មន្រ្តីការទូតជាន់ខ្ពស់ម្នាក់បានបញ្ចេញការខកចិត្តរបស់លោកស្រី ប៉ុន្មានថ្ងៃបន្ទាប់ពីសកម្មជនសិទ្ធិមនុស្សមួយចំនួននៅក្នុងប្រទេសវៀតណាមនិយាយថា ពួកគេត្រូវបានរារាំងមិនឲ្យចូលរួមក្នុងជំនួបមួយជាមួយនឹងលោកស្រី ស្របពេលដែលលោកស្រីដឹកនាំក្រុមប្រតិភូទៅចូលរួមក្នុងវេទិកាសន្ទនាទ្វេភាគីស្តីពីសិទ្ធិមនុស្សនៅប្រទេសវៀតណាម។
កាលពីថ្ងៃអង្គារ ទី០៦ ខែមិថុនាកន្លងនេះ លោកស្រី Virginia Bennett ឧបការីស្តីទីរដ្ឋមន្រ្តីការបរទេសអាមេរិកទទួលបន្ទុកផ្នែកលទិ្ធប្រជាធិបតេយ្យ សិទ្ធិមនុស្ស និងការងារ បានបញ្ជាក់ពីការបង្ហោះសារមួយចំនួនរបស់ក្រុមរិះគន់រដ្ឋាភិបាលវៀតណាម ដោយនិយាយថា «អាជ្ញាធរបានរារាំងបុគ្គលមួយចំនួនមិនឲ្យជួបជាមួយខ្ញុំ»។
នៅក្នុងបទសម្ភាសន៍ផ្តាច់មុខជាមួយនឹង VOA ផ្សាយជាភាសាវៀតណាម មន្ត្រីអាមេរិករូបនេះបាននិយាយថា៖
«ខ្ញុំបានជំរុញរដ្ឋាភិបាលវៀតណាមឲ្យអនុញ្ញាតបុគ្គលគ្រប់រូប អនុវត្តសិទ្ធិ និងសេរីភាពនៃការបញ្ចេញមតិរបស់ពួកគេ ដោយមិនមានការភ័យខ្លាចពីការផ្តន្ទាទោស ដូចដែលសហរដ្ឋអាមេរិក កំពុងបន្តធ្វើ ហើយយើងក៏បានអំពាវនាវឲ្យរដ្ឋាភិបាលលុបចោលបម្រាម និងការដាក់កំហិតនានាលើក្រុមសកម្មជន»។
នេះមិនមែនជាលើកដំបូងទេ ដែលក្រុមអ្នករិះគន់រដ្ឋាភិបាលកុម្មុយនិស្តមួយនេះ ត្រូវបានគេរារាំងមិនឲ្យជួបជាមួយនឹងមន្ត្រីអាមេរិក។ អតីតប្រធានាធិបតីលោក បារ៉ាក់ អូបាម៉ា ក៏បានជួបប្រទះនឹងបញ្ហាដូចនេះផងដែរកាលពីឆ្នាំមុន អំឡុងពេលទស្សនកិច្ចរបស់លោកទៅកាន់ប្រទេសវៀតណាម ទីដែលលោកត្រូវបានស្វាគមន៍ដោយពលរដ្ឋវៀតណាមរាប់ពាន់នាក់។
លោកស្រី Bennett បានបន្ថែមថា លោកស្រីបានលើកឡើងពី «ករណីជាក់លាក់គួរឲ្យព្រួយបារម្ភចំពោះបុគ្គលជាង១២នាក់ នៅក្នុងវេទិកាសន្ទនានាឆ្នាំនេះ»។ នៅតែមិនមានភាពច្បាស់លាស់នៅឡើយទេថាតើ ភាគីសហរដ្ឋអាមេរិកបានលើកឡើងពីករណីលោក Hoang Duc Binh (ហ័ង ឌុក ប៊ីង) ដែលត្រូវបានចាប់ខ្លួនកាលពីខែឧសភាពី «បទរំលោភបំពានលើសិទ្ធិប្រជាធិបតេយ្យដែលប៉ះពាល់ដល់ផលប្រយោជន៍របស់ប្រទេស»នោះឬទេ បន្ទាប់ពីការពាក់ព័ន្ធរបស់លោកនៅក្នុងបាតុកម្មស្តីពីបញ្ហាបរិស្ថានមួយប្រឆាំងនឹងរោងចក្រដែកថែបតៃវ៉ាន់ ដែលបានបំពុលតំបន់ឆ្នេរសមុទ្រនៅភាគកណ្តាលប្រទេសវៀតណាម។ លោកស្រី Bennett បាននិយាយថា សហរដ្ឋអាមេរិក «មានការព្រួយបារម្ភ» អំពីករណីនេះ។
រដ្ឋាភិបាលវៀតណាមបានបដិសេធម្តងហើយម្តងទៀតនូវការចោទប្រកាន់របស់ក្រុមសកម្មជនសិទ្ធិមនុស្ស ដែលថា រដ្ឋាភិបាលបានបំបិទមាត់ក្រុមអ្នករិះគន់ខ្លួន។ ខណៈដែលអង្គការឃ្លាំមើលសិទ្ធិមនុស្ស Human Rights Watch បានរិះគន់រដ្ឋាភិបាលក្រុងហាណូយពីការចាប់ខ្លួនបុគ្គលមួយចំនួននៅក្នុងឆ្នាំ២០១៦ រដ្ឋាភិបាលក្រុងហាណូយនេះបានអះអាងថា ខ្លួនផ្តន្ទាទោសដាក់ពន្ធនាគារតែអ្នកល្មើសច្បាប់តែប៉ុណ្ណោះ។
នៅពេលសួរថាតើរដ្ឋបាលលោក ត្រាំ នឹងដាក់បញ្ហាជំនួញ ជាប្រធានបទពិភាក្សាចម្បងជំនួសឲ្យបញ្ហាសកម្មជនសិទ្ធិមនុស្ស ដែលជាប់ទាក់ទងនឹងរដ្ឋាភិបាលក្រុងហាណូយ ដូចដែលក្រុមសកម្មជនបានចោទប្រកាន់ឬយ៉ាងណា មន្រ្តីការទូត លោកស្រី Bennett បានលើកឡើងពីសេចក្តីថ្លែងការណ៍រួម ដែលត្រូវបានចុះផ្សាយបន្ទាប់ពីកិច្ចប្រជុំមួយកាលពីចុងខែឧសភា រវាងលោកប្រធានាធិបតីដូណាល់ ត្រាំ និងលោកនាយកមន្ត្រីវៀតណាម Nguyen Xuan Phuc (វៀន ស៊ុន ហ្វុក)។ លោកស្រីបាននិយាយថា នៅក្នុងសេចក្តីថ្លែងការណ៍នេះ មេដឹកនាំទាំងពីរ «ទទួលស្គាល់ពីសារៈសំខាន់នៃការការពារសិទ្ធិមនុស្ស និងទំនាក់ទំនងរវាងសិទ្ធិមនុស្ស សន្តិសុខ និងការអភិវឌ្ឍប្រកបដោយចិរភាពនៅក្នុងប្រទេសទាំងពីរ»។
បញ្ហាសិទ្ធិមនុស្ស ដែលលោកស្រី Bennett បានទទួលស្គាល់ថា ភាគីទាំងពីរនៅតែមានការខ្វែងគំនិតគ្នា «មានសារៈសំខាន់សម្រាប់ទំនាក់ទំនងទ្វេភាគីដើម្បីសម្រេចបានសក្តានុពលពេញលេញមួយ»។ លោក Vu Anh Quang (វូ អេង ក្វាង) មន្រ្តីការទូតដឹកនាំក្រុមប្រតិភូវៀតណាមនៅក្នុងវេទិកាសន្ទនា មិនអាចទាក់ទងសុំការអត្ថាធិប្បាយបាននោះទេ។
