ប្រធានផ្នែកមនុស្សធម៌របស់អង្គការសហប្រជាជាតិលោក Martin Griffiths កាលពីថ្ងៃចន្ទម្សិលមិញ បានអំពាវនាវឱ្យមានការឆ្លងកាត់ដោយសុវត្ថិភាពដល់ជនស៊ីវិលដែលកំពុងព្យាយាមរត់គេចពីប្រទេសអ៊ុយក្រែននិងស្នើឱ្យមានការផ្តល់ជំនួយមនុស្សធម៌ជាបន្ទាន់ដល់អ៊ុយក្រែន។
លោកបានប្រាប់ក្រុមប្រឹក្សាសន្តិសុខអង្គការសហប្រជាជាតិថា៖ «គ្រប់ភាគីទាំងអស់ ត្រូវយកចិត្តទុកដាក់លើជនស៊ីវិលនិងផ្ទះសម្បែងរបស់ពលរដ្ឋហើយនិងហេដ្ឋារចនាសម្ព័ន្ធនៅក្នុងកិច្ចប្រត្តិបត្តិការយោធារបស់គេ។ ការណ៍នេះរួមមាន ការអនុញ្ញាតឱ្យឆ្លងកាត់ដោយសុវត្ថិភាពដល់ជនស៊ីវិលដែលចាកចេញដោយស្ម័គ្រចិត្តពីតំបន់ដែលមានអរិភាពទៅកាន់ទីកន្លែងដែលគេត្រូវទៅ។ គ្រប់ជនស៊ីវិលទាំងអស់ បើទោះបីជាគេចាកចេញឬមិនចាកចេញពីទីកន្លែងដែលគេរស់នៅក៏ដោយ ក៏គេត្រូវទទួលបានការគោរពនិងការការពារផងដែរ»។
កិច្ចប្រឹងប្រែងដើម្បីជម្លៀសពលរដ្ឋប្រមាណ២សែននាក់ពីទីក្រុង Mariupol នៅភាគខាងត្បូងអ៊ុយក្រែនបានទទួលបរាជ័យកាលពីថ្ងៃសៅរ៍និងថ្ងៃអាទិត្យកន្លងទៅ ហើយភាគីរុស្ស៊ីនិងអ៊ុយក្រែនបានស្តីបន្ទោសគ្នាទៅវិញទៅមកលើបញ្ហានេះ។
លោក Griffiths ក៏បានអំពាវនាវឱ្យមានការឆ្លងកាត់ដោយសុវត្ថិភាពផងដែរក្នុងការដឹកជញ្ជូនជំនួយមនុស្សធម៌ទៅកាន់តំបន់ជម្លោះនានា។
លោក បានបន្ថែមទៀតថា៖ «ជនស៊ីវិលក្នុងទីកន្លែងនានាដូចជាទីក្រុង Mariupol, Kharkiv, Melitopol និងទីកន្លែងផ្សេងៗទៀត ត្រូវការជំនួយចាំបាច់នានា ជាពិសេសបរិក្ខារពេទ្យដើម្បីសង្គ្រោះជីវិត»។ លោកក៏បានជំរុញឱ្យគ្រប់ភាគីទាំងអស់គោរពកាតព្វកិច្ចរបស់គេក្រោមច្បាប់ស្តីពីសង្គ្រាម។
លោកបន្តទៀតថា៖ «យើងត្រូវការជាបន្ទាន់នូវប្រព័ន្ធទាក់ទងជាប្រចាំជាមួយភាគីដែលមានជម្លោះទាំងអស់និងការធានាពីលទ្ធភាពនៃការដឹកជញ្ជូនជំនួយមនុស្សធម៌។ ប្រព័ន្ធប្រាប់ពីជំនួយមនុស្សធម៌ អាចជួយដល់ការដឹកជញ្ជូនចំនួនជំនួយមនុស្សធម៌ដែលត្រូវការចាំបាច់។
ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាតិលោកស្រី Linda Thomas-Greenfield បានជំរុញឱ្យមានការផ្អាកសកម្មភាពអរិភាពដើម្បីអនុញ្ញាតឱ្យជនស៊ីវិលចាកចេញនិងការផ្តល់ជំនួយមនុស្សធម៌។
លោកស្រីបន្តទៀតថា៖ «យើងត្រូវការនូវការតាំងចិត្តដ៏ច្បាស់លាស់ ម៉ឺងម៉ាត់ ជាសាធារណៈ និងមិនងាករេរបស់រុស្ស៊ីដើម្បីសម្រួលនិងអនុញ្ញាតឱ្យមានការផ្តល់ជំនួយមនុស្សធម៌ជាបន្ទាន់ដោយគ្មានការបង្អាក់រារាំងដល់ក្រុមជំនួយមនុស្សធម៌នៅក្នុងប្រទេសអ៊ុយក្រែនឡើយ។
បេសកជនរុស៊្សី បានអះអាងដោយគ្មានភស្តុតាងថា ខាងអាជ្ញាធរអ៊ុយក្រែននោះទេ ជាអ្នកដែលមិនអនុញ្ញាតឱ្យជនស៊ីវិលចាកចេញពីទីប្រជុំជននិងទីក្រុងនានាតាមច្រករបៀងមនុស្សធម៌នោះ៕
