រដ្ឋាភិបាលក្រុងប៉េកាំងបានអះអាងថា អង្គការមួយនៃរាជាណាចក្រអារ៉ាប់មួយចំនួនដែលសម្បួរទៅដោយប្រេងបានច្រានចោលចំណាត់ការដ៏ចម្រូងចម្រាសរបស់ចិនទៅលើជនជាតិ Uyghur កាន់សាសនាឥស្លាម ដោយចាត់ទុកវាថាជា«រឿងផ្ទៃក្នុងរបស់ចិន»។
ក្នុងកិច្ចប្រជុំជាមួយមន្រ្តីគណបក្សកុម្មុនីស្តចិនកាលពីពាក់កណ្តាលខែមករាក្នុងប្រទេសចិន លោក Nayef Falah Al-Hajraf អគ្គលេខាធិការនៃក្រុមប្រឹក្សាសហប្រតិបត្តិការឈូងសមុទ្រ បានសម្តែងការគាំទ្រយ៉ាងខ្លាំងចំពោះជំហរតាមផ្លូវច្បាប់របស់ចិន«លើបញ្ហាទាក់ទងនឹងកោះតៃវ៉ាន់ ស្ថានភាពនៅខេត្ត Xinjiang និងស្ថានភាពសិទ្ធិមនុស្សក្នុងប្រទេសចិន»។ នេះបើតាមសម្ដីរបស់អ្នកនាំពាក្យក្រសួងការបរទេសចិន លោក Wang Wenbin ដែលបានប្រាប់ក្រុមអ្នកសារព័ត៌មានកាលពីថ្ងៃទី១៤ ខែមករា កន្លងទៅនេះ។
លោក Al-Hajraf មិនបានថ្លែងប្រាប់ពីជំហរបែបនេះដល់ក្រុមអ្នកសារព័ត៌មានដោយផ្ទាល់ទេ ប៉ុន្តែអ្នកនាំពាក្យក្រសួងការបរទេសចិនលោក Wenbin និយាយថា លោក Al-Hajraf បានបង្ហាញការគាំទ្រលើជំហរដែលថាបញ្ហាសិទ្ធិមនុស្សមិនត្រូវយកទៅធ្វើនយោបាយទេ និងបានជំទាស់រាល់ការជ្រៀតជ្រែកកិច្ចការផ្ទៃក្នុងរបស់ចិន។
ក្រុមប្រឹក្សាសហប្រតិបត្តិការឈូងសមុទ្រ ដែលមានអក្សរកាត់ (GCC) និងមានទីស្នាក់ការនៅរដ្ឋធានីរីយ៉ាដ គឺជាអង្គការសម្ព័ន្ធនៃប្រទេសអារ៉ាប៊ីសាអូឌីត បារ៉ែន កូវ៉ែត អូម៉ង់ កាតា និងអេមីរ៉ាតអារ៉ាប់រួម។
បើតាមសារព័ត៌មាន Saudi Gazette បានរាយការណ៍ថា ទស្សនកិច្ចរបស់លោក Al-Hajraf ក្នុងប្រទេសចិន មានគោលបំណងបង្កើនទំនាក់ទំនងសេដ្ឋកិច្ច និងសន្តិសុខរវាងប្រទេសជាសមាជិក GCC និងរដ្ឋាភិបាលក្រុងប៉េកាំង។
ប្រទេសចិនរងការរិះគន់ពីគ្រប់ទិសទីចំពោះការគាបសង្កត់របស់ខ្លួនលើជនជាតិ Uyghur កាន់សាសនាឥស្លាមក្នុងតំបន់ស្វយ័ត Xinjiang ភាគពាយ័ព្យប្រទេសចិន ដែលសហរដ្ឋអាមេរិកចាត់ទុកវាថាជាអំពើប្រល័យពូជសាសន៍។
អង្គការឃ្លាំមើលសិទ្ធិមនុស្ស (Human Rights Watch) បានបញ្ជាក់ក្នុងរបាយការណ៍របស់ខ្លួនថា៖ «រដ្ឋាភិបាលចិនបានប្រព្រឹត្ត និងនៅតែបន្តប្រព្រឹត្តឧក្រិដ្ឋកម្មប្រឆាំងមនុស្សជាតិលើជនជាតិ Turkic កាន់សាសនាឥស្លាម។ ក្នុងតំបន់ Xinjiang ជនជាតិ Turkic នៅតែត្រូវបានគេចាប់ឃុំខ្លួនដោយប្រើប្រព័ន្ធតុលាការ ដោយសារតែអត្តសញ្ញាណរបស់ពួកគេ ហើយអ្នកផ្សេងទៀតត្រូវបានគេបង្ខំឱ្យធ្វើការហួសកម្លាំង ត្រូវបានគេតាមឃ្លាំមើល និងត្រូវបានគេបំពាក់បំប៉នមនោគមនយោបាយ»។
