ភ្ជាប់​ទៅ​គេហទំព័រ​ទាក់ទង

អគ្គលេខាធិការ​រង​អ.ស.ប.​គ្រោង​បំពេញ​ទស្សនកិច្ច​នៅ​​កម្ពុជា​ពិភាក្សា​អំពី​សាលាក្តី​ខ្មែរក្រហម

  • សុខ ខេមរា

លោក Miguel de Serpa Soares នៃ​ប្រទេស​ព័រទុយហ្គាល់ ចាប់​ដៃ​ជាមួយ​លោក​អគ្គលេខាធិការ បាន គីមូន នៅ​ពេល​លោក​ត្រូវ​ស្បថ​ចូល​កាន់​តំណែង​ជា​អគ្គលេខាធិការ​រង​អ.ស.ប.​នៅ​ទីស្ថាក់ការ​ឯ​ទីក្រុង​ញូវយ៉ក​សហរដ្ឋ​អាមេរិក​កាល​ពី​ថ្ងៃ​ទី​១៧ ខែ​កញ្ញា ឆ្នាំ​២០១៣។
អគ្គលេខាធិការ​រង​អ.ស.ប.​គ្រោង​នឹង​បំពេញ​ទស្សន​កិច្ច​ក្នុង​ប្រទេស​កម្ពុជា​ដើម្បី ពិភាក្សា​អំពី​ដំណើរការ​សាលាក្តី​កាត់ទោស​ខ្មែរក្រហម​ជាមួយ​នឹង​មន្ត្រី​រដ្ឋាភិបាល​នៅចុង​ខែ​មករា​នេះ។​ ក្រុម​មន្ត្រី​ជាន់ខ្ពស់​អ.ស.ប.​នឹង​ជួប​ជាមួយ​ក្រុម​មន្ត្រី​រដ្ឋាភិបាល​កម្ពុជា ​និង​មន្ត្រី​សាលាក្តី​អំពី​បញ្ហា​ថវិកា ​និង​ដំណើរការ​នានា​ទៅ​ថ្ងៃ​អនាគត។

គណៈ​ប្រតិភូ​ជាន់ខ្ពស់​របស់​អ.ស.ប.​ដឹកនាំ​ដោយ​លោក​មីហ្គែល ​ឌឺ​សឺប៉ា ​ស័ររ៉េស ​(Miguel de ​Serpa Soares) ​អគ្គ​លេខាធិការ​រង​អ.ស.ប.​ទទួល​បន្ទុក​ផ្នែក​ច្បាប់ ​គ្រោង​នឹង​បំពេញ​ទស្សន​កិច្ច​បី​ថ្ងៃ​ក្នុង​ប្រទេស​កម្ពុជា​ដើម្បី​ជួប​ជាមួយ​មន្ត្រី​ រដ្ឋាភិបាល​និង​មន្ត្រី​សាលាក្តី​ខ្មែរ​ក្រហម​ដើម្បី​ពិភាក្សា​អំពី​បញ្ហា​ជា​ច្រើន​រួម​ទាំង​ បញ្ហា​ថវិកា​ផង​ដែរ។​ នេះ​បើ​តាម​ការ​អះអាង​របស់​លោក​ស្រី អ៊ារី កានិកូ​ (Eri Kaneko)​ អ្នក​នាំពាក្យ​រង​របស់​អ.ស.ប.​ក្នុង​ទីក្រុង​ញូវយ៉ក​ ដែល​បាន​ថ្លែង​ប្រាប់​វីអូអេ​ផ្នែក​ខេមរភាសា​សប្តាហ៍​នេះ។​

«គោល​បំណង​នៃ​បេសកកម្ម​នេះ​គឺ​ដើម្បី​ពិភាក្សា​បញ្ហា​ទាំងឡាយ​ទាក់ទង​ទៅ នឹង​បញ្ហា​ថវិកា​ និង​កិច្ចការ​របស់​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា ​ជា​មួយ​នឹងក្រុម​មន្ត្រី​ជាន់ខ្ពស់​រាជ​រដ្ឋាភិបាល​កម្ពុជា​ហើយ​នឹង​ជួប​ជាមួយ​ក្រុម​មន្ត្រី សាលាក្តី​ខ្មែរក្រហម ​ECCC»។​

