ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ក្រុម​សហជីព​ស្វះស្វែង​ជួប​រដ្ឋមន្ត្រី​ក្រសួង​ការងារ​ដើម្បី​ដោះស្រាយ​វិវាទ​ក្នុង​វិស័យ​ទេសចរណ៍


រូបឯកសារ៖ កម្មករ​និយោជិត​ក្រុម​ហ៊ុនណាហ្គា​វើល​ជាង​១០០​នាក់​ប្រមូល​ផ្តុំ​គ្នា​មកដាក់​ញត្តិ​ស្នើ​សុំ​ជំនួយពីរដ្ឋាភិបាល​និង​ប្រាក់​ឧបត្ថម្ភ​ពី​ក្រុម​ហ៊ុននៅខាងមុខ​ក្រសួង​ការងារ​និង​បណ្តុះ​បណ្តាល​វិជ្ជាជីវៈ ​អំឡុង​ពេល​ដែល​ត្រូវ​បា​ព្យួរ​ការងារ​ក្នុង​អំឡុងពេលកូវីដ។ (ទុំ ម្លិះ/វីអូអេ)​​

សហជីពមួយ​ចំនួន​ដែល​ធ្វើ​ការ​ការពារ​ប្រយោជន៍​កម្មករ​និយោជិត​ក្នុង​វិស័យ​ទេសចរណ៍​កំពុង​ស្វែង​រក​ជួប​រដ្ឋមន្ត្រី​ក្រសួង​ការងារ​ដើម្បី​ពិគ្រោះ​យោបល់​រក​ច្រក​ដោះស្រាយ​បញ្ហា​ប្រឈម​មួយចំនួន​ពាក់​ព័ន្ធ​នឹង​ការ​ព្យួរ​ការងារ​ការ​ទូទាត់​ប្រាក់​អតីត​ភាព​ការងារនិង​ជម្លោះ​ការងារ​មួយចំនួន​ដែល​មិន​ទាន់​ដោះស្រាយ​រួច​រាល់​នៅ​ឡើយ​ក្នុង​វិស័យ​ទេសចរណ៍។

នៅ​ក្នុង​លិខិត​ដែល​បាន​ដាក់​ជូន​ទៅ​រដ្ឋមន្ត្រី​ក្រសួង​ការងារ​និង​បណ្តុះបណ្តាល​វិជ្ជាជីវៈ​លោក អ៊ិត​សំហេង​ កាល​ពី​ថ្ងៃទី​១៥ ខែ​វិច្ឆិកា សហព័ន្ធ​សហជីព​កម្មករ​និយោជិត​វិស័យ​ទេសចរណ៍​សេវាកម្ម​ដែល​ជា​សមាជិក​របស់​សហភាព​ការងារ​កម្ពុជា​បាន​កត់​សម្គាល់​បញ្ហា​ជាច្រើន​ដែល​មិន​ទាន់​ដោះស្រាយ​រួច​នៅ​ក្នុងវិស័យ​ទេសចរណ៍​ក្នុង​នោះ​ ប្រាក់​ធានានុគ្រោះ​ប្រាក់​អតីតភាព​ការងារ​ការ​មិន​ធ្វើ​របាយការណ៍​ជូន​ក្រសួង​ការងារ​នៅ​ពេល​ក្រុមហ៊ុន​ព្យួរ​ការងារ ហើយ​វិវាទ​មួយ​ចំនួន​មិន​ទាន់​ត្រូវបាន​ដោះស្រាយ​ឲ្យ​បាន​យុត្តិធម៌​ដល់​កម្មករ​និយោជិត។

សហជីព​លើក​ឡើង​ទៀត​ថា មិន​ទាន់​មាន​ការ​កំណត់​ប្រាក់​ឈ្នួល​អប្បបរមា​នៅ​ក្នុង​វិស័យ​ទេសចរណ៍​ហើយ​ទំនាក់​ទំនង​ការងារ​រវាង​ក្រសួង​មន្ទីរ​ និង​តំណាង​កម្មករ​ក្នុង​វិស័យ​នេះ​ក៏​នៅ​មិន​ទាន់​មាន​ភាព​ល្អ​ប្រសើរ​នៅ​ឡើយ។

