ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ស្វាគមន៍ សេចក្តីសម្រេចមួយរបស់គណៈកម្មាធិការសិទ្ធមនុស្ស អ.ស.ប. កាលពីពេលថ្មីៗនេះ ដែលថា ប្រជាពលរដ្ឋដែលភៀសខ្លួនដោយសារតែហេតុផលអាកាសធាតុនិងគ្រោះធម្មជាតិ នឹងមានអំណះអំណាងត្រឹមត្រូវ ដើម្បីទទួលបានការការពារពីអន្តរជាតិ។
ករណីមួយដែលកំពុងត្រូវបានគេពិភាក្សា គឺទាក់ទងនឹងលោក Ioane Teitiota ដែលជាបុរសម្នាក់មកពីប្រទេសគិរីបាទី ដែលជាប្រទេសដែនកោះមួយក្នុងមហាសមុទ្រប៉ាស៊ីហ្វិក។ លោកបានស្នើសុំការការពារដោយអះអាងថា លោកជាជនភៀសខ្លួនដោយសារការបម្រែបម្រួលអាកាសធាតុ ក៏ប៉ុន្តែ លោកត្រូវបានប្រទេសនូវែលសេឡង់បដិសេធការស្នើសុំរបស់លោក។ គណៈកម្មាធិការសិទ្ធមនុស្ស អ.ស.ប. ដែលបានត្រួតពិនិត្យករណីនេះ យល់ស្របចំពោះសេចក្តីសម្រេចរបស់ប្រទេសនូវែលសេឡង់ ដោយសារលោក Teitiota មិនស្ថិតនៅក្នុងហានិភ័យបន្ទាន់នោះទេ។
ទោះយ៉ាងណា គណៈកម្មាធិការសិទ្ធមនុស្ស អ.ស.ប. និយាយថា ប្រជាពលរដ្ឋមិនគួរត្រឡប់ទៅកាន់ទីតាំងដើមរបស់ខ្លួនវិញនោះទេ បើសិនជាមានសញ្ញាណាមួយបង្ហាញថា ការប្រែប្រួលអាកាសធាតុ គឺជាការគំរាមកំហែងមួយលើសិទ្ធិក្នុងការរស់នៅរបស់ពួកគេ។ ទីភ្នាក់ងារជនភៀសខ្លួនរបស់អ.ស.ប. សាទរចំពោះសេចក្តីសម្រេចដ៏សំខាន់មួយនេះ។
អ្នកនាំពាក្យរបស់ទីភ្នាក់ងារ UNHCR លោក Andrej Mahecic និយាយថា ការសម្រេចចិត្តនោះ មានឥទ្ធិពលសំខាន់សម្រាប់ការការពារពីសំណាក់អន្តរជាតិ ទៅលើមនុស្សដែលផ្លាស់ទីលំនៅដោយសារការប្រែប្រួលអាកាសធាតុ និងគ្រោះធម្មជាតិ។
លោក Andrej Mahecic និយាយថា៖
«វាគូសបញ្ជាក់ពីសារៈសំខាន់នៃវិធានការរបស់ប្រទេសនានាក្នុងការបង្ការនិងកាត់បន្ថយការប៉ះពាល់ដោយសារការប្រែប្រួលអាកាសធាតុ ដែលក្នុងពេលអនាគតអាចបង្ខំឲ្យមនុស្សចាកចេញ ហើយវាក៏នឹងក្លាយទៅជាកាតព្វកិច្ចអន្តរជាតិ។ ទីពីរ សេចក្តីសម្រេចមួយនេះ ក៏ជាការទទួលស្គាល់ថា ច្បាប់សម្រាប់ជនភៀសខ្លួនអន្តរជាតិ អាចអនុវត្តបានក្នុងបរិបទការប្រែប្រួលអាកាសធាតុ និងការបម្លាស់ទីដោយសារគ្រោះមហន្តរាយ»។
លោក Andrew Harper ទីប្រឹក្សាពិសេសផ្នែកអាកាសធាតុរបស់ទីភ្នាក់ងារ UNHCR និយាយថា ករណីភ្លើងឆេះព្រៃនៅអូស្ត្រាលី ផ្ទាំងទឹកកករលាយ ទឹកជំនន់ គ្រោះរាំងស្ងួត និងគ្រោះមហន្តរាយទាក់ទងនឹងអាកាសធាតុផ្សេងៗទៀត គួរតែជាការដាស់តឿនមួយថា ត្រូវមានវិធានការណ៍។
លោក Andrew Harper ថ្លែងថា៖
«ខ្ញុំគិតថាសេចក្តីសម្រេចនេះ អាចសង្ខេបបានថា បើយើងមិនប្រឹងប្រែងបន្ថែមដើម្បីបង្ការទេ នោះយើងនឹងចៀសមិនផុតពីកាតព្វកិច្ចការពារពលរដ្ឋដែលរងប៉ះពាល់ទាំងនោះទេ។ បើសិនជាយើងបរាជ័យក្នុងការបង្កើតបរិស្ថានមួយដែលសហគមន៍មានលទ្ធភាពរស់នៅផុតពីគ្រោះមហន្តរាយអាកាសធាតុ យើងនឹងត្រូវមានកាតព្វកិច្ចការពារពលរដ្ឋដែលរងប៉ះពាល់ទាំងនោះ»។
លោក Harper និយាយថា វាមិនអាចទៅរួចទេក្នុងការគិតទុកថា តើនឹងមានមនុស្សប៉ុន្មាននាក់អាចនឹងត្រូវផ្លាស់ទីលំនៅដោយសារការប្រែប្រួលអាកាសធាតុនោះ។ លោកបានកត់សម្គាល់ថា អ្នកដែលងាយនឹងរងគ្រោះបំផុត គឺអ្នករស់នៅលើកោះតូចៗ និងពលរដ្ឋរស់នៅក្នុងប្រទេសកំពុងអភិវឌ្ឍ ដូចជានៅទ្វីបអាស៊ី និងអាហ្រ្វិកជាដើម ដែលភាគច្រើនមានជីវភាពក្រីក្រខ្លាំង ដែលមិនមានលទ្ធភាពក្នុងការចាកចេញ។
ទីភ្នាក់ងារ UNHCR កំពុងអំពាវនាវឲ្យមានវិធានការជាបន្ទាន់ ដើម្បីជួយសហគមន៍ដែលងាយរងគ្រោះ កាត់បន្ថយហានិភ័យ និងសម្របខ្លួនទៅនឹងអាកាសធាតុដែលកំពុងប្រែប្រួល ដូច្នេះ មនុស្សម្នាក់ៗនឹងបាច់ត្រូវបង្ខំចិត្តចាកចេញពីទីលំនៅរបស់ពួកគេ៕
ប្រែសម្រួលដោយកញ្ញា ទុំ ម្លិះ