ទស្សន​កិច្ច​នេះ​នឹង​ចាប់ផ្តើម​ពីថ្ងៃ​ទី​២៧​ដល់​ថ្ងៃ​ទី២៩​ខែ​មករា​ឆ្នាំ​២០១៤​ ដែល​អម​ដំណើរ​ដោយ​លោកស្រី​ជីណា កាសា​ (Ms. Gina Casar)​ នាយក​គ្រប់​គ្រង​ផ្នែក​ស្ថាប័ន​គ្រប់គ្រង​គម្រោង និង​ហិរញ្ញវិត្ថុ​របស់​អ.ស.ប.​ ហើយ​នឹង​លោក​ឯក​អគ្គរដ្ឋ ទូត​ដេវី ស្សេហ្វ័រ​ ( Ambassador ​David ​Scheffer) ​អ្នក​ជំនាញ​ការ​ពិសេស​របស់ អ.ស.ប.​ទទួល​បន្ទុក​សាលាក្តី​ខ្មែរក្រហម​ផង​ដែរ។​

ក្រុម​មន្ត្រី​សាលាក្តី​ខ្មែរក្រហម​និង​មន្ត្រី​រដ្ឋាភិបាល​ពុំបាន​បញ្ជាក់​លម្អិតអំពី​ទស្សន កិច្ចនេះ​ទេ ​ថាតើ​ត្រូវ​ជួប​ជាមួយ​មន្ត្រី​រដ្ឋាភិបាល​ណា​ខ្លះ​ ថ្ងៃណា ​ប៉ុន្មាន​នាក់​ តែអះ អាង​ថា​ នឹង​បញ្ជាក់​ព័ត៌មាន​បន្ថែម​នៅ​ប៉ុន្មាន​ថ្ងៃខាង​មុខ​ទៀត។​

តែ​លោក​ស្រី ​អ៊ារី កានិកូ​បាន​អះអាង​បន្ថែម​ថា​ ទស្សនកិច្ច​របស់​លោក​មីហ្គែល ឌឺ សឺប៉ា​ ស័ររ៉េស​កើតចេញ​ពី​កិច្ចព្រម​ព្រៀង​របស់​លោក​អគ្គលេខា​ធិការ​អ.ស.ប.​ បាន ​គីម៊ូន​ និង​លោក​នាយករដ្ឋ​មន្ត្រី​ហ៊ុន សែន​ កាលពី​ឆ្នាំទៅ ​ក្នុង​ពេល​កិច្ច​ប្រជុំ​កំពូល​អាស៊ាន​នៅ​ប្រទេស​ប្រ៊ុយណេ​ ដែល​ភាគី​ទាំងពីរ​បាន​ព្រម​ព្រៀង​គ្នា​ថា​ នឹង​ពិភាក្សា​បន្ត​អំពី​សាលាក្តី​នេះ។​

សាលាក្តី​កាត់ទោស​ខ្មែរក្រហម​មាន​បញ្ហា​ជា​ច្រើន​ដូចជា​បញ្ហា​ខ្វះ​ខាត​ថវិកា​យ៉ាងខ្លាំង​ ជា​ច្រើន​លើក​ដែល​មាន​បាតុកម្ម ​ពហិកា​មិន​ចូល​ធ្វើការ​របស់​បុគ្គលិក​កម្ពុជា​ដោយ​សារ​ថា​ គ្មាន​ថវិកា​ពីម្ចាស់​ជំនួយ​ដើម្បី​បើក​ប្រាក់ខែ ​មាន​បញ្ហា​ចោទ​ប្រកាន់​អំពី​ការ​ជ្រៀតជ្រែក​ផ្នែក​នយោបាយ​ ហើយនឹង​ប្រព័ន្ធ​តុលាការ​កូន​កាត់​ស្មុគស្មាញ​គឺ​តាម​ប្រព័ន្ធ​សំឡេងភាគច្រើន​ដាច់​ខាត​នេះ​ ដែល​បាន​អូស​បន្លាយ​ពេល​វេលា​ច្រើន​ក្នុង​ការ​ស្វះ​ស្វែងរក​យុត្តិធម៌។ សាលាក្តី​នេះ​នៅ​មិន​ច្បាស់​ថា ​នឹង​កាត់​ទោស​សំណុំ​រឿង​០០២​ វគ្គទី២​ ដែល​ជា​សំណុំ​រឿងសំខាន់​នៅ​ពេល​ណា​ ហើយ​សំណុំ​រឿង​ចម្រូង​ចម្រាស់​០០៣​ និង​០០៤​ទៀត​សោត​ស្ថិត​នៅ​ស្រពិច​ស្រពិល​នៅ​ឡើយ។​

