រដ្ឋមន្ត្រីការបរទេសអាមេរិកលោក Mike Pompeo នឹងធ្វើដំណើរទស្សនកិច្ចក្នុងប្រទេសវៀតណាម នៅថ្ងៃព្រហស្បតិ៍ និងថ្ងៃសុក្រ ដែលជាផ្នែកមួយនៃដំណើរទស្សនកិច្ចរបស់លោកទៅកាន់ទ្វីបអាស៊ី។នេះបើតាមការលើកឡើងរបស់រដ្ឋាភិបាលប្រទេសវៀតណាម និងត្រូវបានរាយការណ៍ដោយទីភ្នាក់ងារ Reuters។
ដំណើរទស្សនកិច្ចនេះ ត្រូវបានប្រកាសធ្វើឡើងនៅក្នុងសេចក្តីថ្លែងការណ៍ខ្លីមួយ ដែលត្រូវបានផ្សព្វផ្សាយនៅលើគេហទំព័រព័ត៌មានរបស់រដ្ឋាភិបាលវៀតណាម ដែលថា ដំណើរទស្សនកិច្ចរបស់រដ្ឋមន្ត្រីការបរទេសអាមេរិករូបនេះ គឺដើម្បីរំឭកខួបទី២៥ឆ្នាំ នៃការបង្កើតទំនាក់ទំនងការទូតឡើងវិញ រវាងអាមេរិក និងវៀតណាម។
ទោះធ្លាប់ជាសត្រូវស្លាប់រស់ក្នុងសង្គ្រាមវៀតណាមក្នុងទសវត្ស១៩៦០ និងដើមទសវត្ស១៩៧០នោះ ប្រទេសវៀតណាម និងសហរដ្ឋអាមេរិក បានកសាងនូវទំនាក់ទំនងដ៏កក់ក្តៅរបស់ខ្លួនឡើងវិញ ក្នុងរយៈពេលប៉ុន្មានឆ្នាំចុងក្រោយនេះ។
ប្រទេសទាំងពីរក៏បារម្ភខ្លាំង ចំពោះប្រទេសចិន ដែលកាន់តែបង្ហាញអំណាចនៅតំបន់អាស៊ី។
ក្រសួងការបរទេសសហរដ្ឋអាមេរិក នៅមិនទាន់បញ្ជាក់ជាផ្លូវការពីដំណើរទស្សនកិច្ចរបស់លោក Pompeo ទៅកាន់ប្រទេសវៀតណាមនោះនៅឡើយទេ។
លោក Pompeo បានទៅធ្វើទស្សនកិច្ចក្នុងប្រទេសម៉ាល់ឌីវនៅថ្ងៃពុធ បន្ទាប់ពីដំណើរទស្សនកិច្ចរបស់លោកក្នុងប្រទេសស្រីលង្កា និងប្រទេសឥណ្ឌាមក ហើយលោកត្រូវទៅទស្សនកិច្ចក្នុងប្រទេសឥណ្ឌូណេស៊ីនៅថ្ងៃព្រហស្បតិ៍ផងដែរ។ ដំណើរទស្សនកិច្ចរបស់លោកចំនួន ៥ថ្ងៃទៅតំបន់អាស៊ី នេះគឺដើម្បីទប់ទល់នឹងការកើនឥទ្ធិពលរបស់ចិន នៅក្នុងតំបន់នោះ។
ក្នុងដំណើរទស្សនកិច្ចទៅកាន់ប្រទេសម៉ាល់ឌីវ កាលពីថ្ងៃពុធ រដ្ឋមន្ត្រីការបរទេសអាមេរិកលោក Mike Pompeo បានប្រកាសថា រដ្ឋាភិបាលក្រុងវ៉ាស៊ីនតោន នឹងបើកស្ថានទូតរបស់ខ្លួនក្នុងប្រទេសម៉ាល់ឌីវជាលើកដំបូង៕
