ក្រុមអ្នកធ្វើការនិងនិស្សិតអាហ្វ្រិកដែលព្យាយាមរត់គេចចេញពីប្រទេសអ៊ុយក្រែន ដោយសារតែការឈ្លានពានរបស់រុស្ស៊ីនោះ បានត្អូញត្អែរថា ខ្លួនត្រូវបានគេរារាំងមិនឲ្យជិះរថយន្តដឹកអ្នកដំណើរ រថភ្លើងនិងឆ្លងកាត់ព្រំដែនដោយទុកអាទិភាពទៅឲ្យពលរដ្ឋអ៊ុយក្រែន។
មន្ត្រីអាមេរិកាំងមួយរូប បានប្រាប់វីអូអេថា សហរដ្ឋអាមេរិក បានដឹងពីបញ្ហានេះ។ មន្ត្រីរូបនោះ និយាយទៀតថា «នេះជាក្តីបារម្ភមួយដ៏ធំមួយ» ប៉ុន្តែជនជាតិនីហ្សេរីយ៉ាជាច្រើននាក់កាលពីថ្ងៃអង្គារកន្លងទៅ បានចាកចេញពីប្រទេសអ៊ុយក្រែន។
អាជ្ញាធរអ៊ុយក្រែន បានផ្តល់អាទិភាពដល់ស្រ្តីនិងកុមារអ៊ុយក្រែនដែលព្យាយាមចាកចេញពីប្រទេសរបស់ខ្លួន ប៉ុន្តែ គេនៅមិនទាន់ដឹងច្បាស់នៅឡើយទេថា តើពលរដ្ឋអាហ្វ្រិកត្រូវបានគេរារាំងក្នុងកម្រិតណា ដែលខុសពីជនបរទេសដទៃទៀតនោះ។ ពួកបុរសអ៊ុយក្រែនដែលមានអាយុអាចធ្វើសង្គ្រាមបាន មិនត្រូវបានគេអនុញ្ញាតឲ្យចាកចេញពីប្រទេសទេ។
ទោះជាយ៉ាងណាក៏ដោយ ក៏ជនជាតិអាហ្វ្រិកមួយចំនួន ដែលស្ថិតក្នុងចំណោមមនុស្សរាប់ម៉ឺននាក់ដែលព្យាយាមចាកចេញពីអ៊ុយក្រែននោះ បានចោទប្រកាន់ថា មានការប្រកាន់ពូជសាសន៍ដែលបណ្តាលឲ្យមានការបដិសេធពីអាជ្ញាធរអ៊ុយក្រែននិងការបារម្ភពីសហរដ្ឋអាមេរិកនិងអង្គការអន្តរជាតិនានា។
និស្សិតជាតិលីបេរីយ៉ាមួយរូបឈ្មោះ Augustine Akoi Kollie ដែលសិក្សាមុខវិជ្ជាពេទ្យនៅក្នុងទីក្រុង Ternopil ភាគខាងលិចប្រទេសអ៊ុយក្រែន បាននិយាយថា លោកបានឃើញផ្ទាល់ភ្នែកនូវការរើសអើងនេះក្នុងពេលលោកកំពុងរង់ចាំឆ្លងកាត់ព្រំដែនកាលពីយប់ថ្ងៃសៅរ៍កន្លងទៅ នៅចំណុចឆ្លងកាត់ព្រំដែនក្នុងទីក្រុង Suceava នៃប្រទេសរូម៉ានី។
លោកបានប្រាប់វីអូអេថា មានមនុស្សជាច្រើនបានឈរតម្រង់ជួរដ៏វែងដោយមានវ៉ាលីឥវ៉ាន់និងកូនតូចៗរបស់គេផង ហើយប្រសិនបើមានពលរដ្ឋអ៊ុយក្រែនណាម្នាក់ដើរមក អ្នកត្រូវទុកផ្លូវឲ្យជនជាតិអ៊ុយក្រែននោះទៅមុននិងឈរនៅជួរខាងមុខ។ បើទោះបីជាអាជ្ញាធរបានឲ្យស្រ្តីនិងកុមារទៅមុនក្តី ក៏ពួកស្ត្រីជាតិអាហ្វ្រិក ត្រូវបានទុកឲ្យនៅក្រោយគេដែរ។
