សហរដ្ឋអាមេរិកផ្តល់ជំនួយយោធារហូតដល់២៥០លានដុល្លារថែមទៀតឱ្យអ៊ុយក្រែនក្នុងកញ្ចប់ជំនួយមួយដែលមានរួមមានរ៉ុក្កែតថែមទៀតសម្រាប់យានបាញ់មីស៊ីល HIMARS និង AIM-9M Sidewinder ដែលអាចត្រូវប្រើដើម្បីការពារដែនអាកាសអ៊ុយក្រែន។
នេះជាលើកដំបូងហើយដែលសហរដ្ឋអាមេរិកផ្តល់ឱ្យអ៊ុយក្រែននូវមីស៊ីល Sidewinders ដែលអាចត្រូវប្រើសម្រាប់ការវាយប្រហារចម្ងាយខ្លីនិងការវាយប្រហារពីអាកាសទៅអាកាស។
ជំនួយនេះក៏មានរួមបញ្ចូលដែរនូវឧបករណ៍សម្អាតមីននិងអាវុធប្រឆាំងរថក្រោះដូចជាមីស៊ីលធុន TOW និង Javelins បាញ់ដាក់លើស្មាជាដើម។
កញ្ចប់ជំនួយថ្មីបំផុតនេះជាការយកយុទ្ធោបករណ៍អនុញ្ញាតដោយប្រធានាធិបតីលើកទី៤៥ ពីបញ្ជីសារពើភ័ណ្ឌក្រសួងការពារជាតិ ចាប់តាំងពីរុស្ស៊ីបានលុកលុយអ៊ុយក្រែនកាលពីខែកុម្ភៈ២០២២មក។
នៅពេលនេះទៀត ប្រព័ន្ធមីស៊ីលកលយុទ្ធមានចម្ងាយឆ្ងាយនៃកងទ័ពជើងគោកដែលគេស្គាល់ថា ATACMS មិនឋិតក្នុងកញ្ចប់ជំនួយនេះទេ ដែលនាំឱ្យមានការរិះគន់ពីពួកអ្នកវិភាគដូចជាឧត្តមសេនីយ៍ឯកចូលនិវត្តន៍ លោក Ben Hodges ដែលបានបម្រើការជាឧត្តមសេនីយ៍បញ្ជាការកងកម្លាំងសហរដ្ឋអាមេរិកនៅអឺរ៉ុបពីឆ្នាំ២០១៤ដល់ឆ្នាំ២០១៧។
លោក Hodges បាននិយាយប្រាប់វីអូអេកាលពីថ្ងៃអង្គារថា៖ «ជាអកុសលជនជាតិអ៊ុយក្រែននឹងបន្តរងទុក្ខវេទនាច្រើនតទៅទៀតពីព្រោះ យើង គឺក្រុមបស្ចិមប្រទេស មិនបានផ្តល់សមត្ថភាពដែលពួកគេត្រូវការ។ ហើយ ខ្ញុំនិយាយជាពិសេសអំពីអាវុធសម្រាប់បាញ់ចំទីដៅនៅចម្ងាយឆ្ងាយ»។
រដ្ឋាភិបាលក្រុងមូស្គូបានចាប់ផ្តើមធ្វើការវាយលុកជាថ្មីក្នុងអ៊ុយក្រែននៅដើមឆ្នាំនេះ ដែលបានគាំងដំណើរ។
ប្រធានាធិបតីអ៊ុយក្រែនលោក Volodymyr Zelenskyy បានចាត់ទុកការវាយបកនៅពេលនេះប្រឆាំងនឹងកងកម្លាំងរុស្ស៊ីថា យឺត តែគ្មានការប្រែប្រួល ដោយកងកម្លាំងអ៊ុយក្រែនបានបញ្ចូលក្រុមទាហានបម្រុងនិងបានវាយទម្លាយខ្សែបន្ទាត់ការពាររបស់កងកម្លាំងរុស្ស៊ីនៅតំបន់ឦសានកាលពីដើមខែនេះ។
អ្នកនាំពាក្យក្រសួងការពារជាតិសហរដ្ឋអាមេរិកឧត្តមសេនីយ៍ទោលោក Pat Ryder បាននិយាយប្រាប់វីអូអេនៅក្នុងសន្និសីទកាសែតមួយនៅក្រសួងការពារជាតិកាលពីថ្ងៃព្រហស្បតិ៍មុនថា៖ «អ៊ុយក្រែននៅតែវាយប្រហារលើកងទ័ពរុស្ស៊ីតទៅទៀត។ ពួកគេបានធ្វើឱ្យមានការជឿនលឿននៅសមរភូមិជួរមុខ តែនឹងមានការលំបាកច្រើន»៕
