ភ្ជាប់​ទៅ​គេហទំព័រ​ទាក់ទង

អង្គការ​សហប្រជាជាតិ​ថ្កោល​ទោស​ការ​បង្ក្រាប​របស់​រដ្ឋាភិបាល​វៀតណាម​លើ​អ្នក​ការពារ​សិទ្ធិមនុស្ស

  • Lisa Schlein

រូបឯកសារ៖ អ្នក​ស្រី Tran Thi Nga (ស្តាំ) កាន់​ដៃ​កូន​របស់​នាង​ និង​សេចក្តីប្រកាស​​ប្រឆាំង​ចិន នៅ​ពេល​នាង​ចូល​រួម​ក្នុង​ការ​ជួប​ជុំ​គ្នា​មួយ​នៅ​ក្រុង​ហាណូយ កាល​ពី​ឆ្នាំ​២០១២។

មន្ត្រី​អង្គការ​សហប្រជាជាតិ​បាន​ថ្កោល​ទោស​ការ​បង្ក្រាប​ឥត​ឈប់​ឈរ​របស់​រដ្ឋាភិបាល​វៀតណាម​ទៅ​លើ​អ្នក​ការ​ពារ​សិទ្ធិ​មនុស្ស និង​អំពាវ​នាវ​ឲ្យ​មាន​ការ​ដោះ​លែង​ជា​បន្ទាន់​នូវ​អ្នក​ដែល​ជាប់​ពន្ធនាគារ​ទាំង​ឡាយ​ណា​ដែលបានអនុវត្ត​សិទ្ធិ​របស់​ពួក​គេ​ដើម្បី​សេរីភាព​ក្នុង​ការ​បញ្ចេញ​មតិ។

ការិយាល័យ​ឧត្ដម​ស្នង​ការ​សហប្រជាជាតិ​ទទួល​បន្ទុក​សិទ្ធិ​មនុស្ស​បាន​សម្ដែង​ការ​ព្រួយ​បារម្ភ​ចំពោះ​ការ​បង្កើន​យុទ្ធនាការ​បង្ក្រាប​របស់​វៀតណាម​ទៅ​លើ​អ្នក​ដែល​ចោទ​សួរ ឬ​រិះគន់​ទៅ​លើ​គោល​នយោបាយ​របស់​រដ្ឋាភិបាល។ ការិយាល័យ​អង្គការ​សហ​ប្រជាជាតិ​នេះ​ថ្កោល​ទោស​ដល់​ការ​កាត់​ទោស​ធ្ងន់ធ្ងរ​ចំពោះ​អ្នក​ប្រឆាំង​ក្រោយ​ពេល​មាន​ការ​កាត់​ក្ដី​មួយ ដែល​ធ្វើ​បង្គ្រប់​កិច្ច។​

ចំពោះ​ឧបទ្ទវហេតុ​ថ្មីៗ​នេះ ​អង្គការ​សហប្រជាជាតិ​បាន​រាយការណ៍​កាល​ពី​ថ្ងៃ​អង្គារ​ថា សកម្មជន​ល្បី​ឈ្មោះ​មួយរូប គឺ​អ្នកស្រី ​Tran Thi Nga ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ ៩​ ឆ្នាំ និង​ជាប់​ឃុំ​ក្នុង​គេហដ្ឋាន​ ៥ ​ឆ្នាំ ពី​បទ​ផ្សព្វ​ផ្សាយ​នូវ​អ្វី​ដែល​គេ​ហៅ​ថាការ​ឃោសនា​ប្រឆាំង​នឹង​រដ្ឋ​អំណាច។

អ្នក​នាំ​ពាក្យ​ប្រចាំ​ការិយាល័យ​ឧត្ដម​ស្នង​ការ​សហប្រជាជាតិ​ទទួល​បន្ទុក​សិទ្ធិ​មនុស្ស​ អ្នកស្រី ​Liz Throssel ​បាន​ឲ្យ​ដឹង​ថា ការ​កាត់​ទោស​ទៅ​លើ​អ្នកស្រី ​Tran Thi Nga​ ត្រូវ​បាន​គេ​ធ្វើ​ឡើង​ក្នុង​រយៈ​ពេល​មិន​ដល់​មួយ​ខែ​ផង បន្ទាប់​ពីអ្នក​សរសេរ​ប្លុក​ដ៏​លេច​ធ្លោ​ម្នាក់​ដែល​គេ​ស្គាល់​ថា ​មាតា​ផ្សិត​ ត្រូវ​បាន​គេ​ចាប់​ដាក់​ពន្ធនាគារ​រយៈ​ពេល​ ១០ ឆ្នាំ។ អ្នកស្រី​និយាយ​ថា អ្នក​សរសេរ​ប្លុក​ទាំង​ពីរ​នាក់​ត្រូវ​បាន​គេ​កាត់​ទោស​ក្នុង​ដំណើរ​ការកាត់​ក្ដី​ដែល​មិន​មាន​ភាព​ត្រឹមត្រូវ។​

