ក្រសួងការបរទេសសហរដ្ឋអាមេរិកកាលពីថ្ងៃព្រហស្បតិ៍ម្សិលមិញ បានដាក់ទណ្ឌកម្មលើមនុស្សនិងស្ថាប័នចំនួន១៣ ដែលខ្លួននិយាយថា ត្រូវបានរាយការណ៍ថា មានជាប់ពាក់ព័ន្ធនឹងការបញ្ជូននិងផ្ទេរដោយបង្ខំនូវកុមារអ៊ុយក្រែនជាច្រើននាក់ ខណៈពេលដែលរដ្ឋាភិបាលក្រុងវ៉ាស៊ីនតោន កំពុងបង្កើនការដាក់សម្ពាធទៅលើរដ្ឋាភិបាលក្រុងមូស្គូ ដែលបានចូលឈ្លានពានប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
សេចក្តីថ្លែងការណ៍របស់ក្រសួងការបរទេសអាមេរិកបាននិយាយថា សហរដ្ឋអាមេរិកក៏កំពុងចាត់វិធានការផងដែរ ក្នុងការរឹតបន្តឹងទិដ្ឋាការដល់ក្រុមអាជ្ញាធរចំនួន៣នាក់ ដែលត្រូវបានលើកបន្តុបដោយរុស្ស៊ី ដែលជាប់ពាក់ព័ន្ធនឹងការរំលោភសិទ្ធិមនុស្សលើជនជាតិអ៊ុយក្រែនដែលមិនទាន់គ្រប់អាយុ។
ប្រធានាធិបតីសហរដ្ឋអាមេរិកលោក Joe Biden បានសន្យានៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ម្សិលមិញ ដែលកត់សម្គាល់ថ្ងៃឯករាជ្យជាតិអ៊ុយក្រែនថា «រួមជាមួយដៃគូក្នុងទ្វីបអឺរ៉ុបរបស់យើង យើងគាំទ្រអ៊ុយក្រែន ក្នុងការប្រយុទ្ធរបស់គេដើម្បីសេរីភាពនៅពេលនេះ ហើយយើងនឹងជួយពួកគេ ក្នុងរយៈពេលយូរទៅមុខទៀត»។
រដ្ឋាភិបាលអ៊ុយក្រែនបានប៉ាន់ស្មានថា ក្រុមអាជ្ញាធររុស្ស៊ីបានបញ្ជូន ឬបម្លាស់ទីដោយបង្ខំនូវកុមារអ៊ុយក្រែនប្រមាណជាង១៩.៥០០នាក់ពីផ្ទះរបស់គេ ចាប់តាំងពីរុស្ស៊ីចូលឈ្លានពានក្នុងប្រទេសអ៊ុយក្រែនកាលពីឆ្នាំ២០២២មក។
ក្នុងចំណោមបុគ្គលនិងស្ថាប័នដែលទទួលរងការដាក់ទណ្ឌកម្មកាលពីថ្ងៃព្រហស្បតិ៍ម្សិលមិញ គឺមានមជ្ឈមណ្ឌលកុមារ Artek ដែលក្រសួងការបរទេសអាមេរិកនិយាយថា ជាជំរំរដូវក្តៅគ្រប់គ្រងដោយរដ្ឋាភិបាលក្នុងតំបន់ Crimea ដែលរុស្ស៊ីគ្រប់គ្រង។
ក្រសួងការបរទេសអាមេរិកនិយាយថា មជ្ឈមណ្ឌលកុមារ Artek បានទទួលកុមារអ៊ុយក្រែន ហើយដាក់ពួកគេក្នុង«កម្មវិធីអប់រំឡើងវិញសម្រាប់ការស្នេហាជាតិ» និងបានរារាំងពួកគេមិនឱ្យត្រឡប់ទៅជួបជុំគ្រួសារវិញឡើយ។
នាយករបស់មជ្ឈមណ្ឌល Artek ក៏ស្ថិតក្នុងចំណោមអ្នកដែលទទួលរងទណ្ឌកម្មកាលពីថ្ងៃព្រហស្បតិ៍នេះដែរ៕