នៅពេលចិនប្រឈមនឹងការចោទប្រកាន់ពាក់ព័ន្ធនឹងការរំលោភសិទ្ធិមនុស្ស បណ្តាប្រទេសជាសមាជិកនៃក្រុម GCC ដូចជាប្រទេសអារ៉ាប៊ីសាអូឌីត និងអេមីរ៉ាតអារ៉ាប់រួម តែងតែចាត់ទុកវាថាជា«កិច្ចការផ្ទៃក្នុងរបស់ចិន» ដែលគាំទ្រទស្សនៈរបស់ចិនដែរ។ អង្គការសិទ្ធិមនុស្សនានារិះគន់បណ្តាប្រទេសឈូងសមុទ្រអារ៉ាប់ទាំងនេះដែលប្រើច្បាប់ប្រឆាំងភេរវកម្មពុំច្បាស់លាស់ និងពាក្យពេចន៍ទូលំទូលាយ ដើម្បីបំបាត់សំឡេងសកម្មជន និងការដាក់ទោសពីបទបំផ្លាញស្ថិរភាពនិងឯកភាពជាតិ។
សហរដ្ឋអាមេរិក និងចិន ដែលជាប្រទេសមហាអំណាចសេដ្ឋកិច្ចធំបំផុតក្នុងពិភពលោក កំពុងប្រជែងគ្នាយ៉ាងខ្លាំងដើម្បីដណ្តើមឥទ្ធិពលលើតំបន់មជ្ឈិមបូព៌ា ដែលសម្បូរទៅដោយប្រេង ឧស្ម័ន និងផលប្រយោជន៍ខាងយុទ្ធសាស្ត្រ។
ដើម្បីបង្កើនទំនាក់ទំនងពាណិជ្ជកម្ម និងសេដ្ឋកិច្ច ប្រទេសចិនក៏បានសន្យាគាំទ្របណ្តាប្រទេសជាសមាជិកនៃ GCC ក្នុងការដោះស្រាយជម្លោះ និងវិបត្តិនានាក្នុងតំបន់មជ្ឈិមបូព៌ាផងដែរ។ នេះបើតាមក្រុមអ្នកវិភាគ។
លោក Nicholas Heras អ្នកវិភាគជាន់ខ្ពស់នៃវិទ្យាស្ថាន Newlines បានប្រាប់វីអូអេភាសាចិនកុកងឺថា៖ «ប្រទេសចិនកំពុងដើរតាមមាគ៌ារបស់ខ្លួនសន្សឹមៗឆ្ពោះទៅកាន់តំបន់មជ្ឈិមបូព៌ាក្នុងនាមជាប្រទេសមហាអំណាចនិងជាតួអង្គយុទ្ធសាស្រ្តមួយ»។
រដ្ឋាភិបាលក្រុងប៉េកាំងហាក់ដូចជាបានកែប្រែវិធីសាស្ត្ររបស់ខ្លួនក្នុងតំបន់នេះ ហើយថ្មីៗនេះកំពុងតែបង្កើនប្រយោជន៍របស់ខ្លួនបន្ថែមទៀត។ នេះបើតាមលោក Michael Rubin អ្នកស្រាវជ្រាវជាន់ខ្ពស់នៃវិទ្យាស្ថាន American Enterprise ដែលមានទីតាំងនៅរដ្ឋធានីវ៉ាស៊ីនតោន។
លោក Rubin បានបន្តប្រាប់វីអូអេភាសាចិនកុកងឺថា៖ «អ្វីដែលប្លែកគឺថា តំបន់ឈូងសមុទ្រមិនដូចតំបន់ផ្សេងក្នុងលោកនេះឡើយ។ បណ្តាប្រទេសទាំងនេះស្វាគមន៍ភាពជាដៃគូជាមួយចិន ប៉ុន្តែប្រទេសទាំងនោះនឹងមិនស្វាគមន៍ឥទ្ធិពលលើសលប់របស់ចិនឡើយ»៕
ប្រែសម្រួលដោយ លោក កោះ សុគន្ធី