អ្នកស្រី​ Throssell ​បាន​និយាយ​ថា៖ «ជាង​ ៦ ខែ​មក​នេះ ​យ៉ាង​ហោច​ណាស់មាន​សកម្ម​ជន​ការ​ពារ​សិទ្ធិ​មនុស្ស​ ៧ នាក់​ត្រូវ​បាន​គេ​ចាប់​ខ្លួន និង​ប្រឈម​មុខ​នឹង​ការ​កាត់ទោស ហើយ​រាប់​សិប​នាក់​ទៀតកំពុង​ត្រូវ​បាន​គេ​ឃុំ​ខ្លួន មិនតែប៉ុណ្ណោះ សកម្ម​ជន​ពីរ​នាក់​ទៀតត្រូវ​បាន​គេ​និរទេស​ខ្លួន ឬ​បណ្ដេញ​ចេញ​ឲ្យ​ទៅ​រស់​នៅបរទេស។ សកម្មជន​ជា​ច្រើន​នាក់​ទៀត​ត្រូវ​បាន​គេ​បំភិត​បំភ័យ រំខាន និង​វាយ​ដំ​យ៉ាង​សាហាវ​ឃោឃៅ។ សកម្ម​ជន​ការ​ពារ​សិទ្ធិ​មនុស្ស​មិន​គួរ​ត្រូវ​បាន​គេ​ចាត់​ទុក​ជា​ឧក្រិដ្ឋជន​ ដែល​គំរាម​កំហែង​ដល់​សន្តិសុខ​ជាតិ​នោះ​ទេ»។​

អ្នកស្រី Throssell ​ប្រាប់ VOA ថា ឧត្ដម​ស្នង​ការ​សហ​ប្រជាជាតិ​ទទួល​បន្ទុក​សិទ្ធិ​មនុស្ស និង​ក្រុម​អង្គការ​សិទ្ធិ​មនុស្ស​អន្តរ​ជាតិ​នានា បដិសេធ​ចោល​ទាំង​អស់​គ្នា​នូវ​មាត្រា ៨៨ នៃ​ក្រម​ព្រហ្មទណ្ឌ​របស់​វៀតណាម ដែលជា​ក្រម​ព្រហ្ម​ទណ្ឌ​ ដែល​កាត់​ទោស​សកម្មជន​ការ​ពារ​សិទ្ធិ​មនុស្ស​ទាំង​អស់​នោះ។​

អ្នក​ស្រី Throssell បន្ថែមថា៖ «ពួក​គេ​គ្រប់​គ្នា​ចាត់​ទុក​ បទបញ្ញត្តិ​ទាំងអស់​នេះ​ថា​មិន​ច្បាស់​លាស់ និង​រំលោភ​បំពានលើ​ច្បាប់​សិទ្ធិ​មនុស្ស​អន្តរជាតិ ​ ដែល​បាន​ចាត់ទុក​ការ​អនុវត្ត​សិទ្ធិ​ជា​មូលដ្ឋាន ដូច​ជា​សេរីភាព​ក្នុង​ការ​បញ្ចេញ​មតិ ទៅ​នឹងបទ​ឧក្រិដ្ឋកម្ម»។

អ្នកស្រី Throssell និយាយ​ថា​ លោក​ឧត្ដម​ស្នង​ការ​ បាន​សម្ដែង​ការ​ព្រួយ​បារម្ភ​ទៅ​កាន់​អាជ្ញាធរ​វៀតណាម ប៉ុន្តែ​មិន​ទទួល​បាន​ការ​ឆ្លើយ​តប​អ្វី​ឡើយ៕

ប្រែ​សម្រួល​ដោយ សឿន វឌ្ឍនា

XS
SM
MD
LG