រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានបញ្ចប់ដំណើរទស្សនកិច្ចចំនួន៥ប្រទេសនៅតំបន់អាស៊ី ដែលប្រទេសវៀតណាមជាប្រទេសចុងក្រោយគេនៅថ្ងៃសុក្រនេះ ដោយបានបញ្ជាក់ឡើងវិញថា សហរដ្ឋអាមេរិកប្រឆាំងចំពោះការដែលប្រទេសចិន រំលោភលើអធិបតេយ្យភាពរបស់ប្រទេសនានានៃតំបន់អាស៊ីអាគ្នេយ៍ ទ្វីបអាស៊ី និងតំបន់ឥណ្ឌូប៉ាស៊ីហ្វិក។
លោករដ្ឋមន្ត្រីការបរទេស Pompeo បានត្រូវទទួលការស្វាគមន៍ដោយនាយករដ្ឋមន្ត្រីវៀតណាមលោក Nguyen Xuan Phuc នៅក្នុងរដ្ឋធានីហាណូយ នៅពេលដែលប្រទេសទាំង២ ប្រារព្ធខួបលើកទី២៥ឆ្នាំនៃទំនាក់ទំនងរវាងសហរដ្ឋអាមេរិកនិងវៀតណាម។
លោករដ្ឋមន្ត្រីការបរទេស Pompeo បានប្រាប់លោកនាយករដ្ឋមន្ត្រី Phuc ថា សហរដ្ឋអាមេរិក គោរពប្រជាពលរដ្ឋ និងអធិបតេយ្យភាពរបស់វៀតណាមយ៉ាងខ្លាំង។
នៅក្នុងសេចក្តីថ្លែងការណ៍មួយដែលបានចេញផ្សាយបន្ទាប់ពីទស្សនកិច្ចនោះ ក្រសួងការបរទេសសហរដ្ឋអាមេរិក បានបញ្ជាក់ថា «លោករដ្ឋមន្ត្រីការបរទេសPompeo បានបញ្ជាក់ពីការគាំទ្រអធិបតេយ្យភាពរបស់ប្រទេសនានានៅតំបន់អាស៊ីអាគ្នេយ៍ ច្បាប់អន្តរជាតិ និងតំបន់ឥណ្ឌូប៉ាស៊ីហ្វិកសេរី និងបើកចំហរ»។
អ្នកការទូតសហរដ្ឋអាមេរិកជាន់ខ្ពស់រូបនេះ ក៏បានបញ្ជាក់ឡើងវិញនូវការគាំទ្ររបស់សហរដ្ឋអាមេរិក នៅក្នុងការទប់ទល់ប្រទេសចិនក្នុងអំឡុងនៃការឈប់សំចតកាលពីដំបូងនៅក្នុងប្រទេសឥណ្ឌា ស្រីលង្កា កោះម៉ាល់ឌីវ និងប្រទេសឥណ្ឌូណេស៊ីផងដែរ។
មុនពេលលោក Pompeo ទៅដល់ប្រទេសវៀតណាម ក្រសួងការបរទេសអាមេរិក បានចេញសេចក្តីថ្លែងការណ៍មួយ ដែលបានរិះគន់ចិនដែលមិនបានគោរពការសន្យាជាមួយបណ្តាប្រទេសនៅតាមដងទន្លេមេគង្គ និងការទាមទារទឹកដីក្នុងសមុទ្រចិនខាងត្បូង។ ប្រទេសវៀតណាម ហ្វីលីពីន ម៉ាឡេស៊ី ប្រ៊ុយណេ និងកោះតៃវ៉ាន់ បានទាមទារសមុទ្រចិនខាងត្បូង ដែលជាផ្លូវដឹកជញ្ជូនតាមវានាលំដាប់ថ្នាក់ទី៣ក្នុងពិភពលោក៕
