នៅក្នុងការថ្លែងចុងក្រោយរបស់លោកទៅកាន់អ្នកកាសែតនៅក្នុងទីក្រុងហារ៉ារេ ប្រទេសហ្ស៊ីមបាវ៉េ លោក Bishow Parajuli អ្នកសម្របសម្រួលប្រព័ន្ធអង្គការសហប្រជាជាតិនៅប្រទេសហ្ស៊ីមបាវ៉េ បាននិយាយកាលពីថ្ងៃទី ២៨ ខែសីហា កន្លងទៅនេះថា លោកមានការព្រួយបារម្ភថា គណបក្សប្រឆាំងត្រូវបានគេរារាំងសិទ្ធិមិនឲ្យធ្វើការតវ៉ារឿងសេដ្ឋកិច្ចអន់ថយ។ កាលពីពេលថ្មីៗនេះ រដ្ឋាភិបាលបានបង្ក្រាបលើគណបក្សប្រឆាំង និងពួកសកម្មជនចំពោះការតវ៉ារឿងសេដ្ឋកិច្ចអន់ថយនេះ។
លោក Parajuli បញ្ជាក់ដូច្នេះថា៖ «រដ្ឋធម្មនុញ្ញផ្ដល់សិទ្ធិដល់ពលរដ្ឋឲ្យចូលរួមនៅក្នុងការតវ៉ាដោយសន្តិវិធី។ ខ្ញុំចង់និយាយថា គ្រប់រូបភាពនៃការតវ៉ាដោយសន្តិវិធីទាំងអស់មិនគួរត្រូវបានគំរាមកំហែងដោយមធ្យោបាយហិង្សានោះទេ។ ជាការពិត ការធ្វើដូច្នេះគឺមានតែផ្ដល់រូបភាពអវិជ្ជមានចំពោះប្រទេសហ្ស៊ីមបាវ៉េតែប៉ុណ្ណោះ។ ខ្ញុំឃើញថា ប្រជាពលរដ្ឋហ្ស៊ីមបាវ៉េគឺជាអ្នកស្រឡាញ់សន្តិភាព និងជាអ្នកមានចិត្តអត់ធ្មត់។ ប៉ុន្តែ សម្រាប់ក្រុមមនុស្សពាក់ម៉ាសមុខ និងវាយដំគេវិញ គឺយើងពិតជាមិនអាចអត់ឱនឲ្យបាននោះទេ។ នេះមិនមែនជារឿងត្រឹមត្រូវដែលត្រូវធ្វើនោះឡើយ»។
រដ្ឋាភិបាលរបស់លោកប្រធានាធិបតី Emmerson Mnangagwa បានបញ្ជាក់ថា ខ្លួនកំពុងធ្វើការស៊ើបអង្កេតថាតើអ្នកណាដែលស្ថិតនៅពីក្រោយការចាប់ខ្លួនមនុស្ស ដែលធ្វើឲ្យសកម្មជនជាច្រើនរងរបួស បន្ទាប់ពីបានចូលរួមនៅក្នុងការតវ៉ាប្រឆាំងរដ្ឋាភិបាលកាលពីពេលថ្មីៗនេះ។
លោក Tatenda Mombeyarara មេដឹកនាំក្រុមសកម្មជន Citizens Manifesto កំពុងសម្រាកព្យាបាលរបួសនៅក្នុងមន្ទីរពេទ្យឯកជនមួយនៅក្នុងទីក្រុង Harare បន្ទាប់ពីលោកត្រូវបានក្រុមបុរសប្រដាប់អាវុធប្រហែល ១០ នាក់ ចាប់ខ្លួនយកទៅ។ លោកនៅតែទទូចអះអាងថា អ្នកដែលចាប់ខ្លួនលោក ធ្វើឲ្យលោករបួស ដាក់ទារុណកម្មលោក និងទុកលោកចោលឲ្យស្លាប់គឺជាកងកម្លាំងសន្តិសុខ។
លោកនិយាយដូច្នេះថា៖ «ក្រុមមនុស្សដែលវាយប្រហារលើរូបខ្ញុំមានកាន់កាំភ្លើង AK-47។ ក្រុមមនុស្សដែលវាយប្រហារលើរូបខ្ញុំគឺធ្វើឡើងក្នុងរូបភាពរៀបចំទុកជាមុន។ ក្រុមមនុស្សដែលវាយប្រហារលើរូបខ្ញុំគឺធ្វើសកម្មភាពជាក្រុម ដូច្នេះក្រុមនេះមិនអាចកើតឡើងដោយចៃដន្យ ឬក៏ជាក្រុមមនុស្សដែលគ្មានការហ្វឹកហ្វឺនជាមុននោះទេ។ ក្រុមនេះអាចជាក្រុមមួយនៃកងកម្លាំងសន្តិសុខ។ ខ្ញុំអាចទាយបានថា ពួកគេគឺជាក្រុមមនុស្សដែលមានការហ្វឹកហ្វឺនមួយ គឺអាចជាពួកយោធា»។
