ក្រុមឧត្ដមសេនីយ៍ដែលកំពុងច្បាំងគ្នានៃប្រទេសស៊ូដង់បានយល់ព្រមបញ្ជូនអ្នកតំណាងដើម្បីធ្វើការចរចានៅក្នុងប្រទេសអារ៉ាប៊ីសាអូឌីត។ នេះបើតាមមន្ត្រីកំពូលម្នាក់របស់អង្គការសហប្រជាជាតិនៅក្នុងប្រទេសនោះបានប្រាប់ទីភ្នាក់ងារសារព័ត៌មាន Associated Press នៅថ្ងៃចន្ទនេះ ខណៈភាគីទាំង២នៅតែប៉ះទង្គិចគ្នានៅក្នុងរដ្ឋធានី ថ្វីបើមានការបន្តការឈប់បាញ់គ្នាដ៏ប្រេះស្រួយរយៈពេល៣ថ្ងៃក៏ដោយ។
ការចរចាមុនដំបូងនឹងផ្តោតលើការបង្កើតបទឈប់បាញ់គ្នា«ប្រកបដោយស្ថិរភាពនិងទុកចិត្តបាន»ដែលត្រូវឃ្លាំមើលដោយ«ពួកអ្នកសង្កេតការណ៍ជាតិនិងអន្តរជាតិ»។ នេះបើតាមលោក Volker Perthes។ ការឈប់បាញ់គ្នាបណ្តោះអាសន្នជាបន្តបន្ទាប់មួយក្នុងរយៈពេលមួយសប្តាហ៍កន្លងមកនេះបានកាត់បន្ថយការប្រយុទ្ធនៅក្នុងតំបន់ខ្លះតែប៉ុណ្ណោះ ខណៈដែលតំបន់ផ្សេងទៀត ការប្រយុទ្ធយ៉ាងសាហាវបានបន្តដែលបានបណ្តេញជនស៊ីវិលចេញពីផ្ទះសម្បែងរបស់ខ្លួនហើយបានរុញច្រានប្រទេសនេះឱ្យធ្លាក់ចូលក្នុងវិបត្តិមនុស្សធម៌។
លោកPerthes បានព្រមានថា ផែនការសម្រាប់ការចរចានៅកំពុងធ្វើនៅឡើយ។ រហូតមកទល់ពេលនេះ មានតែពួកយោធាតែមួយគត់បានប្រកាសថាខ្លួនបានប្រុងប្រៀបដើម្បីចូលរួមការចរចានេះ ដោយគ្មានព័ត៌មានមកពីគូប្រឆាំងរបស់ពួកគេគឺកងកម្លាំងគាំទ្ររហ័សឬ Rapid Support Forces។ ការចរចាណាក៏ដោយនឹងក្លាយជាសញ្ញានៃការជឿនលឿនដ៏សំខាន់មួយចាប់តាំងពីការប្រយុទ្ធបានផ្ទុះឡើងនៅថ្ងៃទី១៥ ខែមេសារវាងកងទ័ពដែលដឹកនាំដោយឧត្តមសេនីយ៍ Mohammed Hamdan Dagalo។ មនុស្សប្រហែល៥៣០ នាក់ រួមទាំងជនស៊ីវិលនិងពួកអ្នកប្រយុទ្ធបានត្រូវសម្លាប់ចាប់តាំងពីនោះមកហើយជនស៊ីវិល ៤ពាន់៥រយនាក់បានរងរបួស។ នេះបើតាមក្រសួងសុខាភិបាលរបស់ស៊ូដង់។
ក្នុងខណៈនោះដែរ សហរដ្ឋអាមេរិកបានជម្លៀសជនស៊ីវិលអាមេរិកាំងលើកទី១របស់ខ្លួនចេញពីប្រទេសស៊ូដង់។ ដោយមានការតាមមើលពីយន្តហោះគ្មានមនុស្សបើកដ្រូនរបស់យោធាសហរដ្ឋអាមេរិក ពលរដ្ឋអាមេរិកាំងមួយក្រុមបានធ្វើដំណើរប្រកបដោយគ្រោះថ្នាក់តាមផ្លូវពីរដ្ឋធានីខាទុំ ទៅកាន់ទីក្រុងកំពង់ផែស៊ូដង់នៃសមុទ្រក្រហម។ នៅថ្ងៃចន្ទនេះ នាវាដឹកជញ្ជូនរហ័សរបស់កងនាវាសហរដ្ឋអាមេរិកបានដឹកមនុស្ស៣០៨នាក់ពីកំពង់ផែស៊ូដង់ទៅកាន់កំពង់ផែ Jeddah នៃប្រទេសអារ៉ាប៊ីសាអូឌីត។ នេះបើតាមពួកមន្ត្រីអារ៉ាប៊ីសាអូឌីត។
ស្នូផ្ទុះនិងការបាញ់កាំភ្លើងបានត្រូវគេឮនៅក្នុងផ្នែកនានានៃរដ្ឋធានីខាទុំហើយនឹងទីក្រុង Omdurman នៅក្បែរនោះនៅថ្ងៃចន្ទនេះ។ នេះបើតាមពួកអ្នកស្រុក។ ភាគីទាំង២បានប្រកាសកាលពីយប់ថ្ងៃអាទិត្យថា ពួកគេនឹងគោរពការបន្តការឈប់បាញ់គ្នារយៈពេល៧២ម៉ោងកាលពីសប្តាហ៍មុន។ សហរដ្ឋអាមេរិកនិងប្រទេសអារ៉ាប៊ីសាអូឌីតបានដឹកនាំយុទ្ធនាការអន្តរជាតិដើម្បីធ្វើឱ្យឧត្ដមសេនីយ៍ឈប់ប្រយុទ្ធគ្នា បន្ទាប់មកចូលរួមនៅក្នុងការចរចាដើម្បីដោះស្រាយវិបត្តិនេះ។
ថ្លែងមកពីកំពង់ផែស៊ូដង់ បេសកជនរបស់អង្គការសហប្រជាជាតិលោក Perthes បាននិយាយថាពួកគេនៅប្រឈមបញ្ហាលំបាកៗដើម្បីធ្វើឱ្យភាគីទាំង២គោរពបទឈប់បាញ់គ្នា៕
ក្រុងគែរ ប្រទេសអេហ្ស៊ីប —
