នៅមុនពេលបញ្ចប់អាណត្តិរបស់ខ្លួនកាលពីថ្ងៃពុធ ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស (OHCHR) អ្នកស្រី Michelle Bachelet បានចេញរបាយការណ៍ដែលគេរង់ចាំជាយូរមកហើយមួយដែលបានរកឃើញថា ទង្វើដែលរដ្ឋាភិបាលចិនធ្វើលើជាតិសាសន៍ភាគតិចនានានៅក្នុងតំបន់ Xinjiang ប្រទេសចិន អាចជាឧក្រិដ្ឋកម្មប្រឆាំងនឹងមនុស្សជាតិ។
អ្នកស្រី Bachelet បានសរសេរនៅក្នុងរបាយការណ៍នោះថា ព័ត៌មានដែលការិយាល័យរបស់អ្នកស្រីទទួលបានទាក់ទិននឹងការបង្ក្រាបរបស់រដ្ឋាភិបាលចិនលើភេរវកម្មនិង «ភាពជ្រុលនិយម» នៅក្នុងតំបន់ស្វយ័ត Xinjiang ពីឆ្នាំ ២០១៧ ដល់ឆ្នាំ ២០១៩ និងអាចនៅឆ្នាំក្រោយៗមកទៀត បានបង្កឱ្យមានក្ដីបារម្ភនៅក្រោមច្បាប់អន្តរជាតិ។
អ្នកស្រីបានបញ្ជាក់នៅក្នុងរបាយការណ៍កម្រាស់ ៤៨ ទំព័រនោះថា៖ «បើយោងទៅតាមច្បាប់និងគោលនយោបាយ និងនៅក្នុងបរិបទនៃការដាក់កំហិតនិងការដកហូតសិទ្ធិជាមូលដ្ឋានទូទៅដែលបុគ្គលនីមួយៗគួរទទួលបាន យើងឃើញថាកម្រិតនៃការឃុំឃាំងខុសច្បាប់និងបែបរើសអើងលើជាតិសាសន៍អ៊ុយហ្គ័រ (Uyghur) និងក្រុមជាតិសាសន៍កាន់សាសនាឥស្លាមផ្សេងទៀត អាចជាឧក្រិដ្ឋកម្មអន្តរជាតិ ជាពិសេសឧក្រិដ្ឋកម្មប្រឆាំងនឹងមនុស្សជាតិ»។
កន្លងមក អង្គការសិទ្ធិមនុស្សនានានិងរដ្ឋាភិបាលសហរដ្ឋអាមេរិកបានចោទប្រកាន់រដ្ឋាភិបាលចិនថាបានប្រព្រឹត្តអំពើរំលោភបំពានធ្ងន់ធ្ងរលើជាតិសាសន៍អ៊ុយហ្គ័រ ដែលក្នុងនោះរួមមានទាំងការធ្វើទារុណកម្ម អំពើហិង្សាផ្លូវភេទ និងការបង្ខំបំបែកកុមារពីឪពុកម្ដាយរបស់ពួកគេផងដែរ។
ស្ថានបេសកកម្មរបស់ប្រទេសចិនប្រចាំអង្គការសហប្រជាជាតិនៅក្នុងទីក្រុងហ្សឺណែវ ប្រទេសស្វីស បានបញ្ជូនសារឆ្លើយតបទៅកាន់ការិយាល័យរបស់អ្នកស្រី Bachelet ដោយបញ្ជាក់អំពីការជំទាស់របស់ខ្លួនចំពោះរបាយការណ៍នេះ។
ស្ថានបេសកកម្មរបស់ចិននេះបានលើកឡើងថា៖ «ផ្អែកលើព័ត៌មានប្រឌិតនិងការកុហកដែលបង្កើតឡើងដោយក្រុមប្រឆាំងនឹងចិន និងកើតចេញមកពីការសន្មតដែលថាគេមានកំហុសនោះ យើងឃើញថា «ការវាយតម្លៃ» នេះគឺជាការបកស្រាយខុសពីច្បាប់និងគោលនយោបាយរបស់ប្រទេសចិន និងជាការបង្ខូចកេរ្តិ៍ឈ្មោះនិងមួលបង្កាច់ធ្ងន់ធ្ងរលើប្រទេសចិន ក៏ដូចជាការជ្រៀតជ្រែកចូលក្នុងកិច្ចការផ្ទៃក្នុងរបស់ប្រទេសចិនផងដែរ ដែលរំលោភលើគោលការណ៍នានាដូចជាគោលការណ៍សន្ទនានិងកិច្ចសហប្រតិបត្តិការ និងគោលការណ៍មិនយករឿងសិទ្ធិមនុស្សមកធ្វើជានយោបាយជាដើម។ ជាងនេះទៀត ការវាយតម្លៃនេះក៏បំផ្លាញផងដែរដល់ភាពគួរឱ្យជឿទុកចិត្តបានរបស់ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស»៕
ប្រធានផ្នែកសិទ្ធិមនុស្សអ.ស.ប.៖ ទង្វើរបស់ចិនលើជាតិសាសន៍អ៊ុយហ្គ័រអាចជាឧក្រិដ្ឋកម្មប្រឆាំងមនុស្សជាតិ
