ស.រ.អា.ឃើញមាន «ឱកាសធំ» មួយនៅក្នុងកិច្ចចរចាខាងការទូតនៅឯអ.ស.ប. ដើម្បីបញ្ចប់ការបង្ហូរឈាមនៅក្នុងប្រទេសស៊ីរី និងប្រទេសយេម៉ែន (Yemen) និងធ្វើឱ្យមានការជឿនលឿនឆ្ពោះទៅកាន់ការធ្វើឱ្យមានសន្តិភាពនៅទីនោះ។
លោករដ្ឋមន្ត្រីការបរទេសស.រ.អា. John Kerry បានវាយតម្លៃប្រកបដោយសុទិដ្ឋិនិយមនៅក្រោយកិច្ចចរចារបស់លោកនៅក្នុងបុរីញូវយ៉កកាលពីថ្ងៃសៅរ៍ជាមួយលោក Mohammad Javad Zarif រដ្ឋមន្ត្រីការបរទេសនៃប្រទេសអ៊ីរ៉ង់នៅមុនការបើកការជជែកដេញដោលគ្នានៅក្នុងមហាសន្និបាតប្រចាំឆ្នាំរបស់អ.ស.ប.នៅថ្ងៃច័ន្ទស្អែកនេះ។
លោក Kerry បានមានប្រសាសន៍ថា «ខ្ញុំយល់ឃើញថា សប្តាហ៍នេះជាឱកាសធំមួយសម្រាប់ប្រទេសមួយចំនួនបំពេញមុខនាទីសំខាន់មួយក្នុងការខិតខំព្យាយាមដោះស្រាយបញ្ហាពិបាកៗខ្លះនៅក្នុងភូមិភាគមជ្ឈឹមបូព៌ា។ យើងត្រូវការធ្វើឱ្យមានសន្តិភាព និងវិធីទៅមុខមួយនៅក្នុងប្រទេសស៊ីរី នៅក្នុងប្រទេសយេម៉ែន និងក្នុងតំបន់នោះទាំងមូល»។
លោក Kerry បានមានប្រសាសន៍ថា លោកមានជំនឿថាមានឱកាស «ក្នុងការធ្វើឱ្យមានការជឿនលឿន» នៅក្នុងពេលប៉ុន្មានថ្ងៃខាងមុខនេះនៅក្នុងកិច្ចចរចានៅខាងក្រៅការប្រជុំរបស់អ.ស.ប.។
លោក Zarif បានមានប្រសាសន៍ថា លោកគ្រោងយកចិត្តទុកដាក់លើការអនុវត្តពេញលេញនៃកិច្ចព្រមព្រៀងបរមាណូរវាងប្រទេសអ៊ីរ៉ង់ និងប្រទេសមហាអំណាចពិភពលោកដោយមានរួមបញ្ចូលទាំងស.រ.អា.ផងដែរ៕
