កងយន្តហោះប្រតិកម្មប្រយុទ្ធបានវាយប្រហារលើទីតាំងកងទាហានប៉ារ៉ាក្នុងក្រុងខាទុំកាលពីថ្ងៃព្រហស្បតិ៍ នៅពេលមានការប្រយុទ្ធគ្នានិងការលួចឥវ៉ាន់ក្នុងតំបន់ Darfur ទោះជាកងទ័ពនិងកងកម្លាំងបដិបក្ខបានយល់ព្រមពន្យារពេលកិច្ចព្រមព្រៀងឈប់បាញ់គ្នាក៏ដោយ។
នៅម៉ោងចុងក្រោយនៃបទឈប់បាញ់គ្នាបីថ្ងៃដែលផុតកំណត់នៅពាក់កណ្តាលអធ្រាត្រ កងទ័ពនិងកងកម្លាំងគាំទ្ររហ័ស RSF បានប្រកាសការពន្យារពេលឈប់បាញ់គ្នា៧២ម៉ោងទៀតដោយសារមានសម្ពាធពីប្រទេសអារ៉ាប៊ីសាអ៊ូឌីតនិងស.រ.អ.។
មានការប្រឹងប្រែងច្រើនដងដើម្បីធ្វើឱ្យមានការព្រមព្រៀងឈប់បាញ់គ្នាចាប់តាំងពីមានការប្រយុទ្ធគ្នាកាលពីថ្ងៃទី១៥ ខែមេសារវាងកងទ័ពប្រទេសស៊ូដង់ដឹកនាំដោយលោកនាយឧត្តមសេនីយ៍ Abdel Fattah al-Burhan និងកងទាហានប៉ារ៉ា RSF ដឹកនាំដោយអនុប្រធានរបស់លោកដែលក្លាយជាគូបដិបក្ខ គឺលោក Mohamed Hamdan Daglo។ ការប្រឹងប្រែងទាំងនេះគ្មានជោគជ័យទេ។
អ្នកតំណាងបរទេសដែលទាក់ទិននឹងការបញ្ឈប់ការប្រយុទ្ធគ្នាបានស្វាគមន៍ការពន្យារពេលការឈប់បាញ់គ្នាហើយសុំឱ្យមានការអនុវត្តកិច្ចព្រមព្រៀងនេះឱ្យបានពេញលេញ។
នៅក្នុងសេចក្តីថ្លែងការណ៍រួមមួយសហភាពអាហ្វ្រិក អ.ស.ប. ប្រទេសអារ៉ាប៊ីសាអ៊ូឌីត ប្រទេសអេមីរ៉ាតអារ៉ាប់រួម ចក្រភពអង់គ្លេសនិងស.រ.អ.បានអបអរសាទរ«ការប្រុងប្រៀបរបស់ភាគីទាំងពីរក្នុងការសន្ទនាគ្នាដើម្បីធ្វើឱ្យមានការបញ្ឈប់អរិភាពឱ្យបានយូរជាងមុននិងធ្វើឱ្យប្រាកដថាមានជំនួយមនុស្សធម៌គ្មានបង្អាក់»។
ប្រទេសទាំងនេះនិយាយថាការធ្វើដូច្នេះអាចនាំឱ្យមានការបន្ថយភាពតានតឹងត្រូវតាមផែនការសន្តិភាពកាលពីថ្ងៃទី២០ ខែមេសា។
រដ្ឋមន្ត្រីការបរទេសស.រ.អ.លោក Antony Blinken បានសរសេរតាម Twitter ថា៖
«យើងស្វាគមន៍សេចក្តីប្រកាសរបស់កងយោធពលស៊ូដង់និងកងកម្លាំងគាំទ្ររហ័សដើម្បីពន្យារពេលការឈប់បាញ់គ្នាបន្ថែម៧២ម៉ោងទៀតក្នុងប្រទេសស៊ូដង់»៕