លោកបន្ថែមទៀតថា៖ «នេះជាការប្រកាន់ពូជសាសន៍ពីព្រោះបើអ្នកនិយាយថា អ្នកយកស្ត្រីនិងកុមារទៅមុនហើយនៅទីនោះក៏មាននិស្សិតបរទេសដែលជាស្ត្រីផងដែរ ហេតុអ្វីក៏មិនយកគ្នាទៅមុនដែរ?»។
វេជ្ជបណ្ឌិតជនជាតិនីហ្សេរីយ៉ាមួយរូប ដែលមានវ័យ២៤ឆ្នាំ បានប្រាប់ការសែត The New York Times ថា នាងបានជាប់នៅច្រកឆ្លងកាត់ព្រំដែនអ៊ុយក្រែន-ប៉ូឡូញអស់រយៈពេល២ថ្ងៃ នៅតំបន់ប្រជុំជន Medyka នៃប្រទេសប៉ូឡូញដោយឆ្មាំសន្តិសុខបានរារាំងមិនឲ្យជនបរទេសធ្វើដំណើរទៅមុខហើយទុកឲ្យជនជាតិអ៊ុយក្រែនទៅមុនសិន។
នាងបានប្រាប់កាសែតនេះទៀតថា៖ «ក្រុមសន្តិសុខទាំងនោះ បានប្រើដំបងរបស់គេវាយទៅលើអ្នកឈររង់ចាំទាំងនោះ។ ពួកគេបានទះនិងវាយមនុស្សទាំងនោះហើយបានរុញពួកគេ ឲ្យទៅឈរនៅជួរខាងក្រោយវិញ។ មើលទៅដូចជាពិបាកភ្នែកណាស់។
អ្នកយកព័ត៌មានរបស់វីអូអេម្នាក់ដែលរាយការណ៍ពីប្រទេសអ៊ុយក្រែន បានឲ្យដឹងថា អាជ្ញាធរអ៊ុយក្រែននៅទីនោះ បានផ្តល់អាទិភាពដល់ពលរដ្ឋអ៊ុយក្រែនឲ្យឡើងជិះរថយន្តដឹកអ្នកដំណើរនិងរទេះភ្លើងដែលបានធ្វើឲ្យជនបរទេសផ្សេងៗទៀតមានការលំបាកក្នុងការចាកចេញពីប្រទេសនេះ។
មន្ត្រីអាមេរិកមួយរូបដែលបាននិយាយក្នុងលក្ខខណ្ឌមិនបញ្ជេញឈ្មោះ បានឲ្យដឹងថា សហ រដ្ឋអាមេរិក កំពុងតាមដានពិនិត្យមើលរឿងរ៉ាវជុំវិញជនបរទេសដែលចាកចេញពីប្រទេសអ៊ុយក្រែនហើយនោះគឺជាក្តីកង្វល់មួយដ៏ធំ បើទោះបីជាមានជនជាតិនីហ្សេរីយ៉ា ដែលជាក្រុមជនបរទេសដ៏ធំទី២បានចាកចេញពីប្រទេសអ៊ុយក្រែនកាលពីថ្ងៃអង្គារកន្លងទៅនេះក្តី៕
អ្នកផ្តល់ព័ត៌មានដល់សេចក្តីរាយការណ៍នេះ រួមមាន Myroslava Gongadze ប្រធានការិយាល័យអឺរ៉ុបខាងកើតរបស់វីអូអេ អ្នកយកព័ត៌មានសន្តិសុខជាតិរបស់វីអូអេ Jeff Seldin Grace Alheri Abdu អ្នកយកព័ត៌មានសេវាកម្មHausa របស់វីអូអេ Ignatius Annor នៃសេវា Englsih to Africa និង Betty Ayoub និង Carol Guensburg នៃការិយាល័យអាហ្វ្រិក។
ខណៈជនជាតិអ៊ុយក្រែនកំពុងសម្រុកចេញពីប្រទេស មានសេចក្តីរាយការណ៍ពីការរើសអើងលើជនជាតិអាហ្រ្វិកផងដែរ
វ៉ាស៊ីនតោន —
