្កើតអង្គការនេះ ដែលលោកបានឲ្យឈ្មោះថា «សមាគមប្រជាធិបតេយ្យវៀតណាម» ត្រូវបានបដិសេធ។
ទីភ្នាក់ងារសន្តិសុខនិងស៊ើបអង្កេតប្រចាំខេត្ត Ninh Binh បានចោទប្រកាន់ថា រវាងឆ្នាំ ២០១៨ និង២០២០ លោក Khanh បានប្រើប្រាស់បណ្តាញសង្គមហ្វេសប៊ុកដើម្បីបង្ហោះនិងផ្សព្វផ្សាយ «ព័ត៌មានក្លែងបន្លំ និងបង្ខូចកេរ្តិ៍ឈ្មោះ» ប្រទេសវៀតណាម និង «ប្រឆាំងនឹងរដ្ឋអំណាច»។
រដ្ឋាភិបាលវៀតណាមបានពង្រឹងវិធានការចាប់ខ្លួនអ្នកសារព័ត៌មាន និងសកម្មជនដែលប្រើប្រាស់បណ្តាញសង្គមដើម្បីបង្ហោះសារ ដែលជារឿយៗយោងទៅលើការចោទប្រកាន់ថា ធ្វើឲ្យប៉ះពាល់ដល់ស្ថិរភាពសង្គម ឬប្រឆាំងនឹងរដ្ឋអំណាច។
នៅក្នុងសវនការដាច់ដោយឡែកកាលពីខែមករា អ្នកសារព័ត៌មានឯករាជ្យបីនាក់ និងសកម្មជនបរិស្ថានមួយរូប ដែលបានបង្ហោះ និងចែករំលែកព័ត៌មានលើបណ្តាញសង្គម ត្រូវបានកាត់ទោសឲ្យជាប់ពន្ធនាការ។ បន្ថែមពីលើនេះ អាជ្ញាធរវៀតណាមក៏បានកោះហៅឲ្យបណ្តាញសង្គមហ្វេសប៊ុក និងបណ្តាញសង្គមដទៃទៀត លុបចោលនូវអត្ថបទព័ត៌មានផ្សេងៗ ដែលខ្លួនចាត់ទុកថា បំពានច្បាប់។
បណ្តាញសង្គមបានក្លាយជាមធ្យោបាយដ៏មានប្រជាប្រិយភាពមួយនៅក្នុងការឆ្លើយឆ្លង និងចែករំលែកព័ត៌មាននៅក្នុងវៀតណាម ដែលមានកំណត់ត្រាសេរីភាពសារព័ត៌មានដុនដាប។ វៀតណាមទទួលបានចំណាត់ថ្នាក់ ១៧៥ ក្នុងចំណោមប្រទេស ១៨០ ដែលចំណាត់ថ្នាក់លេខ ១ មានន័យថា មានសេរីភាពខ្ពស់។ នេះបើយោងទៅតាមសន្ទស្សន៍សេរីភាពសារព័ត៌មានពិភពលោក។
ដោយមានតែបណ្តាញផ្សព្វផ្សាយគ្រប់គ្រងដោយរដ្ឋាភិបាល ដែលទទួលបានអាជ្ញាបណ្ណនៅក្នុងប្រទេសអ្នកសារព័ត៌មាន និងមនុស្សដទៃទៀតបានប្រើប្រាស់បណ្តាញសង្គមហ្វេសប៊ុកដើម្បីពិភាក្សា និងចែករំលែកព័ត៌មានដោយសេរីជាងមុន។
វៀតណាមមានចំនួនអ្នកប្រើប្រាស់បណ្តាញសង្គមហ្វេសប៊ុកច្រើនជាងគេបង្អស់លំដាប់ទី០៧ នៅលើពិភពលោក ដោយមានអ្នកប្រើប្រាស់ចំនួន ៦៥ លាននាក់។ នេះបើយោងទៅតាមតួលេខពីក្រុមហ៊ុនទិន្នន័យទីផ្សារ Statista៕
ប្រែសម្រួលដោយលោក ណឹម សុភ័ក្រ្តបញ្ញា