​លិខិត​របស់​សហជីព​ថ្លែង​ក្នុង​ន័យ​ដើម​ថា៖«ដោយសារ​កត្តា​នេះ​ហើយ​សហព័ន្ធ​សហជីព​កម្មករ​និយោជិត​វិស័យ​ទេសចរណ៍​សេវាកម្ម​បាន​ធ្វើ​ការ​ជួប​ជុំ​ប្រជុំ​ជាច្រើន​ដង​ជាមួយ​សហភាព​ការងារ​កម្ពុជា​ជាពិសេស​កាល​ពី​ថ្ងៃ​ទី​៣១​ខែ​តុលា​ឆ្នាំ​២០២១​កន្លង​ទៅ​ពួកគេ​បាន​ប្រជុំ​គ្នា​ ហើយ​បាន​សម្រេច​ឲ្យ​សហភាព​ការងារ​កម្ពុជាធ្វើ​សំណើ​សុំ​ជួប​ឯកឧត្តម​រដ្ឋមន្ត្រី​ដើម្បី​សម្តែង​ការ​គួរ​សម​និង​ពិភាក្សា​ការ​ងារ​ផងដែរ។​

ប្រធាន​សហភាព​ការងារ​កម្ពុជា​លោក ​អាត់​ធន់​ប្រាប់​វីអូអេ​នៅ​ថ្ងៃ​អង្គារ​នេះ​ថា​បញ្ហា​ជាច្រើន​ពាក់​ព័ន្ធ​នឹង​ការ​ងារ​ក្នុង​វិស័យ​ទេសចរណ៍​នេះ​បាន​កើត​ឡើង​នៅ​ខេត្ត​ទេសចរណ៍​សំខាន់​ពីរ​គឺ​ខេត្ត​ព្រះសីហនុ​និង ខេត្ត​សៀម​រាប​ដែល​ម្ចាស់​ក្រុម​ហ៊ុន​រាប់​រយ​បាន​ប្រឹងប្រែង​គេច​ពី​ការ​ទទួល​ខុសត្រូវ​ចំពោះ​ការ​ទូទាត់​សំណង​ផ្សេងៗ​ដល់​កម្មករ​និយោជិត​ដែល​បម្រើ​ការងារ​តាម​ភោជនីយដ្ឋាន​សណ្ឋាគារ​ និង​ព្រលាន​យន្ត​ហោះ​ជាដើម។

លោក​បញ្ជាក់​ទៀត​ថា​ក្រុម​សហជីព​អាច​នឹង​មាន​ការ​ជួប​ប្រជុំ​ជាមួយ​រដ្ឋមន្ត្រី​ក្រសួង​ការងារ​លោក អ៊ិត សំហេង​នៅ​ចុង​ខែ​វិច្ឆិកា​នេះដើម្បី​រក​ដំណោះ​ស្រាយ​ឆ្លើយតប​ទៅ​នឹង​ការ​លំបាក​របស់​បុគ្គលិក​និយោជិត​ក្នុង​វិស័យ​ទេសចរណ៍​ដែល​រង​ផល​ប៉ះពាល់​យ៉ាង​ធ្ងន់ធ្ងរពី​ការ​ឆ្លង​រាតត្បាត​ខ្លាំង​នៃ​ជំងឺ​កូវីដ​១៩​កន្លង​មក។​

លោក​ថ្លែង​ថា៖«កុំ​ឲ្យ​នៅ​ពេល​ដែល​វិបត្តិ​ហ្នឹង​វា​កើត​ឡើង​ហើយ​ហើយ​ក្រុម​ហ៊ុន​គាត់​គេច​ពី​ការ​ទទួល​ខុសត្រូវធ្វើ​ឲ្យ​បុគ្គលិក​កាន់​តែ​ពិបាក។ ហើយ​អ្វី​ដែល​រដ្ឋ​ហ្នឹង​ជួយ​ហើយ​ មាន​ន័យ​ថា​កម្មករ​គាត់​[អត់ ]​បាន​ដែរ​បើ​ក្រុម​ហ៊ុន​គេ​អត់​រាយការណ៍ ព្រោះ​លក្ខខណ្ឌ​របស់​ក្រសួង​បញ្ជាក់​ហើយ​ទាល់​តែ​រាយការណ៍។ បើ​អត់​រាយការណ៍​គឺ​អត់​ឲ្យ​ទេ។ ហើយ​បើ​អត់​ឲ្យ​មាន​ន័យ​ថា​ទោះ​បី​គាត់​ធ្វើ​វិស័យ​ហ្នឹង​ក៏​ដោយ​តែ​គាត់​អត់​បាន​ទេ»។​

លោក​បន្ថែម​ថា៖ «អីចឹង​យើង​ចង់​ជជែក​ចំណុច​ហ្នឹង​ដើម្បី​ឲ្យ​ឯកឧត្តម​រដ្ឋមន្ត្រី​ហ្នឹង​គាត់​ដឹង​ចំណុច​ហ្នឹង​ហើយ​គាត់​រក​វិធី​ដោះស្រាយ​បញ្ហា​ហ្នឹង»។