លោកនាយករដ្ឋមន្ត្រី Phuc (ហ្វុក) ជាមេដឹកនាំដំបូងពីប្រទេសនៅតំបន់អាស៊ីអាគ្នេយ៍ ដែលបានធ្វើទស្សនកិច្ចទៅកាន់សេតវិមាន ក្រោមរដ្ឋបាលលោកប្រធានាធិបតីត្រាំ។ លោក Carl Thayer អ្នកជំនាញផ្នែកប្រទេសវៀតណាម និងសាស្ត្រាចារ្យចូលនិវត្តិន៍ តែនៅបង្រៀននៅសាកលវិទ្យាល័យ University of New South Wales ប្រទេសអូស្ត្រាលីបានប្រាប់ VOA ផ្សាយជាភាសាវៀតណាមថា «ការងារពីមុនៗដែលប្រទេសទាំងពីរបានធ្វើកន្លងមកគឺ សម្រេចបានជាកិច្ចព្រមព្រៀងផ្សេងៗ ដែលមានទឹកប្រាក់ប្រមាណពី៨ ទៅ១៥ពាន់លានដុល្លារ»។
លោកបាននិយាយថា «ការណ៍នេះច្បាស់ណាស់បានបង្កើតបរិយាកាសជាល្អមួយ ហើយលោកប្រធានាធិបតី ត្រាំ បានឆ្លើយតបយ៉ាងវិជ្ជមាន។ លើសពីនេះ អតិរេកពាណិជ្ជកម្ម ក្នុងទឹកប្រាក់ចំនួន៣០ពាន់លានដុល្លាររបស់វៀតណាម ដែលជាមូលហេតុចម្បងមួយបង្កឲ្យមានភាពរកាំរកូសនៅក្នុងទំនាក់ទំនងទ្វេភាគី ត្រូវបានគេដោះស្រាយនៅចំពោះមុខ។ វៀតណាមមានភាពបត់បែន ហើយបានផ្តល់គំនិតយោបល់ពីរបៀបដែលជំនួញពីអាមេរិកអាចពង្រឹងការលក់ទៅកាន់ប្រទេសវៀតណាម។ បញ្ហាពាណិជ្ជកម្មនៅតែជាបញ្ហាអាទិភាពជានិច្ច។ ដំណើរទស្សនកិច្ចរបស់លោកនាយករដ្ឋមន្ត្រី Phuc (ហ្វុក) បានបើកចំហឲ្យមានការពិភាក្សាលម្អិតបន្ថែមទៀតពីសំណាក់ក្រុមអ្នកជំនាញផ្នែកពាណិជ្ជកម្ម»៕
លោកស្រី Bennett បានបដិសេធការរិះគន់មួយចំនួនពីសំណាក់ក្រុមអ្នករិះគន់រដ្ឋាភិបាលវៀតណាមដែលថា រដ្ឋបាលលោកប្រធានាធិបតី ត្រាំ ចាត់ទុកបញ្ហាពាណិជ្ជកម្មសំខាន់ជាងបញ្ហាសិទ្ធិមនុស្ស ក្នុងបរិបទទំនាក់ទំនងរវាងប្រទេសទាំងពីរ ដោយលោកស្រីបានលើកឡើងពីសេចក្តីថ្លែងការណ៍រួមមួយ ដែលត្រូវបានចុះផ្សាយ បន្ទាប់ពីកិច្ចប្រជុំទ្វេភាគីរវាងលោកនាយករដ្ឋមន្ត្រី Phuc (ហ្វុក) និងលោកប្រធានាធិបតីត្រាំនៅសេតវិមានកាលពីចុងខែឧសភា។ លោកស្រីបានបន្តថា លោកស្រីមានការខកចិត្តចំពោះការររាំងសកម្មជនវៀតណាម ដែលត្រូវបានអញ្ជើញមកជួបជាមួយលោកស្រី ហើយលោកស្រីបានជំរុញឲ្យរដ្ឋាភិបាលក្រុងហាណូយលុបចោលបម្រាមលើសកម្មជនទាំងនោះ៕
ប្រែសម្រួលដោយ ប៊ុន ប៉េងហ៊ុយ
