ភ្ជាប់​ទៅ​គេហទំព័រ​ទាក់ទង

អ.ស.ប៖ ក្រុម​ចម្រុះ​ដឹកនាំ​ដោយ​អារ៉ាប៊ី សាអូឌីត ជា​អ្នក​ទទួល​ខុសត្រូវ​ចំពោះ​ការ​វាយប្រហារភាគច្រើនលើ​ជនស៊ីវិល​យេម៉ែន


លោក​ Ismail Ould ប្រេសិត​ពិសេស​នៃ​អគ្គលេខាធិការ​សហប្រជាជាតិ​បើក​កិច្ច​​ចរចា​សន្តិភាពសម្រាប់​ប្រទេស​យេម៉ែន ​នៅ​ក្នុង​ប្រទេស​ស្វ៊ីស កាល​ពី​ថ្ងៃ​ទី​១៥​ ខែ​ធ្នូ​ ឆ្នាំ​២០១៥។​

មន្ត្រី​ជាន់​ខ្ពស់​ទទួល​បន្ទុក​ខាង​បញ្ហា​សិទ្ធិមនុស្ស​នៅ​អង្គការ​សហប្រជាជាតិ​និយាយ​ថា កងកម្លាំង​យោធា​ចម្រុះ​ដឹកនាំ​ដោយ​ប្រទេស​អារ៉ាប៊ី សាអូឌីត នៅ​ក្នុង​ប្រទេស​យេម៉ែន ហាក់​ដូច​ជា​ជា​អ្នក​ទទួល​ខុសត្រូវ​ចំពោះ​ចំនួន​ការ​វាយប្រហារ​ទៅលើ​ជន​ស៊ីវិល​ ដែល​«មិន​មាន​លក្ខណៈ​សមាមាត្រ​គ្នា​សោះ» នៅ​ក្នុង​ប្រទេស​ដែល​ហែក​ហួរ​ដោយ​សារ​ជម្លោះ​នោះ។

ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​ គឺ​ព្រះអង្គ​ម្ចាស់​ Zeid Raad al-Hussein បាន​ថ្លែង​ទៅ​កាន់​ក្រុម​ប្រឹក្សា​សន្តិសុខ​សហប្រជាជាតិ​កាល​ពី​ថ្ងៃ​អង្គារ​ថា​ យុទ្ធនាការ​វាយ​ប្រហារ​តាម​កាំភ្លើង​ធំ​និង​តាម​អាកាស​ដឹកនាំ​ដោយ​ប្រទេស​អារ៉ាប៊ី សាអូឌីត ដែល​បាន​ចាប់​ផ្តើម​ធ្វើ​ឡើង​នៅ​ឆ្នាំ​នេះ បាន​តម្រង់​គោលដៅ​ទៅ​រក​តំបន់​ជនស៊ីវិល ហើយ​ឈាន​ទៅ​ដល់​ការ​បំផ្លិច​បំផ្លាញ​ មន្ទីរពេទ្យ ​និង​សាលារៀន​អស់​មួយ​ចំនួន។

ព្រះអង្គ​ម្ចាស់​ Zeid បាន​មាន​បន្ទូល​ពីរ​ថ្ងៃ​ក្រោយ​ពី​កិច្ច​ចរចា​សន្តិភាព​ដែល​ឧបត្ថម្ភ​ដោយ​អង្គការ​សហប្រជាជាតិ​នៅ​ក្នុង​ប្រទេស​ស្វីស​ បាន​នាំ​ភាគី​ជម្លោះ​ពីរ​ឲ្យ​ជួប​គ្នា គឺ​ក្រុម​បះបោរ​និកាយ​ Shi'ite ដែល​គាំទ្រ​ដោយ​ប្រទេស​អ៊ីរ៉ង់ និង​ក្រុម​ចម្រុះ​អារ៉ាប់ ដែល​គាំទ្រ​ប្រធានាធិបតី​យេ​ម៉ែនគឺ លោកAbdu ការចរចា​នៅ​ក្នុង​ប្រទេស​ស្វ៊ីស​នោះ​ បាន​បញ្ចប់​ទៅ​ដោយ​គ្មាន​កិច្ច​ព្រមព្រៀង​ណាមួយ​ទេ ហើយ​ត្រូវ​បាន​ធ្វើ​ឲ្យ​ហ្មងសៅ​ដោយសារ​ភាគី​ទាំង​ពីរ​បានរំលោភ​ទៅ​លើ​បទ​ឈប់​បាញ់​គ្នា​ជា​បណ្តោះអាសន្ន​ម្តង​ហើយ​ម្តង​ទៀត។

កិច្ច​ចរចា​គ្នា​នោះ​ គ្រោង​នឹង​បន្ត​ធ្វើ នៅ​ពាក់​កណ្តាល​ខែ​មករា​ឆ្នាំ​ក្រោយ​ទៀត។​

ភាគី​ទាំង​ពីរ​បាន​វាយ​ប្រយុទ្ធ​គ្នា​តាំង​ពីខែ​មីនា​មក​ ហើយ​ទិន្នន័យ​របស់​អង្គការ​សហប្រជាជាតិ​ បាន​បង្ហាញ​ថា ប្រជាជន​ជាង​៥​៧០០​នាក់ ភាគច្រើន​ជា​ជន​ស៊ីវិល បាន​ស្លាប់​ដោយសារ​ជម្លោះ​នេះ៕

XS
SM
MD
LG