ប្រធានាធិបតីសហរដ្ឋអាមេរិកលោក Joe Biden និងប្រធានាធិបតីចិនលោក Xi Jinping បាន«ពិភាក្សាគ្នាយ៉ាងទូលំទូលាយ» កាលពីយប់ថ្ងៃចន្ទអំពីបញ្ហាកោះតៃវ៉ាន់ ដែលជាបញ្ហាដែលសហរដ្ឋអាមេរិកនិងចិន មានការខ្វែងគំនិតគ្នាជាយូរមកហើយ។
មន្ត្រីសហរដ្ឋអាមេរិកបាននិយាយថា នៅក្នុងជំនួបនោះ លោក Biden បានបញ្ជាក់យ៉ាងច្បាស់អំពីផលប្រយោជន៍របស់សហរដ្ឋអាមេរិកដើម្បីធ្វើឲ្យប្រាកដថា «មិនមានការផ្លាស់ប្តូរណាមួយដោយឯកតោភាគីចំពោះស្ថានភាពនៅពេលបច្ចុប្បន្ន» នៅច្រកសមុទ្រតៃវ៉ាន់ (Taiwan Strait)។
មន្ត្រីជាន់ខ្ពស់ម្នាក់នៃរដ្ឋបាលរបស់លោក Biden បានបញ្ជាក់ក្នុងសន្និសីទកាសែតបន្ទាប់ពីជំនួបតាមអនឡាញនោះថា លោកប្រធានាធិបតី Biden «បានលើកឡើងចំៗអំពីក្ដីកង្វល់របស់លោកទាក់ទិននឹងឥរិយាបថមួយចំនួនរបស់រដ្ឋាភិបាលក្រុងប៉េកាំងដែលលោកជឿថា ជាការប្រឆាំងចំពោះ» សន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់។
ក្នុងរយៈពេលប៉ុន្មានខែថ្មីៗនេះ ចិនបានបង្កើនការហោះហើរយន្តហោះចម្បាំងរបស់ខ្លួនចូលទៅក្នុងតំបន់កំណត់ការពារដែនអាកាសរបស់តៃវ៉ាន់។
សេចក្តីថ្លែងការណ៍របស់សហរដ្ឋអាមេរិកបានលើកឡើងថា លោក Biden «បានគូសបញ្ជាក់ថា សហរដ្ឋអាមេរិកនៅតែប្ដេជ្ញាចិត្តចំពោះគោលនយោបាយ «ចិនតែមួយ» ដែលត្រួសត្រាយដោយច្បាប់ទំនាក់ទំនងតៃវ៉ាន់ (Taiwan Relations Act) សេចក្តីថ្លែងការណ៍រួមចំនួន ៣ (Three Joint Communiques) និងការធានា ៦ ចំណុច (Six Assurances) ហើយថា សហរដ្ឋអាមេរិកជំទាស់ខ្លាំងក្លាចំពោះកិច្ចប្រឹងប្រែងជាឯកតោភាគីណាមួយនៅក្នុងការផ្លាស់ប្តូរស្ថានភាពបច្ចុប្បន្ន ឬក៏ការធ្វើឲ្យអន្តរាយដល់សន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់»។
ប៉ុន្តែ សេចក្តីថ្លែងការណ៍របស់ចិនបានបញ្ជាក់ផ្ទុយពីនេះ ដោយផាត់ចេញច្បាប់ទំនាក់ទំនងតៃវ៉ាន់និងការធានា ៦ ចំណុច ដែលសហរដ្ឋអាមេរិកចាត់ទុកថា មានសារៈសំខាន់ជាមូលដ្ឋានចំពោះគោលនយោបាយដ៏យូរអង្វែងរបស់ខ្លួន។
ក្រសួងការបរទេសចិនបានបញ្ជាក់ដូច្នេះថា៖ «គោលនយោបាយចិនតែមួយនិងសេចក្តីថ្លែងការណ៍រួមចំនួន ៣ រវាងចិននិងសហរដ្ឋអាមេរិក គឺជាគ្រឹះនយោបាយនៃទំនាក់ទំនងរវាងចិននិងសហរដ្ឋអាមេរិក»៕