មន្ត្រី​កម្មវិធី​ការងារ​របស់​មជ្ឈមណ្ឌល​សម្ព័ន្ធ​ភាព​ការងារ​និង​សិទ្ធិ​មនុស្ស​ហៅ​កាត់​ថា​សង់​ត្រាល់​លោក​ ឃុន​ថារ៉ូ យល់​ថា​ការ​ជួប​ពិភ្សា​ជាមួយ​ថ្នាក់​ដឹកនាំ​ក្រសួង​ការងារ​នោះ​មិន​គ្រប់​គ្រាន់​ទេ។ លោក​ថា​អាជ្ញាធរ​ពាក់ព័ន្ធ​គួរ​ពង្រឹង​ការ​អនុវត្ត​ច្បាប់​ការងារ​ឲ្យ​ហ្មត់​ចត់​ដែល​ជា​ផ្នែក​មួយ​នៃ​ការ​ការពារ​អត្ថប្រយោជន៍​របស់​កម្មករ​និយោជិត​ក្នុង​វិស័យ​ទេសចរណ៍​ដែល​ធ្លាក់​ដាំ​ក្បាល​ចុះ​ខ្លាំង​ក្នុង​រយៈពេល​ជិត​ពីរ​ឆ្នាំ​ចុង​ក្រោយ​នេះ។

«ការដាក់​លិខិត​ទៅ​ជួប​រដ្ឋមន្ត្រី​នេះ​ខ្ញុំ​គិត​ថាវា​មិន​មែន​ជា​ដំណោះស្រាយ​មួយ​ទេ។ រឿង​ដែល​សំខាន់​គឺ​ស្ថាប័ន​ដែល​ទទួល​បន្ទុក​នៅ​ក្នុង​ការ​អនុវត្ត​ច្បាប់​ហ្នឹង​ទាំង​ក្រសួង​ការ​ងារហ្នឹងតាមរយៈ​អធិការកិច្ច​ត្រូវ​តែ​ធ្វើ​យ៉ាងណា​ពង្រឹង​នូវ​ប្រសិទ្ធភាព​ដោះស្រាយ​យន្តការ​នៃ​ការ​ដោះស្រាយ​វិវាទ​នៅ​ក្នុង​ប្រទេស​កម្ពុជា​របស់​យើង​ហ្នឹង»។

រដ្ឋលេខាធិការ និង​ជា​អ្នក​នាំពាក្យ​ក្រសួង​ការងារ​លោក ហេង​សួរបាន​ប្រាប់​វីអូអេ​នៅ​ថ្ងៃ​អង្គារ​នេះ​តាម​សារ​ឆ្លើយ​ឆ្លង​WhatsApp ថា​លោក​មិន​បាន​ដឹង​អំពី​សំណើ​សុំ​ជួប​រដ្ឋមន្ត្រី​ក្រសួង​ការងារ​ពី​ភាគី​សហជីព​នៅឡើយ​ទេ​។

វិស័យ​ទេសចរណ៍​របស់​ប្រទេស​កម្ពុជា​បាន​រង​ការ​បក់​បោក​យ៉ាង​ខ្លាំង​ពី​វិបត្តិ​នៃ​ការ​ឆ្លង​រាតត្បាត​ជំងឺ​កូវីដ​១៩​ដោយ​ភ្ញៀវ​ទេសចរ​បរទេស​បាន​ថយ​ចុះ​យ៉ាង​គំហុក​គិត​ចាប់​តាំង​ពី​ចុង​ឆ្នាំ​២០១៩​មក។

យោង​តាម​ស្ថិតិ​របស់​ក្រសួង​ទេស​ចរណ៍​នៅ​ឆ្នាំ​២០១៩ មុន​ពេល​មាន​ការ​ឆ្លង​រាត​ត្បាត​ជំងឺ​កូវីដ​១៩​កម្ពុជា​ទទួល​បាន​ភ្ញៀវ​បរទេស​ចំនួន​ប្រមាណ​៦,៦ លាន​នាក់​ដែល​បាន​ផ្តល់​ចំណូល​ដល់វិស័យ​ទេសចរណ៍​ជិត ៥ ពាន់ ​លាន​ដុល្លារ​អាមេរិក។ ក៏​ប៉ុន្តែ​នៅ​ក្នុង​ឆ្នាំ​២០២០​ចំនួន​អ្នក​មក​ទស្សនា​ប្រទេស​កម្ពុជា​បាន​ធ្លាក់​ចុះ​ខ្លាំង​ដល់​១,៣​លាន​នាក់​ និង​ការ​ចំណូល​ពី​វិស័យ​នេះ​បាន​ធ្លាក់​ចុះ​ដល់​ប្រមាណ​១​ពាន់​លាន​ដុល្លារ​អាមេរិក៕

XS
SM
MD
LG