​ក្រុម​មន្ត្រី​ឃ្លាំមើល​សាលាក្តី​ខ្មែរក្រហម​ ដូចជា​លោក​ឡុង បញ្ញាវុធ ​មន្ត្រី​គម្រោង ​ផ្តួច​ផ្តើម​យុត្តិធម៌​នៅ​កម្ពុជា​ បាន​អះអាង​ថា​ លោក​បាន​ដឹង​អំពី​ដំណឹង​នៃ​ទស្សន កិច្ច​របស់​លោក​ហ្គែល ឌឺ សឺប៉ា ​ស័ររ៉េស​ដែរ។​ លោក​ជំរុញ​ឲ្យ​អ.ស.ប.​និង​កម្ពុជា​ ព្រមព្រៀង​គ្នា​ធានា​ថា​ ថវិកា​សម្រាប់​សាលាក្តី​មិន​ត្រូវ​ខ្វះខាត​ត​ទៅ​ទៀត​ ហើយ អាច​បំពេញ​កិច្ច​ការងារ​ចប់ចុង​ចប់ដើម​ផង​ និង​ទទូចឲ្យ​មាន​កិច្ច​សហការ​គ្នា​ក្នុង​ ការ​ធ្វើឲ្យ​សំណុំ​រឿង​បន្ថែម​០០៣​ និង​០០៤​ដែល​ជាប់គាំង​នោះ​ អាច​ដំណើរការ​ បាន​ចប់​ផង​ដែរ។​

«យើងចង់​ឲ្យ​មាន​ការ​មូលមាត់គ្នា​អំពី​ការ​សហការ​របស់​រដ្ឋាភិបាល​និង​អ.ស.ប.​ដែល​ធ្វើ​យ៉ាង​ណា​ជំរុញឲ្យ​សាលាក្តី​នេះ​ដំណើរ​ការ​ទៅ​បាន​ ដោយ​ចប់ចុង​ចប់​ដើម​ក្នុងការ​ផ្តល់​យុត្តិធម៌​មួយ​ដល់​ជន​រងគ្រោះ»។​

លោក​បាន​ស្វាគមន៍​ដល់​រដ្ឋាភិបាល​កម្ពុជា ​ដែល​បាន​ផ្តល់​ជំនួយ​បន្ថែម​នូវទឹក​ ប្រាក់​៣​លាន​៤​សែន​ដុល្លារ​ដល់​សាលាក្តី​សម្រាប់​ឆ្នាំ​២០១៤​ដល់​ឆ្នាំ​២០១៥។ ​ហើយ​លោកបាន​ទទូចឲ្យ​សហគមន៍​អន្តរជាតិ​ផ្តល់​ថវិកា​បន្ថែម​ដល់​សាលាក្តី​នេះ​ផង​ដែរ។​

លោក​ឡាត់ គី​អ្នក​ឃ្លាំមើល​សាលាក្តី​មួយ​រូប​ផ្សេង​ទៀត​នៃ​អង្គការ​សិទ្ធិ​មនុស្ស​អាដហុក ​បាន​ចែក​រំលែក​ក្តី​បារម្ភ​ស្រដៀង​គ្នា​នឹង​លោក​ឡុង បញ្ញាវុធ​ដែរ។​ ​តែ លោក​សង្កត់​ធ្ងន់​ថា ​ជន​រងគ្រោះ​ជាដើម​បណ្តឹង​មួយ​ចំនួន​ហាក់ដូច​ជា​អស់​ទឹកចិត្ត​ក្នុង​ការ​សហការ​រឿង​សាលាក្តី​ខ្មែរក្រហម​ដែល​មាន​ដំណើរការ​យឺតយ៉ាវ​ និង​ខ្វះ ថវិកា​នេះ។​ មួយវិញ​ទៀត​លោក​ថ្លែង​ថា​ ការ​ផ្សព្វផ្សាយ​អំពី​កេរ​តំណែល​វិជ្ជមាន​ សាលាក្តី​ខ្លះ​កន្លង​មក មិនដឹង​ជា​ខុស​ ឬត្រូវ​យ៉ាងណា​ នៅ​ពេល​ដែល​សាលាក្តី​នេះ​មាន​បញ្ហា​ជាប់ជា​ប្រចាំ​ផង​និង​មិន​ដឹង​ចប់​ឆាប់​ ឬ​យូរ​ប៉ុណ្ណា​ និង​បាន​លទ្ធផល​ចុង​ក្រោយ​យ៉ាងណា​នោះ។​