លោក Mombeyarara គឺជា សកម្មជនម្នាក់ ដែលរដ្ឋាភិបាលហ្ស៊ីមបាវ៉េចោទប្រកាន់ថាបានចូលរួមនៅក្នុងការប្រជុំមួយនៅក្នុងប្រទេសម៉ាល់ឌីវកាលពីដើមឆ្នាំនេះ ដើម្បីរៀបចំផែនការសម្ងាត់ប្រឆាំងនឹងរដ្ឋាភិបាលរបស់លោក Mnangagwa។ លោក និងសកម្មជនផ្សេងទៀតកំពុងប្រឈមនឹងការចោទប្រកាន់ពីបទក្បត់ជាតិ។
នៅស្របពេលជាមួយគ្នានេះដែរ លោក Parajuli ដែលជាអ្នកសម្របសម្រួលប្រព័ន្ធអង្គការសហប្រជាជាតិនៅក្នុងប្រទេសហ្ស៊ីមបាវ៉េ បានជំរុញឲ្យរដ្ឋាភិបាលរបស់លោក Mnangagwa បន្តការជជែកពិភាក្សាជាមួយនឹងបស្ចិមប្រទេស ដែលជាផ្នែកមួយនៃកិច្ចប្រឹងប្រែងដើម្បីដកទណ្ឌកម្មដែលដាក់លើរដ្ឋាភិបាលហ្ស៊ីមបាវ៉េកាលពីឆ្នាំ ២០០២ ចេញ។ ទណ្ឌកម្មទាំងនេះត្រូវបានដាក់បន្ទាប់ពីមានសេចក្ដីរាយការណ៍នានាថាមានការលួចបន្លំនៅក្នុងការបោះឆ្នោត។ លោក Parajuli និយាយថា ទណ្ឌកម្មទាំងនេះមិនពាក់ព័ន្ធអ្វីជាមួយនឹងបញ្ហាសេដ្ឋកិច្ចនាពេលបច្ចុប្បន្ននេះរបស់ប្រទេសហ្ស៊ីមបាវ៉េនោះទេ។
លោកបញ្ជាក់ដូច្នេះថា៖ «ប្រសិនបើអ្នកបែងចែកទណ្ឌកម្មនេះជាផ្នែកៗ នោះយើងឃើញថា ប្រទេសមួយចំនួនដែលមានវិធានការតឹងតែងគឺជាអ្នកគាំទ្រខ្លាំងក្លាលើប្រទេសហ្ស៊ីមបាវ៉េ នេះបើយើងនិយាយផ្អែកលើទស្សនៈអភិវឌ្ឍមនុស្សធម៌។ ដូច្នេះ ប្រទេសទាំងនោះខ្វល់ខ្វាយអំពីប្រទេសហ្ស៊ីមបាវ៉េ។ ជាការពិត ការគិតដែលយល់ថានេះជាការដាក់ទណ្ឌកម្មអាចធ្វើឲ្យយល់ច្រឡំចំពោះផលប្រយោជន៍មួយចំនួនទាក់ទិននឹងសក្ដានុពល ប៉ុន្តែខ្ញុំបានឃើញថា ប្រទេសទាំងនោះមានចំណាប់អារម្មណ៍ខ្លាំងលើការវិនិយោគក្នុងប្រទេសហ្ស៊ីមបាវ៉េ។ ការដាក់ទណ្ឌកម្មនេះមិនបានដាក់កំហិតចំពោះការវិនិយោគរបស់ប្រទេសទាំងនោះឡើយ។ ប៉ុន្តែ ខ្ញុំគិតថា ការប្រឈមចម្បងបំផុតគឺគោលនយោបាយមិនត្រឹមត្រូវ»។
អ្នកការទូតអង្គការសហប្រជាជាតិរូបនេះបានជំរុញរដ្ឋាភិបាលហ្ស៊ីមបាវ៉េឲ្យកែប្រែច្បាប់ដែលគាំទ្រអ្នកវិនិយោគ និងឲ្យបន្តទាក់ទងជាមួយនឹងប្រទេសដែលដាក់ទណ្ឌកម្មលើមន្ត្រីជាន់ខ្ពស់រដ្ឋាភិបាល និងក្រុមហ៊ុនរបស់រដ្ឋមួយចំនួននៅក្នុងឆ្នាំ ២០០២។
លោក Parajuli នឹងផ្លាស់ទៅកាន់ប្រទេសឥណ្ឌាដើម្បីដឹកនាំកម្មវិធីស្បៀងអាហារពិភពលោករបស់អង្គការសហប្រជាជាតិ បន្ទាប់ពីបានធ្វើការនៅក្នុងប្រទេសហ្ស៊ីមបាវ៉េក្នុងនាមជាអ្នកសម្របសម្រួលប្រព័ន្ធអង្គការសហប្រជាជាតិអស់រយៈពេល ៥ ឆ្នាំមក៕
ប្រែសម្រួលដោយ ភី សុភាដា
