មន្ត្រីរដ្ឋាភិបាលសហរដ្ឋអាមេរិកនិងមន្ត្រីរដ្ឋាភិបាលចិន បានបញ្ជាក់កាលពីថ្ងៃអង្គារថា ជំនួបលើកដំបូងបង្អស់រវាងប្រធានាធិបតីអាមេរិកលោក Joe Biden និងប្រធានាធិបតីចិនលោក Xi Jinping បានធ្វើឡើងដោយ «ស្មោះត្រង់» ហើយអាចត្រួសត្រាយផ្លូវឱ្យមានភាពប្រសើរឡើងនូវទំនាក់ទំនងតានតឹងរវាងប្រទេសទាំងពីរទាក់ទិននឹងបញ្ហានានាដែលមានសារៈសំខាន់ជាសាកល។
មេដឹកនាំទាំងពីរ បានជួបប្រជុំគ្នាតាមអនឡាញក្នុងកម្រិតថ្នាក់ដឹកនាំជាលើកដំបូងបង្អស់កាលពីយប់ថ្ងៃចន្ទ ដោយបានចំណាយពេលជាង ៣ ម៉ោងកន្លះ ពិភាក្សាអំពីបញ្ហានានាដូចជា សិទ្ធិមនុស្ស ការប្រកួតប្រជែងសេដ្ឋកិច្ច និងឋានៈរបស់កោះតៃវ៉ាន់ជាដើម។
សេតវិមានប្រធានាធិបតីអាមេរិកបានបញ្ជាក់នៅក្នុងសេចក្តីថ្លែងការណ៍មួយកាលពីថ្ងៃអង្គារថា៖ «លោកប្រធានាធិបតី Biden បានគូសបញ្ជាក់ថា សហរដ្ឋអាមេរិក នឹងបន្តការពារផលប្រយោជន៍និងគុណតម្លៃរបស់ខ្លួន ហើយរួមជាមួយនឹងសម្ព័ន្ធមិត្តនិងដៃគូរបស់ខ្លួន សហរដ្ឋអាមេរិកនឹងធានាថា ក្បួនច្បាប់សម្រាប់សតវត្សរ៍ទី ២១ នេះ នឹងជួយធ្វើឱ្យប្រសើរឡើងនូវប្រព័ន្ធអន្តរជាតិមួយដែលមានលក្ខណៈសេរី បើកចំហ និងយុត្តិធម៌»។
កាលពីថ្ងៃអង្គារ ទីភ្នាក់ងារព័ត៌មាន Xinhua របស់រដ្ឋាភិបាលចិន បានហៅជំនួបនេះថា មាន«ភាពស្មោះត្រង់ មានប្រយោជន៍ សារៈសំខាន់ និងប្រកបដោយផ្លែផ្កា»។ ទីភ្នាក់ងារព័ត៌មាននេះ បានបញ្ជាក់ថា ភាគីទាំងពីរ បានឯកភាពគ្នារក្សាទំនាក់ទំនងជិតស្និទ្ធ«ក្នុងទម្រង់ផ្សេងៗ» និង«ធ្វើឱ្យទំនាក់ទំនងរវាងចិននិងសហរដ្ឋអាមេរិកត្រឡប់មកកាន់ផ្លូវត្រូវវិញ»។
មួយវិញទៀត កាសែត Global Times ដែលគាំទ្រដោយរដ្ឋាភិបាលចិន បានរាយការណ៍ថា ជំនួបនេះ បានគូសបញ្ជាក់អំពី«ការខ្នះខ្នែងរបស់លោកប្រធានាធិបតី Biden នៅក្នុងការស្វះស្វែងពង្រីកចំណងទាក់ទងជាមួយរដ្ឋាភិបាលក្រុងប៉េកាំង»៕