«អញ្ចឹង​ហើយ​បាន​ជា​ការងារ​ទាំងអស់​នេះ​ជា​ការងារ​មួយ​នៅ​ស្រពិច​ស្រពិល។​ អញ្ចឹង​បើសិន​ណា​មាន​អ្នក​ជំនាញ​ការ​ពី​អ.ស.ប.​មក​ យើង​រីករាយ​នៅ​ក្នុង​ការ​ជួប​ពិភាក្សា​ដើម្បី​ស្វែង​យល់​អំពី​បញ្ហា​កិច្ចការ​ទាំង​អស់​នេះ​ ថា​តើ​ដំណើរ​ការ​ឆ្ពោះ​ទៅ មុខ​យ៉ាង​ដូចម្តេច​ទៀតបាទ»។​

សាលាក្តី​ខ្មែរក្រហម​ ដែលចាប់​ផ្តើម​កាល​ពីឆ្នាំ​២០០៦​ បាន​ចំណាយ​ទឹកប្រាក់​ជាង​២០០​លាន​ដុល្លារ​ស.រ.អា.​ ហើយ​កាត់​ទោស​បាន​តែ​ជន​ជាប់​ចោទ​ម្នាក់​ប៉ុណ្ណោះ​គឺ​លោក​កាំង ហ្កេចអ៊ាវ ​ហៅឌុច​ ប្រធាន​គុកទួល​ស្លែង​ ឬ​ស ២១​។​ សំណុំ​រឿង​០០២​ដែល​ពាក់​ព័ន្ធ​នឹង​បទ​ឧក្រិដ្ឋកម្ម​សំខាន់ៗ​ ទាក់ទង​នឹងការ​កាប់​សម្លាប់​រង្គាល​ពលរដ្ឋ​ខ្មែរ​ជាង​១​លាន​៧​សែន​នាក់​ក្នុង​ទសវត្សរ៍​១៩៧០​នោះ​ មិនទាន់​កំណត់​ជាក់លាក់​ ថា​ត្រូវ​កាត់ទោស​ពេលណា​លើ​វិសាលភាព​នៃ​ឧក្រិដ្ឋកម្ម​អ្វីខ្លះ​នោះ​ទេ។​ ជនជាប់​ចោទ​ទាំង​ពីរ​ជា​អតីត​មេដឹកនាំ​ខ្មែរក្រហម​កំពូល​គឺ​នួន ជា ​និង ខៀវ សំផន​ ដែល​មាន​វ័យ​ជាង​៨០​ឆ្នាំ ​កំពុង​រង់​ចាំ​ការ​កាត់​ទោស។ ​ដោយឡែក​ជន​ជាប់​ចោទ​អៀង សារី ​អតីត​រដ្ឋមន្ត្រី​ការ​បរទេស​ខ្មែរក្រហម​នោះ​ បាន​ស្លាប់​មុន​ការ​កាត់​ទោស ​ដូច​ជន​សង្ស័យ​ដ​ទៃ​ទៀត​ដែរ។ ​

ក្រុម​អ្នក​ឃ្លាំ​មើល​សាលាក្តី​បាន​ទទូច​ដែរ​ថា​ ទស្សន​កិច្ច​របស់​គណៈ​ប្រតិភូ​ជាន់ ខ្ពស់​អ.ស.ប.​លើក​នេះ​គួរត្រូវ​កំណត់​ផង​ដែរ​នូវ​យុទ្ធសាស្ត្រ​បញ្ចប់​តុលាការ​ ក្រៅពី​ការ​ធានា​ថវិកា​ និង​ដំណើរការ​កាត់​ទោស​ចប់​ចុង​ចប់​ដើម​នោះ៕
XS
SM
MD
LG