រដ្ឋមន្ត្រីក្រសួងការបរទេសសហរដ្ឋអាមេរិក លោក Mike Pompeo នឹងធ្វើទស្សនកិច្ចក្នុងប្រទេសឥណ្ឌូណេស៊ីនៅសប្ដាហ៍ក្រោយ ដែលនឹងជាដំណើរទស្សនកិច្ចលើកដំបូងរបស់លោកទៅកាន់ប្រទេសនេះ បន្ទាប់ពីមេដឹកនាំឥណ្ឌូណេស៊ី បានបដិសេធសំណើចូលចាក់សាំងរបស់យន្តហោះឌ្រូនស៊ើបការណ៍របស់អាមេរិក។
រដ្ឋមន្ត្រីការបរទេសឥណ្ឌូណេស៊ី អ្នកស្រី Retno Marsudi បាននិយាយនៅថ្ងៃព្រហស្បតិ៍ថាលោក Pompeo នឹងថ្លែងសុន្ទរកថានៅក្នុងសន្និសីទក្រុមយុវជនឥស្លាមស្ដីពីសាសនានិងអរិយធម៌ នៅក្នុងរដ្ឋធានីហ្សាការតា។ ប៉ុន្តែលោក Marsudi មិនបានផ្ដល់ព័ត៌មានលម្អិតបន្ថែមអំពីការធ្វើដំណើររបស់លោក Pompeo ឡើយ។
មុននេះ លោក Pompeo បានប្រាប់អ្នកសារព័ត៌មាននៅរដ្ឋធានីវ៉ាស៊ីនតោនថា លោកសង្ឃឹមថានឹងជួបលោក Retno និងប្រធានាធិបតីឥណ្ឌូណេស៊ីលោក Joko Widodo ក្នុងដំណើរទស្សនកិច្ចលើកនេះ។
ដំណើរទស្សនកិច្ចនេះ ធ្វើឡើងចំពេលដែលការមិនចុះសម្រុងគ្នារវាងអាមេរិកនិងចិន កើនឡើងខ្លាំងនៅក្នុងតំបន់អាស៊ីអាគ្នេយ៍ ជាពិសេសនៅសមុទ្រចិនខាងត្បូង ដែលប្រទេសចិនអះអាងថាភាគច្រើននៃតំបន់នោះជាទឹកដីរបស់ខ្លួន។ ការអះអាងនេះត្រូវបានច្រានចោលដោយប្រទេសជាច្រើនក្នុងតំបន់រួមទាំងប្រទេសឥណ្ឌូណេស៊ី។
ទស្សនកិច្ចរបស់លោក Pompeo កើតឡើងក្រោយពេលអាមេរិកបានដាក់សំណើទៅកាន់លោក Retno និងរដ្ឋមន្ត្រីក្រសួងការពាជាតិឥណ្ឌូណេស៊ីលោក Prabowo Subianto កាលពីចុងខែកក្កដានិងដើមខែសីហា ស្នើសុំសិទ្ធិឲ្យយន្តហោះឌ្រូនស៊ើបការណ៍ប្រភេទ P-8របស់ខ្លួនដែលត្រួតពិនិត្យសកម្មភាពយោធាចិននៅតំបន់ទឹកសម្បូរដោយធនធានធម្មជាតិនោះ ចុះចតនិងចាក់សាំង។
សំណើនេះត្រូវបានរាយការណ៍ដំបូងដោយទីភ្នាក់ងារព័ត៌មាន Reuters ថា ត្រូវបានបដិសេធដោយលោកប្រធានាធិបតី Jokowi នេះបើយោងតាមមន្ត្រីជាន់ខ្ពស់របស់ឥណ្ឌូណេស៊ី។ជាយូរណាស់មកហើយប្រទេសឥណ្ឌូណេស៊ីប្រកាន់យកគោលនយោបាយការបរទេសអព្យាក្រឹត និងមិនដែលអនុញ្ញាតឲ្យប្រទេសណាមួយប្រើទឹកដីរបស់ខ្លួនដើម្បីធ្វើប្រតិបត្តិការណ៍យោធាណាមួយឡើយ។
លោក Pompeo បដិសេធមិនឆ្លើយសំណួរផ្ទាល់អំពីសំណើទាក់ទងនឹងឌ្រូនស៊ើបការណ៍នេះ ដោយប្រាប់អ្នកសារព័ត៌មានឲ្យទៅសួរក្រសួងការពារជាតិ៕
